2005-2009-yillarda umumtaʼlim maktablari uchun darsliklar va oʻquv-metodik qoʻllanmalar nashr etish dasturi toʻgʻrisida (548-son)

22.11.2004

Oʻzbekiston Respublikasi Vazirlar Mahkamasining

qarori

Oʻzbekiston Respublikasi Prezidentining “2004—2009-yillarda Maktab taʼlimini rivojlantirish Davlat umummilliy dasturi toʻgʻrisida” 2004-yil 21-maydagi PF-3431-son Farmonini bajarish yuzasidan hamda davlat taʼlim standartlari talablariga javob beradigan zamonaviy oʻquv adabiyotlari va oʻquv-metodik qoʻllanmalarni tayyorlash, nashr etish va umumtaʼlim maktablarini ular bilan taʼminlashning kompleks tizimini yaratish maqsadida Vazirlar Mahkamasi qaror qiladi:

1. Uzluksiz taʼlim tizimi uchun oʻquv dasturlari, darsliklar va oʻquv qoʻllanmalarini qayta koʻrib chiqish va yangilarini yaratish boʻyicha Hukumat komissiyasi tomonidan ishlab chiqilgan 2005—2009-yillarda umumtaʼlim maktablari uchun darsliklar va oʻquv-metodik qoʻllanmalar nashr etish dasturi 1, 1a, 1b, 1v-ilovalarga* muvofiq maʼqullansin.

* 1, 1a, 1b, 1v-ilovalar berilmaydi.

2. Quyidagilar:

umumtaʼlim maktablari uchun yangi darsliklar yaratish va ularni nashr etish jadvali 2-ilovaga* muvofiq;

* 2-ilova berilmaydi.

Umumiy oʻrta va oʻrta maxsus, kasb-hunar taʼlimi taʼlim muassasalari uchun darsliklar va oʻquv-metodik komplekslarni ishlab chiqish uchun mualliflar tarkibini tanlab olish va tasdiqlash tartibi toʻgʻrisidagi nizom 3-ilovaga muvofiq;

Umumiy oʻrta va oʻrta maxsus, kasb-hunar taʼlimi taʼlim muassasalari uchun darsliklar va oʻquv-metodik komplekslarni tanlov asosida tanlab olish tartibi toʻgʻrisidagi nizom 4-ilovaga muvofiq;

Umumiy oʻrta va oʻrta maxsus, kasb-hunar taʼlimi taʼlim muassasalari uchun darsliklar va oʻquv-metodik komplekslarni nashr etish yuzasidan tender savdolari oʻtkazish tartibi toʻgʻrisidagi nizom 5-ilovaga muvofiq tasdiqlansin.

3. Belgilab qoʻyilsinki:

umumiy oʻrta va oʻrta maxsus, kasb-hunar taʼlimi taʼlim muassasalari uchun yangi darsliklar va oʻquv-metodik komplekslar yaratish, ularni nashr etishga hamda qayta nashr etishga davlat buyurtmasini joylashtirish tender (tanlov) asosida yoki buyurtmachilar tomonidan tashkil etiladigan idoraviy tanlov komissiyalari tomonidan baholanadigan eng yaxshi takliflarni tanlab olish yoʻli bilan amalga oshiriladi;

umumiy oʻrta taʼlim taʼlim muassasalari uchun darsliklar va oʻquv-metodik qoʻllanmalarni (xorijiy tillar boʻyicha darsliklar va oʻquv-metodik komplekslar bundan mustasno) xarid qilish va yetkazib berish Oʻzbekiston Respublikasi Xalq taʼlimi vazirligi huzuridagi budjetdan tashqari Respublika maqsadli kitob jamgʻarmasidan mablagʻlar ajratish yoʻli bilan Oʻzbekiston Respublikasi Xalq taʼlimi vazirligi tomonidan, akademik litseylar uchun — Respublika budjeti mablagʻlari hisobiga Oʻzbekiston Respublikasi Oliy va oʻrta maxsus taʼlim vazirligining Oʻrta maxsus, kasb-hunar taʼlimi markazi tomonidan, kasb-hunar kollejlari uchun esa — mahalliy budjetlar mablagʻlari hisobiga oʻrta maxsus, kasb-hunar taʼlimi hududiy boshqarmalari tomonidan amalga oshiriladi.

umumiy oʻrta va oʻrta maxsus, kasb-hunar taʼlimi taʼlim muassasalari uchun xorijiy tillar boʻyicha darsliklar va oʻquv-metodik qoʻllanmalarni xarid qilish va yetkazib berish Oʻzbekiston Respublikasi Xalq taʼlimi vazirligi huzuridagi budjetdan tashqari Respublika maqsadli kitob jamgʻarmasining aylanma mablagʻlari hisobidan Oʻzbekiston Respublikasi Xalq taʼlimi vazirligi hamda Oliy va oʻrta maxsus taʼlim vazirligining Oʻrta maxsus, kasb-hunar taʼlimi markazi yoki uning hududiy boshqarmalari tomonidan amalga oshiriladi.

4. Uzluksiz taʼlim tizimi uchun oʻquv dasturlari, darsliklar va oʻquv qoʻllanmalarini qayta koʻrib chiqish va yangilarini yaratish boʻyicha Hukumat komissiyasi (A.I. Ikramov)ga:

nashr etishga tavsiya etilgan oʻquv adabiyotlarini tanlov asosida tanlab olishni tashkil etish va oʻtkazish masalalarini muvofiqlashtirish;

oʻquv adabiyotlarining belgilangan davlat taʼlim standartlariga va zamonaviy metodik talablarga muvofiqligini ekspertizadan oʻtkazish va baholash;

qabul qilingan 2005—2009-yillarda umumtaʼlim maktablari uchun darsliklar va oʻquv-metodik qoʻllanmalar nashr etish dasturi amalga oshirilishining tizimli monitoringini olib borish yuklansin.

5. Oʻzbekiston Respublikasi Xalq taʼlimi vazirligi:

2005—2009-yillarda umumtaʼlim maktablari uchun darsliklar va oʻquv-metodik komplekslar nashr etishning 1a va 1b-ilovalarga muvofiq tasdiqlangan prognoz koʻrsatkichlaridan kelib chiqqan holda har yili kelgusi yilda nashr etish moʻljallangan oʻquv adabiyotlarining aniq roʻyxatini va tirajini belgilasin va tasdiqlasin;

umumiy oʻrta taʼlimning takomillashtirilgan davlat taʼlim standartlari, darsliklarga nisbatan yangilangan metodik talablar asosida oʻquv adabiyotlari 2-ilovaga muvofiq muddatlarda yaratilishini va nashr etilishini taʼminlasin;

Oʻzbekiston Respublikasi Moliya vazirligi bilan birgalikda, Darsliklarning respublika aylanma fondini yaratishni hamda maktablar oʻquvchilarini ushbu fond hisobiga darsliklar bilan taʼminlash tartibini nazarda tutuvchi maktablar oʻquvchilarini darsliklar bilan taʼminlashning samarali mexanizmini joriy etish yuzasidan 2004-yil oxirigacha taklif tayyorlasin va Oʻzbekiston Respublikasi Vazirlar Mahkamasiga kiritsin;

Oʻzbekiston aloqa va axborotlashtirish agentligi, Oʻzbekiston Respublikasi Moliya vazirligi bilan birgalikda 2005—2009-yillarda umumtaʼlim maktablari uchun davlat taʼlim standartlari talablariga muvofiq yuqori samarali multimediy tizimlarini hamda oʻquv adabiyotlari va qoʻllanmalarning kompyuter elektron turlarini yaratish dasturini ishlab chiqsin va belgilangan tartibda tasdiqlasin.

6. Oʻzbekiston Respublikasining Xususiylashtirish, monopoliyadan chiqarish va raqobatni rivojlantirish davlat qoʻmitasi umumtaʼlim maktablari uchun darsliklar va oʻquv-metodik qoʻllanmalarni nashr etish va qayta nashr qilishga tender (tanlov) savdolari oʻtkazishda raqobat toʻgʻrisidagi qonun hujjatlari talablariga rioya qilinishi ustidan nazoratni kuchaytirsin.

61. Oʻzbekiston Respublikasi Moliya vazirligi:

umumtaʼlim maktablari uchun darsliklar va oʻquv-metodik qoʻllanmalarni yetkazib berish xizmatlari narxlarining, shuningdek Oʻzbekiston Respublikasi Hukumatining qarorlarida narxlarini tartibga solish nazarda tutilgan oʻquv adabiyotlari ayrim turlarining narxlarini deklaratsiyalashda ularning sunʼiy ravishda oshirib yuborilishiga yoʻl qoʻyilmasligi ustidan nazorat oʻrnatsin;

oʻquv adabiyotlarini yangilashda ularga narxlar dinamikasi monitoringini olib borsin hamda ular yuzasidan maʼlumotlarni Uzluksiz taʼlim tizimi uchun yangi oʻquv dasturlari, darsliklar va oʻquv qoʻllanmalari yaratish va ularni qayta koʻrib chiqish boʻyicha Hukumat komissiyasiga kiritsin.

7. Vazirlar Mahkamasining “Oʻrta maxsus, kasb-hunar taʼlimi tizimi uchun darsliklar va oʻquv adabiyotlarining yangi avlodini yaratish toʻgʻrisida” 2001-yil 16-avgustdagi 341-son qarorining 8-bandi oʻz kuchini yoʻqotgan deb hisoblansin.

8. Mazkur qarorning bajarilishini nazorat qilish Oʻzbekiston Respublikasi Bosh vazirining birinchi oʻrinbosari R.S. Azimov va Oʻzbekiston Respublikasi Bosh vazirining oʻrinbosari A.I. Ikramov zimmasiga yuklansin.

