Ijro ishini yuritish sohasida toʻlov intizomini mustahkamlashga doir qoʻshimcha chora-tadbirlar toʻgʻrisida (379-son)

21.05.2018

Oʻzbekiston Respublikasi Vazirlar Mahkamasining

qarori

Oʻzbekiston Respublikasi Prezidentining “Prokuratura organlarining qabul qilinayotgan normativ-huquqiy hujjatlar ijrosini taʼminlashdagi faoliyati samaradorligini oshirish boʻyicha qoʻshimcha chora-tadbirlar toʻgʻrisida” 2018-yil 15-fevraldagi PF-5343-son Farmoni ijrosini taʼminlash hamda ijro ishini yuritish sohasida toʻlov intizomini mustahkamlash maqsadida Vazirlar Mahkamasi qaror qiladi:

1. Oʻzbekiston Respublikasi Prezidentining “Prokuratura organlarining qabul qilinayotgan normativ-huquqiy hujjatlar ijrosini taʼminlashdagi faoliyati samaradorligini oshirish boʻyicha qoʻshimcha chora-tadbirlar toʻgʻrisida” 2018-yil 15-fevraldagi PF-5343-son Farmoniga muvofiq Oʻzbekiston Respublikasi Bosh prokuraturasi tomonidan Oʻzbekiston Respublikasi Raqamli texnologiyalar vazirligi, shuningdek, boshqa manfaatdor vazirliklar va idoralar bilan birgalikda 2018-yil 1-maydan boshlab ijro hujjatlari boʻyicha qarzdorlar toʻgʻrisida barcha uchun ochiq maʼlumotlar bazasi ishlab chiqilayotgani maʼlumot uchun qabul qilinsin

2. Belgilab qoʻyilsinki:

ushbu qarorga 1-ilovada koʻrsatilgan yirik bitimlar, ayrim turdagi moliya-kredit xizmatlari, xalqaro yoʻlovchi tashish xizmatlari va davlat xizmatlari jismoniy va yuridik shaxslarning ijro hujjatlari boʻyicha qarzdorligi (keyingi oʻrinlarda qarzdorlikni tekshirish deb ataladi) mavjudligi tekshirilganidan keyin amalga oshiriladi, ushbu bandning oltinchi xatboshida nazarda tutilgan hollar bundan mustasno;

qarzdorlik mavjudligini tekshirish ushbu qarorga 1-ilovada koʻrsatilgan tashkilotlar tomonidan Oʻzbekiston Respublikasi Bosh prokuraturasi huzuridagi Majburiy ijro byurosi (keyingi oʻrinlarda Byuro deb ataladi) Ijro ishi yurituvlari yagona elektron bazasi orqali onlayn rejimida tegishli yirik bitimlarni amalga oshirish va xizmatlar koʻrsatishdan avval amalga oshiriladi;

yirik bitimlarni amalga oshirish va tegishli xizmatlar koʻrsatishga qarzdorlikni tekshirish natijalari boʻyicha mulkiy tusdagi ijro hujjatlari boʻyicha toʻlanmagan qarz aniqlanmagan taqdirdagina ruxsat etiladi. Bu hollarda bitimni amalga oshirayotgan yoki xizmatlar koʻrsatayotgan tashkilot Byuro Ijro ishi yurituvlari yagona elektron bazasidan tegishli koʻchirmani chop etadi hamda uni tegishli bitimlarni amalga oshirish va xizmatlarni koʻrsatish bilan bogʻliq materiallarga biriktirib qoʻyadi;

jismoniy va yuridik shaxslarda qarzdorlik aniqlangan taqdirda, bitimni amalga oshirayotgan yoki xizmatlar koʻrsatayotgan tashkilotlar qarzdorga Byuro Ijro ishi yurituvlari yagona elektron bazasidan olingan tegishli koʻchirma nusxasini taqdim etgan holda bitimni amalga oshirish va xizmatlar koʻrsatishni rad etadi.

Davriy toʻlovlarni toʻlashni nazarda tutadigan mulkiy tusga ega ijro hujjatlari boʻyicha qarzdorlikni tekshirish faqat ushbu qaror 1-ilovasining 10 — 12-bandlarida nazarda tutilgan xizmatlar koʻrsatilayotganda jismoniy shaxsga nisbatan sud yoki davlat ijrochisi tomonidan Oʻzbekiston Respublikasidan chiqishga vaqtinchalik cheklov oʻrnatilganligi mavjudligi yuzasidan amalga oshiriladi.

