Oʻzbekiston fermerlari kengashi huzuridagi Fermer xoʻjaliklarini qoʻllab-quvvatlash jamgʻarmasi faoliyatini tashkil etish toʻgʻrisida (433-son)

07.06.2018

Oʻzbekiston Respublikasi Vazirlar Mahkamasining

qarori

Oʻzbekiston Respublikasi Prezidentining 2018-yil 26-apreldagi “Fermer, dehqon xoʻjaliklari va tomorqa yer egalari faoliyatini takomillashtirish boʻyicha qoʻshimcha chora-tadbirlar toʻgʻrisida” PQ-3680-son qarori ijrosini taʼminlash, Oʻzbekiston fermer, dehqon xoʻjaliklari va tomorqa yer egalari kengashi huzuridagi Fermer, dehqon xoʻjaliklari va tomorqa yer egalarini qoʻllab-quvvatlash jamgʻarmasi (keyingi oʻrinlarda Jamgʻarma deb ataladi) faoliyatini tashkil etish maqsadida Vazirlar Mahkamasi qaror qiladi:

1. Quyidagilar:

Oʻzbekiston fermerlari kengashi huzuridagi Fermer xoʻjaliklarini qoʻllab-quvvatlash jamgʻarmasi vasiylik kengashining tarkibi 1-ilovaga muvofiq;

Oʻzbekiston fermerlari kengashi huzuridagi Fermer xoʻjaliklarini qoʻllab-quvvatlash jamgʻarmasi ijro etuvchi apparatining tuzilmasi 2-ilovaga muvofiq;

Oʻzbekiston fermerlari kengashi huzuridagi Fermer xoʻjaliklarini qoʻllab-quvvatlash jamgʻarmasi toʻgʻrisidagi nizom 3-ilovaga muvofiq tasdiqlansin.

Jamgʻarmaning ijro etuvchi apparati, jumladan, markaziy apparati va hududiy vakillari shtat birliklari soni Jamgʻarma vasiylik kengashi tomonidan belgilanadi. Bunda Jamgʻarma ish hajmidan kelib chiqib, Vasiylik kengashiga Jamgʻarmaga qoʻshimcha shtat birliklari jalb etish, Oʻzbekiston fermerlari kengashiga zarurat boʻlganda Jamgʻarmaning ijro etuvchi apparati tuzilmasiga oʻzgartirishlar kiritish huquqi berilsin.

Belgilab qoʻyilsinki:

“Tomorqa xizmati” MCHJlarning ustav fondlarida Jamgʻarma mablagʻlari hisobiga shakllantirilgan ulush nomidan Oʻzbekiston fermerlari kengashi, hududiy fermerlar kengashlari ishtirokchi boʻlishi mumkin;

hududiy fermerlar kengashlari raislari “Tomorqa xizmati” MCHJ ustav fondidagi ulushlarning samarali boshqarilishi uchun shaxsan masʼul hisoblanadi;

Jamgʻarma ijrochi etuvchi direktori lavozimiga koʻra Oʻzbekiston fermerlari kengashi raisining oʻrinbosari hisoblanadi, Jamgʻarmaning hududiy vakillari hududiy fermerlar kengashlari raislari oʻrinbosarlari hisoblanadi. Bunda Jamgʻarma ijrochi direktoriga Kengash faoliyatida ishtirokidan kelib chiqib, Kengash mablagʻlari hisobidan qoʻshimcha ragʻbatlantirish toʻlovlari amalga oshirilishi mumkin.

Jamgʻarma tomonidan fermer xoʻjaliklariga va boshqa qishloq xoʻjaligi korxonalariga qonunchilikda belgilangan tartibda meva-sabzavotlarni qayta ishlash (quritish) korxonalari, sovitish omborxonalari, chorvachilik komplekslari, ishlab chiqarish bino-inshootlari, issiqxona majmualari qurib berish, tayyor intensiv bogʻlar va tokzorlar barpo etish, qishloq xoʻjaligida zanjirli ishlab chiqarishni yoʻlga qoʻyib, yakuniy mahsulot ishlab chiqarishga ixtisoslashgan, jumladan, omuxta yem tayyorlash, sutni qayta ishlash, tomat pasta ishlab chiqarish, mineral oʻgʻitlar tayyorlash, oʻsimliklarga kimyoviy ishlov berish, qadoqlash va saralash uskunalari bilan taʼminlash boʻyicha lizing faoliyatini amalga oshirish tartibi Jamgʻarma vasiylik kengashi tomonidan tasdiqlanadi.