Vazirlar Mahkamasining Raisi I. KARIMOV

Toshkent sh.,

2004-yil 22-noyabr,

548-son

Vazirlar Mahkamasining 2004-yil 22-noyabrdagi 548-son qaroriga 3-ILOVA

Umumiy oʻrta va oʻrta maxsus, kasb-hunar taʼlimi taʼlim muassasalari uchun darsliklar va oʻquv-metodik komplekslarni ishlab chiqish uchun mualliflar tarkibini tanlab olish va tasdiqlash tartibi toʻgʻrisida

NIZOM

I. Umumiy qoidalar

1. Mazkur Nizom Oʻzbekiston Respublikasi Prezidentining “2004—2009-yillarda Maktab taʼlimini rivojlantirish Davlat umummilliy dasturi toʻgʻrisida” 2004-yil 21-maydagi PF-3431-son Farmoniga muvofiq ishlab chiqilgan hamda darsliklar va oʻquv-metodik komplekslarni ishlab chiqishga mualliflar tarkibini tanlab olish va tasdiqlash tartibini belgilaydi.

2. Oʻquv adabiyotlarini ishlab chiqish uchun mualliflar tarkibi tanlov asosida tanlab olish yoʻli bilan aniqlanadi, xorijiy tillar boʻyicha darsliklar va oʻquv-metodik qoʻllanmalar bundan mustasno.

Xorijiy tillarni oʻrganish uchun oʻquv adabiyotlari yaratish va ularni modernizatsiya qilish boʻyicha mualliflar guruhlari (taʼlim turlari, xorijiy tillar predmetlari, sinflar, kurslar va shu kabilar boʻyicha) Oʻzbekiston Respublikasi Xalq taʼlimi vazirligi hamda Oliy va oʻrta maxsus taʼlim vazirligi tomonidan shakllantiriladi va tasdiqlanadi.

3. Quyidagilar mualliflar tarkibini tanlov asosida tanlab olishning maqsadi va vazifalari hisoblanadi:

oʻquvchilarni takomillashtirilgan davlat taʼlim standartlari, oʻquv rejalari va dasturlari asosida yaratilgan oʻquv adabiyotlari bilan taʼminlash;

vazirliklar va vakolatli muassasalarning buyurtmalari asosida oʻquv adabiyotlarini ishlab chiqish uchun mualliflar tarkibini tanlash tizimida raqobat muhitini yaratish, shuningdek uning ochiq-oshkoraligini taʼminlash;

oʻquv adabiyotlarini ishlab chiqishga eng malakali mutaxassislarni jalb etish, shuningdek yosh isteʼdodli mualliflar va mualliflar jamoalarini qoʻllab-quvvatlash.

4. Ham jismoniy shaxslar, ham kadrlar salohiyatiga, taʼlim muassasalari uchun oʻquv adabiyotlari yaratish tajribasiga ega boʻlgan turli tashkiliy-huquqiy shakllardagi ilmiy va oʻquv tashkilotlari mualliflar tarkibini tanlov asosida tanlab olish qatnashchilari boʻlishlari mumkin.

5. Oʻzbekiston Respublikasi Xalq taʼlimi vazirligi hamda Oliy va oʻrta maxsus taʼlim vazirligining Oʻrta maxsus, kasb-hunar taʼlimi markazi (keyingi oʻrinlarda buyurtmachi deb yuritiladi) takomillashtirilgan davlat standartlari va oʻquv dasturlarining bosqichma-bosqich joriy etilishini hisobga olgan holda tanlov asosida ishlab chiqish uchun zarur boʻlgan oʻquv adabiyotlari roʻyxatini belgilaydilar va Uzluksiz taʼlim tizimi uchun oʻquv dasturlari, darsliklar va oʻquv qoʻllanmalarini qayta koʻrib chiqish va yangilarini yaratish boʻyicha Hukumat komissiyasining (keyingi oʻrinlarda Hukumat komissiyasi deb yuritiladi) tasdigʻiga kiritadilar.

6. Hukumat komissiyasi mualliflar tarkibini tanlab olish asosida ishlab chiqish uchun zarur boʻlgan oʻquv adabiyotlari roʻyxatini oʻrganadi va tasdiqlaydi.

II. Mualliflar tarkibi tanlovini oʻtkazish

7. Mualliflar tarkibini tanlab olish Uzluksiz taʼlim tizimi uchun oʻquv dasturlari, darsliklar va oʻquv qoʻllanmalarini qayta koʻrib chiqish va yangilarini yaratish boʻyicha Hukumat komissiyasi huzurida tuziladigan tanlov komissiyasi tomonidan amalga oshiriladi.

Tanlov komissiyasi aʼzolari soni (kamida 9 kishi) toq boʻlgan tarkibda tuziladi, uning shaxsiy tarkibi Hukumat komissiyasi tomonidan tasdiqlanadi.

Tanlov komissiyasi tarkibiga quyidagilar kiritiladi:

buyurtmachining vakillari;

manfaatdor vazirliklar va idoralarning (Oʻzbekiston Matbuot va axborot agentligi, Sogʻliqni saqlash vazirligi va boshqalar) vakillari;

ilmiy-pedagogik jamoatchilik vakillari;

yetakchi amaliyotchi oʻqituvchilar, metodik kabinetlar mutaxassislari, ota-onalar qoʻmitasi aʼzolari.

Buyurtmachining rahbari yoki uning oʻrinbosarlaridan biri tanlov komissiyasi raisi hisoblanadi.

8. Oʻquv adabiyotlari loyihasini ishlab chiqish uchun mualliflar tarkibini tanlov asosida tanlab olish va tasdiqlashni tashkil etish hamda oʻtkazish ushbu Nizomga ilova qilinayotgan sxemaga muvofiq amalga oshiriladi.

9. Tanlov asosida ishlab chiqish uchun zarur boʻlgan oʻquv adabiyotlari roʻyxati Hukumat komissiyasi tomonidan tasdiqlangandan keyin tanlov komissiyasi ommaviy axborot vositalarida mualliflar tarkibi tanlanishi toʻgʻrisida eʼlon beradi.

Eʼlon buyurtmanomalarni qabul qilish muddati tugashidan kamida 30 kun oldin beriladi.

10. Qatnashchilardan arizalarni qabul qilish va mualliflarni tanlab olish tartibotlarini tashkil etish funksiyalari tanlov komissiyasiga yuklanadi.

11. Qatnashchilar tanlov komissiyasiga quyidagilardan iborat boʻlgan takliflarni taqdim etadilar:

ishtirok etish uchun buyurtmanoma;

qatnashchining soʻrovnomasi;

oʻquv adabiyoti konsepsiyasi (0,5 bosma toboqqacha), unda oʻquv kursining maqsadi va vazifalari, mazmuni va tuzilmasiga nazariy-metodologik yondashuv, oʻquv adabiyotining metodik apparatiga asos qilib olinadigan didaktik prinsiplar aks ettirilishi kerak;

oʻquv adabiyotining reja-prospekti (boʻlimlar va mavzular mazmunining tezisli bayoni, 1 bosma toboqqacha) va bitta bobning namuna matni.

12. Buyurtmanomalar taqdim etishning belgilangan muddati tugagandan keyin tanlov komissiyasi belgilangan kun va soatda buyurtmanomalar mavjud boʻlgan takliflarni ochadi.

13. Eʼlonda koʻrsatilgan oxirgi muddatdan keyin tushgan buyurtmanomalar tanlovga qoʻyilmaydi. Tanlovda ishtirok etish shartlariga va rasmiylashtirish qoidalariga muvofiq boʻlmagan buyurtmanomalar koʻrib chiqilmaydi.

14. Tanlov komissiyasi bayonnoma tuzadi, unda tushgan buyurtmanomalarni hamda zarur maʼlumotlar va hujjatlar mavjudligini roʻyxatdan oʻtkazadi. Bayonnomada:

tushgan buyurtmanomalar;

tanlovga qoʻyilgan qatnashchilar;

tanlov qatnashchilari tarkibiga kiritilmagan talabgorlar (ularning takliflari rad etilishining aniq sabablari koʻrsatilgan holda) toʻgʻrisidagi maʼlumotlar boʻlishi kerak.

15. Ishlab chiquvchi mualliflarning takliflarini ekspertizadan oʻtkazishni tashkil etish uchun tanlov komissiyasi tomonidan ilmiy va pedagogik jamoatchilik, olimlar, amaliyotchi oʻqituvchilar, metodistlar va talab etiladigan ixtisoslikning boshqa mutaxassislaridan iborat tarkibda tegishli fanlar boʻyicha ekspert guruhi tayinlanadi.

Tegishli fanlar boʻyicha ekspert guruhining shaxsiy tarkibi tanlov komissiyasi tomonidan tasdiqlanadi. Ekspert guruhi aʼzolarining tarkibi oshkor qilinmaydi.

Ekspert guruhi ishlab chiquvchi mualliflarning taqdim etilgan takliflarini ularning kod raqamlari boʻyicha baholaydi va oʻzining asoslangan xulosalarini tanlov komissiyasiga kiritadi.

16. Buyurtmachining rahbarlari, tanlov komissiyasi va ekspert guruhlarining aʼzolari ishlab chiquvchi mualliflar boʻlishlari mumkin emas.

17. Tanlov komissiyasi ekspert guruhlarining xulosalari va tanlov hujjatlarida koʻrsatilgan mezonlar asosida 10 kun muddatda gʻoliblarni tanlab olish uchun taqdimnomalarni Hukumat komissiyasiga yuboradi.

Oʻquv adabiyotlari loyihalarini ishlab chiqish uchun mualliflar guruhini tanlash gʻoliblari toʻgʻrisidagi yakuniy qaror Hukumat komissiyasi tomonidan qabul qilinadi va qaror tegishli bayonnoma bilan rasmiylashtiriladi.

Tanlov natijalari toʻgʻrisidagi axborot Hukumat komissiyasi tomonidan tasdiqlangandan keyin 3 kun mobaynida ommaviy axborot vositalarida eʼlon qilinadi.