3. Bitimlarni amalga oshiruvchi va tegishli xizmatlar koʻrsatuvchi tashkilotlar tomonidan jismoniy va yuridik shaxslarning qarzdorligi mavjudligini tekshirish sxemasi 2-ilovaga muvofiq tasdiqlansin.

4. Byuro Oʻzbekiston Respublikasi Axborot texnologiyalari va kommunikatsiyalarini rivojlantirish vazirligi va boshqa manfaatdor vazirliklar va idoralar bilan birgalikda ikki hafta muddatda quyidagilarni amalga oshirish imkonini beradigan maxsus dasturiy modul ishlab chiqilishini va uning faoliyatini taʼminlasin:

Byuroning Ijro ishi yurituvlari yagona elektron bazasi orqali mulkiy tusdagi ijro hujjatlari boʻyicha qarzdorlikni tekshirish;

qarzdorlikni tekshirish natijasi boʻyicha tekshirish oʻtkazilgan sana va vaqtni koʻrsatgan hamda maxsus QR-kodni qoʻygan holda tekshirish natijalari toʻgʻrisidagi koʻchirmani chop etish;

Byuroning Ijro ishi yurituvlari yagona elektron bazasiga tegishli qarzdorlik toʻlanganligi toʻgʻrisidagi axborotni tezkor ravishda kiritish.

5. Ushbu qarorga 1-ilovada koʻrsatilgan yirik bitimlarni amalga oshiruvchi va xizmatlar koʻrsatuvchi tashkilotlar Byuro bilan birgalikda ikki hafta muddatda qarzdorlikni tekshirishda dastlabki va chiqish maʼlumotlariga doir yagona texnologik va tashkiliy talablarni, Byuroning maʼlumotlar bazasiga markazlashtirilgan holda ulanishni hamda axborot xavfsizligining boshqa talablarini nazarda tutuvchi oʻzaro elektron hamkorlikning tegishli reglamentlarini tasdiqlasinlar.

6. Oʻzbekiston Respublikasi tijorat banklariga jismoniy va yuridik shaxslarga ushbu qaror bilan tasdiqlangan roʻyxatda nazarda tutilmagan kreditlar berishda hamda boshqa moliya-kredit xizmatlari koʻrsatishda mijozning toʻlov qobiliyatini va bajarilmay qolgan moliyaviy majburiyati mavjudligini tekshirish maqsadida Byuro maʼlumotlar bazasi orqali qarzdorlik tekshiruvini bank amaliyotiga joriy qilish tavsiya etilsin.

7. Byuroga jismoniy shaxslarning ijro hujjatlari boʻyicha qarzlarni toʻlashning qoʻshimcha shakllari, fuqarolarni qarzdorlik mavjudligi va uni zamonaviy axborot-kommunikatsiya texnologiyalaridan, jumladan, SMS xabarlar va USSD soʻrovlardan foydalangan holda toʻlash tartibi toʻgʻrisida xabardor qilish shakllarini joriy etish huquqi berilsin.

Oʻzbekiston Respublikasi mobil aloqa tarmogʻi operatorlari Byuroning soʻroviga binoan abonentlarga ijro hujjatlari boʻyicha qarzdorlik muddati va ularni toʻlash tartibi toʻgʻrisidagi SMS-xabarlarning bepul tarqatilishini taʼminlasinlar.

8. Oʻzbekiston Respublikasi Adliya vazirligi Oʻzbekiston Respublikasi Bosh prokuraturasi hamda boshqa manfaatdor vazirliklar va idoralar bilan birgalikda ular qabul qilgan normativ-huquqiy hujjatlarni bir oy muddatda ushbu qarorga muvofiqlashtirsinlar.

9. Ushbu qarorning bajarilishini nazorat qilish Oʻzbekiston Respublikasi Bosh vazirining birinchi oʻrinbosari — “Oʻzbekiston temir yoʻllari” AJ boshqaruvi raisi A.J. Ramatov va Oʻzbekiston Respublikasi Bosh vazirining oʻrinbosari — “Oʻzbekneftgaz” AJ boshqaruvi raisi A.S. Sultanov zimmasiga yuklansin.

