Ijro hujjatlari boʻyicha mol-mulkni sotish tartibi toʻgʻrisidagi nizomni tasdiqlash haqida (3024-son)

19.06.2018

Oʻzbekiston Respublikasi Bosh prokuraturasi Oʻzbekiston Respublikasi Xususiylashtirilgan korxonalarga koʻmaklashish va raqobatni rivojlantirish davlat qoʻmitasining

Qarori

[Oʻzbekiston Respublikasi Adliya vazirligi tomonidan 2018-yil 19-iyunda roʻyxatdan oʻtkazildi, roʻyxat raqami 3024]

Oʻzbekiston Respublikasi “Sud hujjatlari va boshqa organlar hujjatlarini ijro etish toʻgʻrisida”gi Qonunining 56-moddasi hamda Oʻzbekiston Respublikasi Prezidentining 2017-yil 30-maydagi PQ-3016-son “Oʻzbekiston Respublikasi Bosh prokuraturasi huzuridagi Majburiy ijro byurosi faoliyatini tashkil etish toʻgʻrisida”gi qaroriga muvofiq Oʻzbekiston Respublikasi Bosh prokuraturasi hamda Xususiylashtirilgan korxonalarga koʻmaklashish va raqobatni rivojlantirish davlat qoʻmitasi qaror qiladi:

1. Ijro hujjatlari boʻyicha mol-mulkni sotish tartibi toʻgʻrisidagi nizom ilovaga muvofiq tasdiqlansin.

2. Quyidagilar oʻz kuchini yoʻqotgan deb topilsin:

Oʻzbekiston Respublikasi Davlat mulki qoʻmitasi hamda Adliya vazirligining 2006-yil 29-dekabrdagi 01/19-18/08, 37-son “Sud hujjatlari va boshqa organlar hujjatlari boʻyicha mol-mulkni sotish uchun savdo tashkilotlarini tanlash va mol-mulkni sotish tartibi toʻgʻrisidagi nizomni tasdiqlash haqida”gi qarori (roʻyxat raqami 1649, 2006-yil 29-dekabr) (Oʻzbekiston Respublikasi qonun hujjatlari toʻplami, 2006-y., 51-52-son, 524-modda);

Oʻzbekiston Respublikasining Xususiylashtirish, monopoliyadan chiqarish va raqobatni rivojlantirish davlat qoʻmitasi hamda Adliya vazirligining 2014-yil 19-fevraldagi 01/19-26/04, 2-son “Sud hujjatlari va boshqa organlar hujjatlari boʻyicha mol-mulkni sotish uchun savdo tashkilotlarini tanlash va mol-mulkni sotish tartibi toʻgʻrisidagi nizomga oʻzgartirishlar kiritish haqida”gi qarori (roʻyxat raqami 1649-1, 2014-yil 19-fevral) (Oʻzbekiston Respublikasi qonun hujjatlari toʻplami, 2014-y., 8-son, 86-modda).

3. Mazkur qaror rasmiy eʼlon qilingan kundan eʼtiboran kuchga kiradi.

Bosh prokuror O. MURODOV

Toshkent sh.,

2018-yil 25-may,

25-q-son

Xususiylashtirilgan korxonalarga koʻmaklashish va raqobatni rivojlantirish davlat qoʻmitasi raisi R. GULYAMOV

Toshkent sh.,

2018-yil 25-may,

01/15-10/12-son

Oʻzbekiston Respublikasi Bosh prokuraturasi va Xususiylashtirilgan korxonalarga koʻmaklashish va raqobatni rivojlantirish davlat qoʻmitasining 2018-yil 25-maydagi 25-q va 01/15-10/12-son qaroriga ILOVA

Ijro hujjatlari boʻyicha mol-mulkni sotish tartibi toʻgʻrisidagi

NIZOM

Mazkur Nizom Oʻzbekiston Respublikasining Fuqarolik kodeksi, “Sud hujjatlari va boshqa organlar hujjatlarini ijro etish toʻgʻrisida”gi Qonuni (bundan buyon matnda Qonun deb yuritiladi), Oʻzbekiston Respublikasi Vazirlar Mahkamasining 2009-yil 15-iyuldagi 200-son “Davlat daromadiga oʻtkaziladigan mol-mulkni olib qoʻyish, sotish yoki yoʻq qilib tashlash tartibini takomillashtirish toʻgʻrisida”gi qaroriga muvofiq ijro hujjatlari boʻyicha mol-mulkni sotish tartibini belgilaydi.

1-bob. Umumiy qoidalar

1. Mazkur Nizom ijro hujjatlari asosida xatlanib, auksion savdolari orqali yoxud qonunchilikda belgilangan boshqa usulda sotilishi belgilangan mol-mulkka nisbatan tatbiq etilmaydi.