171. Quyidagi hollarda tanlab olish boʻlib oʻtmagan deb eʼlon qilinadi:

tanlab olishga uchtadan kam boʻlgan qatnashchilarning takliflari taqdim etilganda;

uchtadan kam qatnashchilarning tanlov takliflari tanlov hujjatlarida belgilangan talablarga muvofiq boʻlganda.

172. Tanlov asosida tanlab olish boʻlib oʻtmagan deb eʼtirof etilgan taqdirda, tanlov komissiyasi takroriy tanlov asosida tanlab olishni oʻtkazish toʻgʻrisida qaror qabul qiladi.

Takroriy tanlov asosida tanlab olish oʻtkazilganda takliflarni taqdim etish shartlari va muddatlarini qayta koʻrib chiqishga yoʻl qoʻyiladi.

Takroriy tanlov boʻlib oʻtmagan deb eʼtirof etilgan taqdirda, tanlov komissiyasi taʼlim muassasasiga yoki ilmiy tashkilotga oʻquv adabiyotini ishlab chiqarishni topshiradi.

173. Tanlov asosida tanlab olish jarayonida va u tugallangandan keyin mualliflar — ishlab chiquvchilar oʻz tarkibini olimlar, metodistlar va tajribali amaliyotchi oʻqituvchilar bilan toʻldirishi mumkin.

18. Buyurtmachi Hukumat komissiyasining qarori asosida gʻoliblar bilan Oʻzbekiston Respublikasi qonun hujjatlariga muvofiq oʻquv adabiyotlari loyihalarini ishlab chiqish yuzasidan shartnoma tuzadi.

III. Yakuniy qoidalar

19. Buyurtmachi oʻquv adabiyotlari loyihasi ishlab chiqilishining muntazam nazorat qilinishini taʼminlaydi.

20. Oʻquv adabiyotlari loyihasini ishlab chiqish uchun buyurtma olgan gʻoliblar oʻquv adabiyotlari loyihasining sifati va ishlab chiqish muddatlari uchun javob beradilar.

Umumiy oʻrta va oʻrta maxsus, kasb-hunar taʼlimi taʼlim muassasalari uchun darsliklar va oʻquv-metodik komplekslarni ishlab chiqish uchun mualliflar tarkibini tanlab olish va tasdiqlash tartibi toʻgʻrisida nizomga ILOVA

Oʻquv adabiyotlari loyihasini ishlab chiqish uchun mualliflar tarkibini tanlab olish va tasdiqlash sxemasi

Vazirlar Mahkamasining 2004-yil 22-noyabrdagi 548-son qaroriga 4-ILOVA

Umumiy oʻrta va oʻrta maxsus, kasb-hunar taʼlimi taʼlim muassasalari uchun darsliklar va oʻquv-metodik komplekslarni tanlov asosida tanlab olish tartibi toʻgʻrisida

NIZOM

I. Umumiy qoidalar

1. Mazkur Nizom keyinchalik nashr etish uchun yangi avlod darsliklarni va oʻquv-metodik komplekslarni tanlab olish tanlovini oʻtkazish tartibini belgilaydi.

2. Darsliklar va oʻquv-metodik komplekslarga (keyingi oʻrinlarda oʻquv adabiyotlari deb yuritiladi) umumiy oʻrta va oʻrta maxsus, kasb-hunar taʼlimi taʼlim muassasalari uchun yaratiladigan darsliklar, qoʻshimcha oʻquv, metodik va maʼlumotnoma adabiyotlar kiradi.

3. Oʻquv adabiyotlarini tanlab olish tanlov asosida amalga oshiriladi, unda faqat mualliflar tarkibini tanlab olish gʻoliblari qatnashadi (oʻrganish va tasdiqlash Xalq taʼlimi vazirligi hamda Oliy va oʻrta maxsus taʼlim vazirligi tomonidan amalga oshiriladigan oʻquv adabiyotlari bundan mustasno). Quyidagilar tanlov yoʻli bilan tanlab olishning maqsadi hisoblanadi:

zamonaviylashtirilgan davlat taʼlim standartlari va oʻquv dasturlari talablariga muvofiq oʻquv adabiyotlari mazmunini takomillashtirish, ularning dizayni sifatini oshirish;

oʻquv adabiyotlari yaratish jarayonida raqobat muhitini shakllantirish, yosh mualliflar va mualliflar jamoalarini qoʻllab-quvvatlash.

4. Tanlov oʻtkazish toʻgʻrisidagi qaror Uzluksiz taʼlim tizimi uchun oʻquv dasturlari, darsliklar va oʻquv qoʻllanmalarini qayta koʻrib chiqish va yangilarini yaratish boʻyicha Hukumat komissiyasi (keyingi oʻrinlarda Hukumat komissiyasi deb yuritiladi) tomonidan qabul qilinadi.

5. Oʻquv adabiyotlarini tanlov asosida tanlab olish aʼzolari soni (kamida 9 kishi) toq boʻlgan, shaxsiy tarkibi esa Hukumat komissiyasi tomonidan tasdiqlanadigan tanlov komissiyasi tomonidan oʻtkaziladi. Tanlov komissiyasi tarkibiga quyidagilar kiritiladi:

buyurtmachining — Oʻzbekiston Respublikasi Xalq taʼlimi vazirligining yoki Oliy va oʻrta maxsus taʼlim vazirligining Oʻrta maxsus, kasb-hunar taʼlimi markazi (tegishliligiga koʻra) vakillari;

Oʻzbekiston Respublikasi Xalq taʼlimi vazirligining Respublika taʼlim markazi yoki Oliy va oʻrta maxsus taʼlim vazirligining Oliy va oʻrta maxsus, kasb-hunar taʼlimini rivojlantirish markazi mutaxassislari;

idoraviy mansub taʼlim muassasalariga ega boʻlgan boshqa vazirliklar va idoralarning vakillari;

Pedagogika fanlari ilmiy-tadqiqot instituti va boshqa tegishli ilmiy-tadqiqot taʼlim muassasalari xodimlari;

umumtaʼlim maktablari, akademik litseylar va kasb-hunar kollejlarining yetakchi amaliyotchi oʻqituvchilari;

Oʻzbekiston matbuot va axborot agentligi vakillari.

Buyurtmachining rahbari yoki uning oʻrinbosarlaridan biri tanlov komissiyasi raisi hisoblanadi.

II. Tanlov orqali tanlab olishni oʻtkazishga tayyorgarlik koʻrish

6. Oʻquv adabiyotlarini tanlov orqali tanlab olishni tashkil etish va oʻtkazish ushbu Nizomga ilova qilinayotgan sxemaga muvofiq amalga oshiriladi.

7. Tanlov komissiyasi tanlov boshlanishidan 120 kun oldin ommaviy axborot vositalarida tanlov oʻtkazilishi toʻgʻrisida eʼlon beradi. Eʼlonda quyidagilar koʻrsatiladi:

ishlab chiqilishi moʻljallanayotgan oʻquv adabiyotlari roʻyxati;

tanlov takliflarini qabul qilish va tanlovni oʻtkazish muddatlari;

tanlov hujjatlarini va tanlov shartlari toʻgʻrisida qoʻshimcha axborotni olish uchun manzil, bogʻlaniladigan shaxslar va telefon raqamlari.

8. Tayyorgarlik koʻrish muddati, tanlov takliflarini qabul qilishning oxirgi sanasi va soati, shuningdek takliflarni ochish kuni va vaqti tanlov komissiyasi tomonidan belgilanadi, u tanlov hujjatlarini tayyorlash va tarqatishni tashkil etadi, talabgorlarga maslahatlar beradi, arizalarni qabul qiladi, tanlov takliflarining hisobga olinishini, saqlanishi va maxfiyligini taʼminlaydi.

9. Tanlov hujjatlari quyidagilardan iborat boʻladi:

tanlov orqali tanlab olishda qatnashish uchun beriladigan buyurtmanomaning namunaviy shakli;

ishlab chiqish moʻljallangan oʻquv adabiyotlari roʻyxati;

tanlov qatnashchisi uchun yoʻriqnoma;

tanlov takliflarini baholash mezonlari;

oʻquv adabiyotlarini nashr etish huquqini beruvchi shartnomaning namunaviy shakli.

10. Tanlov hujjatlari faqat talabgorlarga — mualliflar tarkibini tanlab olish tanlovi gʻoliblariga, oʻquv adabiyotlari loyihasini ishlab chiqish yuzasidan shartnoma tuzilgan shaxslarga yuboriladi.

11. Tanlov takliflarini tayyorlash davri ommaviy axborot vositalarida eʼlon berilgan yoki tanlov qatnashchisi rasmiy ravishda xabardor qilingan (taklif etilgan) sanadan boshlab kamida 120 kunni tashkil qiladi.

12. Talabgorlar tanlov taklifi sifatida qatnashish uchun buyurtmanoma, oʻquv adabiyotlarining qoʻlyozmasi yoki maketini taqdim etadilar.

13. Tanlov orqali tanlab olishda qatnashish uchun beriladigan buyurtmanomada quyidagilar koʻrsatiladi:

taklif etilayotgan oʻquv adabiyotining nomi;

umumiy maʼlumotlar hamda oʻquv adabiyotlari muallifi (mualliflari)ning tajribasi va kasb-malaka darajasi toʻgʻrisidagi maʼlumotlar;

muallifning pochta va elektron manzili (mavjud boʻlsa), telefoni va telefaksi (mavjud boʻlsa) raqamlari.

