Oʻzbekiston Respublikasi Vazirlar Mahkamasi huzurida Geodeziya va kartografiya boshqarmasini tashkil etish haqida (19-son)

16.01.1992

OʻZBEKISTON RESPUBLIKASI PREZIDENTI HUZURIDAGI VAZIRLAR MAHKAMASINING

qarori

Oʻzbekiston Respublikasining “Oʻzbekiston Respublikasi davlat mustaqilligining asoslari toʻgʻrisida” Qonunining 8-moddasiga asoslanib, respublika xalq xoʻjaligini topografiya-geodeziya materiallari, kartografiya mashgʻulotlari bilan taʼminlash va davlat kadastri asoslarini yaratish maqsadida Vazirlar Mahkamasi qaror qiladi:

1. Oʻzbekiston Respublikasi Vazirlar Mahkamasi huzurida Geodeziya va kartografiya boshqarmasi tashkil etilsin.

Geodeziya va kartografiya boshqarmasi apparati xodimlari soni 10 nafardan iborat qilib va ish haqi fondi 107 ming soʻm miqdorida belgilansin.

Geodeziya va kartografiya boshqarmasiga quyidagi asosiy masalalarni hal qilish yuklatilsin:

Oʻzbekiston Respublikasi hududida topografiya-geodeziya va kartografiya ishlarini istiqbolli rivojlantirish konsepsiyalarini ishlab chiqish;

korxona va tashkilotlarni, ular kimning tasarrufida ekanligi va mulkiy egaligidan qatʼi nazar, yuqorida qayd etilgan ishlarni olib borishi ustidan geodezik nazoratni amalga oshirish;

geodeziya, astronomiya, gravimetriya ishlarini bir koordinat tizimida bajarish hamda respublika hududida, aholi yashaydigan punktlar va dengiz shelf zonasi bilan birgalikda har qanday masshtabdagi topografik suratga olish ishlarini va kartografik monitoringni olib borish.

2. Geodeziya va kartografiya boshqarmasining ixtiyoriga sobiq SSSR geodeziya va kartografiya qoʻmitasining Oʻzbekiston Respublikasi hududida joylashgan va ilovada qayd etilgan korxona, tashkilotlari olib berilsin.

3. Geodeziya va kartografiya boshqarmasi bir oy muddat ichida Boshqarma faoliyatiga tegishli masalalar yuzasidan Oʻzbekiston Respublikasi Iqtisodiyot qoʻmitasi va Moliya vazirligi bilan kelishilgan takliflarni Vazirlar Mahkamasiga kiritsin.

Oʻzbekiston Respublikasining Bosh vaziri A. MUTALOV

Toshkent sh.,

1992-yil 16-yanvar,

19-son

Vazirlar Mahkamasining 1992-yil 16-yanvardagi 19-son qaroriga ILOVA

OʻZBEKISTON RESPUBLIKASI VAZIRLAR MAHKAMASI HUZURIDAGI GEODEZIYA VA KARTOGRAFIYA BOShQARMASINING TARKIBIGA KIRUVChI KORXONA VA TAShKILOTLARNING ROʻYXATI

Oʻzbekiston aerogeodeziya korxonasi, Toshkent shahri

“Tabiat” (“Priroda”) davlat ilmiy-tekshirish va ishlab chiqarish markazining Oʻzbekiston tarmogʻi, Toshkent shahri

Oʻzbekiston davlat geodeziya nazorati inspeksiyasi, Toshkent shahri

Toshkent kartografiya fabrikasi