Xavfsizlik va jinoyatchilikka qarshi kurashish sohasida hamkorlik toʻgʻrisida

09.03.2018

Oʻzbekiston Respublikasi bilan Tojikiston Respublikasi oʻrtasida

Bitim

Oʻzbekiston Respublikasi va Tojikiston Respublikasi, keyingi oʻrinlarda “Tomonlar” deb ataluvchilar,

ikki mamlakat oʻrtasidagi doʻstona munosabatlarni inobatga olib,

xavfsizlik va jinoyatchilikka qarshi kurashish masalalari boʻyicha ikki tomonlama va koʻp tomonlama xalqaro hamkorlikning kengayishi muhim ekanligini anglagan holda,

ikki mamlakatning xavfsizligini taʼminlash boʻyicha milliy manfaatlarni eʼtirof etib,

suverenitet, hududiy yaxlitlik va ikki mamlakatning ichki ishlariga aralashmaslik, shuningdek, ikki mamlakat fuqarolarining huquqlarini hurmat qilish va himoya qilish asosida,

Tomonlar milliy qonunchiligi va ular ishtirokchi boʻlgan xalqaro shartnomalarga tayanib,

quyidagilar toʻgʻrisida kelishib oldilar:

1-modda

Tomonlar xavfsizlikni taʼminlash va jinoyatchilikka qarshi kurashish maqsadida quyidagi sohalarda oʻzaro manfaatli hamkorlikni amalga oshiradilar:

a) ikki mamlakatning konstitutsiyaviy tuzumi, qonuniy hokimiyati va hududiy yaxlitligiga qarshi qaratilgan tahdidlarning oldini olish;

b) terrorizm, ekstremizm va ularning moliyalashtirilishiga qarshi kurashish;

v) terroristik va ekstremistik tashkilotlarning uchinchi davlatlar hududidan turib Tomonlarning xavfsizligiga putur yetkazadigan buzgʻunchilik faoliyatiga qarshi kurashish;

g) xorijiy davlatlar maxsus xizmatlari va tashkilotlarining Oʻzbekiston Respublikasi va Tojikiston Respublikasiga nisbatan razvedka-buzgʻunchilik faoliyatiga qarshi kurashish;

d) qurol va oʻq-dorilar, portlovchi moddalar, ommaviy qirgʻin qurollari, ayniqsa, yadroviy va radioaktiv, kimyoviy va biologik qurollar, shuningdek, ularni ishlab chiqarish texnologiyalarining ishlab chiqarilishi va noqonuniy muomalasining oldini olish;

e) giyohvandlik vositalari, psixotrop moddalar va ular prekursorlarining noqonuniy muomalasi, noqonuniy migratsiya, odam va uning aʼzolari savdosi, shuningdek, insonni ekspluatatsiya qilishning boshqa koʻrinishlariga qarshi kurashish;

j) axborot texnologiyalaridan foydalanishga oid jinoyatlar va kiberjinoyatchilikning oldini olish va ularga qarshi kurashish, shuningdek, Tomonlarning milliy manfaatlariga qarshi axborot tarqatadigan internet-saytlar faoliyatini aniqlash va taqiqlash;

z) jinoiy yoʻl bilan olingan daromadlarni legallashtirishning oldini olish;

k) boshqa jinoyatlarning oldini olish va bartaraf etish.

2-modda

Mazkur Bitimning qoidalari va maqsadlari amalga oshirilishi uchun quyidagilar Tomonlarning vakolatli organlari hisoblanadi:

Tojikiston Respublikasi nomidan — Tojikiston Respublikasi Milliy xavfsizlik davlat qoʻmitasi, Tojikiston Respublikasi Ichki ishlar vazirligi va Tojikiston Respublikasi Bosh prokuraturasi;

Oʻzbekiston Respublikasi nomidan — Oʻzbekiston Respublikasi Milliy xavfsizlik xizmati, Oʻzbekiston Respublikasi Ichki ishlar vazirligi va Oʻzbekiston Respublikasi Bosh prokuraturasi.

3-modda

Tomonlar mazkur Bitim doirasidagi hamkorlikni quyidagi shakllarda amalga oshiradilar:

a) mazkur Bitimning 1-moddasida belgilangan yoʻnalishlar boʻyicha axborot, shuningdek, amaliy va ilmiy-oʻquv materiallari almashinuvi;

b) chegarani boshqarish va chegara nazorati masalalari boʻyicha axborot va tajriba almashinuvi;

v) mazkur Bitimning 1-moddasida nazarda tutilgan jinoyatlarni aniqlash, oldini olish va bartaraf etish boʻyicha, shuningdek, jinoyat sodir etgan shaxslarni qidirish, ushlash va koʻchirish boʻyicha qoʻshma chora-tadbirlar oʻtkazish;

d) moddiy-texnik yordam koʻrsatish;

e) ekspertlar almashinuvi.

