Oʻzbekiston Respublikasi Adliya vazirligi huzuridagi Huquqiy siyosat tadqiqot instituti faoliyatini tashkil etish chora-tadbirlari toʻgʻrisida (442-son)
11.06.2018
Oʻzbekiston Respublikasi Vazirlar Mahkamasining
qarori
Oʻzbekiston Respublikasi Prezidentining “Davlat huquqiy siyosatini amalga oshirishda adliya organlari va muassasalari faoliyatini tubdan takomillashtirish chora-tadbirlari toʻgʻrisida” 2018-yil 13-apreldagi PF-5415-son Farmonini bajarish, shuningdek, norma ijodkorligi faoliyatini ilmiy-uslubiy taʼminlashning sifati va samaradorligini oshirish, huquqiy siyosatning dolzarb masalalari boʻyicha ilmiy tadqiqotlarni amalga oshirish maqsadida Vazirlar Mahkamasi qaror qiladi:
1. Oʻzbekiston Respublikasi Prezidentining “Davlat huquqiy siyosatini amalga oshirishda adliya organlari va muassasalari faoliyatini tubdan takomillashtirish chora-tadbirlari toʻgʻrisida” 2018-yil 13-apreldagi PF-5415-son Farmoniga muvofiq Toshkent davlat yuridik universitetining Huquqiy tadqiqotlar markazi negizida Oʻzbekiston Respublikasi Adliya vazirligi huzurida Huquqiy siyosat tadqiqot instituti (keyingi oʻrinlarda Tadqiqot instituti deb ataladi) tashkil etilganligi maʼlumot uchun qabul qilinsin.
2. Belgilansinki, Tadqiqot instituti:
yagona davlat huquqiy siyosatini amalga oshirish, qonuniylikni mustahkamlash, sud-huquq sohasini takomillashtirish, davlat boshqaruvi samaradorligini oshirish, ijtimoiy-iqtisodiy sohadagi munosabatlarni huquqiy tartibga solishni oʻrganishga qaratilgan tadqiqotlarni tashkil etish va oʻtkazish sohasida respublikaning yetakchi davlat ilmiy-tadqiqot ekspert muassasasi hisoblanadi;
yuridik shaxs hisoblanadi va Oʻzbekiston Respublikasi Moliya vazirligining Gʻaznachiligida shaxsiy hisobraqamlarga, Oʻzbekiston Respublikasining Davlat gerbi tasviri tushirilgan muhrga ega boʻladi.
3. Oʻzbekiston Respublikasi Adliya vazirligi huzuridagi Huquqiy siyosat tadqiqot institutining boshqaruv xodimlari cheklangan umumiy soni 25 kishidan iborat boʻlgan tuzilmasi ilovaga muvofiq tasdiqlansin.
4. Belgilansinki:
Tadqiqot institutiga Oʻzbekiston Respublikasi Adliya vaziri tomonidan lavozimga tayinlanadigan va lavozimdan ozod qilinadigan direktor rahbarlik qiladi;
Tadqiqot instituti xodimlariga Oʻzbekiston Respublikasi Adliya vazirligining markaziy apparati xodimlari uchun nazarda tutilgan mehnatga haq toʻlash va moddiy ragʻbatlantirish shartlari qoʻllaniladi;
Tadqiqot instituti xodimlariga qonunchilikda belgilangan tartibda darajali unvonlar beriladi, darajali unvonlar va uzoq yillik xizmati uchun ustamalar va qoʻshimcha toʻlovlar toʻlanadi;
Tadqiqot instituti xodimlariga avvalgi ish joyida uzoq yillik xizmati uchun berilgan ustama va qoʻshimcha toʻlovlar, maxsus va darajali unvonlar saqlab qolinadi.
Davlat tashkilotlaridagi ilmiy, ilmiy-pedagogik va mehnat faoliyati bilan shugʻullanuvchi ilmiy darajaga ega xodimlarga qoʻshimcha haq toʻlashga doir ragʻbatlantirish shartlari Institut xodimlariga nisbatan ham tatbiq etiladi.
5. Quyidagilar Tadqiqot instituti faoliyatini moliyalashtirish manbalari etib belgilansin:
Tadqiqot institutining joriy taʼminotiga ajratiladigan budjet mablagʻlari;
budjetdan tashqari Adliya organlari va muassasalarini rivojlantirish jamgʻarmasi mablagʻlari;
Oʻzbekiston Respublikasi Innovatsion rivojlanish vazirligi tomonidan oʻtkaziladigan tanlovlar natijalari boʻyicha ajratiladigan grantlar;
xalqaro moliya institutlari va boshqa institutlar, xorijiy tashkilotlarning grantlari;
tadqiqotlar oʻtkazishdan va shartnoma asosida ishlarni bajarish (xizmat koʻrsatish)dan tushadigan mablagʻlar;
qonun hujjatlarida taqiqlanmagan boshqa manbalar.
