Oʻzbekiston Respublikasi Hisob palatasining dasturiy kompleksini joriy etish chora-tadbirlari toʻgʻrisida (362-son)

14.05.2018

Oʻzbekiston Respublikasi Vazirlar Mahkamasining

qarori

Oʻzbekiston Respublikasi Prezidentining “Oʻzbekiston Respublikasi Hisob palatasi faoliyatini tubdan takomillashtirish chora-tadbirlari toʻgʻrisida” 2017-yil 10-avgustdagi PF-5147-son Farmonini bajarish yuzasidan, shuningdek, Oʻzbekiston Respublikasi Hisob palatasining (keyingi oʻrinlarda Hisob palatasi deb ataladi) oʻziga yuklangan vazifalarni amalga oshirish uchun davlat organlari va tashkilotlari maʼlumotlar bazasidan foydalanishini taʼminlash maqsadida Vazirlar Mahkamasi qaror qiladi:

1. Quyidagilar:

Oʻzbekiston Respublikasi Hisob palatasiga maʼlumotlar bazasidan real vaqt rejimida foydalanish ruxsat etiladigan davlat organlari va tashkilotlarining roʻyxati 1-ilovaga muvofiq;

Oʻzbekiston Respublikasi Hisob palatasiga elektron soʻrovga muvofiq maʼlumotlar ayirboshlashning dasturiy taʼminoti orqali ular maʼlumotlar bazasini shakllantirishlaridan oldin maʼlumotlar taqdim etadigan, keyinchalik Oʻzbekiston Respublikasi Hisob palatasiga ularning maʼlumotlar bazasidan real vaqt rejimida foydalanish ruxsat etiladigan davlat organlari va tashkilotlarining roʻyxati 2-ilovaga muvofiq tasdiqlansin.

2. Ushbu qarorga 2-ilovada koʻrsatilgan davlat organlari va tashkilotlari Oʻzbekiston Respublikasi Axborot texnologiyalari va kommunikatsiyalarini rivojlantirish vazirligi bilan birgalikda 2018 — 2020-yillar mobaynida oʻzlarining maʼlumotlar bazasini shakllantirsinlar, shuningdek, ularni Hisob palatasi real vaqt rejimida foydalanishi uchun Elektron hukumatning maʼlumotlar uzatish idoralararo tarmogʻiga ulasinlar.

3. Oʻzbekiston Respublikasi Axborot texnologiyalari va kommunikatsiyalarini rivojlantirish vazirligi, Hisob palatasi bilan kelishgan holda, ushbu qarorga 2-ilovada koʻrsatilgan davlat organlari va tashkilotlari tomonidan maʼlumotlar bazasini shakllantirish, shuningdek, ularni Elektron hukumatning idoralararo maʼlumotlar uzatish tarmogʻiga ulash jadvalini tasdiqlash uchun uch oy muddatda Oʻzbekiston Respublikasi Vazirlar Mahkamasiga kiritsin.

4. Soliq organlari hamda davlat boshqa organlari va tashkilotlarining maʼlumotlar bazasini taqqoslash yoʻli bilan soliq solinadigan bazani, soliq toʻlovchilarning toʻliq qamrab olinishini real vaqt rejimida baholashni taʼminlovchi Hisob palatasining dasturiy kompleksini (keyingi oʻrinlarda dasturiy kompleks deb ataladi) yaratish va bosqichma-bosqich joriy etish yuzasidan “yoʻl xaritasi” 3-ilovaga muvofiq tasdiqlansin.

5. Oʻzbekiston Respublikasi Axborot texnologiyalari va kommunikatsiyalarini rivojlantirish vazirligi:

ushbu qarorga 1-ilovada koʻrsatilgan davlat organlari va tashkilotlarining, ularning maʼlumotlar bazasidan Hisob palatasi real vaqt rejimida foydalanishi uchun Elektron hukumatning idoralararo maʼlumotlar uzatish tarmogʻiga ulanishini ikki hafta muddatda taʼminlasin;

2018-yil 1-dekabrgacha boʻlgan muddatda Hisob palatasi ushbu qarorga 1 va 2-ilovalarda koʻrsatilgan davlat organlari va tashkilotlaridan axborot olish maqsadida maʼlumotlar ayirboshlashning dasturiy taʼminotini ishlab chiqsin va foydalanishga topshirsin, shuningdek, zaruriyatga koʻra, elektron hisobot maʼlumotlari shakllanishini hisobga olgan holda uning yanada takomillashtirilishini taʼminlasin;

Hisob palatasiga “Litsenziya” axborot tizimlaridan, shuningdek, uning soʻrovlariga muvofiq boshqa axborot tizimlaridan foydalanish imkoniyatini taʼminlasin.

