Vazirlar Mahkamasining “Davlatning xorijdan mablagʻ jalb qilishi toʻgʻrisidagi shartnomalar boʻyicha yuridik xulosalar berish tartibi haqidagi nizomni tasdiqlash toʻgʻrisida” 2015-yil 10-iyuldagi 187-son qaroriga oʻzgartirish va qoʻshimchalar kiritish haqida (522-son)

10.07.2018

Oʻzbekiston Respublikasi Vazirlar Mahkamasining

qarori

“Xorijdan mablagʻ jalb qilish toʻgʻrisida”gi Oʻzbekiston Respublikasining Qonuniga, Oʻzbekiston Respublikasi Prezidentining “Oʻzbekiston Respublikasi Adliya vazirligi faoliyatini yanada takomillashtirishga doir tashkiliy chora-tadbirlar toʻgʻrisida” 2018-yil 13-apreldagi PQ-3666-son qaroriga muvofiq, shuningdek, Oʻzbekiston Respublikasi Adliya vazirligi tomonidan davlatning xorijdan mablagʻ jalb qilishi toʻgʻrisidagi shartnomalar hamda Oʻzbekiston Respublikasining davlat kafolatlari boʻyicha yuridik xulosalar berishni takomillashtirish maqsadida Vazirlar Mahkamasi qaror qiladi:

1. Vazirlar Mahkamasining “Davlatning xorijdan mablagʻ jalb qilishi toʻgʻrisidagi shartnomalar boʻyicha yuridik xulosalar berish tartibi haqidagi nizomni tasdiqlash toʻgʻrisida” 2015-yil 10-iyuldagi 187-son qaroriga (Oʻzbekiston Respublikasi QT, 7-son, 58-modda) ilovaga muvofiq oʻzgartirish va qoʻshimchalar kiritilsin.

2. Mazkur qarorning bajarilishini nazorat qilish Bosh vazir oʻrinbosari — Oʻzbekiston Respublikasi Moliya vaziri J.A. Qoʻchqorov va Oʻzbekiston Respublikasi Adliya vaziri R.K. Davletov zimmasiga yuklansin.

Oʻzbekiston Respublikasining Bosh vaziri A. ARIPOV

Toshkent sh.,

2018-yil 10-iyul,

522-son

Vazirlar Mahkamasining 2018-yil 10-iyuldagi 522-son qaroriga ILOVA

Vazirlar Mahkamasining “Davlatning xorijdan mablagʻ jalb qilishi toʻgʻrisidagi shartnomalar boʻyicha yuridik xulosalar berish tartibi haqidagi nizomni tasdiqlash toʻgʻrisida” 2015-yil 10-iyuldagi 187-son qaroriga kiritilayotgan oʻzgartirish va qoʻshimchalar

1. Nomlanishga “shartnomalar” soʻzidan keyin “va Oʻzbekiston Respublikasining davlat kafolatlari” soʻzlari qoʻshilsin.

2. Muqaddima quyidagi tahrirda bayon etilsin:

“Xorijdan mablagʻ jalb qilish toʻgʻrisida”gi Oʻzbekiston Respublikasining Qonuniga, Oʻzbekiston Respublikasi Prezidentining “Oʻzbekiston Respublikasi Adliya vazirligi faoliyatini yanada takomillashtirishga doir tashkiliy chora-tadbirlar toʻgʻrisida” 2018-yil 13-apreldagi PQ-3666-son qaroriga muvofiq, shuningdek, Oʻzbekiston Respublikasi Adliya vazirligi tomonidan davlatning xorijdan mablagʻ jalb qilishi toʻgʻrisidagi shartnomalar va Oʻzbekiston Respublikasining davlat kafolatlari boʻyicha yuridik xulosalar berishni tartibga solish maqsadida Vazirlar Mahkamasi qaror qiladi”.

3. 1-bandga “shartnomalar” soʻzidan keyin “va Oʻzbekiston Respublikasining davlat kafolatlari” soʻzlari qoʻshilsin.

4. Ilovada:

a) nomlanishiga “shartnomalar” soʻzidan keyin “va Oʻzbekiston Respublikasining davlat kafolatlari” soʻzlari qoʻshilsin;

b) 1-bandning birinchi xatboshi quyidagi tahrirda bayon etilsin:

“Ushbu Nizom “Xorijdan mablagʻ jalb qilish toʻgʻrisida”gi Oʻzbekiston Respublikasi Qonuniga, Oʻzbekiston Respublikasi Prezidentining “Oʻzbekiston Respublikasi Adliya vazirligi faoliyatini yanada takomillashtirishga doir tashkiliy chora-tadbirlar toʻgʻrisida” 2018-yil 13-apreldagi PQ-3666-son qaroriga muvofiq davlatning xorijdan mablagʻ jalb qilishi toʻgʻrisidagi shartnomalar va Oʻzbekiston Respublikasining davlat kafolatlari boʻyicha yuridik xulosalar berish tartibini belgilaydi”;

v) 2-band:

quyidagi tahrirdagi uchinchi xatboshi bilan toʻldirilsin:

“Oʻzbekiston Respublikasining davlat kafolati — qarz oluvchi-rezident oʻzidan undiriladigan summani qarz (kredit) berish kelishuvlarida belgilangan muddatda toʻlamagan taqdirda Oʻzbekiston Respublikasining qarz beruvchi oldidagi qarzni toʻliq yoki qisman toʻlash majburiyatidir”;

uchinchi va toʻrtinchi xatboshilar tegishlicha toʻrtinchi va beshinchi xatboshilar deb hisoblansin;

g) 3-bandga “shartnomalar” soʻzidan keyin “va Oʻzbekiston Respublikasining davlat kafolatlari” soʻzlari qoʻshilsin;

d) 5-bandda:

“a” va “b” kichik bandlariga “shartnoma” soʻzidan keyin “va Oʻzbekiston Respublikasining davlat kafolatlari” soʻzlari qoʻshilsin;

“i” kichik bandi quyidagi tahrirda bayon etilsin:

““i” taqdim etilayotgan hujjatlarda havolalari mavjud boʻlgan boshqa hujjatlarning nusxalari”.