Yuk avtotransport vositalarini “Qamchiq” dovonidan oʻtishi va harakatlanishi ustidan nazorat qilish tartibi toʻgʻrisidagi nizomga oʻzgartirishlar kiritish haqida (2391-1-son)

09.07.2018

Oʻzbekiston Respublikasi Ichki ishlar vazirligi Oʻzbekiston avtomobil transporti agentligining

Qarori

[Oʻzbekiston Respublikasi Adliya vazirligi tomonidan 2018-yil 9-iyulda roʻyxatdan oʻtkazildi, roʻyxat raqami 2391-1]

Oʻzbekiston Respublikasi Vazirlar Mahkamasining 2018-yil 6-apreldagi 268-son “Qamchiq” dovoni orqali avtomobil transportida yuk tashishni yanada tartibga solish chora-tadbirlari toʻgʻrisida”gi qaroriga (Qonun hujjatlari maʼlumotlari milliy bazasi, 06.04.2018-y., 09/18/268/1042-son) muvofiq, Oʻzbekiston Respublikasi Ichki ishlar vazirligi va Oʻzbekiston avtomobil transporti agentligi qaror qiladi:

1. Oʻzbekiston Respublikasi Ichki ishlar vazirligi va Oʻzbekiston avtomobil va daryo transporti agentligining 2012-yil 3-avgustdagi 28, 5-son qarori (roʻyxat raqami 2391, 2012-yil 21-sentabr) (Oʻzbekiston Respublikasi qonun hujjatlari toʻplami, 2012-y., 38-son, 443-modda) bilan tasdiqlangan Yuk avtotransport vositalarining “Qamchiq” dovonidan oʻtishi va harakatlanishi ustidan nazorat qilish tartibi toʻgʻrisidagi nizomga ilovaga muvofiq oʻzgartirishlar kiritilsin.

2. Mazkur qaror rasmiy eʼlon qilingan kundan eʼtiboran kuchga kiradi.

Ichki ishlar vaziri P. BOBOJONOV

Toshkent sh.,

2018-yil 7-iyun,

44-son

Oʻzbekiston avtomobil transporti agentligi boshligʻi D. DEXKANOV

Toshkent sh.,

2018-yil 7-iyun,

1/212-son

Oʻzbekiston Respublikasi Ichki ishlar vazirligi va Oʻzbekiston avtomobil transporti agentligining 2018-yil 7-iyun 44 va 1/212-son qaroriga ILOVA

Yuk avtotransport vositalarini “Qamchiq” dovonidan oʻtishi va harakatlanishi ustidan nazorat qilish tartibi toʻgʻrisidagi nizomga kiritilayotgan oʻzgartirishlar

1. Muqaddima quyidagi tahrirda bayon etilsin:

“Mazkur Nizom Oʻzbekiston Respublikasi Vazirlar Mahkamasining 2011-yil 26-dekabrdagi 342-son “Oʻzbekiston Respublikasi hududidagi avtomobil yoʻllarida xavfsizlikni taʼminlash va tashkillashtirish chora-tadbirlari toʻgʻrisida”gi, 2012-yil 10-iyuldagi 204-son “Qamchiq” dovoni orqali avtomobil transportida yuk tashishni tartibga solishga doir qoʻshimcha chora-tadbirlari toʻgʻrisida”gi va 2018-yil 6-apreldagi 268-son “Qamchiq” dovoni orqali avtomobil transportida yuk tashishni yanada tartibga solish chora-tadbirlar toʻgʻrisida”gi qarorlariga muvofiq yuk tashiyotgan yuk avtotransport vositalarining “Qamchiq” dovoniga kirishi hamda unda harakatlanishi ustidan nazorat qilish tartibini belgilaydi.”.

2. 4-band quyidagi tahrirda bayon etilsin:

“4. Oʻzbekiston Respublikasi Vazirlar Mahkamasining 2018-yil 6-apreldagi 268-son “Qamchiq” dovoni orqali avtomobil transportida yuk tashishni yanada tartibga solish chora-tadbirlar toʻgʻrisida”gi qaroriga muvofiq ishlab chiqarilgan yili 20 yildan ortiq boʻlgan yuk avtotransport vositalari va shatakchi avtotransportda (tirkama va yarim tirkamalar bundan mustasno) “Qamchiq” dovoni orqali yuklarni tashish taqiqlanadi.”.

3. 6-bandining birinchi xatboshi quyidagi tahrirda bayon etilsin:

“6. Yuk avtotransport vositalarini, shuningdek, ularga ortilgan yuk gabariti va vazni oʻlchamlarini tekshirish hamda nazorat qilish A373 “M39 avtoyoʻli — Guliston –Boʻka — Angren — Qoʻqon va Andijon orqali — Oʻsh” avtomobil yoʻlining 185 va 273-kilometrlarida zamonaviy texnologik qurilmalar bilan jihozlangan nazorat punktlari qurib bitkazilgunga qadar 193 va 268-kilometrlaridagi “Chinor” va “Namangan” muntazam yoʻl-patrul xizmati maskanlarida Oʻzbekiston Respublikasi Avtomobil yoʻllari davlat qoʻmitasi hamda Ichki ishlar vazirligining Davlat yoʻl harakati xavfsizligi xizmati (bundan buyon matnda IIV DYHXX deb yuritiladi) tomonidan hamkorlikda amalga oshiriladi. Bunda quyidagilarga jiddiy eʼtibor qaratiladi:”.

4. 7-band quyidagi tahrirda bayon etilsin:

“7. A373 “M39 avtoyoʻli — Guliston — Boʻka — Angren — Qoʻqon va Andijon orqali — Oʻsh” avtomobil yoʻlining 185 va 273-kilometrlaridagi nazorat punktlari qurib bitkazilganidan keyin yuk avtotransport vositalari, shuningdek ularga ortilgan yuk gabariti va vazn oʻlchamlari Oʻzbekiston Respublikasi Avtomobil yoʻllari davlat qoʻmitasi tomonidan tekshiriladi va nazorat qilinadi.”.

5. 8-bandi oʻz kuchini yoʻqotgan deb topilsin.

6. 9-bandidagi “Oʻzavtoyoʻl” DAKning” degan soʻzlar “Oʻzbekiston Respublikasi Avtomobil yoʻllari davlat qoʻmitasining” degan soʻzlar bilan almashtirilsin.

7. Mazkur oʻzgartirishlar Oʻzbekiston Respublikasi Avtomobil yoʻllari davlat qoʻmitasi bilan kelishilgan.

Oʻzbekiston Respublikasi Avtomobil yoʻllari davlat qoʻmitasi raisi A. ABDUVALIYEV

2018-yil 5-iyun