Oʻzbekiston Respublikasining Bosh vaziri A. ARIPOV

Toshkent sh.,

2018-yil 21-may,

379-son

Vazirlar Mahkamasining 2018-yil 21-maydagi 379-son qaroriga 1-ILOVA

Oʻzbekiston Respublikasi Bosh prokuraturasi huzuridagi Majburiy ijro byurosi maʼlumotlar bazasi orqali faqat qarzdorlik tekshirilgandan keyin sodir etiladigan yirik bitimlar va koʻrsatiladigan xizmatlar

ROʻYXATI

T/rYirik bitimlar va xizmatlarBitimlarni amalga oshiruvchi yoki xizmatlar koʻrsatuvchi tashkilotlar1.Koʻchmas mulk bilan bogʻliq bitimlarni notarial tasdiqlash (oldi-sotdi, ijara, hadya, ishonchnoma berish, ishonchli boshqarish va shu kabilar)Notarial idoralar (Oʻzbekiston Respublikasi Adliya vazirligi)2.Avtotransport vositalari bilan bogʻliq bitimlarni notarial tasdiqlash (oldi-sotdi, ijara, lizing, hadya, ishonchnoma berish va shu kabilar)3.Yangi avtotransport vositalarini, shu jumladan lizing shartnomalari boʻyicha sotish.“Oʻzavtosanoat” AJ4.Koʻchmas mulk va avtotransport vositalarini sotib olish uchun kreditlar berish, shu jumladan, ular boʻyicha lizing operatsiyalariTijorat banklari5.Ijro hujjatlar boʻyicha elektron-onlayn auksionlarda mulkni sotish (elektron onlayn auksionda ishtirok etish uchun buyurtmanomalar qabul qilish)“Elektron onlayn-auksionlarni tashkil etish” AJ (Oʻzbekiston Respublikasi Davlat aktivlarini boshqarish agentligi)6.Xususiylashtiriladigan koʻchmas mulk obyektlarini, masʼuliyati cheklangan jamiyatlar ustav fondi (ustav kapitani)dagi davlat ulushlarini hamda davlat mulkini ijaraga berish huquqini elektron onlayn-auksionlarda sotish (elektron onlayn auksionda ishtirok etish uchun buyurtmanomalar qabul qilish)“Elektron onlayn-auksionlarni tashkil etish” AJ (Oʻzbekiston Respublikasi Davlat aktivlarini boshqarish agentligi)7.Yer uchastkalariga boʻlgan huquqni davlat roʻyxatidan oʻtkazish va koʻchmas mulkka boʻlgan huquqlar davlat reyestrdan koʻchirma berishKadastr agentligi Davlat kadastrlari palatasining hududiy organlari (Oʻzbekiston Respublikasi Iqtisodiyot va moliya vazirligi huzuridagi Kadastr agentligi) Davlat xizmatlari markazlari (Oʻzbekiston Respublikasi Adliya vazirligi)8.Binolar, inshootlar va koʻp yillik dov-daraxtlarga boʻlgan huquqlarni davlat roʻyxatidan oʻtkazish va koʻchmas mulkka boʻlgan huquqlar davlat reyestrdan koʻchirma berish9.Koʻchmas mulk obyektlariga kadastr yigʻma jildini (pasportini) tayyorlash10.Xalqaro yoʻlovchi tashish xizmatlari koʻrsatish uchun aviachiptalar sotish (Oʻzbekiston Respublikasiga aviachiptalardan tashqari)*“Oʻzbekiston havo yoʻllari” milliy aviakompaniyasining aviachiptalar sotish kassalari11.Xalqaro yoʻlovchi tashish xizmatlari koʻrsatish uchun temir yoʻl chiptalari sotish (Oʻzbekiston Respublikasiga temir yoʻl chiptalaridan tashqari)*“Oʻzbekiston temir yoʻllari” AJning temir yoʻl chiptalari sotish kassalari12.Oʻzbekiston Respublikasi fuqarosining xorijga chiqish uchun biometrik pasportini rasmiylashtirishMigratsiya va fuqarolikni rasmiylashtirish boʻlimlari(Oʻzbekiston Respublikasi Ichki ishlar vazirligi)13.Avtotransport vositasini davlat roʻyxatidan oʻtkazish va qayta roʻyxatdan oʻtkazishDavlat yoʻl harakati xavfsizligi xizmati organlari(Oʻzbekiston Respublikasi Ichki ishlar vazirligi)14.Avtotransport vositasini boshqarish huquqini beruvchi haydovchilik guvohnomasini berish va almashtirish16.Chet elda mehnat faoliyatini amalga oshirish uchun ruxsatnoma berish.Oʻzbekiston Respublikasi Bandlik va mehnat munosabatlari vazirligiDavlat xizmatlari markazlari (Oʻzbekiston Respublikasi Adliya vazirligi)17.Yakka tartibda uy-joy qurishga (rekonstruksiya qilishga) ruxsat berishQurilish va uy-joy kommunal xoʻjaligi boʻlimlari(Oʻzbekiston Respublikasi Qurilish va uy-joy-kommunal xoʻjaligi vazirligi)Davlat xizmatlari markazlari (Oʻzbekiston Respublikasi Adliya vazirligi)18.Binolar va inshootlar tashqi koʻrinishini oʻzgartirishni (fasadni taʼmirlash) kelishish19.Obyektni rekonstruksiya qilish va qayta ixtisoslashtirish uchun ruxsatnoma berish20.Qurilish-montaj ishlarini amalga oshirish uchun ruxsatnomalar berish21.Elektron davlat xaridlarida xarid qilish tartib-taomillari ishtirokchisi sifatida ishtirok etish“Oʻzbekiston Respublika tovar xom ashyo birjasi” AJ Davlat xaridlari elektron tizimining operatorlari (Oʻzbekiston Respublikasi Iqtisodiyot va moliya vazirligi)