4-modda

1. Tomonlar mazkur Bitimda nazarda tutilgan majburiyatlarni bajarish yuzasidan oʻzlarining vakolatli organlari oʻrtasida quyidagi masalalar boʻyicha axborot almashadilar:

a) terroristik va ekstremistik tashkilotlar, ular bilan aloqador guruhlar va alohida shaxslar, shuningdek, boshqa transmilliy jinoiy guruhlar va ularning maqsadlari haqida;

b) terroristik, ekstremistik va transmilliy uyushgan jinoyatlarni sodir etish usullari va sabablari haqida;

v) terroristik aktlar va ekstremizm, boshqa uyushgan jinoyatlarni aniqlash, oldini olish va bartaraf etish tajribasiga oid;

g) xorijiy davlatlar maxsus xizmatlari va tashkilotlarining Oʻzbekiston Respublikasi va Tojikiston Respublikasiga nisbatan razvedka-buzgʻunchilik harakatlari toʻgʻrisida;

d) ikki davlatning jinoyatchilikning oldini olish va unga qarshi kurashish sohasidagi qonunchiligi toʻgʻrisida;

e) terrorizm va ekstremizmga qarshi kurashishdagi zamonaviy ilmiy vositalarning puxta tayyorlanishi va qoʻllanilishi haqida;

j) Tomonlarning ikki davlat hududida jinoyat sodir etgan va qamoqda saqlanayotgan yoki jazoni oʻtayotgan fuqarolari toʻgʻrisida;

z) mazkur Bitimning 1-moddasida belgilangan boshqa masalalar boʻyicha.

2. Tomonlar tajriba almashish maqsadida tegishli tuzilmalar uchun oʻquv kurslarini oʻtkazadilar.

5-modda

Tomonlar mazkur Bitimda nazarda tutilgan hamkorlik doirasida quyidagilarni amalga oshirishni oʻz zimmalariga oladilar:

a) xalqaro huquqning umumeʼtirof etilgan normalari ustuvorligi prinsipiga amal qilish;

b) Tomonlarning tegishli organlari tarafidan terroristik va ekstremistik deb topilgan partiyalar, harakatlar va tashkilotlarning faoliyatini aniqlash va barham berish, ularning har qanday qoʻllab-quvvatlovi va yordamidan saqlanish;

v) Oʻzbekiston Respublikasi yoki Tojikiston Respublikasining konstitutsiyaviy tuzumini zoʻravonlik yoki boshqa noqonuniy usullar bilan agʻdarishni maqsad qilgan destruktiv unsurlarning faoliyatini bartaraf etish choralarini koʻrish.

6-modda

Qoʻshma chora-tadbirlar boʻyicha harakatlarni muvofiqlashtirish hamda hamkorlik jarayonida yuzaga keladigan muammolarni hal qilish uchun Tomonlarning vakolatli organlari doimiy vakillar bilan almashishlari, tezkor-xizmat faoliyatining aniq tarmoqlari boʻyicha Bitimning amalga oshirilish mexanizmlarini belgilaydigan vaqtinchalik ishchi guruhlar tuzishlari mumkin.

7-modda

1. Mazkur Bitimning amalga oshirilishi boʻyicha ishchi til rus tili hisoblanadi.

2. Tomonlar oʻrtasidagi axborot va yozishmalar mazmuni yuboruvchining roziligisiz uchinchi tomonga ogʻzaki yoki yozma shaklda taqdim etilishi mumkin emas.

8-modda

Mazkur Bitimning qoidalarini talqin qilishda kelishmovchiliklar yuzaga kelgan taqdirda, Tomonlar ularni oʻzaro muzokaralar orqali hal qiladilar.

9-modda

Mazkur Bitimga Tomonlarning oʻzaro kelishuvi asosida uning ajralmas qismi hisoblanadigan va mazkur Bitimning 10-moddasiga muvofiq kuchga kiradigan alohida bayonnomalar bilan rasmiylashtiriladigan oʻzgartirish va qoʻshimchalar kiritilishi mumkin.

10-modda

1. Mazkur Bitim Tomonlar uning kuchga kirishi uchun zarur boʻlgan davlat ichki protseduralarini bajarganliklari toʻgʻrisida diplomatik kanallar orqali oxirgi yozma xabarnoma olingan sanadan boshlab kuchga kiradi.

2. Mazkur Bitim nomuayyan muddatga tuziladi va uning amal qilishi Tomonlardan biri boshqa Tomonning mazkur Bitimning amal qilishini tugatish niyati toʻgʻrisidagi yozma xabarnomasini diplomatik kanallar orqali olgan sanadan boshlab, olti oy oʻtgandan soʻng tugatiladi.

3. Mazkur Bitim amal qilishining tugatilishi Tomonlar tarafidan uning amal qilishi tugatilishiga qadar kelishilgan, lekin tugallanmagan hamkorlikning amalga oshirilishiga taʼsir koʻrsatmaydi.

Dushanbe shahrida, 2018-yil 9-martda ikki nusxada, har biri oʻzbek, tojik va rus tillarida tuzildi, bunda barcha matnlar bir xil yuridik kuchga ega.

Mazkur Bitim qoidalarini talqin qilishda kelishmovchiliklar yuzaga kelgan taqdirda, Tomonlar rus tilidagi matnga murojaat qiladilar.

(imzolar)