Oʻzbekiston Respublikasi Prezidentining 2018-yil 26-apreldagi “Fermer, dehqon xoʻjaliklari va tomorqa yer egalari faoliyatini takomillashtirish boʻyicha qoʻshimcha chora-tadbirlar toʻgʻrisida”gi PQ-3680-son qaroriga muvofiq mablagʻlarni tijorat banklariga joylashtirish hisobidan olinadigan daromadlarning 30 foizgacha miqdordagi Jamgʻarma daromadlari Kengashni moddiy-texnik hamda moliyaviy jihatdan taʼminlash, shuningdek, uning xodimlarini moddiy ragʻbatlantirish uchun yoʻnaltirilishi maʼlumot uchun qabul qilinsin.

Mazkur bandning oʻn birinchi xatboshisidagi maqsadlar uchun Jamgʻarmaning “Tomorqa xizmati” MCHJ ustav kapitalidagi ulushlarini nominal (balans) qiymatida Oʻzbekiston fermerlari kengashiga hamda hududiy fermerlar kengashlariga berishga rozilik berilsin.

2. Jamgʻarma Toshkent shahar, Islom Karimov koʻchasi, 2A-uy manziliga bepul foydalanish huquqi bilan joylashtirilsin hamda mazkur manzilda ajratilgan hudud va xonalarni Jamgʻarma mablagʻlari hisobidan taʼmirlash vakolati berilsin.

Jamgʻarma Vasiylik kengashi bilan kelishgan holda Toshkent shahri hududida yer maydoni sotib olib, maʼmuriy bino qurishi yoki tayyor binoni xarid qilishi mumkin.

3. Oʻzbekiston Respublikasi Axborot texnologiyalari va kommunikatsiyalarini rivojlantirish vazirligi Jamgʻarmani belgilangan tartibda Hukumat va shahar aloqa vositalari bilan taʼminlasin.

4. Jamgʻarmaning Vasiylik kengashi raisi (Z. Mirzayev) Jamgʻarmaning Vasiylik kengashi toʻgʻrisidagi nizomni bir oy muddatda tasdiqlasin.

6. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari Z.T. Mirzayev hamda Oʻzbekiston fermer, dehqon xoʻjaliklari va tomorqa yer egalari kengashi raisi vazifasini bajaruvchi A.A. Xaitov zimmasiga yuklansin.

Oʻzbekiston Respublikasining Bosh vaziri A. ARIPOV

Toshkent sh.,

2018-yil 7-iyun,

433-son

Vazirlar Mahkamasining 2018-yil 7-iyundagi 433-son qaroriga 1-ILOVA

Oʻzbekiston fermerlari kengashi huzuridagi Fermer xoʻjaliklarini koʻllab-quvvatlash jamgʻarmasi vasiylik kengashining

TARKIBI

Sh.M. Gʻaniyev—Oʻzbekiston Respublikasi Prezidenti maslahatchisi, Vasiylik kengashi raisiA.A. Xaitov—Oʻzbekiston fermerlari kengashi raisi, Vasiylik kyengashi raisining oʻrinbosariE.M. Muxitdinov—kambagʻallikni qisqartirish va bandlik vazirining oʻrinbosariA.R. Karimov—iqtisodiyot va moliya vazirining oʻrinbosariA.A. Raximov—Oʻzbekiston fermerlari kengashi raisining oʻrinbosari I. Amanov—ATB “Agrobank” raisi oʻrinbosariR. Sulaymonov—ATB “Mikrokreditbank” raisining oʻrinbosariG.A. Rashidova—AT “Xalq banki” raisining oʻrinbosariT.A. Sattarov—Oʻzbekiston fermerlari kengashi huzuridagi Fermer xoʻjaliklarini qoʻllab-quvvatlash jamgʻarmasining ijrochi direktori, Vasiylik kyengashi aʼzosi va masʼul kotibi.

Izoh: Vasiylik kengashi aʼzolari boshqa ishga oʻtgan taqdirda, sobiq aʼzolarning vazifalari ushbu lavozimlarga yangidan tayinlangan shaxslar zimmasiga yuklanadi.

Vazirlar Mahkamasining 2018-yil 7-iyundagi 433-son qaroriga 2-ILOVA

Oʻzbekiston fermerlari kengashi huzuridagi Fermer xoʻjaliklarini qoʻllab-quvvatlash jamgʻarmasi ijro etuvchi apparati

TUZILMASI

Jamgʻarma vasiylik kengashiJamgʻarma ijro etuvchi direktoriFermer xoʻjaliklariga xizmat koʻrsatish infratuzilmasini rivojlantirish va innovatsiyalarni qoʻllab-quvvatlash boʻlimi*3Fermer xoʻjaliklari va qishloq xoʻjaligi korxonalarini moliyaviy qoʻllab-quvvatlash uchun tijorat banklariga resurs ajratish boʻlimi**2Buxgalteriya boʻlimi ***2Yuristkonsult ***1Jamgʻarmaning hududiy vakillari 16

Jamgʻarmaning ijro etuvchi apparati, jumladan, markaziy apparati va hududiy vakillari shtat birliklari miqdori Jamgʻarma vasiylik kengashi tomonidan belgilanadi. Bunda Jamgʻarma ish hajmidan kelib chiqib, Vasiylik kengashiga Jamgʻarmaga qoʻshimcha shtat birliklari jalb etish huquqi berilgan.

