“Oʻzbektoʻqimachimash” ishlab chiqarish birlashmasini tugatish masalalari toʻgʻrisida (542-son)

16.11.2004

Oʻzbekiston Respublikasi Vazirlar Mahkamasining

qarori

[Koʻchirma]

“Oʻzbektoʻqimachimash” ishlab chiqarish birlashmasining moliyaviy ahvoli uzoq vaqtdan buyon qoniqarsiz ahvoldaligi, kreditorlik qarzlarining katta miqdordaligi, korxonani iqtisodiy nochor ahvoldan chiqarishning strategik rejasi yoʻqligi munosabati bilan Vazirlar Mahkamasi qaror qiladi:

1. “Oʻzbekyengilsanoat” davlat-aksiyadorlik kompaniyasi, Oʻzbekiston Respublikasi Iqtisodiyot vazirligi, Davlat mulki qoʻmitasining “Oʻzbektoʻqimachimash” ishlab chiqarish birlashmasi davlat korxonasini tugatish toʻgʻrisidagi taklifi qabul qilinsin.

3. Tugatish komissiyasi:

“Oʻzbektoʻqimachimash” ishlab chiqarish birlashmasini tugatish, shu jumladan ekologiya jihatidan zararli ishlab chiqarishlarni, birinchi navbatda choʻyan quyish bilan bogʻliq ishlab chiqarishlarni demontaj qilish boʻyicha chora-tadbirlar kompleksini qonun hujjatlarida belgilangan muddatlarda va tartibda amalga oshirsin;

korxona mol-mulki xatlovdan oʻtkazilishini va qoʻriqlanishini taʼminlash, shuningdek tugatish komissiyasining tashkilotlar, mehnat jamoasi, debitorlar va kreditorlar oldidagi manfaatlarini ifodalash uchun tugatish boshqaruvchisini tayinlasin;

kreditorlarni aniqlasin va tugatish vaqtidagi vujudga kelgan kreditorlik qarzlarning qaytarilishini taʼminlasin;

oraliq tugatish balansini tasdiqlasin, unda tugatilayotgan korxona mol-mulkining tarkibi, kreditorlar tomonidan qoʻyilgan talablar roʻyxati, shuningdek ularni koʻrib chiqish natijalari toʻgʻrisidagi maʼlumotlarni aks ettirsin;

sotiladigan mol-mulk va obyektlar roʻyxatini aniqlasin;

yengil sanoat korxonalari uchun ehtiyot qismlar, uzellar va butlovchi buyumlar ishlab chiqarish, shuningdek tayyor tikuvchilik va trikotaj buyumlari ishlab chiqarish boʻyicha qoʻshma korxonalar tashkil etish imkoniyati mavjud boʻlgan obyektlar (binolar va inshootlar) roʻyxatini aniqlasin. Belgilansinki, ushbu obyektlar “Oʻzbekyengilsanoat” davlat-aksiyadorlik kompaniyasi balansiga bepul oʻtkaziladi va daromad soligʻi solish obyekti hisoblanmaydi;

yuqorida koʻrsatib oʻtilgan roʻyxatga kirmagan obyektlar (binolar va inshootlar) negizida isteʼmol tovarlari ishlab chiqarish va xizmatlar koʻrsatish boʻyicha ekologiya jihatidan toza boʻlgan bir qator korxonalar tashkil etish yuzasidan uch oy muddatda takliflar ishlab chiqsin va Vazirlar Mahkamasiga kiritsin.

4. Oʻzbekiston Respublikasi Iqtisodiyot vazirligi “Oʻzbekyengilsanoat” davlat-aksiyadorlik kompaniyasi va Tashqi iqtisodiy aloqalar agentligi bilan birgalikda uch oy muddatda Vazirlar Mahkamasiga:

toʻqimachilik asbob-uskunalari va mashinalari ishlab chiqaruvchi, respublika yengil sanoati korxonalarini zamonaviylashtirish va texnika bilan qayta jihozlashda qatnashuvchi yetakchi xorijiy ishlab chiqaruvchilar bilan hozirgi vaqtda import boʻyicha sotib olinayotgan ehtiyot qismlar, uzellar va butlovchi buyumlar ishlab chiqaradigan qoʻshma korxonalar tashkil etish;

respublika yengil sanoati uchun asbob-uskunalarni taʼmirlash boʻyicha oʻquv va servis markazlari tashkil etish yuzasidan takliflar kiritsin.

5. Hozirgi vaqtda “Oʻzbektoʻqimachimash” ishlab chiqarish birlashmasi egallab turgan hududlarning bir qismi kelgusida sogʻlomlashtirish-sanitariya zonasi tashkil etish uchun Toshkent shahar hokimligi balansiga oʻtkazilsin.

Toshkent shahar hokimligi Oʻzbekiston Respublikasi Davlat arxitektura va qurilish qoʻmitasi bilan kelishgan holda tugatilayotgan “Oʻzbektoʻqimachimash” ishlab chiqarish birlashmasi hududining bir qismi belgilangandan va berilgandan keyin uch oy muddatda bino va inshootlarning buzilishini taʼminlasin hamda sogʻlomlashtirish va sanitariya zonasini tashkil etsin.

7. Belgilab qoʻyilsinki, tugatilayotgan “Oʻzbektoʻqimachimash” ishlab chiqarish birlashmasining mol-mulkini sotish faqat tugatish komissiyasi qaroriga binoan quyidagi tartibda amalga oshiriladi:

asbob-uskunalar, inventarlar, xom ashyo va materiallar, tayyor mahsulotlar zaxiralari hamda boshqa moddiy boyliklar koʻchmas mulk birjasi orqali, qonun hujjatlarida belgilangan tartibda sotiladi;

bino va inshootlar tender asosida potensial investorlarga, tugatish komissiyasi tomonidan belgilangan tarkibiy oʻzgartirish rejasiga muvofiq sotiladi.

8. Belgilansinki, tugatilayotgan “Oʻzbektoʻqimachimash” ishlab chiqarish birlashmasining mol-mulkini sotishdan tushgan mablagʻlar tugatish ishlari boʻyicha xarajatlarni qoplashga hamda korxonaning kreditorlik qarzlarini bankrotlik toʻgʻrisidagi qonun hujjatlarida belgilangan navbat boʻyicha toʻlashga yoʻnaltiriladi.

9. Oʻzbekiston Respublikasi Mehnat va aholini ijtimoiy muhofaza qilish vazirligi tugatish komissiyasi bilan birgalikda “Oʻzbektoʻqimachimash” ishlab chiqarish birlashmasining tugatilishi munosabati bilan boʻshab qoladigan xodimlarni ishga joylashtirish chora-tadbirlarini koʻrsin.

11. Mazkur qarorning bajarilishini nazorat qilish Oʻzbekiston Respublikasining Bosh vaziri Sh.M. Mirziyoyev zimmasiga yuklansin.

Vazirlar Mahkamasining Raisi I. KARIMOV

Toshkent sh.,

2004-yil 16-noyabr,

542-son