2. Ijro hujjatlariga asosan mol-mulkni sotish boʻyicha savdo tashkilotlarini tanlab olish Oʻzbekiston Respublikasi Bosh prokuraturasi huzuridagi Majburiy ijro byurosining (bundan buyon matnda Byuro deb yuritiladi) hududiy boshqarmalari tomonidan tanlov asosida amalga oshiriladi.

3. Tanlov oʻtkazishdan asosiy maqsad har bir tuman (shahar) boʻyicha yoki alohida turdagi mol-mulklarni sotish boʻyicha eng maqbul savdo tashkilotlarini aniqlashdan iborat.

4. Tanlovning barcha qatnashchilariga teng tanlov shartlarini yaratish, oshkoralik, talablarning yagonaligi va baho berishda xolislik tanlov oʻtkazishning asosiy tamoyillari hisoblanadi.

2-bob. Ijro hujjatlariga asosan mol-mulkni sotish boʻyicha savdo tashkilotlari oʻrtasida tanlov oʻtkazish

1-§. Tanlov komissiyasi

5. Tanlov ijro hujjatlariga asosan mol-mulkni sotish uchun savdo tashkilotini aniqlash maqsadida tashkil etilgan tanlov komissiyasi (bundan buyon matnda Komissiya deb yuritiladi) tomonidan oʻtkaziladi.

6. Komissiya Byuro direktori buyrugʻi asosida 5 kishidan iborat quyidagi tarkibda tuziladi:

Byuroning hududiy boshqarmasi boshligʻi — Komissiya raisi;

Oʻzbekiston Respublikasining Raqobatni rivojlantirish va isteʼmolchilar huquqlarini himoya qilish qoʻmitasining hududiy organlari vakili — Komissiya aʼzosi;

tanlov oʻtkazilayotgan hududda faoliyat koʻrsatayotgan Byuroning tegishli tuman (shahar) boʻlimi boshligʻi — Komissiya aʼzosi;

Byuro hududiy boshqarmasining sud hujjatlari va boshqa organlar hujjatlarini ijro etish boʻlimi boshligʻi, ichki xavfsizlikni taʼminlash shuʼbasi katta inspektori — Komissiya aʼzolari hisoblanadi.

Zarurat tugʻilganida, maxsus bilim talab qiladigan masalalar boʻyicha xulosa berish uchun Komissiya yigʻilishlariga ekspertlar (mutaxassislar) jalb qilinishi mumkin. Ekspertlar Komissiya yigʻilishlarida ovoz berish huquqiga ega emas.

7. Quyidagilar Komissiyaning vazifalari hisoblanadi:

tanlov oʻtkazish vaqti, joyi va shartlari toʻgʻrisida eʼlon berish boʻyicha qaror qabul qilish;

tanlab olingan savdo tashkilotlari bilan tuziladigan namunaviy shartnoma loyihasini tasdiqlash;

tanlov gʻoliblarini aniqlash.

Komissiya tanlov oʻtkazish boʻyicha boshqa vazifalarni ham amalga oshirishi mumkin.

Komissiya oʻz faoliyatini mustaqil amalga oshiradi. Komissiya faoliyatiga gʻayriqonuniy tarzda aralashish belgilangan tartibda javobgarlikka sabab boʻladi. Oʻz navbatida, komissiya aʼzolari savdo tashkilotlari hujjatlarining xolisona koʻrib chiqilishi va baholanishi uchun javobgar hisoblanadi.

8. Byuroning hududiy boshqarmalaridagi sud hujjatlari va boshqa organlar hujjatlarini ijro etish boʻlimi Komissiyaning ishchi organi (bundan buyon matnda ishchi organ deb yuritiladi) hisoblanadi.

Quyidagilar ishchi organning vazifalari hisoblanadi:

tanlovga qatnashish uchun talabgorlardan tushgan arizalarni qabul qilish;

ommaviy axborot vositalarida, shu jumladan Internet tarmogʻi orqali tanlov oʻtkazish toʻgʻrisida eʼlon berish;

Komissiya bayonnomalarini yuritish;

manfaatdor shaxslarni tanlov shartlari hamda namunaviy shartnoma shakli bilan tanishtirish;

savdo tashkilotlari tomonidan shartnoma shartlari bajarilishini nazorat qilish;

tanlov boʻyicha kelib tushgan va yuritiladigan hujjatlarning hisobini, saqlanishini hamda maxfiyligini taʼminlash.

Ishchi organ Komissiyaning topshirigʻi asosida boshqa vazifalarni ham amalga oshirishi mumkin.