* Boʻlim boshligʻi bir vaqtning oʻzida Jamgʻarma ijro etuvchi direktori oʻrinbosari hisoblanadi, Kengash raisi bilan kelishgan holda oʻrinbosar vazifasini bajarish boshqa boʻlimlar boshliqlariga yuklatilishi mumkin.

** Lizing faoliyatini amalga oshirish uchun Jamgʻarma ulushi ishtirokida masʼuliyati cheklangan jamiyat shaklida yuridik shaxs tashkil etilishi mumkin;

*** Yuridik xizmat va buxgalteriya xizmati autsorsing asosida tashkil etilishi mumkin.

Vazirlar Mahkamasining 2018-yil 7-iyundagi 433- son qaroriga 3-ILOVA

Oʻzbekiston fermerlari kengashi huzuridagi Fermer xoʻjaliklarini qoʻllab-quvvatlash jamgʻarmasi toʻgʻrisida

NIZOM

1-bob. Umumiy qoidalar

1. Ushbu Nizom Oʻzbekiston fermerlari kengashi huzuridagi Fermer xoʻjaliklarini qoʻllab-quvvatlash jamgʻarmasining (keyingi oʻrinlarda Jamgʻarma deb ataladi) vazifalari va faoliyati yoʻnalishlarini, boshqarish tartibini, shuningdek, uning mablagʻlarini shakllantirish va ulardan foydalanish tartibini belgilaydi.

Jamgʻarma oʻz faoliyatida Oʻzbekiston fermerlari kengashiga (keyingi oʻrinlarda Kengash deb ataladi) hisobot beradi.

2. Jamgʻarma oʻz faoliyatida Oʻzbekiston Respublikasi Konstitutsiyasi va qonunlariga, Oʻzbekiston Respublikasi Oliy Majlisi palatalari qarorlariga, Oʻzbekiston Respublikasi Prezidentining farmonlari, qarorlari va farmoyishlariga, Vazirlar Mahkamasining qarorlari va farmoyishlariga, ushbu Nizomga, shuningdek boshqa qonun hujjatlariga amal qiladi.

3. Jamgʻarma muassasa shaklidagi yuridik shaxs hisoblanadi, oʻzining mustaqil balansiga, milliy va xorijiy valyutada bank hisob raqamlariga, oʻz emblemasi tasviri tushirilgan va nomi davlat tilida yozilgan muhrga, shtamplarga va blankalarga ega.

2-bob. Jamgʻarmaning asosiy vazifalari va faoliyati yoʻnalishlari

4. Fermer xoʻjaliklari va boshqa qishloq xoʻjaligi korxonalarini moliyaviy qoʻllab-quvvatlash Jamgʻarmaning asosiy vazifalari hisoblanadi.

5. Jamgʻarma oʻz faoliyatini quyidagi asosiy yoʻnalishlar boʻyicha amalga oshiradi:

fermer xoʻjaliklari va boshqa qishloq xoʻjaligi korxonalari faoliyatini rivojlantirish, kredit resurslaridan foydalanishni kengaytirish sohasida qoʻllab-quvvatlash;

fermer xoʻjaliklari va boshqa qishloq xoʻjaligi korxonalarining innovatsion faoliyatini qoʻllab-quvvatlash, yangi turdagi qishloq xoʻjaligi mahsulotlari yetishtirishni ragʻbatlantirish, shuningdek qishloq xoʻjaligida yangi samarali texnologiyalarni joriy qilishga koʻmaklashish;

qishloq xoʻjaligi faoliyatini rivojlantirishga koʻmaklashuvchi davlat, tarmoq va hududiy dasturlarni, loyihalar hamda tadbirlarni amalga oshirishda ishtirok etish.

fermer xoʻjaliklari va boshqa qishloq xoʻjaligi korxonalarini Jamgʻarma mablagʻlari hisobidan qonunchilikda belgilangan tartibda qishloq xoʻjaligi texnikasi va texnologiyalari, qishloq xoʻjaligi mahsulotlarini tashishga moʻljallangan transport vositalari, asbob-uskunalar yoki ular joylashgan bino-inshootlar bilan birga, shuningdek, tayyor intensiv bogʻ va tokzorlar hamda issiqxonalar bilan taʼminlash boʻyicha lizing faoliyatini amalga oshirish.