14. Tanlov takliflari qatnashchi uchun yoʻriqnomada nazarda tutilgan shartlar asosida ishlab chiqiladi, unda quyidagilar mavjud boʻlishi kerak:

tanlovga taqdim etilayotgan hujjatlarning roʻyxati va ularga qoʻyiladigan talablar;

oʻquv adabiyotini yaratish va rasmiylashtirishga qoʻyiladigan pedagogik va texnik talablar;

tanlov takliflari turkumini shakllantirish tartibotiga qoʻyiladigan talablar va uni tanlov komissiyasiga berish usullari;

tanlov orqali tanlab olish doirasida tuzilgan har qanday hujjatning maxfiyligiga izoh;

buyurtmanomalar va tanlov takliflarini qabul qilishning eng soʻnggi muddatlari;

tanlovni oʻtkazish tartibotlari tavsifi va muddatlari;

gʻolibni aniqlash va shartnoma tuzish tartibining tavsifi;

tanlov orqali tanlab olishga doir tushuntirishlar olish uchun manzil va bogʻlanish telefonlari.

15. Tanlov takliflari muhrlangan holda qabul qilinadi. Belgilangan muddatdan keyin taqdim etilgan takliflar koʻrib chiqilmaydi va konvertlar ochilmagan holda talabgorlarga qaytariladi.

Tanlov ishtirokchisi tomonidan tanlov takliflarining toʻliq boʻlmagan holda taqdim etilishi ham uning taklifi rad etilishi uchun asos boʻlishi mumkin.

16. Tanlov qatnashchisi tanlov takliflarini taqdim etishning soʻnggi sanasi va vaqtidan keyin oʻz taklifiga oʻzgartirishlar kiritishga yoki uni qaytarib olishga haqli emas.

III. Tanlov orqali tanlab olishni oʻtkazish shartlari

17. Buyurtmanomalar berishning belgilangan muddati tamom boʻlgandan keyin tanlov komissiyasi belgilangan kun va soatda tanlov takliflari joylangan konvertlarni ochadi.

Tanlov takliflari joylangan konvertlarni ochish tanlov komissiyasi aʼzolari va tanlovda qatnashayotgan oʻquv adabiyotlari mualliflari ishtirokida amalga oshiriladi.

18. Konvertlar ochilgandan keyin komissiya bayonnoma tuzadi, unda tushgan takliflarni hamda zarur maʼlumotlar va hujjatlar mavjud ekanligini qayd etadi. Bayonnomada quyidagilar toʻgʻrisidagi maʼlumotlar boʻlishi kerak:

tushgan takliflar;

tanlovga qoʻyilgan qatnashchilar, ularning kod raqamlari;

tanlov qatnashchilari tarkibiga kiritilmagan talabgorlarning takliflari rad etilishining aniq sabablari koʻrsatilgan holdagi roʻyxati.

19. Oʻquv adabiyotlarini ekspertizadan oʻtkazish va baholashni tashkil qilish uchun tanlov komissiyasi tomonidan ilmiy va pedagogik jamoatchilik, olimlar, amaliyotchi oʻqituvchilar, metodistlar va muayyan ixtisoslikning boshqa mutaxassislaridan iborat tarkibda tegishli fan boʻyicha ekspert guruhi tayinlanadi. Ekspert guruhi aʼzolari tarkibi oshkor qilinmaydi.

20. Tanlovda qatnashayotgan oʻquv adabiyotlarini ekspert baholash komissiya tomonidan belgilangan muddatlarda, biroq 30 kalendar kundan ortiq boʻlmagan muddatda oʻtkaziladi.

21. Tanlov takliflarini baholash va tanlov gʻolibini aniqlash tanlov hujjatlarida koʻrsatilgan mezonlar asosida amalga oshiriladi.

Quyidagilar oʻquv adabiyotlarini baholashning asosiy mezonlari hisoblanadi:

oʻquv adabiyotlarining davlat taʼlim standartlariga, oʻquv rejalari va dasturlariga muvofiqlik darajasi;

taklif etilayotgan oʻquv materialining uzviyligi va izchilligi taʼminlanganligi darajasi, shuningdek predmetlararo aloqaning taʼminlanishi;

taklif etilayotgan oʻquv materialining ilmiy-pedagogik asoslanganligi;

predmetga milliy mustaqillik gʻoyalarining singdirilganligi darajasi;

oʻquv materialining taʼlim olayotganlarning psixologik va yosh xususiyatlariga, shuningdek ularning bilimlari darajasiga muvofiqligi;

bayon etish tilining ravonligi, taklif etilayotgan materialning koʻrgazmaliligi va rasmlar ilova qilinganligi;

nazariy materialning mashqlar, vazifalar va amaliy mashgʻulotlar bilan maqbul nisbati;

taklif etilayotgan maket dizaynining sifati.

22. Baholash mezonlari tafsilotlari tanlov komissiyasi tomonidan tanlov takliflari konvertlari ochilgunga qadar amalga oshiriladi. Tanlov paytida mezonlarga oʻzgartirish va qoʻshimchalar kiritilishiga yoʻl qoʻyilmaydi.

23. Tushgan oʻquv adabiyotini koʻrib chiqish va baholash toʻgʻrisidagi axborot maxfiy hisoblanadi va tanlab olish tartibotlariga rasman aloqador boʻlmagan shaxslarga maʼlum qilinmaydi. Komissiya va ekspert guruhi aʼzolari mazkur axborot oshkor qilinganligi uchun qonun hujjatlarida belgilangan tartibda javob beradilar.

24. Ekspert guruhi tanlov qatnashchilarining taqdim etilgan takliflarini ularning kod raqamlari boʻyicha baholaydi hamda oʻzining asoslangan xulosalarini tanlov komissiyasiga kiritadi.

Tanlov komissiyasi ekspert guruhlar xulosalari hamda tanlov hujjatlarida koʻrsatilgan mezonlar asosida 10 kun muddatda Hukumat komissiyasiga gʻoliblarni tanlab olish boʻyicha tavsiyanoma yuboradi.

gʻolibni aniqlash toʻgʻrisidagi uzil-kesil qaror Hukumat komissiyasi tomonidan qabul qilinadi, qaror tegishli bayonnoma bilan rasmiylashtiriladi.

25. Tanlov yakunlari gʻolib aniqlangandan keyin 3 kundan kechikmay ommaviy axborot vositalarida eʼlon qilinadi.

26. Hukumat komissiyasi qarori asosida buyurtmachi bilan qoʻlyozma muallifi (mualliflar jamoasi) oʻrtasida oʻquv adabiyotlarini nashr etish toʻgʻrisida shartnoma imzolanadi.

Shartnoma Oʻzbekiston Respublikasi qonun hujjatlari talablariga muvofiq tuzilishi va oʻquv adabiyotlarini ishlab chiqqanlik uchun moddiy ragʻbatlantirish, ularga egalik qilish, ulardan foydalanish va ularni tasarruf etish, nizolarni hal etish shartlarini hamda shartnoma tuzishdagi boshqa majburiy shartlarni aks ettirishi zarur.

IV. Yakuniy qoidalar

27. Tanlovning har bir qatnashchisi mazkur Nizomda belgilangan tanlov asosida tanlab olishni oʻtkazish shartlariga rioya etilishi va natijalarning xolisligi uchun qonun hujjatlarida belgilangan tartibda javob beradi.

28. Tanlov asosida tanlab olishni tashkil etish va oʻtkazish bilan bogʻliq nizolar Oʻzbekiston Respublikasining qonun hujjatlariga muvofiq koʻrib chiqiladi.

Umumiy oʻrta va oʻrta maxsus, kasb-hunar taʼlimi taʼlim muassasalari uchun darsliklar va oʻquv-metodik komplekslarni tanlov asosida tanlab olish toʻgʻrisidagi nizomga ILOVA

Oʻquv adabiyotlari loyihalarini tanlov asosida tanlab olishni tashkil etish va oʻtkazish sxemasi

Vazirlar Mahkamasining 2004-yil 22-noyabrdagi 548-son qaroriga 5-ILOVA

Umumiy oʻrta va oʻrta maxsus kasb-hunar taʼlimi taʼlim muassasalari uchun darsliklar va oʻquv-metodik komplekslarni nashr etish va qayta nashr qilish yuzasidan tender savdolari oʻtkazish tartibi toʻgʻrisida

NIZOM

I. Umumiy qoidalar

1. Mazkur Nizom darsliklar va oʻquv-metodik komplekslarni nashr etish va qayta nashr etish uchun davlat buyurtmasini joylashtirish yuzasidan tender savdolarini tashkil qilish va oʻtkazish tartibi va shartlarini belgilaydi.

Darsliklar, qoʻshimcha oʻquv, metodik adabiyotlar va ish daftarlari darsliklar va oʻquv-metodik komplekslar (keyingi oʻrinlarda oʻquv adabiyotlari deb ataladi) sifatida qaraladi.

11. Ushbu Nizomda quyidagi tushunchalar qoʻllaniladi:

oʻquv adabiyoti maketi — nashriyot tomonidan tasdiqlangan bosma sahifada polosalar joylashtirilgan holda nashr polosalarini verstka va montaj qilish uchun oʻquv adabiyoti etaloni;

oʻquv adabiyotining asl nusxasi-maketi — har bir sahifasi boʻlgʻusi nashrning tegishli sahifasiga toʻliq muvofiq boʻlgan oʻquv adabiyotining asl nusxasi;

nashr — oʻxshash nusxalarning muayyan soni bilan oʻquv adabiyotining birlamchi chop etilishi;

qayta nashr qilish — oldin chiqarilgan oʻquv adabiyotini takroran nashr qilish. Qayta nashr qilish stereotip, yaʼni biror-bir tuzatishlarsiz, yoki tuzatilgan, toʻldirilgan, qayta ishlangan boʻlishi mumkin”;

2. Mazkur Nizomning amal qilishi umumiy oʻrta va oʻrta maxsus, kasb-hunar taʼlimi taʼlim muassasalari uchun oʻquv adabiyotlari nashr etishda va qayta nashr etishda tender savdolari oʻtkazishga tatbiq etiladi.

3. Tender savdolari 100 ming AQSH dollaridan ortiq boʻlgan summaga bitta kontrakt boʻyicha oʻquv adabiyotlari nashr etilganda va qayta nashr etilganda amalga oshiriladi.