2-§. Tanlov oʻtkazishga tayyorgarlik koʻrish

9. Komissiya tanlov boshlanishidan kamida oʻttiz kun oldin ommaviy axborot vositalarida, shu jumladan Internet tarmogʻi orqali tanlov oʻtkazish toʻgʻrisida eʼlon beradi. Eʼlon beriladigan ommaviy axborot vositalari roʻyxati Byuro tomonidan belgilanadi va Byuro hamda uning hududiy boshqarmalari rasmiy veb-saytlarida joylashtiriladi.

Eʼlonda quyidagilar koʻrsatilishi shart:

tanlov oʻtkazadigan organning nomi;

tanlov oʻtkazish joyi, sanasi va vaqti;

tanlov gʻoliblarini aniqlash mezonlari;

tanlovda ishtirok etish uchun zarur boʻlgan hujjatlar roʻyxati;

ariza va hujjatlarni qabul qilib olish joyi va manzili;

tanlovda ishtirok etish uchun arizalar taqdim etishning oxirgi muddati.

10. Byuroning tegishli hududiy boshqarmasi tanlov eʼlon qilingan kundan boshlab uch kundan kechiktirmay bu haqda Byuroga xabar beradi. Byuro masʼul xodimi tanlovlarda kuzatuvchi sifatida qatnashishi mumkin.

11. Tanlov har yili bir marta oʻtkaziladi. Zaruriyat tugʻilgan hollarda Komissiya tomonidan navbatdan tashqari tanlov oʻtkazilishi ham mumkin.

12. Savdo tashkilotlari oʻrtasidagi tanlov har bir tuman (shahar) boʻyicha oldindan belgilab beriladigan gʻoliblar soni (kamida ikkita) miqdorida oʻtkaziladi.

Zarur hollarda, mahalliy sharoitlardan kelib chiqib, alohida turdagi mol-mulklarni (oziq-ovqat mahsulotlari, kiyim-kechak, texnik va maishiy tovarlar, qurilish mahsulotlari va boshqalar) sotish uchun ixtisoslashtirilgan vakolatli savdo tashkilotlari aniqlanishi mumkin.

Quyidagi turdagi mol-mulklar ixtisoslashtirilgan vakolatli savdo tashkilotlari orqali sotiladi:

qimmatbaho metallar va qimmatbaho (yarim qimmatbaho) toshlardan yasalgan buyumlar boʻyicha;

mahsuldor va ish mollari, asalari oilalari, yem-xashak, boshqa turdagi qishloq xoʻjaligi mahsulotlari boʻyicha;

yoqilgʻi-moylash materiallari, neft va gaz mahsulotlari boʻyicha;

mineral oʻgʻitlar va pestitsidlar boʻyicha;

sotish uchun alohida ruxsatnoma yoxud litsenziya talab qilinadigan boshqa mahsulotlar boʻyicha;

Komissiya tomonidan belgilab berilgan boshqa mol-mulklar boʻyicha.

Foydalanib boʻlmaydigan qora va rangli metallardan yasalgan buyumlar, shuningdek metall parchalari va ushbu metallarning chiqindilari toʻlov evaziga qora va rangli metallar parchalari va chiqindilarini yigʻish bilan shugʻullanuvchi korxonalar va tashkilotlarga toʻlov evaziga beriladi.

Foydalanilishi yoki sotilishi mumkin boʻlmagan buyumlar, shuningdek makulatura va ikkilamchi xom ashyoning boshqa turlari toʻlov evaziga ikkilamchi xom ashyoni yigʻish va qayta ishlash bilan shugʻullanuvchi tegishli tashkilotlarga toʻlov evaziga beriladi.

Komissiyaning qarori bilan alohida turdagi mol-mulklarni sotish uchun ixtisoslashtirilgan savdo tashkilotlari viloyat miqyosida ham aniqlanishi mumkin.

13. Madaniy boyliklar (tarixiy, badiiy, ilmiy qimmatga ega boʻlgan qimmatbaho asarlar, noyob qoʻlyozmalar, antikvar mahsulotlar va boshqalar) boʻyicha vakolatli savdo tashkilotlari Byuro tomonidan respublika miqyosida aniqlab beriladi.

3-§. Tanlovda ishtirok etish

14. Tanlovda qonunchilik hujjatlarida belgilangan tartibda davlat roʻyxatidan oʻtgan, turgʻun savdo shoxobchasi mavjud yuridik shaxslar qatnashishlari mumkin.

Quyidagi yuridik shaxslar tanlovga qatnashishga qoʻyilmaydilar:

qayta tashkil etish, tugatish yoki bankrot arafasida boʻlgan;

faoliyat yuritayotganiga olti oy boʻlmagan;

oxirgi ikki yil ichida ijro hujjatlari asosida xatlangan mol-mulkni sotish yuzasidan tuzilgan shartnoma boʻyicha majburiyatlarni bajarmagan yoki lozim darajada bajarmaganligi sababli shartnoma bekor qilingan boʻlsa.