3 bob. Jamgʻarmani boshqarish

6. Jamgʻarmaning Vasiylik kengashi Jamgʻarmani boshqarishning yuqori organi hisoblanadi.

7. Jamgʻarmaning Vasiylik kengashi:

Jamgʻarma Vasiylik kengashi toʻgʻrisida nizomni tasdiqlaydi;

Jamgʻarmaning daromadlari boʻyicha har yilgi prognozlarni tasdiqlaydi;

Jamgʻarma tomonidan tijorat banklariga resurs ajratish, lizing xizmatlarini koʻrsatish hamda Jamgʻarmaning boshqa asosiy faoliyat yoʻnalishlariga mablagʻlar ajratishning har yilgi prognoz parametrlarini belgilaydi. Bunda Jamgʻarma mablagʻlari hisobidan moliyalashtiriladigan loyihalarga tashabbuskorlarning talabidan kelib chiqqan holda har yilgi parametrlardan kelib chiqib qoʻshimcha mablagʻlar ajratilishi mumkin;

Jamgʻarmaning ijro etuvchi apparati faoliyati ustidan nazorat qiladi;

Jamgʻarma ijro etuvchi direktorining Jamgʻarma mablagʻlaridan foydalanilishi toʻgʻrisidagi hisobotlarini muntazam eshitadi;

har chorakda hisobot davridan keyingi oyning 20-kunidan kechikmay Oʻzbekiston Respublikasi Iqtisodiyot va moliya vazirligiga Jamgʻarma mablagʻlari shakllantirilishi va ulardan foydalanilishi toʻgʻrisida hisobotlar taqdim etadi;

Jamgʻarmani yillik auditdan oʻtkazish uchun, shu jumladan, uning mablagʻlaridan maqsadli foydalanish boʻyicha auditorlik tashkilotini belgilaydi;

Jamgʻarma ishtirokchi hisoblangan masʼuliyati cheklangan jamiyatlar ustav kapitalidagi ulushlarini va ularning yirik bitimlari doirasidagi aktivlarini tasarrufidan chiqarish tartibini belgilaydi, odatdagi xoʻjalik faoliyati jarayonida tuziladigan bitimlar bundan mustasno;

Oʻzbekiston Respublikasi Vazirlar Mahkamasiga Jamgʻarmaning ustav kapitalini koʻpaytirish toʻgʻrisida takliflar kiritadi.

Jamgʻarma Vasiylik kengashi qarorlari ochiq ovoz berish orqali, oddiy koʻpchilik ovoz bilan qabul qilinadi. Vasiylik kengashi majlis bayonlari soʻrov oʻtkazish yoʻli bilan rasmiylashtirilishi mumkin.

Jamgʻarmaning Vasiylik kengashi aʼzolariga yuklangan vazifalar bajarilganligi uchun Jamgʻarmaning Vasiylik kengashi toʻgʻrisidagi nizomda belgilangan tartibda va miqdorlarda taqdirlash pullari toʻlanadi.

8. Jamgʻarmaning ijro etuvchi apparati Jamgʻarmaning ijroiya organi hisoblanadi. Jamgʻarmaning ijro etuvchi direktori (keyingi oʻrinlarda Ijro etuvchi direktor deb ataladi) Jamgʻarma ijro etuvchi apparati rahbari hisoblanadi.

9. Ijro etuvchi direktor:

Jamgʻarmaning joriy faoliyatiga operativ rahbarlik qiladi;

Jamgʻarmaga yuklangan vazifalarga muvofiq Jamgʻarmaning ijro etuvchi apparati faoliyatini tashkil etadi va shaxsan javob beradi;

Jamgʻarmaning ijro etuvchi apparati xodimlarini ishga qabul qiladi va ular bilan tuzilgan mehnat shartnomalari amal qilishini toʻxtatadi, ularning lavozim majburiyatlari va vakolatlarini taqsimlaydi;

xalqaro va xorijiy tashkilotlarda Jamgʻarma nomidan ish koʻradi;

Jamgʻarma nomidan mehnat, xoʻjalik, kredit shartnomalarini va boshqa shartnomalarni, shu jumladan, resurslarni ajratish va tijorat banklarining depozitlarida joylashtirish toʻgʻrisidagi shartnomalarni imzolaydi;

Jamgʻarmaning pul mablagʻlari va moddiy boyliklarining buxgalteriya hisobi yuritilishini, moliyaviy va statistika hisobotlari belgilangan tartibda tayyorlanishi va taqdim etilishini tashkil etadi;

qonun hujjatlariga muvofiq boshqa majburiyatlar va vakolatlarni amalga oshiradi.

Mazkur bandda nazarda tutilayotgan majburiyat va vakolatlar Jamgʻarma ijro etuvchi direktori oʻrinbosari zimmasiga yuklatilishi mumkin.

10. Jamgʻarmaning ijro etuvchi apparatini saqlab turish Jamgʻarmaning Vasiylik kengashi tomonidan tasdiqlanadigan daromadlar va xarajatlar smetasi asosida Jamgʻarmaning mablagʻlari hisobiga amalga oshiriladi.

