Hududiy “Mevasabzavot” birlashmalari faoliyatini takomillashtirish chora-tadbirlari toʻgʻrisida (394-son)

11.10.2000

Oʻzbekiston Respublikasi Vazirlar Mahkamasining

qarori

Respublika mintaqalarida meva-sabzavot tarmogʻini boshqarishni yanada takomillashtirish, kam quvvatli boshqaruv boʻgʻinlarini tugatish, meva-sabzavot mahsulotlari bozorida raqobat muhitini yaratish maqsadida Vazirlar Mahkamasi qaror qiladi:

1. Vazirlar Mahkamasining 2000-yil 4-martdagi 78-son qarori bilan tashkil etilgan maxsus idoralararo komissiyaning, Qoraqalpogʻiston Respublikasi Vazirlar Kengashi, viloyatlar hokimliklari, Oʻzbekiston Respublikasi Qishloq va suv xoʻjaligi vazirligi hamda xoʻjalik yurituvchi subyektlarning:

Buxoro, Navoiy, Sirdaryo va Xorazm viloyatlaridagi hududiy “Mevasabzavot” birlashmalarini tugatish;

ilgari tugatilayotgan hududiy “Mevasabzavot” birlashmalariga kirgan korxona va xoʻjaliklar (1-ilova) faoliyatini muvofiqlashtirish boʻyicha funksiyalarni, koʻrsatib oʻtilgan qishloq xoʻjaligi korxonalarining toʻliq iqtisodiy mustaqilligi saqlab qolingan holda, tegishli viloyatlar qishloq va suv xoʻjaligi boshqarmalariga berish;

qolgan hududiy “Mevasabzavot” birlashmalari faoliyatini muvofiqlashtirish funksiyalarini Oʻzbekiston Respublikasi Qishloq va suv xoʻjaligi vazirligiga yuklash toʻgʻrisidagi takliflariga rozilik berilsin.

2. Oʻzbekiston Respublikasi Qishloq va suv xoʻjaligi vazirligi meva-sabzavotchilik samaradorligini oshirish va meva-sabzavot mahsulotlari bozorida raqobat muhitini shakllantirish maqsadida:

meva-sabzavot yoʻnalishidagi qishloq xoʻjaligi korxonalarida iqtisodiy islohotlarni oʻtkazishda, ularda oilaviy pudrat, shartnomaviy munosabatlar, yer uchastkalarini uzoq muddatli ijaraga berish, xarajatlarni hisobga olishning chek tizimini keng joriy qilishga koʻmaklashsin;

xorijiy investitsiyalarni tarmoqqa jalb etish, qoʻshma ishlab chiqarishlar tashkil qilish, ilgʻor agrotexnika texnologiyalarini joriy etish chora-tadbirlarini amalga oshirsin;

yetishtirilgan meva-sabzavot mahsulotlarini sotishga koʻmaklashish maqsadida ichki va tashqi bozorlarning marketing tadqiqotlarini oʻtkazsin;

har yili sabzavot ekinlarining hududiy “Mevasabzavot” birlashmalari xoʻjaliklarida, ularning ixtisoslashuvini va bozorda mahsulotga boʻlgan ehtiyojni hisobga olgan holda, oqilona joylashtirilishini taʼminlasin;

sabzavot ekinlari seleksiyasi va urugʻchiligining holati, meva-sabzavotchilik xoʻjaliklarini sabzavotlar hamda meva-rezavor ekinlarining serhosil va qimmatli navlari hamda turlari bilan taʼminlash masalalarini doimiy ravishda koʻrib borsin.

3. Hududiy “Mevasabzavot” birlashmasi ijro etuvchi apparatining namunaviy tuzilmasi 2-ilovaga muvofiq maʼqullansin.

Belgilab qoʻyilsinki:

hududiy “Mevasabzavot” birlashmasi raisi uning qatnashchilari umumiy yigʻilishida saylanadi va tegishli ravishda Qoraqalpogʻiston Respublikasi Vazirlar Kengashi hamda viloyatlar hokimliklari tomonidan, Oʻzbekiston Respublikasi Qishloq va suv xoʻjaligi vazirligi bilan kelishgan holda tasdiqlanadi;

ijro etuvchi apparat taʼminoti oʻz xoʻjalik faoliyati hamda birlashmaga kiruvchi korxonalar bilan shartnoma asosidagi ajratmalar hisobiga amalga oshiriladi.

4. Hududiy “Mevasabzavot” birlashmalariga qoʻshimcha ravishda:

ularning tarkibiga kiruvchi qishloq xoʻjaligi va qayta ishlash korxonalarida xoʻjalik yuritishning yangi shakllarini joriy etishga koʻmaklashish;

zamonaviy qishloq xoʻjaligi hamda qayta ishlash texnologiyalari, marketing, menejment va boshqa masalalar boʻyicha mutaxassislarni tayyorlash va qayta tayyorlashni tashkil etish funksiyalari yuklansin.

5. Vazirlar Mahkamasining 1997-yil 18-iyuldagi 363-son qarorining 10-bandi va qarorga 5-ilova oʻz kuchini yoʻqotgan deb hisoblansin.

6. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari T. Xoltoyev zimmasiga yuklansin.

Vazirlar Mahkamasining Raisi I. KARIMOV

Toshkent sh.,

2000-yil 11-oktabr,

394-son

Vazirlar Mahkamasining 2000-yil 11-oktabrdagi 394-son qaroriga 1-ILOVA

Tugatilayotgan hududiy “Mevasabzavot” birlashmalarining faoliyatini muvofiqlashtirib borish tegishli viloyatlar qishloq va suv xoʻjaligi boshqarmalariga yuklanadigan korxonalari

ROʻYXATI

Vazirlar Mahkamasining 2000-yil 11-oktabrdagi 394-son qaroriga 2-ILOVA

“Mevasabzavot” Qoraqalpogʻiston Respublikasi, viloyat birlashmalarining

NAMUNAVIY TUZILMASI