* Qarzdorlikni tekshirish sud yoki davlat ijrochisi tomonidan Oʻzbekiston Respublikasidan chiqishga vaqtinchalik cheklov oʻrnatilganligi mavjudligi yuzasidan amalga oshiriladi.

Vazirlar Mahkamasining 2018-yil 21-maydagi 379-son qaroriga 2-ILOVA

Bitimlarni amalga oshiruvchi va tegishli xizmatlar koʻrsatuvchi tashkilotlar tomonidan jismoniy va yuridik shaxslarning qarzdorligi mavjudligini tekshirish

SXEMASI

BosqichlarSubyektlarTadbirlarIjro muddati1-bosqichOʻzbekiston Respublikasi Bosh prokuraturasi huzuridagi Majburiy ijro byurosi1. Ijro hujjatlari boʻyicha qarzdorligi (keyingi oʻrinlarda qarzdorlik deb ataladi) mavjud boʻlgan jismoniy va yuridik shaxslar — qarzdorlar toʻgʻrisida tegishli maʼlumotlar bazalarini shakllantiradi.2. Tasdiqlangan reglamentlarga muvofiq ushbu qarorga 1-ilovada koʻrsatilgan bitimlarni amalga oshiruvchi va xizmatlar koʻrsatuvchi tashkilotlarning shakllantirilgan maʼlumotlar bazasiga moneliksiz kirishini taʼminlaydi.Doimiy ravishda2-bosqichBitimlarni amalga oshiruvchi va xizmatlar koʻrsatuvchi tashkilotlarUshbu qarorga 1-ilovada koʻrsatilgan yirik bitimlarni amalga oshirish, ayrim moliya-kredit xizmatlarini koʻrsatish, xalqaro yoʻlovchi tashish xizmatlari va davlat xizmatlari koʻrsatishda qarzdorlarning maʼlumotlar bazasi orqali jismoniy va yuridik shaxslarda qarzlarning mavjudligini oldindan tekshiradi.Yirik bitimlarni amalga oshirish va ayrim moliya-kredit xizmatlari koʻrsatishgacha3-bosqichBitimlarni amalga oshiruvchi va xizmatlar koʻrsatuvchi tashkilotlarJismoniy va yuridik shaxslarda qarzdorlik mavjud boʻlgan taqdirda, bitimlarni amalga oshirish va xizmatlarni koʻrsatishni rad etish toʻgʻrisida qaror qabul qiladi.Jismoniy va yuridik shaxslarda qarzdorlik mavjud boʻlgan taqdirda4-bosqichJismoniy va yuridik shaxslar1. Mavjud qarzdorlikni qoplaydi.1. Jismoniy va yuridik shaxslarda qarzdorlik mavjud boʻlgan taqdirdaByuro(ijro hujjatlari qismi boʻyicha)2. Qarzdor tomonidan qarz toʻlanganligi haqidagi maʼlumot Byuroning maʼlumotlar bazasiga tezkorlik bilan kiritilishini (taqdim etilishini) taʼminlaydi.2. Mavjud qarzdorlik qoplanganidan soʻng zudlik bilan