11. Jamgʻarma ijro etuvchi direktori va xodimlarini moddiy ragʻbatlantirish Jamgʻarma Vasiylik kengashi tomonidan tasdiqlanadigan Jamgʻarma xodimlarini moddiy ragʻbatlantirish toʻgʻrisidagi nizomga asosan Jamgʻarma mablagʻlari hisobidan amalga oshiriladi.

13. Jamgʻarma xodimlarining ish haqi lavozim maoshi, mukofotlar, qoʻshimcha haq va ustamalar, ragʻbatlantiruvchi toʻlovlar, shuningdek, qonun hujjatlarida hamda Jamgʻarma xodimlarini moddiy ragʻbatlantirish toʻgʻrisidagi nizomda nazarda tutilgan qoʻshimcha moddiy ragʻbatlantirish mablagʻlaridan tashkil topadi.

Jamgʻarma xodimlarining lavozim maoshlari Jamgʻarma Vasiylik kengashi tomonidan tasdiqlanadigan shtatlar jadvali asosida belgilanadi.

Jamgʻarma oʻz xodimlarining lavozim maoshlariga 5 baravargacha oʻsib boruvchi koeffitsiyentni qoʻllashga haqli.

14. Jamgʻarmaga yuklangan vazifalarni bajarish uchun Jamgʻarma daromadlari va xarajatlari smetasiga muvofiq oʻn beshta xizmat avtotransport vositasini xarid qilish va saqlash uchun mablagʻ ajratiladi.

Jamgʻarmada ish yuritish jarayonini raqamlashtirish maqsadida Jamgʻarma vasiylik kengashi bilan kelishgan holda uning faoliyatidagi barcha hisob-kitoblarni va hujjatlashtirish jarayonini qamrab oluvchi hamda “oilakredit.uz” yagona elektron platformasiga integratsiya qilinadigan axborot dasturi yaratiladi.

4-bob. Jamgʻarma mablagʻlarini shakllantirish va ulardan foydalanish

15. Jamgʻarma mablagʻlari quyidagi manbalar hisobiga shakllantiriladi:

Jamgʻarmaga yuklangan vazifalarni bajarish uchun jalb qilinadigan xalqaro moliya institutlari, xorijiy hukumat tashkilotlari va boshqa donorlarning kreditlari (qarzlari) va grantlari;

Jamgʻarmaning daromadlari, shu jumladan, mablagʻlarni depozit hisob raqamlariga joylashtirishdan olinadigan daromadlar;

qonun hujjatlarida taqiqlanmagan boshqa manbalar.

Jamgʻarmaga kelib tushgan mablagʻlar uning oʻz mablagʻlari hisoblanadi va Jamgʻarmaning Vasiylik kengashi tomonidan tasdiqlanadigan daromadlar va xarajatlar smetasi asosida sarflanadi.

16. Jamgʻarma mablagʻlari Jamgʻarmaning tijorat banklarida ochiladigan hisob raqamlarida jamlanadi.

17. Jamgʻarma mablagʻlari quyidagilar uchun sarflanadi:

fermer xoʻjaliklari va ular bilan hamkorlikda ishlaydigan dehqon xoʻjaliklari hamda boshqa qishloq xoʻjaligi korxonalariga chorvachilik (qoramol, qoʻy, echki), baliqchilik, quyonchilik, asalarichilik, kurkachilik va parrandachilik, biogumus ishlab chiqarish, agroturizm loyihalari, suv chiqarish uchun tejamkor nasos agregatlari xarid qilish, qishloq xoʻjaligi maqsadlarida quyosh panellarini oʻrnatish, artezian quduqlarini qazish, yomgʻirlatib sugʻorish tizimini oʻrnatish va dala doʻkonlarini qurish uchun — 1 yilgacha imtiyozli davr bilan 4 yil muddatga kreditlar ajratish uchun resurslarni tijorat banklariga joylashtirish. Bunda kreditlar yillik Markaziy bankning asosiy stavkasidan 4 foizlik punkt yuqori stavkada (shundan 4 foizi bank marjasi) beriladi;

fermer xoʻjaliklari va ular bilan hamkorlikda ishlaydigan dehqon xoʻjaliklari hamda boshqa qishloq xoʻjaligi korxonalariga bogʻdorchilik (koʻchatchilik), uzumchilik (tok soʻrisi) va limonchilikni tashkil etish, issiqxona qurish, qishloq xoʻjaligi texnikasi va transporti hamda asbob-uskunalarini xarid qilish, ularni joylashtirish uchun bino va inshootlar (jumladan, yozgi toʻrli issiqxonalar) qurish, koʻchma muzlatkichlarni oʻrnatish, agrologistika markazlarini tashkil etish, “in-vitro” va boshqa laboratoriyalar, sovutish omborxonalarini tashkil etish uchun — 3 yilgacha imtiyozli davr bilan 7 yilgacha kreditlar ajratish uchun resurslarni tijorat banklariga joylashtirish. Bunda kreditlar yillik Markaziy bankning asosiy stavkasidan 4 foizlik punkt yuqori stavkada (shundan 4 foizi bank marjasi) beriladi;