15. Tanlovda ishtirok etish istagini bildirgan savdo tashkiloti Byuroning tegishli hududiy boshqarmasiga roʻyxat asosida quyidagi hujjatlarni taqdim etadi:

Komissiya nomiga ariza;

davlat roʻyxatidan oʻtkazilganlik toʻgʻrisidagi guvohnomaning nusxasi;

savdo tashkiloti taʼsis hujjatlarining nusxasi;

savdo doʻkoniga boʻlgan mulk (ijara) huquqining mavjudligini tasdiqlovchi hujjatlarning nusxasi;

savdo doʻkonining joylashgan joyi toʻgʻrisida maʼlumot, uning qisqacha tavsifnomasi va 10x15 oʻlchamdagi rangli fotosuratlari (joyning atrof koʻrinishi, umumiy tashqi va ichki koʻrinishlari aks ettirilishi kerak);

mol-mulklarning saqlanishi, turkumlanishi, sortlarga ajratilishi va butlanishini taʼminlovchi joylarning (uskunalarning) qisqacha tavsifnomasi, shuningdek 10x15 oʻlchamdagi rangli fotosuratlari (joyning umumiy tashqi va ichki koʻrinishlari aks ettiriladi);

talabgorning majburiyatlardan holi pul mablagʻlari mavjudligi toʻgʻrisida bank maʼlumotnomasi;

talabgorga tegishli hamda ijro hujjati boʻyicha mol-mulkni sotishda ishtirok etishi mumkin boʻlgan texnik soz holatdagi transport yoki boshqa texnika vositalariga oid huquqni belgilovchi hujjatlar nusxasi hamda ularning texnik tavsifi;

koʻrsatilgan xizmat uchun savdo chegirmasi miqdori (10 foizdan koʻp boʻlmagan);

savdo tashkilotining mol-mulklar realizatsiya qilish boʻyicha hisobini yuritishga moʻljallangan maxsus dasturiy taʼminotni ishlatish majburiyati.

Alohida turdagi faoliyatni amalga oshirish uchun ruxsatnoma yoki litsenziya talab qilingan hollarda, ularning nusxasi ham taqdim etiladi.

Talabgorlar mazkur Nizomning 23-bandida belgilangan baholash mezonlarini tasdiqlash uchun zarur boʻlgan boshqa qoʻshimcha hujjatlarni taqdim qilishlari mumkin.

16. Mazkur Nizomning 15-bandida koʻrsatilgan hujjatlarning haqiqiyligiga shubha tugʻilgan taqdirda, tanlov oʻtkazilishi belgilangan kunda Komissiya tomonidan mazkur hujjatlarning asl nusxalari talab qilinishi mumkin. Bunda taqdim etilgan hujjatlarning haqiqiyligi tekshiriladi va hujjatlarning asli qaytarib beriladi.

17. Savdo tashkiloti qaysi hududda faoliyat yuritayotgan boʻlsa yoki tanlov oʻtkazilayotgan tumanga (shaharga) yaqin joylashgan boʻlsa, ushbu hudud boʻyicha oʻtkaziladigan tanlovda ishtirok etish uchun hujjatlar taqdim etishi mumkin.

18. Tanlovda ishtirok etish uchun taqdim etilgan hujjatlar Komissiyaning ishchi organi tomonidan qabul qilinadi. Taqdim etilgan hujjatlarni qabul qilishni rad etish taqiqlanadi, mazkur Nizomning 14-bandida nazarda tutilgan holatlar bundan mustasno.

Ishchi organ hujjatlar qabul qilish muddati tugashiga qadar talabgorlarni tanlov shartlari va Komissiya tomonidan tasdiqlangan namunaviy shartnoma nusxasi bilan tanishtiradi.

Hujjatlar qabul qilish tanlov boshlanishidan oʻn kun oldin toʻxtatiladi.

19. Talabgorlar tomonidan soxta hujjatlar taqdim qilingani yoxud davlat ijrochilari bilan til biriktirib, noqonuniy harakatlar qilganligi aniqlangan taqdirda ular tanlovga qoʻyilmaydilar, tanlov gʻolibi deb topilgan taqdirda esa tanlov natijalarining ularga oid qismi bekor qilinadi.