Bir ming AQSH dollaridan kam summaga bitta kontrakt boʻyicha oʻquv adabiyotlarini nashr etish va qayta nashr etishda noshir narx, sifat va muddatlar boʻyicha eng maqbul shartlarni taklif etganlar bilan toʻgʻridan-toʻgʻri shartnomalar tuzish yoʻli bilan aniqlanadi.

Bir ming AQSH dollaridan 100 ming AQSH dollarigacha summaga bitta kontrakt boʻyicha oʻquv adabiyotlarini nashr etish va qayta nashr etishda noshir buyurtmachilar tomonidan tashkil etiladigan idoraviy tanlov komissiyalari tomonidan baholanadigan eng yaxshi takliflarni tanlab olish yoʻli bilan aniqlanadi.

Istisno hollarda, Oʻzbekiston Respublikasi Prezidentining qarorlari asosida oʻquv adabiyotlarini nashr etish va qayta nashr etishga kontraktlar tender (tanlov) savdolari oʻtkazilmasdan tuzilishi mumkin.

4. Xorijiy kreditlar mablagʻlari (grantlar) hisobiga oʻquv adabiyoti nashr etishda va qayta nashr etishda mazkur Nizomning talablari tavsiya xususiyatiga ega boʻladi va, agar xorijiy kreditlar va grantlarni berish shartlariga koʻra savdolarni oʻtkazishning oʻzgacha tartibi belgilangan boʻlsa, qoʻllanilishi mumkin emas.

5. Tender savdolarini oʻtkazish toʻgʻrisidagi qaror Uzluksiz taʼlim tizimi uchun oʻquv dasturlari, darsliklar va oʻquv qoʻllanmalarini qayta koʻrib chiqish va yangilarini yaratish boʻyicha Hukumat komissiyasi (keyingi oʻrinlarda Hukumat komissiyasi deb yuritiladi) tomonidan qabul qilinadi.

Nashr qilish va qayta nashr qilishga tender savdolari faqat Hukumat komissiyasining qarori va huquq egalari (mualliflar va mualliflar jamoalari)ning roziligi mavjud boʻlgan oʻquv adabiyotlariga eʼlon qilinishi mumkin. Oʻquv adabiyotlarini qayta nashr qilishda oʻquv adabiyotlarining asl nusxasi-maketiga huquqlarga ega boʻlgan nashriyotlarning roziligi ham zarurdir.

Oʻquv adabiyotlarini qayta nashr qilish boʻyicha tender savdolari gʻoliblariga muallifni taqdirlash toʻlovini va oʻquv adabiyotlarining asl nusxasi-maketini tayyorlashga tasdiqlangan sarf-xarajatlarni huquq egasi boʻlgan nashriyotga qoplash uchun mablagʻlarni toʻlash Oʻzbekiston matbuot va axborot agentligi, Xalq taʼlimi vazirligi, Oliy va oʻrta maxsus taʼlim vazirligining Oʻrta maxsus, kasb-hunar taʼlimi markazi tomonidan Oʻzbekiston Respublikasi Moliya vazirligi bilan birgalikda belgilanadigan tartibda amalga oshiriladi.

6. Quyidagilar tender savdolarining maqsadi hisoblanadi:

oʻquv adabiyotining texnik jihatdan bajarilishi sifatini oshirish va undan uzoq muddat foydalanilishini taʼminlash;

oʻquv adabiyotini nashr etish va qayta nashr etish jarayonida raqobat muhitini yaratish, noshirlik va matbaa faoliyati bilan shugʻullanuvchi xoʻjalik yurituvchi subyektlarning tenderlarda ishtirok etishini kengaytirish va ragʻbatlantirish, shuningdek ularning teng huquqli ishtirok etishini taʼminlash, mazkur jarayonga kichik va xususiy tadbirkorlik subyektlarini jalb etish;

oʻquv adabiyotini nashr etishga va qayta nashr etishga yoʻnaltiriladigan davlat budjeti, budjetdan tashqari maqsadli jamgʻarmalar mablagʻlaridan foydalanish samaradorligini oshirish.

7. Oshkoralik, talablarning yagonaligi va qarorlar qabul qilishdagi xolislik hamda savdoning barcha qatnashchilari uchun teng raqobat shart-sharoitlari yaratish tender savdolarini tashkil etish va oʻtkazishning asosiy prinsiplari hisoblanadi.

8. Oʻquv adabiyoti nashr etishga va qayta nashr etishga tender savdolari mazkur Nizomga ilovaga muvofiq bir bosqichli ikki konvertli tartib-qoida boʻyicha axborotnoma ochiq eʼlon qilinishi yoʻli bilan oʻtkaziladi.

II. Tender savdolarining qatnashchilari

9. Buyurtmachi, tender komissiyasi, tender savdolarining tashkilotchisi va oferentlar tender savdolarining asosiy qatnashchilari hisoblanadi.

10. Buyurtmachi (Oʻzbekiston Respublikasi Xalq taʼlimi vazirligi yoki Oliy va oʻrta maxsus taʼlim vazirligining Oʻrta maxsus, kasb-hunar taʼlimi markazi):

rasmiy farmoyish beruvchi hujjat (buyruq) chiqargan holda tender oʻtkazish shakli, turi, sanasi, joyi va shartlarini belgilaydi;

oʻquv adabiyotining maksimal qiymatini mustaqil ravishda yoki ixtisoslashtirilgan tashkilotlarni jalb etgan holda belgilaydi;

talabgorlarning malakasiga qoʻyiladigan asosiy talablarni, oʻquv adabiyotiga qoʻyiladigan maxsus va texnik talablarni belgilaydi;

tender savdolarini tayyorlash va oʻtkazish bilan bogʻliq xarajatlarni amalga oshiradi;

tender hujjatlari ishlab chiqilishini nazorat qiladi va ularni tasdiqlaydi;

tender savdolarining gʻolibi bilan kontrakt tuzadi.

11. Tender komissiyasi oʻquv adabiyotini nashr etishga va qayta nashr etishga davlat buyurtmasini joylashtirish uchun tender savdolarini oʻtkazish boʻyicha doimiy organ hisoblanadi. Komissiyaning son tarkibi aʼzolarning toq sonidan, qoidaga koʻra, kamida 11 kishidan iborat boʻladi. Buyurtmachining rahbari yoki uning oʻrinbosarlaridan biri komissiya raisi hisoblanadi. Hukumat komissiyasi tomonidan tasdiqlanadigan komissiya tarkibiga Tender komissiyasi buyurtmachi tomonidan Oʻzbekiston Respublikasi Investitsiyalar boʻyicha davlat qoʻmitasi, Oʻzbekiston Respublikasi Vazirlar Mahkamasi huzuridagi “OʻzInjiniring” respublika loyiha instituti, shuningdek, buyurtmachining tarmoq ilmiy-texnik kengashlari vakillari majburiy tartibda jalb etilgan holda tashkil etiladi:

Oʻzbekiston Respublikasi Vazirlar Mahkamasi Ijro etuvchi apparatining;

Oʻzbekiston Respublikasi Oliy va oʻrta maxsus taʼlim vazirligining (tender Oʻrta maxsus, kasb-hunar taʼlimi markazi tomonidan oʻtkazilgan taqdirda);

Oʻzbekiston Respublikasi Xalq taʼlimi vazirligi yoki Oʻrta maxsus, kasb-hunar taʼlimi markazining (mansubliligiga koʻra);

Oʻzbekiston Respublikasi Moliya vazirligi;

Oʻzbekiston Respublikasi Xususiylashtirish, monopoliyadan chiqarish va raqobatni rivojlantirish davlat qoʻmitasi;

Oʻzbekiston Respublikasi Sogʻliqni saqlash vazirligi;

xizmat koʻrsatuvchi tijorat bankining;

kitob nashr etish sohasidagi mustaqil ekspert tashkilotlarining vakillari majburiy tartibda kiritiladi.

Buyurtmachining yoki uning idoraviy mansub korxonalari va tashkilotlarining vakillari soni tender komissiyasi umumiy tarkibining 30 foizidan oshmasligi kerak.

12. Tender komissiyasi:

tender oʻtkazish tartib-qoidalarini belgilaydi;

tender takliflarini baholash mezonlarini tasdiqlaydi;

tender takliflarini qabul qilishning oxirgi kuni va vaqtini, konvertlarni ochish vaqti va joyini belgilaydi;

tegishlicha rasmiylashtirgan holda tender savdolarini oʻtkazadi;

takliflar bildirilgan konvertlarni ochadi, ularning tender hujjatlari bilan belgilangan talablarga (taqdim etilgan hujjatlarning toʻliqligi, ularning rasmiylashtirilishi va hokazo) muvofiqligini tekshiradi;

baholash guruhlari jalb etiladigan mustaqil ekspertlar yoki maslahatchilar ishini tashkil etadi va muvofiqlashtiradi;

tender savdolari natijalarini tasdiqlash uchun Hukumat komissiyasiga kiritadi.

13. Tender savdolarining tashkilotchisi (buyurtmachining taklifiga koʻra tender komissiyasi tomonidan tayinlanadigan ishchi guruh yoki buyurtmachi tomonidan shartnoma asosida jalb etiladigan konsalting kompaniyasi):

buyurtmachi bilan kelishgan holda tender hujjatlarini ishlab chiqadi va tasdiqlangandan keyin uni talabgorlarga taqdim etadi;

tender oʻtkazish toʻgʻrisidagi eʼlonni ommaviy axborot vositalarida eʼlon qiladi va maxsus axborot portalida joylashtiradi hamda potensial talabgorlarga taklifnomalar joʻnatilishini taʼminlaydi;

tender takliflarini baholash mezonlari ishlab chiqilishini taʼminlaydi;

arizalar va tender takliflarini qabul qiladi, ularning hisobga olinishi va maxfiyligini taʼminlaydi;

talabgorlarning malakaviy tanlovini oʻtkazadi;

tender takliflarining asl nusxalarini konvertlarni ochish va tender oʻtkazish uchun tender komissiyasiga taqdim etadi.