qishloq xoʻjaligi mahsulotlarini yetishtirish, qayta ishlash va eksport qilish, xalqaro sertifikatlar olish, “oʻsimliklar klinikasi” faoliyati hamda qishloq xoʻjaligining boshqa yoʻnalishlari uchun aylanma mablagʻlarga talabgorlarga 6 oy imtiyozli davr bilan 18 oy muddatga kreditlar ajratish uchun resurslarni tijorat banklariga joylashtirish. Bunda kreditlar yillik Markaziy bankning asosiy stavkasida (shundan 4 foizi bank marjasi) beriladi;

Jahon banki va boshqa xalqaro moliya institutlarining kreditlari va qarzlariga xizmat koʻrsatish;

xalqaro moliya institutlaridan olingan grant mablagʻlari va Jamgʻarmaning oʻz mablagʻlari hisobidan fermer xoʻjaliklari va boshqa qishloq xoʻjaligi korxonalariga grantlar ajratish. Bunda Jamgʻarma mablagʻlari hisobidan grant ajratish yoʻnalishlari va tartibi Jamgʻarma Vasiylik kengashi tomonidan belgilanadi;

fermer xoʻjaliklari va boshqa qishloq xoʻjaligi korxonalariga qonunchilikda belgilangan tartibda meva-sabzavotlarni qayta ishlash (quritish) korxonalari, sovitish omborxonalari, chorvachilik komplekslari, ishlab chiqarish bino-inshootlari, issiqxona majmualari qurib berish, intensiv bogʻlar va tokzorlar barpo etish, qishloq xoʻjaligida zanjirli ishlab chiqarishni yoʻlga qoʻyib, yakuniy mahsulot ishlab chiqarishga ixtisoslashgan, jumladan, omuxta yem tayyorlash, sutni qayta ishlash, tomat pasta ishlab chiqarish, mineral oʻgʻitlar tayyorlash, oʻsimliklarga kimyoviy ishlov berish, qadoqlash va saralash uskunalari bilan taʼminlash boʻyicha lizing faoliyatini amalga oshirish;

qishloq xoʻjaligi mahsulotlari yetishtiruvchilarga quritish sexi va sovitkichli omborxonalarni xarid qilish va oʻrnatishga 36 oygacha imtiyozli davr bilan 84 oy muddatga yillik Markaziy bankning asosiy stavkasidan 4 foizlik punkt yuqori stavkada oilaviy tadbirkorlikni rivojlantirish dasturlarining yagona elektron platformasi orqali kreditlar berish. Bunda, kredit summasining 60 foizi boʻyicha garov taʼminoti sifatida oʻrnatiladigan quritish sexi va sovitkichli omborxonalar olinadi, 40 foizi boʻyicha garov taʼminoti sifatida ularning qaytmaslik xatarini sugʻurta qilish boʻyicha sugʻurta polisi olinadi;

meva-sabzavotlarni qayta ishlash (quritish) korxonalari, sovitish omborxonalari, chorvachilik komplekslari, issiqxona majmualari qurilishiga, intensiv bogʻlar va tokzorlar barpo etilishiga, qishloq xoʻjaligida zanjirli ishlab chiqarishni yoʻlga qoʻyib, yakuniy mahsulot ishlab chiqarishga ixtisoslashgan, jumladan, omuxta yem tayyorlash, sutni qayta ishlash, tomat pasta ishlab chiqarish, mineral oʻgʻitlar tayyorlash, oʻsimliklarga kimyoviy ishlov berish, qadoqlash va saralash uskunalarini keltirishga va mazkur obyektlarni sotish uchun savdo maydonlari tashkil etishga. Bunda mazkur xatboshida nazarda tutilayotgan faoliyat Jamgʻarma taʼsischiligida tashkil etiladigan tadbirkorlik subyektlari tomonidan amalga oshirilishi mumkin, shuningdek mazkur obyektlar fermer xoʻjaliklari va boshqa qishloq xoʻjaligi korxonalariga Jamgʻarmadan belgilangan tartibda ajratiladigan kreditlar evaziga va lizing toʻlovlari asosida mazkur obyektlarning oʻzini garovga qoʻyish huquqi asosida Jamgʻarma tomonidan balans qiymatida sotiladi. Ularni qurish, xarid qilish va sotish tartibi Jamgʻarma vasiylik kengashi tomonidan tasdiqlanadi;

davlat-xususiy sheriklik shartlari asosida loyihalarni belgilangan tartibda moliyalashtirish;