4-§. Tanlov gʻoliblarini aniqlash va tanlov natijalarini eʼlon qilish

20. Tanlov gʻoliblarini aniqlash ikki bosqichda amalga oshiriladi:

birinchi bosqichda — ishchi organ tomonidan taqdim qilingan hujjatlar mazkur Nizomda belgilangan talablarga javob berishi va toʻgʻri rasmiylashtirilganligi, shuningdek Byuro hududiy boshqarmasining ichki xavfsizlikni taʼminlash shuʼbasi tomonidan talabgorning ishchanlik obroʻsi, qonunchilik hujjatlariga va Byuroning hududiy boshqarmasi bilan tuzilgan shartnoma shartlariga rioya etish ahvoli (agar bunday shartnoma tuzilgan boʻlsa), unga nisbatan nazorat idoralari tomonidan qoʻllanilgan sanksiyalar hamda talabgorning rahbar(lar)i muqaddam boshqa korxona rahbari sifatida tanlovlarda qatnashganligi va sud hujjatlari va boshqa organ hujjatlari boʻyicha mol-mulkni sotish faoliyatida javobgarlikka tortilganligi va boshqa shunga oʻxshash jihatlar tekshiriladi;

ikkinchi bosqichda — Komissiya oʻz yigʻilishida taqdim qilingan hujjatlarni oʻrganadi, mazkur Nizomning 23-bandida belgilangan mezonlar boʻyicha baholaydi hamda uning natijalari boʻyicha tanlov gʻolibini aniqlaydi.

21. Talabgorning ishchanlik obroʻsini tekshirish yakunlari boʻyicha Byuro hududiy boshqarmasining ichki xavfsizlikni taʼminlash shuʼbasi tomonidan xulosa tuzilib, u ishchi organga taqdim qilinadi.

Birinchi bosqichdan oʻtgan talabgorlarning hujjatlari ikkinchi bosqichga qoʻyiladi.

22. Ishchi organi tomonidan ayrim talabgorlarning hujjatlari birinchi bosqichdan qaytarilgan boʻlsa, ular boʻyicha umumlashgan maʼlumot sabablarini koʻrsatgan holda Komissiyaga taqdim qilinadi. Komissiya qaytarish sabablarini asossiz deb topganda, talabgorlar ikkinchi bosqichga qoʻyiladi.

23. Savdo tashkilotlari tanlovi Komissiya tomonidan kollegial tarzda hal qilinadi.

Komissiya majlislari, agar ularning ishida Komissiya aʼzolarining umumiy sonining uchdan ikki qismi ishtirok etsa, vakolatli hisoblanadi.

Komissiya aʼzolari talabgorlar tomonidan taqdim qilingan hujjatlarni oʻrganib chiqib, quyidagi mezonlar boʻyicha ularni baholaydi:

isteʼmolchi uchun joylashgan joyining qulayligi (viloyat va tuman (shahar) markazlari, bozorlar va boshqalarga yaqinligi);

mol-mulklarning saqlanishini, turkumlanishini, sortlarga ajratilishini va butlanishini taʼminlovchi joylarning (uskunalarning) mavjudligi;

majburiyatlardan holi boʻlgan pul mablagʻlarining mavjudligi;

texnik jihatdan soz boʻlgan transport va boshqa texnika vositasining mavjudligi;

koʻrsatilgan xizmat uchun savdo chegirmasining pastligi.

24. Talabgorlarning imkoniyatlari reyting shkalasida quyidagilarni inobatga olgan holda baholanadi:

isteʼmolchi uchun joylashgan joyining qulayligini (viloyat va tuman (shahar) markazlari, bozorlar va boshqalarga yaqinligi) uning aniq joylashgan oʻrni asosida oʻrganilib, talabgorga 5 balldan 10 ballgacha baho beriladi. Bunda mahalliy hokimiyat organlari tomonidan soliq solish, ijara haqi stavkasini belgilash yoxud boshqa maqsadlarda tuman (shahar) hududi tegishli zonalarga boʻlingan boʻlsa, mazkur zonalashtirish hisobga olinadi;

mol-mulklarning saqlanishini, turkumlanishini, sortlarga ajratilishini va butlanishini taʼminlovchi joylarning (uskunalarning) mavjudligi mezonini aniqlashda talabgor imkoniyati 5 balldan 8 ballgacha baholanadi;

talabgor tomonidan tanlovga taklif etilayotgan transport yoki boshqa texnika vositasi, uning turi va texnik imkoniyatlaridan kelib chiqib 3 balldan 8 ballgacha baholanadi. Tanlovda transport yoki boshqa texnika vositasiga ball berishda talabgorning ijro hujjati boʻyicha mol-mulkni sotishda ishtirok etishi mumkin boʻlgan texnik jihatdan soz boʻlgan koʻpi bilan 2 ta transport va (yoki) texnika vositalari hisobga olinadi. Bunda ijaraga olingan transport yoki boshqa texnika vositasi hisobga olinmaydi;

talabgorning hisobvaragʻidagi majburiyatlardan holi boʻlgan pul mablagʻlari 2 balldan 5 ballgacha baholanadi;

koʻrsatilgan xizmat uchun savdo chegirmasining pastligi 5 balldan 8 ballgacha baholanadi.