6. Ushbu qarorga 1 va 2-ilovalarda koʻrsatilgan davlat organlari va tashkilotlari rahbarlariga:

qonun hujjatlarining axborot xavfsizligiga rioya etishga doir talablarini hisobga olgan holda Hisob palatasi ularning maʼlumotlar bazasidan real vaqt rejimida foydalanish imkoniyatini yaratish;

Hisob palatasining elektron soʻrovi asosida axborotni (elektron hujjatni) oʻz vaqtida shakllantirish va ularni maʼlumotlar ayirboshlash dasturiy taʼminoti orqali taqdim etish taʼminlanishi yuzasidan masʼuliyat yuklansin.

7. Belgilab qoʻyilsinki:

ushbu qarorga 1 va 2-ilovalarda koʻrsatilgan davlat organlari va tashkilotlarining maʼlumotlar bazasidan foydalanish tartibi Hisob palatasi tomonidan belgilanadi;

dasturiy kompleksni ishlab chiqish, joriy etish va kuzatib borish bilan bogʻliq sarf-xarajatlar Raqamli texnologiyalarni rivojlantirish jamgʻarmasi mablagʻlari hisobiga amalga oshiriladi.

8. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari — moliya vaziri J.A. Qoʻchqorov hamda Oʻzbekiston Respublikasi Axborot texnologiyalari va kommunikatsiyalarini rivojlantirish vaziri A.I. Axmedxodjayev zimmasiga yuklansin.

Oʻzbekiston Respublikasining Bosh vaziri A. ARIPOV

Toshkent sh.,

2018-yil 14-may,

362-son

Vazirlar Mahkamasining 2018-yil 14-maydagi 362-son qaroriga 3-ILOVA

Oʻzbekiston Respublikasi Hisob palatasining soliq organlari hamda davlat boshqa organlari va tashkilotlarining maʼlumotlar bazasini taqqoslash yoʻli bilan soliq solinadigan bazani, soliq toʻlovchilarning toʻliq qamrab olinishini real vaqt rejimida baholashni taʼminlovchi dasturiy kompleksini yaratish va bosqichma-bosqich joriy etish yuzasidan

“YOʻL XARITASI”

T/r Tadbirlar nomi Amalga oshirish mexanizmi Amalga oshirish muddati Masʼul ijrochilar Oʻzbekiston Respublikasi Hisob palatasining dasturiy kompleksini yaratishga doir tashkiliy tadbirlar 1. Soliq solinadigan bazani, soliq toʻlovchilarning toʻliq qamrab olinishini baholash uchun tahliliy jadvallarni ishlab chiqish va Oʻzbekiston Respublikasi Hisob palatasining dasturiy kompleksiga kiritish uchun Hisob palatasiga taqdim etish Davlat soliq qoʻmitasi va Moliya vazirligining qoʻshma buyrugʻi 2018-yil may Davlat soliq qoʻmitasi, Moliya vazirligi 2. Oʻzbekiston Respublikasi Hisob palatasining soliq organlari va davlat boshqa organlari hamda tashkilotlarining maʼlumotlar bazasini taqqoslash yoʻli bilan soliq solinadigan bazani, soliq toʻlovchilarning toʻliq qamrab olinishini real vaqt rejimida baholashni taʼminlovchi dasturiy kompleksini yaratishga doir texnik topshiriqni tayyorlash Texnik topshiriqni tasdiqlash 2018-yil may Axborot texnologiyalari va kommunikatsiyalarini rivojlantirish vazirligi, Hisob palatasi, Davlat soliq qoʻmitasi, Davlat bojxona qoʻmitasi, Moliya vazirligi, Markaziy bank va davlat boshqa organlari Oʻzbekiston Respublikasi Hisob palatasining dasturiy kompleksini ishlab chiqish va joriy etish 3. Oʻzbekiston Respublikasi Hisob palatasining dasturiy kompleksini ishlab chiqish va uning samarali ishlashini taʼminlash uchun moddiy-texnik taʼminot boʻyicha ishlar (xizmatlar) qiymatini belgilash Budjetni tasdiqlash 2018-yil iyun Axborot texnologiyalari va kommunikatsiyalarini rivojlantirish vazirligi 4. Oʻzbekiston Respublikasi Hisob palatasining davlat organlari va tashkilotlarining maʼlumotlar bazasi bilan integratsiyalashuvchi dasturiy kompleksining asosiy vazifalarini ishlab chiqish Texnik topshiriqni amalga oshirish texnik topshiriqning muddatlariga muvofiq Axborot texnologiyalari va kommunikatsiyalarini rivojlantirish vazirligi, Hisob palatasi 5. Oʻzbekiston Respublikasi Hisob palatasining dasturiy kompleksini joriy etish va xodimlarini oʻqitish Texnik topshiriqni amalga oshirish texnik topshiriqning muddatlariga muvofiq Axborot texnologiyalari va kommunikatsiyalarini rivojlantirish vazirligi, Hisob palatasi 6. Davlat organlari va tashkilotlarining maʼlumotlar bazasini Oʻzbekiston Respublikasi Hisob palatasining dasturiy kompleksi bilan integratsiyalash Hisob palatasining farmoyishi tasdiqlangan jadvalga muvofiq Hisob palatasi, Axborot texnologiyalari va kommunikatsiyalarini rivojlantirish vazirligi va davlat boshqa organlari