Lombardlar tomonidan faoliyat va operatsiyalarni amalga oshirish qoidalariga oʻzgartirishlar kiritish haqida (1290-2-son)

07.05.2018

Oʻzbekiston Respublikasi Markaziy banki Boshqaruvining

Qarori

[Oʻzbekiston Respublikasi Adliya vazirligi tomonidan 2018-yil 7-mayda roʻyxatdan oʻtkazildi, roʻyxat raqami 1290-2]

Oʻzbekiston Respublikasining “Oʻzbekiston Respublikasining Markaziy banki toʻgʻrisida”gi Qonuni va Oʻzbekiston Respublikasi Prezidentining 2018-yil 23-martdagi PQ-3620-son “Bank xizmatlari ommabopligini oshirish boʻyicha qoʻshimcha chora-tadbirlar toʻgʻrisida”gi qaroriga muvofiq Oʻzbekiston Respublikasi Markaziy banki Boshqaruvi qaror qiladi:

1. Oʻzbekiston Respublikasi Markaziy banki Boshqaruvining 2003-yil 22-sentabrdagi 23/4-son qarori (roʻyxat raqami 1290, 2003-yil 10-dekabr) (Oʻzbekiston Respublikasi vazirliklari, davlat qoʻmitalari va idoralarining meʼyoriy hujjatlari axborotnomasi, 2003-y., 23-son) bilan tasdiqlangan Lombardlar tomonidan faoliyat va operatsiyalarni amalga oshirish qoidalariga ilovaga muvofiq oʻzgartirishlar kiritilsin.

2. Mazkur qaror rasmiy eʼlon qilingan kundan eʼtiboran kuchga kiradi.

Markaziy bank raisi M. NURMURATOV

Toshkent sh.,

2018-yil 28-aprel,

16/3-son

Oʻzbekiston Respublikasi Markaziy banki Boshqaruvining 2018-yil 28-apreldagi 16/3-son qaroriga ILOVA

Lombardlar tomonidan faoliyat va operatsiyalarni amalga oshirish qoidalariga kiritilayotgan oʻzgartirishlar

1. 7-band quyidagi tahrirda bayon etilsin:

“7. Lombard:

garovga yoki saqlovga qoʻyilgan ashyolardan foydalanishga va ularni tasarruf etishga;

yillik qarz summasining yarmidan koʻp miqdorda foizlar hisoblash, komissiya va neustoyka (shtraf, penya) undirish, kredit shartnomalari boʻyicha javobgarlikning boshqa choralarini qoʻllashga;

kredit buyurtmalarini koʻrib chiqish, ssuda hisobvaraqlariga xizmat koʻrsatish, kreditlar ajratish uchun toʻlovlar, shuningdek kreditlar muddatidan ilgari soʻndirilganligi uchun neustoyka undirishga haqli emas.

Garovga yoki saqlash uchun topshirilgan mol-mulk yoʻqolganda, kamomad aniqlanganda, agar bu holatlar yengib boʻlmas kuch oqibatida yuz berganligini isbotlay olmasa, lombard mol-mulk egasiga, tomonlar kelishuviga koʻra, mulkiy zararni garov pattasi yoki saqlash pattasida koʻrsatilgan mol-mulkni baholash qiymati narxida toʻlashi shart.

Garovga yoki saqlash uchun topshirilgan mol-mulk shikastlanganda, agar shikastlanish yengib boʻlmas kuch oqibatida yuz berganligini isbotlay olmasa, lombard mol-mulk egasiga, tomonlar kelishuviga koʻra, mulkiy zararni garov pattasi yoki saqlash pattasida koʻrsatilgan mol-mulk narxidan oshmagan qiymatda toʻlashi shart.”.

2. 13-band quyidagi tahrirda bayon etilsin:

“13. Kreditning summasi va muddati, shuningdek, beriladigan kredit boʻyicha haq stavkasining miqdori tomonlarning kelishuviga asosan mazkur Qoidalar talablarini inobatga olgan holda belgilanadi.”.