Jamgʻarmani saqlab turish va faoliyatini moddiy-texnik jihatdan taʼminlash;

ustav kapitalida Jamgʻarma ulushi shakllantirilgan masʼuliyati cheklangan jamiyatlar faoliyatida ishtirok etish va ularga qoʻshimcha mablagʻ ajratish;

fermer xoʻjaliklari va boshqa qishloq xoʻjaligi korxonalarini rivojlantirish, qonunchilik hujjatlarida nazarda tutilgan innovatsion va boshqa loyihalarni amalga oshirishga investitsiyalarni jalb qilish bilan bogʻliq boshqa yoʻnalishlar;

Jamgʻarma tomonidan fermer xoʻjaliklari rahbarlari va aʼzolarining hamda qishloq xoʻjaligi kooperativlari xodimlarining bilim va koʻnikmalarini oshirish uchun oʻquv kurslarini tashkil etish bilan bogʻliq xarajatlarni qoplash uchun subsidiyalar ajratish. Bunda oʻquv markazlari faoliyatini moliyalashtirish tartibi Jamgʻarmaning vasiylik kengashi tomonidan tasdiqlanadi;

fermer xoʻjaliklari va boshqa qishloq xoʻjaligi korxonalarida qishloq xoʻjaligi borasida innovatsion yoʻnalishlarni ommalashtirish maqsadida mahalliy va xalqaro seminar va koʻrgazmalar tashkil etish hamda xorijda oʻtkaziladigan bu kabi tadbirlarda fermer xoʻjaliklari va boshqa qishloq xoʻjaligi korxonalari rahbarlari, Kengash va Jamgʻarma xodimlarini ishtirokini taʼminlash;

Kengashni saqlash va moddiy-texnik taʼminlash hamda mablagʻlarni tijorat banklariga joylashtirish hisobiga olinadigan Jamgʻarma daromadlarning 30 foizi miqdordagi mablagʻlar (pul mablagʻlari yoki boshqa aktivlar koʻrinishida) uning xodimlarini moddiy ragʻbatlantirish.

18. Jamgʻarmaning tijorat banklariga resurs ajratish va mablagʻlarini depozitga qoʻyishdan olingan, shuningdek Jamgʻarmaning boʻsh turgan mablagʻlariga tijorat banki tomonidan toʻlangan foiz koʻrinishidagi daromadlari Jamgʻarmaning oʻz mablagʻlari boʻlib, konsolidatsiyalashgan budjet mablagʻlari yoki budjet tizimi budjetlari mablagʻlari hisoblanmaydi.

Jamgʻarmaning Vasiylik kengashi qaroriga asosan “Tomorqa xizmati” MCHJlarga 300 million soʻmgacha ajratilgan garovsiz kredit uchun Jamgʻarmaning tijorat banklari tomonidan garovga (depozit) olingan mablagʻlarining akseptsiz undirilgan hamda tijorat banklariga qoʻyilgan depozit mablagʻlarining qaytmagan qismi mazkur bandning birinchi xatboshisida keltirilgan manbalar hisobidan yaratilgan zaxira mablagʻlari hisobidan qoplanadi.

Jamgʻarmaning “Tomorqa xizmati” MCHJlar ustav fondini shakllantirish uchun yoʻnaltirilgan mablagʻlari mazkur bandning birinchi xatboshida keltirilgan manbalar hisobidan shakllantirilgan boʻlib, Jamgʻarmaning oʻz aktivlari hisoblanadi.

Oʻzbekiston Respublikasi Prezidentining 2025-yil 14-fevraldagi “Tomorqa yer egalari va dehqon xoʻjaliklari faoliyatida zamonaviy tashkiliy tizimni joriy qilish va moliyaviy qoʻllab-quvvatlashning qoʻshimcha chora-tadbirlari toʻgʻrisida”gi PF-22-son Farmoni 6-bandida belgilangan mablagʻlar Kambagʻallikni qisqartirish va bandlik vazirligi huzuridagi Dehqon xoʻjaliklari va tomorqa yer egalarini qoʻllab-quvvatlash jamgʻarmasiga oʻtkazib berilgandan soʻng Jamgʻarmaning balansida mavjud barcha aktivlar, jumladan pul mablagʻlari Fermer, dehqon xoʻjaliklari va tomorqa yer egalarini qoʻllab-quvvatlash jamgʻarmasining daromadidan shakllangan oʻz aktivlari hisoblanadi;

Jamgʻarma faoliyati va mablagʻlari davlat tashqi auditi va moliyaviy nazorati organlari nazorat obyekti hisoblanmaydi.

5-bob. Tijorat banklariga resurslar berish tartibi

19. Tijorat banklariga resurslar ajratish uchun Jamgʻarma va bosh tijorat banki oʻrtasida qonun hujjatlarida belgilangan tartibda bosh kelishuv tuziladi.