Savdolarni tashkil etish uchun konsalting kompaniyasi jalb etilgan taqdirda tender savdolari tashkilotchisining huquq va majburiyatlari uning bilan buyurtmachi oʻrtasida tuziladigan shartnomada belgilanadi.

14. Tender takliflarini ekspertizadan oʻtkazish va baholashni tashkil etish uchun tender komissiyasi tomonidan texnik va tijorat bahosi boʻyicha baholash guruhlari tayinlanadi.

Texnik baho boʻyicha baholash guruhi tender komissiyasi aʼzolaridan yoki mustaqil maslahatchilar orasidan, oʻquv adabiyotlari yaratish va chiqarish hamda kitob nashr etish texnologiyasi sohasida vakolatli boʻlgan kamida besh nafar mutaxassisdan iborat tarkibda tuziladi.

Tijorat bahosi boʻyicha baholash guruhi tender komissiyasi aʼzolari yoki mustaqil maslahatchilar orasidan, bank-moliya, yuridik va boshqa sohalarda vakolatli boʻlgan kamida besh nafar mutaxassisdan, shuningdek buyurtmachining vakillaridan iborat tarkibda tuziladi.

15. Baholash guruhlarining shaxsiy tarkibi tender komissiyasi tomonidan tasdiqlanadi va tender savdolari tugallangunga qadar maxfiy axborot hisoblanadi.

16. Baholash guruhlari:

tender takliflarini oʻrganadi, tahlil qiladi va koʻrib chiqadi;

tender hujjatlarida koʻrsatilgan mezonlarga muvofiq ballar qoʻyadi;

eng yaxshi tender taklifini aniqlaydi hamda savdolar gʻolibini aniqlash va tasdiqlash uchun tender komissiyasiga xulosa kiritadi.

17. Noshirlik faoliyatida tajribaga ega boʻlgan ham mahalliy, ham xorijiy yuridik shaxslar oferentlar — tender savdolari qatnashchilari boʻlishlari mumkin.

18. Talabgorlarning malakaviy tanlovida savdolarda qatnashishga quyidagi yuridik shaxslar qoʻyilmaydi:

tender savdolari eʼlon qilingan sanada davlat roʻyxatidan oʻtkazilgan paytdan boshlab oʻz faoliyatini 6 oydan kam amalga oshirayotgan;

buyurtmachi bilan oldin tuzilgan kontraktlar boʻyicha zimmasiga qabul qilingan majburiyatlarni zarur tarzda bajarmagan;

qayta tashkil etish, tugatish yoki toʻlovga qobiliyatsizlik jarayonidagi;

buyurtmachi bilan sud muhokamasi holatidagi;

tender komissiyasi aʼzolaridan kimgadir bevosita tashkiliy-huquqiy yoki moliyaviy qaram boʻlgan;

malakaviy tanlov uchun barcha zarur hujjatlarni belgilangan muddatlarda taqdim etmagan.

Buyurtmachi bilan oldin tuzilgan kontraktlar boʻyicha oʻz zimmasiga olingan majburiyatlarni zarur tarzda bajarmagan oferentlar toʻgʻrisidagi maʼlumotlar tender komissiyasiga taqdim etiladi.

20. Oferentlar:

tender takliflarini tayyorlaydilar va savdo tashkilotchisiga taqdim etadilar;

ularning faoliyatini va moliyaviy holatini baholash uchun zarur boʻlgan qoʻshimcha axborotni taqdim etadilar (tender komissiyasining soʻroviga koʻra);

tender takliflarini tayyorlash va taqdim etish davomida sarflangan barcha moliyaviy xarajatlarni oʻz manbalari hisobidan qoplaydilar;

tender savdolarida gʻolib chiqqan taqdirda buyurtmachi bilan kontrakt tuzadilar.

III. Tender hujjatlari

21. Tender hujjatlari ishlab chiqilishini tender komissiyasi tashkil etadi, tender savdolari tashkilotchisi esa amalga oshiradi. Tender hujjatlari quyidagilarni oʻz ichiga oladi:

oferentlar uchun yoʻriqnoma;

talabgorlarga qoʻyiladigan malaka talablari;

nashr etiladigan oʻquv adabiyotlari roʻyxati, texnik talablar va spetsifikatsiya;

tender taklifi shakli, shu jumladan tender takliflarini oʻrash va markirovka qilishga qoʻyiladigan talablar, takliflarni texnik va moliyaviy baholash mezonlari;

kontraktning taxminiy koʻrinishi.

22. Oferentlar uchun yoʻriqnomada quyidagilar mavjud boʻladi:

tushuntirish olish mumkin boʻlgan savdo tashkilotchisi vakilining manzili va bogʻlanish telefonlari koʻrsatilgan holda tenderda ishtirok etishga taklifnoma;

tender savdolarida qatnashish uchun talabgorlarning buyurtmanomalari shakli namunasi;

rasmiylashtirish tartibi, shu jumladan tender taklifi tuzilishi kerak boʻlgan til, shuningdek viza qoʻyishga va nusxalar soni toʻgʻrisidagi koʻrsatmalarga qoʻyiladigan talablar;

tender taklifi tender komissiyasiga taqdim etilgandan keyin unga oʻzgartirishlar kiritish va uni rasmiylashtirish tartibi;

narx boʻyicha koʻrsatma;

takliflarni tender komissiyasiga berish tartibiga qoʻyiladigan talablar;

tender taklifining amal qilish muddati;

qayd etilgan vaqt mobaynida oferent taklifi qaytarib olinmasligini kafolatlovchi tender taklifiga pul kafolati miqdori, uni qoʻyish tartibi va qaytarish tartibi;

buyurtmachining xohishiga koʻra — tender savdolari natijasi boʻyicha tuzilgan kontraktni zarur tarzda ijro etish boʻyicha pul kafolati (garov shaklida) miqdori, uni qoʻyish va qaytarish tartibi;

tender hujjatlari talablariga asoslangan taklif bilan birgalikda oferentlarga qarshi takliflar berish imkoniyati toʻgʻrisidagi axborot;

takliflar bildirilgan konvertlarni ochish tartib-qoidasi tavsifi, ularni baholash va tender gʻolibini aniqlash muddatlari;

tender takliflarini baholash mezonlari;

oʻtkazilayotgan savdo doirasida tuziladigan hujjatlarning maxfiyligiga izoh.

23. Talabgorlarga tenderda qatnashish uchun quyidagi malaka talablari qoʻyiladi:

shartnoma tuzishga fuqarolik huquqiy layoqati va vakolatlari (talabgorning roʻyxatdan oʻtkazilganligi va sud majburiyatlari mavjudligi toʻgʻrisidagi axborot hamda faoliyatning mazkur turini amalga oshirish huquqini tasdiqlovchi hujjatlar);

talabgorning ustav sarmoyasi miqdori va moliyaviy holatining boshqa koʻrsatkichlari (belgilangan tartibda tasdiqlangan);

davlat buyurtmasining talabgorlik qilinayotgan hajmini bajarish uchun zarur mehnat resurslari va malakali mutaxassislar, oʻz ishlab chiqarish bazasi yoki oʻquv adabiyotlarining talabgorlik qilinayotgan hajmi nusxalarini koʻpaytirish toʻgʻrisidagi shartnoma mavjudligi;

oʻquv adabiyotini nashr etish va qayta nashr etish uchun moʻljallangan qiymatning kamida 20 foizi miqdorida boʻsh aylanma mablagʻlar mavjudligi yoki koʻrsatib oʻtilgan mablagʻlarni berishga bankning ishonch xati;

kitob, shu jumladan oʻquv adabiyoti nashr etishga doir ish tajribasi;

Tender savdolarida qatnashish uchun talabgorga buyurtmachi tomonidan belgilanadigan, biroq talabgorlarning oʻz tijorat siri muhofaza qilinishi huquqini buzmaydigan boshqa talablar ham qoʻyilishi mumkin.

24. Nashr etiladigan oʻquv adabiyotlarining roʻyxati, texnik talablari va oʻziga xosligi quyidagilarni oʻz ichiga oladi:

nomi va nusxasi;

tuzilma va maketga qoʻyilgan talablar;

qogʻoz formati va sifati, boʻyoqlarning hajmi va soni, materiallar va matbaaning sifati;

nashr etilayotgan oʻquv adabiyotining yuqori sifati va uzoq muddat foydalanilishini taʼminlashga koʻmaklashadigan boshqa texnologik talablar.

25. Tender taklifi:

talabgorning tender savdolarida qatnashish uchun malaka talablariga muvofiqligini tasdiqlaydigan maʼlumotlar;

texnik taklif;

tijorat taklifi;

vakilga berilgan ishonchnoma;

majburiyatlar bajarilishini taʼminlash shakllari;

oʻquv adabiyotini nashr va qayta nashr etish jadvalidan iborat boʻladi.

27. Kontrakt proformasi Oʻzbekiston Respublikasi qonun hujjatlariga muvofiq tuziladi va oʻquv adabiyotini nashr etish va qayta nashr etish shartlari, narxi va jadvalini, xizmatlarning manbalari va haq toʻlash shaklini, toʻlovlar shartlari va jadvalini, tomonlarning majburiyatlarini, nizolarni hal etish tartibini, shuningdek bitishuvlar tuzishda majburiy boʻlgan boshqa shartlar va holatlarni oʻz ichiga olishi kerak.

Kontrakt proformasini tuzishda buyurtmachi yoki tender savdolari tashkilotchisi shartnoma asosida ixtisoslashtirilgan konsalting kompaniyalariga maslahat soʻrab murojaat qilishga haqlidir.