6. Oʻzbekiston Respublikasi Adliya vazirligi bir oy muddatda belgilangan tartibda:
Tadqiqot instituti ustavining ishlab chiqilishi va tasdiqlanishini, shuningdek, uning davlat roʻyxatidan oʻtkazilishini;
Tadqiqot institutining shtatlar jadvali va xarajatlar smetasini tasdiqlanishini taʼminlasin;
Tadqiqot institutini yuqori malakali kadrlar bilan toʻldirish boʻyicha zarur chora-tadbirlarni amalga oshirsin.
7. Oʻzbekiston Respublikasi Moliya vazirligi Tadqiqot institutiga:
Oʻzbekiston Respublikasi Davlat budjetining xarajatlari parametrlarida uning taʼminoti uchun 2018-yilda zarur boʻlgan budjet mablagʻlarini ajratsin va keyinchalik esa har yili mablagʻ ajratishni nazarda tutsin;
ikkita yengil, shu jumladan bitta biriktirilgan xizmat avtotransporti vositasini saqlash uchun limit ajratsin.
8. Tadqiqot instituti:
Oʻzbekiston Respublikasi Davlat statistika qoʻmitasi, Moliya vazirligi, Iqtisodiyot vazirligi, Bandlik va mehnat munosabatlari vazirligi, Ichki ishlar vazirligi, Bosh prokuraturasi, Oliy sudining statistika axboroti;
xorijiy matbuot sharhlari va Oʻzbekiston Respublikasi Prezidenti Administratsiyasi huzuridagi Iqtisodiy tadqiqotlar va islohotlar markazining tahliliy axborotlari, Oʻzbekiston Respublikasi Moliya vazirligi huzuridagi Budjet-soliq tadqiqotlari instituti hamda Oʻzbekiston Respublikasi Iqtisodiyot vazirligi huzuridagi Prognozlashtirish va makroiqtisodiy tadqiqotlar institutining tahliliy materiallari majburiy tarzda yuboriladigan tashkilotlar roʻyxatiga kiritilsin.
9. Oʻzbekiston Respublikasi Axborot texnologiyalari va kommunikatsiyalarini rivojlantirish vazirligi Tadqiqot institutining buyurtmanomasiga koʻra uni belgilangan tartibda zarur boʻlgan aloqa turlari va vositalari bilan taʼminlasin, shuningdek keng qamrovli Internet tarmogʻidan foydalanish imkoniyatini yaratib bersin.
10. Tadqiqot institutiga Toshkent shahar, Buyuk ipak yoʻli koʻchasi, 69-uy manzilida joylashgan bino operativ boshqaruv huquqi asosida berilsin.
Vazirlar Mahkamasining 2013-yil 10-apreldagi 193-f-son farmoyishi oʻz kuchini yoʻqotgan deb hisoblansin.
11. Oʻzbekiston Respublikasi Adliya vazirligi manfaatdor vazirliklar va idoralar bilan birgalikda oʻzlari qabul qilgan normativ-huquqiy hujjatlarni bir oy muddatda ushbu qarorga muvofiqlashtirsin.
12. Mazkur qarorning bajarilishini nazorat qilish Oʻzbekiston Respublikasi adliya vaziri R.K. Davletov zimmasiga yuklansin.
Oʻzbekiston Respublikasining Bosh vaziri A. ARIPOV
Toshkent sh.,
2018-yil 11-iyun,
442-son
Vazirlar Mahkamasining 2018-yil 11-iyundagi 442-son qaroriga ILOVA
Oʻzbekiston Respublikasi Adliya vazirligi huzuridagi Huquqiy siyosat tadqiqot instituti
TUZILMASI
Direktor Direktor oʻrinbosari* — Sud-huquq va huquqni muhofaza qilish faoliyati sohasini huquqiy tartibga solishni oʻrganish boʻlimi 5 Bosh buxgalter 1 AKT boʻyicha katta mutaxassis 1 Ijtimoiy sohadagi munosabatlarni huquqiy tartibga solishni oʻrganish boʻlimi 5 Umumiy boʻlim 2 Iqtisodiy sohadagi munosabatlarni huquqiy tartibga solishni oʻrganish boʻlimi 5 Jamoatchilik bilan aloqalar boʻyicha yetakchi mutaxassis 1 Xalqaro hamkorlik boʻyicha bosh mutaxassis 1 Davlat boshqaruvi samaradorligini oʻrganish boʻlimi 3
Boshqaruv xodimlarining umumiy cheklangan soni — 25 birlik.
* Direktor oʻrinbosari lavozimi aynan ushbu ustunga kiritilishi shartli boʻlib, Oʻzbekiston Respublikasi Adliya vaziri buyrugʻi bilan direktor oʻrinbosari tegishli boʻlim boshligʻi etib tayinlanishi mumkin. Bunda mazkur tuzilmaga tegishli oʻzgartirishlar kiritilishi talab qilinmaydi.