Oʻzbekiston Respublikasining Milliy gvardiyasini tashkil etish toʻgʻrisida (29-son)

23.01.1992

OʻZBEKISTON RESPUBLIKASI PREZIDENTI HUZURIDAGI VAZIRLAR MAHKAMASINING

qarori

Oʻzbekiston Respublikasining “Davlat mustaqilligi asoslari toʻgʻrisida” 1991-yil 31-avgustdagi Qonunining oltinchi moddasiga muvofiq Vazirlar Mahkamasi qaror qiladi:

1. Oʻzbekiston Respublikasining davlat mustaqilligini, fuqarolarning konstitutsion huquqlari va erkinliklarini va hududiy yaxlitligini himoya qilish maqsadida Oʻzbekiston Respublikasi Ichki ishlar vazirligining 3408-harbiy qismi negizida Oʻzbekiston Respublikasining Milliy Gvardiya brigadasi tuzilsin.

2. Oʻzbekiston Respublikasi Ichki ishlar vazirligi 3408-harbiy qismni butun shaxsiy tarkibi, qurol-yarogʻi, texnikasi va boshqa mol-mulki bilan birgalikda Oʻzbekiston Respublikasi Mudofaa ishlari vazirligi ixtiyoriga bersin.

3. Milliy Gvardiya joylashgan oʻrni etib Oʻzbekiston Respublikasi Ichki ishlar vazirligining Toshkent oliy harbiy-texnika bilim yurtining binolari va inshootlari kompleksi belgilansin va u Oʻzbekiston Respublikasi Mudofaa ishlari vazirligining balansiga oʻtkazilsin.

4. Oʻzbekiston Respublikasi Milliy xavfsizlik xizmati bir hafta muddat ichida sobiq SSSR Davlat xavfsizlik qoʻmitasi instituti filiali binolari va inshootlarini xizmat binolari butun kompleksining mol-mulki, asbob-uskunalari bilan birgalikda Oʻzbekiston Respublikasi Ichki ishlar vazirligi balansiga bersin.

5. Oʻzbekiston Respublikasi Mudofaa ishlari vazirligi bir hafta muddat ichida Milliy Gvardiyaning tuzilmasi, nizomi, shtatlari boʻyicha Vazirlar Mahkamasiga taklif kiritsin, bunda harbiy xizmatchilar, ularning oila aʼzolari uchun belgilangan barcha huquq va imtiyozlar Milliy Gvardiyaga tatbiq etilishini nazarda tutsin hamda alohida sharoitlardagi xizmat uchun 20 foiz miqdorida oshirilgan ustama belgilansin.

6. Oʻzbekiston Respublikasi Mudofaa ishlari vazirligi, Moliya vazirligi, Iqtisodiyot qoʻmitasi bir hafta muddat ichida Oʻzbekiston Respublikasi Milliy Gvardiyasining mablagʻ bilan taʼminlanishi, moddiy-texnika taʼminoti masalasini koʻrib chiqsin.

Vazirlar Mahkamasining Raisi I. KARIMOV

Toshkent sh.,

1992-yil 23-yanvar,

29-son