Talabgorlar tomonidan taqdim etilgan maʼlumotlar mazkur bandning ikkinchi — oltinchi xatboshilarida koʻrsatilgan mezonlarga javob bermasa, ularga ushbu mezon boʻyicha ball berilmaydi.

25. Komissiya yigʻilishida talabgorning har bir mezonlar boʻyicha tegishli ballni berish masalasi Komissiya aʼzolari tomonidan mazkur Nizomning 1-ilovasida nazarda tutilgan koʻrsatkichlar asosida koʻpchilik ovoz bilan hal etiladi va har bir mezon boʻyicha yagona ball beriladi.

26. Eng koʻp yakuniy ball toʻplagan talabgorlar Komissiya yigʻilishida tanlov gʻoliblari deb topiladi.

Agar ikki va undan ortiq talabgor bir xil ball toʻplagan taqdirda, ular orasida nisbatan past savdo chegirmasi taklif qilgan talabgor tanlov gʻolibi deb topiladi.

27. Tanlov gʻoliblari deb topish toʻgʻrisidagi qaror Komissiya aʼzolarining oddiy koʻpchilik ovozi bilan qabul qilinadi. Ovozlar teng boʻlib qolgan hollarda Komissiya raisining ovozi hal qiluvchi hisoblanadi.

28. Komissiya qarori bayonnoma bilan rasmiylashtiriladi. Bayonnoma Komissiya raisi va kotibi tomonidan imzolanadi.

Bayonnomada quyidagilar koʻrsatilishi shart:

yigʻilish oʻtkazilgan joy va sana;

yigʻilishda ishtirok etgan Komissiya aʼzolari;

tanlovda ishtirok etish uchun hujjatlar taqdim etgan talabgorlarning roʻyxati;

talabgorlar takliflarini baholash haqidagi maʼlumot;

tanlov gʻoliblari toʻgʻrisida maʼlumot.

29. Tanlov natijalari boʻyicha bayonnoma imzolanganidan soʻng besh kunlik muddat ichida tanlov gʻoliblari va Byuro hududiy boshqarmalari, uning tuman (shahar) boʻlimlari oʻrtasida muddatini uzaytirish huquqi bilan bir yil muddatga ijro hujjatlari boʻyicha mol-mulkni sotish toʻgʻrisida tasdiqlangan namunaviy shakldagi shartnoma tuziladi.

Byuroning markaziy apparati Byuro sud hujjatlari va boshqa organlar hujjatlarini ijro etish boshqarmasi ish yurituvidagi ijro hujjatlari boʻyicha tanlovda gʻolib deb topilgan har qanday savdo tashkiloti bilan mol-mulkni sotish toʻgʻrisida shartnoma tuzishi mumkin.

Shartnomaning amal qilish muddatini uzaytirishda savdo tashkilotlari tomonidan shartnoma shartlariga rioya qilinganligi hamda ular tomonidan ijro hujjatlari boʻyicha savdoni tashkil etish va oʻtkazish tartibini buzish holatlariga yoʻl qoʻyilmaganligi inobatga olinadi.

30. Shartnoma tuzilganidan soʻng Byuro hududiy boshqarmasi tomonidan bir kunlik muddat ichida vakolatli savdo tashkilotlarining roʻyxati Byuroga va uning tegishli tuman (shahar) boʻlimlariga yuboriladi. Shuningdek, tanlovni oʻtkazish toʻgʻrisida eʼlon berilgan ommaviy axborot vositalarida bu haqda maʼlumot beriladi.

3-bob. Ijro hujjatlari asosida sotiladigan mol-mulkni sotuvga chiqarish va sotish tartibi

31. Ijro hujjatlari asosida davlat daromadiga oʻtkaziladigan mol-mulkni sotish Oʻzbekiston Respublikasi Vazirlar Mahkamasining 2009-yil 15-iyuldagi 200-son qarori bilan tasdiqlangan Davlat daromadiga oʻtkaziladigan mol-mulkni olib qoʻyish, sotish yoki yoʻq qilib tashlash tartibi toʻgʻrisidagi nizomga asosan amalga oshiriladi.

Ijro hujjatlari asosida sotuvga chiqariladigan mol-mulk savdo tashkilotlariga topshirilgunga qadar qonunchilik hujjatlarida belgilangan tartibda baholanadi.

32. Xatlangan mol-mulk uni baholash toʻgʻrisidagi xulosa baholovchidan olingan kundan boshlab, qonunchilik hujjatlarida nazarda tutilgan hollarda davlat ijrochisi tomonidan baholanganda esa, mol-mulkni baholangan kundan boshlab 3 kun ichida dalolatnoma asosida davlat ijrochisi tomonidan savdo tashkilotiga topshiriladi.

Dalolatnoma mazkur Nizomning 2-ilovasida belgilangan shaklda tuziladi.