28. Takliflarni taqdim etish muddati tamom boʻlgunga qadar tender savdolari tashkilotchisi tender hujjatlarini sotib olgan talabgorlarni darhol ular toʻgʻrisida maʼlum qilib, taklifga tuzatish kiritish uchun yetarli boʻlgan vaqt bergan holda uning muddatini uzaytirib tender hujjatlariga oʻzgartirish va qoʻshimchalar kiritishga haqlidir.

29. Tender savdolari tashkilotchisi talabgorning soʻroviga koʻra tender takliflarini taqdim etishning soʻnggi muddatidan kamida 10 kun oldin soʻrov manbaini koʻrsatmagan holda tender savdolarining barcha talabgorlariga majburiy tartibda javob yuborib tender hujjatlarining mohiyati yoki mazmuni bilan bogʻliq savolga yozma javob berishi shart.

30. Tender komissiyasi, savdo tashkilotchisi va talabgorlar oʻrtasida xabar, bildirishnoma va boshqa axborotni ayirboshlash yozma shaklda amalga oshiriladi.

IV. Tender savdolarini oʻtkazish tartibi va shartlari

31. Ommaviy axborot vositalarida tender savdolari oʻtkazish toʻgʻrisida rasmiy eʼlon berilgan sana yoki talabgorga pochta (sana pochta shtempeli boʻyicha aniqlanadi), telefaks yoki boshqa shaklda qatnashish uchun rasmiy bildirishnoma (taklifnoma) yuborilgan sana savdo ochilgan sana hisoblanadi.

32. Tender savdolari toʻgʻrisidagi eʼlon markaziy va boshqa eng koʻp tarqalgan yoxud ixtisoslashtirilgan gazeta va jurnallarda tender takliflari bildirilgan konvertlar rasmiy ochilishidan kamida 30 kun oldin eʼlon qilinadi hamda maxsus axborot portalida joylashtiriladi.

33. Eʼlonda quyidagilar koʻrsatiladi:

buyurtmachining nomi va manzili;

davlat buyurtmasini shakllantirish manbalari;

nashr etish va qayta nashr etish moʻljallangan oʻquv adabiyotining nomi, nusxasi va maksimal qiymati;

talabgorlarga qoʻyiladigan asosiy shartlar va talablar;

tender hujjatlari olinadigan joy (tender savdolari tashkilotchisining manzili, aloqa telefoni va telefaksi);

tender hujjatlari uchun haq toʻlash qiymati va tender taklifi berishda tender talabgori uchun zakalat summasi;

zakalat summasini va tender hujjatlari uchun haq toʻlash shartlari, ularni toʻlash uchun bank rekvizitlari;

tender hujjatlarini taqdim etish joyi, oxirgi muddati (kun va soat koʻrsatilgan holda);

tender takliflari bildirilgan konvertlarni ochish joyi, kuni va vaqti.

34. Tender savdolarida qatnashish istagini bildirgan talabgorlar eʼlon berilgandan keyin savdo tashkilotchisidan tender hujjatlarini oladilar.

Tender hujjatlari uchun toʻlov miqdori buyurtmachi tomonidan uning tender savdolarini tashkil etish va oʻtkazish bilan bogʻliq kutilayotgan xarajatlaridan kelib chiqib belgilanadi.

35. Tender takliflari tender hujjatlariga qoʻyiladigan talablarga muvofiq ishlab chiqiladi va bir paketga solingan ikki konvertda taqdim etiladi.

Paketda talabgorning malaka talablariga muvofiqligini va moliyaviy holatini tasdiqlaydigan hujjatlar, kafolat (tender komissiyasi tomonidan nashr etiladigan oʻquv adabiyoti maksimal qiymati (narxi)ning 1 foizidan 5 foizigacha belgilanadigan miqdorda) qoʻyilganligini tasdiqlaydigan bank hujjatlari, yoki ekvivalent summaga xizmat koʻrsatuvchi bankning kafolat xati taqdim etiladi.

Birinchi konvert texnik taklif hisoblanadi va unda oʻquv adabiyoti maketi, taklif etilayotgan jadval hamda oʻquv adabiyotini nashr etish va qayta nashr etish muddatlari koʻrsatilgan boʻladi.

Ikkinchi konvert tijorat taklifi hisoblanadi va unda narx takliflari, boʻlishi mumkin boʻlgan chegirmalar mavjud boʻladi.

36. Paketda talabgorning nomi va manzili, tender savdolari tashkilotchisining nomi va manzili yozilgan boʻlishi kerak. Konvertlarda talabgorning nomi va manzili, tender savdolari tashkilotchisining nomi va manzili, nashr etish va qayta nashr etish uchun taklif qilinayotgan oʻquv adabiyotlari nomi va, zaruriyat boʻlganda, taklifnoma raqami koʻrsatiladi.

37. Tender taklifining tegishli ravishda “Asl nusxa” va “Nusxa” soʻzlari bilan belgi qoʻyilgan, talabgorning imzosi va muhri bilan tasdiqlangan asl nusxasi va nusxasi tender savdolari tashkilotchisiga muhrlangan shaklda yuboriladi.

38. Tender taklifining amal qilish muddati tender hujjatlari bilan belgilanadi.

Talabgorlar oʻz tender takliflarini ularni taqdim etishning oxirgi kuni va vaqti tamom boʻlgunga qadar chaqirib olishlari mumkin.

Quyidagi hollarda tender taklifi koʻrib chiqilmaydi va konvertlar ochilmasdan talabgorga qaytariladi:

tender hujjati uni taqdim etish muddati tamom boʻlgandan keyin tushganda;

talabgor tender savdolari malaka talablariga muvofiq boʻlmaganda.

39. Tender takliflarini taqdim etish sanasi tender savdolari tashkilotchisining pochta bildirishnomasi olinganligi toʻgʻrisidagi belgisi yoki chopar bilan yuborilgan tender takliflari roʻyxatdan oʻtkazilgan sana boʻyicha aniqlanadi.

40. Tender takliflarini berishning belgilangan muddati tamom boʻlgandan keyin, tender komissiyasi belgilangan kun va soatda talabgorning malaka talablariga muvofiqligini va moliyaviy holatini tasdiqlaydigan hujjatlar, bank hujjatlari, texnik va tijorat takliflari mavjud boʻlgan konvertlar bor boʻlgan konvertni ochadi.

Texnik va tijorat takliflari bildirilgan konvertlar muhrlangan shaklda qoladi hamda navbatdagi majlisgacha tender savdolari tashkilotchisining poʻlat sandigʻida saqlanadi. Tender savdolari tashkilotchisi birinchi va ikkinchi konvertlardagi hujjatlarning saqlanishi uchun javob beradi.

401. Talabgorning malaka talablariga muvofiqligini va moliyaviy holatini tasdiqlaydigan hujjatlar, bank hujjatlari tenderda qatnashish uchun qoʻyiladigan talabgorlarni malakali tanlab olish uchun tender savdolari tashkilotchisiga beriladi.

Tanlab olingan oferentlar roʻyxati tender komissiyasi tomonidan tasdiqlanadi.

Tenderda qatnashishga qoʻyilmagan talabgorlarning tender hujjatlari texnik va tijorat takliflari bildirilgan konvertlar ochilmasdan talabgorlarga qaytariladi.

41. Texnik takliflar bildirilgan konvertlar qatnashish istagini bildirgan oferentlar yoki ularning vakolatli vakillari ishtirokida ochiladi.

Birinchi konvert ochilgandan keyin oferentlar nomlari oʻqiladi, savdolar shartlari va tartib-qoidalariga rioya etish, tegishli hujjatlar mavjudligi tekshiriladi.

42. Hujjatlar paketida tender hujjatlariga qoʻyiladigan talablar buzilganligi aniqlangan taqdirda, hujjatlar ularning mazmuni eʼlon qilinmasdan oferentga qaytariladi.

Tender komissiyasi, ular boshqa oferentlarning reytingiga taʼsir koʻrsatmasa va ularga yoʻl qoʻygan tender savdosi oferentga ustunliklar bermasa, tender hujjatlarining eʼlon qilingan shartlarga nomuvofiqligini yoki tender takliflarini rasmiylashtirishdagi noaniqliklarni eʼtiborga olmasligi mumkin.

43. Tender komissiyasi majlisining natijalari bayonnoma bilan rasmiylashtiriladi. Bayonnomada savdo oferentlari tomonidan eʼtirof etilgan tashkilotlar sanab oʻtiladi. Shakl boʻyicha taqdim etilmagan va savdolarga qoʻyilmagan takliflar bayonnomada ular rad etilishining sabablari koʻrsatilgan holda alohida sanab oʻtiladi.

44. Tender komissiyasi majlisining natijalari toʻgʻrisidagi axborot hozir boʻlmagan talabgorga yozma shaklda yetkaziladi. Tender takliflari bildirilgan konvertlarni ochish toʻgʻrisidagi bayonnoma ommaviy axborot vositalarida eʼlon qilinmaydi.

45. Texnik takliflar oʻrganish, tahlil qilish va baholash uchun texnik baho boʻyicha baholash guruhiga beriladi. Takliflarni baholashda, oʻquv adabiyotlari namunalari parametrlarining belgilangan sanitariya qoida va normalariga, davlat standartlariga, shuningdek texnik talablarga va buyurtmachi tomonidan belgilangan spetsifikatsiyaga muvofiqligi majburiy tartibda hisobga olinadi.

46. Takliflarni baholash tender komissiyasi tomonidan belgilangan har bir baholash mezoni boʻyicha ballar qoʻyish yoʻli bilan amalga oshiriladi. Savdo oferentlari yoki ularning vakillari tender takliflarini baholashda hozir boʻlishga haqli emas.

47. Baholash davomida tender komissiyasi tushuntirishlar olish uchun oferentlarga yozma ravishda murojaat qilish, ulardan qoʻshimcha maʼlumotlar va tasdiqnomalar olish huquqiga ega boʻladi.