20. Bosh kelishuvni tuzish uchun tijorat banklari Jamgʻarmaga bankning tegishli boshqaruv organi (kuzatuv kengashi yoki aksiyadorlar umumiy yigʻilishi) tomonidan tasdiqlangan bosh kelishuv tuzish toʻgʻrisidagi qarorning yoki bosh kelishuv tuzish vakolatini beruvchi boshqa hujjatning bir nusxasini taqdim etadi.

21. Jamgʻarma mablagʻlari hisobidan kreditlar hududiy fermerlar kengashlari tavsiyanomasiga koʻra hamda har bir mahallaga mahallabay ishlash boʻyicha biriktirilgan hokim yordamchisi tomonidan beriladigan tavsiyalar asosida koʻra oilaviy tadbirkorlikni rivojlantirish dasturlari doirasidagi loyihalarni moliyalashtirish manbalarida nazarda tutilgan mablagʻlardan tashqari va navbatsiz rasmiylashtirib beriladi.

Tavsiya etilgan talabgor kredit olish boʻyicha talablarga mos boʻlmaganda tijorat banklari kredit bermaslik huquqiga ega.

Talabgorlarga kreditlar oilaviy tadbirkorlikni rivojlantirish dasturlaridan tashqari boshqa qishloq xoʻjaligi yoʻnalishlari asosida ham ajratilishi mumkin.

22. Bosh kelishuvni tuzgan respublika tijorat banklari yoki ularning viloyat filiallari mablagʻlar olish uchun Jamgʻarmaga hududiy fermerlar kengashlari bilan kelishilganligini tasdiqlovchi axborot va hududlar boʻyicha qarz oluvchilar — loyiha tashabbuskorlari koʻrsatilgan buyurtmanomani taqdim etadilar.

23. Olingan buyurtmanomalar asosida Jamgʻarma mablagʻlarni tijorat bankiga oʻtkazib beradi, shuningdek, fermerlar bilan hamkorlikda ishlaydigan dehqon xoʻjaliklari uchun mablagʻlar tijorat banklarining umumiy buyurtmanomasi asosida (tashabbuskor — fermerlar bilan hamkorlikda ishlaydigan dehqon xoʻjaliklari koʻrsatilmagan holda) ham oʻtkazib berilishi mumkin.

Jamgʻarmaga kiritilgan buyurtmanomalar qonunchilikda belgilangan talablarga mos boʻlmagan taqdirda, tijorat bankiga resurs boʻlib — boʻlib ajratilishi yoki ajratilmasdan qaytarib yuborilishi mumkin.

24. Jamgʻarma tomonidan tijorat banklariga ajratilgan hamda fermer xoʻjaliklariga kredit berish uchun foydalanilayotgan resurslar uchun bosh bank bosh kelishuvda nazarda tutilgan tijorat banki marjasini ajratib qolgan holda imtiyozli foiz stavkasi miqdorida foiz hisoblaydi, ushbu mablagʻlar jamgʻarib boriladigan hisobraqamida yigʻiladi va bosh kelishuvda belgilangan muddatlarda Jamgʻarmaning tegishli bank hisobraqamiga oʻtkazib beriladi.

Jamgʻarma mablagʻlari fermer xoʻjaliklari va boshqa qishloq xoʻjaligi korxonalariga maxsus elektron axborot dasturlari orqali rasmiylashtirib berilishi mumkin.

Tomorqa yer egalariga onlayn tarzda mikrokreditlar ajratish uchun resurslar hududiy fermer, dehqon xoʻjaliklari va tomorqa yer egalari kengashlarining takliflariga asosan Jamgʻarma tomonidan respublika tijorat banklariga tumanlar kesimida joylashtiriladi.

25. Tijorat banki foydalanilmagan va muddatidan oldin qaytarilgan, shuningdek, maqsadsiz ishlatilgan mablagʻlarni Jamgʻarma hisobraqamiga qaytarishga majbur.

Tijorat banklari Jamgʻarmadan ajratilgan kreditlarni tashabbuskorlar tomonidan maqsadli foydalanilishi va tijorat bankiga qaytarilishi toʻgʻrisida Jamgʻarmaga har oyning 5-sanasiga qadar tashabbuskorlar kesimida axborot taqdim etadi.

6-bob. Yakunlovchi qoidalar

26. Ushbu Nizom talablari buzilishida aybdor boʻlgan shaxslar qonun hujjatlariga muvofiq javob beradilar.

27. Ushbu Nizomni amalga oshirishda yuzaga keladigan nizolar qonun hujjatlarida belgilangan tartibda, shu jumladan, sud tartibida hal etiladi.

28. Jamgʻarma tugatish qonun hujjatlarida nazarda tutilgan tartibda amalga oshiriladi.