33. Mol-mulkni sotish toʻgʻrisidagi dalolatnomaga quyidagilar ilova qilinadi:

ijro hujjatining nusxasi;

mol-mulkni xatlash (roʻyxatga olish) dalolatnomasining nusxasi;

mol-mulkni tavsiflovchi hujjatlar va (yoki) baholash toʻgʻrisidagi xulosa nusxalari;

sertifikatlanishi shart boʻlgan tovarlar boʻyicha muvofiqlik sertifikatlari.

34. Ijro hujjatlari ijrosini oʻz vaqtida taʼminlash uchun miqdori, hajmi va tez sotilishi imkoniyatlaridan kelib chiqib, mol-mulk bir vaqtning oʻzida sotish uchun shartnoma tuzilgan bir nechta savdo tashkilotlariga berilishi mumkin.

35. Sotish uchun savdo tashkilotlariga beriladigan barcha mol-mulklar muvofiqlik sertifikatlari (sertifikatlanishi shart boʻlgan tovarlar boʻyicha) va roʻyxatga olish dalolatnomasida yoki qabul qilish-topshirish dalolatnomasida nazarda tutilgan tartib raqamlari, shuningdek qonunchilik hujjatlariga muvofiq boshqa maʼlumotlar koʻrsatilgan holda savdo tashkilotining tovar yorliqlari bilan taʼminlanishi kerak.

Mol-mulklarni juzʼiy taʼmirlash, tozalash va tekislash ularni sotish uchun qabul qilib olgan savdo tashkilotlari hisobidan amalga oshiriladi.

36. Savdo tashkilotlari tomonidan mol-mulkni sotish Oʻzbekiston Respublikasi Vazirlar Mahkamasining 2003-yil 13-fevraldagi 75-son qarori bilan tasdiqlangan Oʻzbekiston Respublikasida chakana savdo qoidalariga muvofiq amalga oshiriladi.

37. Mol-mulk savdo tashkilotlariga sotish uchun topshirilgan kundan eʼtiboran oʻttiz kun ichida belgilangan narxda sotilmasa, savdo tashkiloti mol-mulk narxini kamaytirish yoxud uni qaytarib olish masalasini koʻrib chiqish uchun davlat ijrochisiga yozma ravishda xabarnoma yuboradi.

Davlat ijrochisi qonunchilik hujjatlarida belgilangan tartibda sotilmagan mol-mulk narxini kamaytirish yoxud uni qaytarib olish masalasini hal qiladi.

4-bob. Savdo tashkilotlari tomonidan shartnoma shartlariga, shuningdek mol-mulkni sotish tartibiga rioya etilishi ustidan nazorat qilish

38. Mol-mulkni topshirgan Byuroning hududiy tuzilmasi va savdo tashkiloti oʻrtasida sotuvga topshirilgan va sotilgan mol-mulk hamda sotuvdan tushgan pul mablagʻlari toʻgʻrisida har oyda keyingi oyning beshinchi sanasiga qadar maʼlumot almashinib boriladi (shu jumladan, axborot-kommunikatsiya texnologiyalari yordamida), shuningdek har chorak yakuni boʻyicha savdo tashkilotlarida sotilmasdan qoldiqda qolgan mol-mulklar sanoqdan oʻtkazilib, chorak yakuni boʻyicha keyingi oyning beshinchi sanasiga qadar mazkur Nizomning 3-ilovasida belgilangan shaklga muvofiq taqqoslash dalolatnomalari tuzilib, bir nusxasi Byuroga taqdim etib boriladi.

39. Savdo tashkilotlari tomonidan shartnoma shartlariga, shuningdek mol-mulkni sotish tartibiga rioya etilishi ustidan nazorat shartnomani tuzgan tegishli Byuro va uning hududiy tuzilmalari tomonidan amalga oshiriladi.

Shartnoma shartlari va mol-mulkni sotish tartibi buzilgan taqdirda Byuro va uning hududiy tuzilmalari shartnomani bir tomonlama bekor qilish hamda mol-mulkni mazkur Nizom asosida tanlab olingan boshqa savdo tashkilotiga olib berishga haqlidir.

5-bob. Mol-mulkni realizatsiya qilishdan tushadigan pul mablagʻlarini hisobga olish

40. Mol-mulkni realizatsiya qilishdan tushgan pul mablagʻlarini oʻtkazish uchun Byuro va uning hududiy tuzilmalari tomonidan bankda depozit hisob raqami ochiladi.

41. Mol-mulkni realizatsiya qilishdan tushgan pul mablagʻlari, savdo chegirmasini ushlab qolgan holda, realizatsiya qilinishiga qarab savdo tashkiloti tomonidan Byuro yoki uning hududiy tuzilmasidagi depozit hisob raqamiga ikki bank ish kunidan kechikmay, ijro hujjatining tartib raqami va sanasi koʻrsatilgan holda oʻtkaziladi.