48. Oferentning malaka maʼlumotlari toʻgʻrisida ishonchsiz axborot aniqlangan taqdirda tender komissiyasining qarori bilan talabgor tender savdolari tartibotida bundan keyin ishtirok etishdan chetlashtiriladi.

49. Takliflari maqbul deb eʼtirof etilgan oferentlar tijorat takliflarini baholashga qoʻyiladilar. Texnik takliflarni baholash shartlariga koʻra oʻtmagan oferentlar bundan keyin tenderda qatnashishdan chetlatiladilar.

50. Tender komissiyasi tomonidan tijorat takliflarini baholashga qoʻyilgan oferentlar roʻyxati maʼqullangandan keyin belgilangan manzil boʻyicha, koʻrsatilgan kun va soatda tijorat takliflari bildirilgan konvertlar koʻpchilikning oldida ochiladi.

51. Ikkinchi paketga solingan barcha talab etiladigan hujjatlar mavjud boʻlgan taqdirda, tender komissiyasi ularni baholash uchun tijorat asosida baholash boʻyicha baholash guruhiga beradi.

52. Tijorat asosida baholash boʻyicha baholash guruhi taqqoslash usuli bilan oferentlar tomonidan taklif etilayotgan oʻquv adabiyotlari qiymatini (narxini), chegirmalar miqdorlarini va oferentlarning moliyaviy-iqtisodiy koʻrsatkichlarini koʻrib chiqadi.

53. Tender takliflarini baholashning umumiy davri tender komissiyasi tomonidan belgilanadi va u takliflar bildirilgan konvertlar rasman ochilgan paytdan boshlanadi va 30 kalendar kundan ortiq boʻlishi mumkin emas.

54. Tender takliflarini baholash va savdo gʻolibini aniqlash tender komissiyasi tomonidan uning majlisi boshlangunga qadar tasdiqlangan mezonlar asosida amalga oshiriladi. Tanlov paytida mezonlarga oʻzgartirish va qoʻshimchalar kiritishga yoʻl qoʻyilmaydi.

55. Tushgan takliflarning koʻrib chiqilishi va ularning tender komissiyasi va baholash guruhlari aʼzolari tomonidan baholanishi toʻgʻrisidagi axborot maxfiy hisoblanadi hamda tanlov tartib-qoidasiga rasman aloqador boʻlmagan shaxslarga maʼlum qilinmaydi. Tender komissiyasi va baholash guruhlari aʼzolari mazkur axborot oshkor qilinganligi uchun qonun hujjatlarida belgilangan tartibda javob beradilar.

56. Tender hujjatlarini tekshirish chogʻida aniqlangan arifmetik xatolar mavjud boʻlgan taqdirda tender komissiyasi:

oferentga tender taklifiga tuzatish kiritish imkoniyatini berishi;

takliflarni baholashda, agar oʻquv adabiyoti birligi narxi bilan birlik narxi va sonini koʻpaytirish natijasida olingan yakuniy narx oʻrtasida nomuvofiqlik mavjud boʻlsa, oʻquv adabiyoti birligi narxi ustunlik qiladigan, umumiy narxga tuzatish kiritiladigan qaror qabul qilishi mumkin. Agar soʻzlar bilan yozilgan summa bilan raqamda koʻrsatilgan summa oʻrtasida nomuvofiqlik mavjud boʻlsa, u holda soʻzlar bilan yozilgan summa ustunlik qiladi.

57. Texnik va tijorat takliflarini baholash yakunlari yigʻindisi boʻyicha tender taklifi eng koʻp ball olgan oferent savdoning gʻolibi deb eʼlon qilinadi. Ballarning yakuniy yigʻindisi teng boʻlgan taqdirda eng kam narx takliflarini taklif etgan oferentga ustunlik beriladi.

58. Yakun chiqarish va savdoning gʻolibi toʻgʻrisidagi qaror tender komissiyasi tomonidan qabul qilinadi. Gʻolibni tanlashda baholash guruhlarining xulosalari natijalariga asoslaniladi. Qaror tender komissiyasi aʼzolari umumiy sonining oddiy koʻpchilik ovozi bilan qabul qilinadi. Ovozlar teng boʻlib qolgan taqdirda, tender komissiyasi raisining ovozi hal qiluvchi ovoz hisoblanadi.

59. Tender komissiyasining yakuniy bayonnomasida gʻolib va zaxira oferentlar, tender komissiyasi tarkibi, baholash guruhlarining xulosalari, oferentlarning tender takliflari yigʻma jadvali va gʻolib bilan kontraktni imzolashning moʻljallanayotgan muddatlari toʻgʻrisidagi maʼlumotlar mavjud boʻladi.

Bayonnoma hozir boʻlgan aʼzolar tomonidan imzolanishi va tender komissiyasi raisi tomonidan tasdiqlanishi kerak.

Tender komissiyasi gʻoliblar aniqlangan kundan boshlab 10 kun mobaynida natijalarni tasdiqlash uchun Hukumat komissiyasiga yuboradi.

Gʻolibni aniqlash toʻgʻrisidagi qaror Hukumat komissiyasi tomonidan qabul qilinadi va tegishli bayonnoma bilan rasmiylashtiriladi.

60. Tender savdolari tashkilotchisi tender savdolari gʻolibiga savdo yakunlangandan keyin uch kundan kechikmay yozma bildirishnoma yuboradi va yakunlarini ommaviy axborot vositalarida eʼlon qiladi.

61. Buyurtmachi va tender savdolari gʻoliblari oʻrtasidagi kontrakt tender savdolari gʻolibi bildirishnomani olgan kundan boshlab oʻn kun muddatda tuziladi.

62. Agar tender savdolari gʻolibi kontrakt tuzishni rad etsa yoki belgilangan muddatda kontraktni bajarish uchun kafolat bermasa, u holda buyurtmachi tender komissiyasi bilan birgalikda taklifi ikkinchi bahoni olgan oferentni tender savdolari gʻolibi deb eʼtirof etishi yoki takroriy tender savdolari oʻtkazishni tayinlashi mumkin.

V. Yakuniy qoidalar

63. Tender komissiyasi majlisini oʻtkazish uchun kvorum uning aʼzolarining kamida uchdan ikki qismini tashkil etadi. Agar tender komissiyasi majlisida komissiya raisi va uning oʻrinbosari qatnashmasa yoxud kvorum mavjud boʻlmasa tender komissiyasi majlisi huquqiy vakolatli hisoblanmaydi.

64. Tender savdolari quyidagi hollarda boʻlib oʻtmagan deb eʼlon qilinadi:

tender takliflarini taqdim etishning oxirgi muddatiga kelib bir lot boʻyicha uchtadan kam taklif tushganda;

barcha tender takliflari tender hujjatlariga qoʻyiladigan talablarga muvofiq boʻlmaganda;

barcha tender takliflarida tender hujjatlari shartlari talab etadigan hujjatlar mavjud boʻlmaganda;

oʻquv adabiyotining maksimal qiymati doirasida ikkitadan kam boʻlgan oferentning narx taklifi taqdim etilganda;

malakaviy tanlov shartlariga uchtadan kam boʻlgan talabgorning takliflari muvofiq boʻlganda.

65. Tender savdolarining boʻlib oʻtmagan deb eʼlon qilinishi savdo qatnashchilaridan biron-birining mulkiy yoki boshqa javobgarligiga olib kelmaydi.

66. Agar tender savdolari boʻlmagan deb eʼtirof etilsa, takroriy tender savdolari oʻtkaziladi, unda tender hujjatlari shartlarini va tender komissiyasining qarori boʻyicha uni taqdim etish muddatlarini qayta koʻrib chiqishga yoʻl qoʻyiladi.

67. Zakalat:

tender savdolari gʻolibiga — kontrakt bajarilishining talab etiladigan taʼminlanishi (kafolati) taqdim etilishi boʻyicha kontrakt tuzilgandan keyin;

qolgan qatnashchilarga — tender savdolari gʻolibi bilan kontrakt tuzilgandan keyin, biroq tender takliflari amal qilishi muddatidan kechikmay;

oʻz taklifini taklifni taqdim etishning oxirgi kuni va vaqti tamom boʻlgunga qadar qaytarib olgan qatnashchiga qaytariladi.

tender savdolari boʻlib oʻtmagan deb eʼlon qilingan taqdirda;

Zakalat qaytarish uchun asoslar paydo boʻlgan paytdan boshlab besh kun mobaynida qaytariladi.

68. Zakalat:

taklifni taqdim etishning oxirgi kuni va vaqti tamom boʻlgandan keyin oʻz taklifiga oʻzgartirish kiritgan yoki uni qaytarib olgan qatnashchiga;

taklifi amal qilishi davrida oʻz taklifini qaytarib olgan, tender hujjatlarida belgilangan shartlarda kontrakt tuzishni yoki kontrakt bajarilishining talab etiladigan taʼminlanishini (kafolatini) taqdim etishni rad etgan tender savdolari gʻolibiga qaytarilmaydi.

69. Savdolarning har bir qatnashchisi mazkur Nizom bilan belgilangan tender savdolarini oʻtkazish qoidalari va tartibotlariga rioya etilishi hamda qonun hujjatlarida belgilangan tartibda natijalarning xolisligi uchun javob beradi.

70. Tender savdolari oʻtkazilishi munosabati bilan paydo boʻladigan nizolar va kelishmovchiliklar Oʻzbekiston Respublikasining qonun hujjatlariga muvofiq hal etiladi.

Umumiy oʻrta va oʻrta maxsus, kasb-hunar taʼlimi taʼlim muassasalari uchun darsliklar va oʻquv-metodik komplekslarni nashr etish yuzasidan tender savdolari oʻtkazish tartibi toʻgʻrisida nizomga ILOVA

Oʻquv adabiyotini nashr etish va qayta nashr etish huquqi uchun tender savdolari oʻtkazish sxemasi