Mol-mulkni realizatsiya qilishdan tushgan summani oʻtkazish muddati kechikkan taqdirda savdo tashkiloti kechikkan har bir kun uchun toʻlanadigan summaning 0,5 foizi miqdorida penya undiriladi.

42. Byuro yoki uning hududiy tuzilmasining depozit hisob raqamiga mol-mulkni realizatsiya qilishdan kelib tushgan mablagʻlarni taqsimlash qonunchilik hujjatlarida belgilangan tartibda amalga oshiriladi.

6-bob. Yakuniy qoidalar

43. Byuro va uning hududiy tuzilmalari savdo va ixtisoslashgan tashkilotlar, shuningdek bozorlar tomonidan ijro hujjatlari boʻyicha mol-mulkni sotishni tashkil etilishi va oʻtkazilishi ustidan doimiy nazoratni amalga oshiradi.

44. Mazkur Nizom Oʻzbekiston Respublikasi Savdo-sanoat palatasi bilan kelishilgan.

Savdo-sanoat palatasi raisi A. IKRAMOV

2018-yil 25-may

Ijro hujjatlari boʻyicha mol-mulkni sotish tartibi toʻgʻrisidagi nizomga 1-ILOVA

Tanlovda ishtirok etish uchun savdo tashkilotlarini tanlashda talabgorlarning imkoniyatlarini baholash

REYTINGI

T/r Baholash mezonlari Reyting koʻrsatkichlari Reyting ballari 1. Isteʼmolchi uchun joylashgan joyining qulayligi (viloyat va tuman (shahar) markazlari, bozorlar va boshqalarga yaqinligi) a) aholi gavjum viloyat va tuman (shahar) markazida, bozorlar va savdo markazlarda yoxud ularning yaqin atrofida joylashgan talabgor 8 balldan 10 ballgacha b) mazkur bandning “a” kichik bandida koʻrsatilmagan boshqa aholi gavjum boʻlgan va transport vositalari serqatnov yoʻl boʻyida joylashgan talabgor 6 balldan 8 ballgacha v) mazkur bandning “a” va “b” kichik bandlarida koʻrsatilmagan aholi gavjum boshqa hududlarda joylashgan talabgor 5 balldan 6 ballgacha 2. Mol-mulklarning saqlanishini, turkumlanishini, sortlarga ajratilishini va butlanishini taʼminlovchi joylar (uskunalar) Maxsus saqlash binosi yoki joyi (omborxona, yertoʻla, muzlatgich, sovutgich va boshqalar), mol-mulklarning turkumlanishi, sortlarga ajratilishi va butlanishini taʼminlovchi yetarlicha savdo asbob-anjomlari va maxsus sotish joylari 5 balldan 8 ballgacha 3. Talabgorga tegishli texnik jihatdan soz boʻlgan transport va boshqa texnika vositasi Yuk mashinasi 8 ball Yuk tashishga ixtisoslashgan yengil mashina 6 ball Yengil mashina 4 ball Yuk tashishga ixtisoslashgan mototsikl 3 ball Yuk ortuvchi uskuna (pogruzchik) 4 ball 4. Talabgorning majburiyatlardan holi boʻlgan mavjud pul mablagʻi 100 mln. soʻmdan yuqori 5 ball 50 mln. dan — 100 mln.soʻmgacha 4 ball 10 mln. dan — 50 mln. soʻmgacha 3 ball 5 mln. dan — 10 mln. soʻmgacha 2 ball 5. Koʻrsatilgan xizmat uchun savdo chegirmasining pastligi 5 foizgacha 8 ball 5 foizdan 7 foizgacha 7 ball 7 foizdan 9 foizgacha 6 ball 9 foizdan 10 foizgacha 5 ball

Ijro hujjatlari boʻyicha mol-mulkni sotish tartibi toʻgʻrisidagi nizomga 2-ILOVA

* Byuro organining depozit hisob raqamlari koʻrsatiladi, davlat daromadiga oʻtkazilgan mol-mulkni sotishda esa maxsus hisob raqam koʻrsatiladi.

Ijro hujjatlari boʻyicha mol-mulkni sotish tartibi toʻgʻrisidagi nizomga 3-ILOVA

Davlat ijrochilari tomonidan sotuvga chiqarilgan mol-mulklar harakati yuzasidan Byuroning ____________ tuman (shahar) boʻlimi va ___________ savdo tashkiloti oʻrtasida ______ yilning ___-chorak holatiga tuzilgan

TAQQOSLASH DALOLATNOMASI

* Faqat davlat daromadiga oʻtkazilishi lozim boʻlgan mol-mulklar boʻyicha toʻldiriladi.