Xorijiy mamlakatlarda oʻtkaziladigan koʻrgazma, tanlov va yarmarkalarda namoyish etish uchun hunarmandchilik mahsulotlari olib chiqilishining soddalashtirilgan tartibi toʻgʻrisidagi nizomni tasdiqlash haqida (3004-son)
02.05.2018
Oʻzbekiston Respublikasi Tashqi savdo vazirligi Oʻzbekiston Respublikasi Tashqi ishlar vazirligi Oʻzbekiston Respublikasi Madaniyat vazirligi Oʻzbekiston Respublikasi Davlat bojxona qoʻmitasining
Qarori
[Oʻzbekiston Respublikasi Adliya vazirligi tomonidan 2018-yil 2-mayda roʻyxatdan oʻtkazildi, roʻyxat raqami 3004]
Oʻzbekiston Respublikasi Prezidentining 2017-yil 17-noyabrdagi PF-5242-son “Hunarmandchilikni yanada rivojlantirish va hunarmandlarni har tomonlama qoʻllab-quvvatlash chora-tadbirlari toʻgʻrisida”gi Farmoni hamda Oʻzbekiston Respublikasi Prezidentining 2017-yil 17-noyabrdagi PQ-3393-son “Hunarmand” uyushmasi faoliyatini yanada takomillashtirish chora-tadbirlari toʻgʻrisida”gi qaroriga muvofiq Oʻzbekiston Respublikasi Tashqi savdo vazirligi,Tashqi ishlar vazirligi, Madaniyat vazirligi va Davlat bojxona qoʻmitasi qaror qiladi:
1. Xorijiy mamlakatlarda oʻtkaziladigan koʻrgazma, tanlov va yarmarkalarda namoyish etish uchun hunarmandchilik mahsulotlari olib chiqilishining soddalashtirilgan tartibi toʻgʻrisidagi nizom ilovaga muvofiq tasdiqlansin.
2. Mazkur qaror rasmiy eʼlon qilingan kundan eʼtiboran kuchga kiradi.
Tashqi savdo vaziri J. XODJAYEV
Toshkent sh.,
2018-yil 9-aprel,
2018/05-02-son
Tashqi ishlar vaziri A. KAMILOV
Toshkent sh.,
2018-yil 9-aprel,
29-son
Madaniyat vaziri B. SAYFULLAYEV
Toshkent sh.,
2018-yil 9-aprel,
9-son
Davlat bojxona qoʻmitasi raisi M. AZIMOV
Toshkent sh.,
2018-yil 9-aprel,
01-02/12-21-son
Oʻzbekiston Respublikasi Tashqi savdo vazirligi, Oʻzbekiston Respublikasi Tashqi ishlar vazirligi, Oʻzbekiston Respublikasi Madaniyat vazirligi, Oʻzbekiston Respublikasi Davlat bojxona qoʻmitasining 2018-yil 9-apreldagi 2018/05-02, 29, 9, 01-02/12-21-son qaroriga ILOVA
Xorijiy mamlakatlarda oʻtkaziladigan koʻrgazma, tanlov va yarmarkalarda namoyish etish uchun hunarmandchilik mahsulotlari olib chiqilishining soddalashtirilgan tartibi toʻgʻrisidagi
NIZOM
Ushbu Nizom Oʻzbekiston Respublikasi Prezidentining 2017-yil 17-noyabrdagi PF-5242-son “Hunarmandchilikni yanada rivojlantirish va hunarmandlarni har tomonlama qoʻllab-quvvatlash chora-tadbirlari toʻgʻrisida”gi Farmoniga asosan xorijiy mamlakatlarda oʻtkaziladigan koʻrgazma, tanlov va yarmarkalarda namoyish etish uchun hunarmandchilik mahsulotlari olib chiqilishining soddalashtirilgan tartibini belgilaydi.
1-bob. Umumiy qoidalar
1. Mazkur Nizom “Hunarmand” uyushmasi aʼzosi hisoblanuvchi hunarmandchilik subyektlariga (bundan buyon matnda hunarmand deb yuritiladi) nisbatan qoʻllaniladi.
2. Oʻzbekiston Respublikasi Prezidentining 2017-yil 29-dekabrdagi PQ-3451-son “Xorijiy davlatlarda koʻrgazma tadbirlarini oʻtkazish uchun moʻljallangan tovarlarni olib chiqish tartibini soddalashtirish chora-tadbirlari toʻgʻrisida”gi qaroriga asosan hunarmand xorijiy davlatlarda oʻtkaziladigan koʻrgazma, tanlov va yarmarkalarda namoyish etish uchun moʻljallangan qiymati 5 000 (besh ming) AQSh dollarigacha boʻlgan hunarmandchilik mahsulotlarini eksport kontrakti tuzmasdan hamda bojxona yuk deklaratsiyasini rasmiylashtirmasdan olib chiqishi mumkin.
2-bob. Hunarmandchilik mahsulotlarini olib chiqish
3. Hunarmand xorijiy mamlakatlarda oʻtkaziladigan koʻrgazma, tanlov va yarmarkalarda namoyish etish uchun hunarmandchilik mahsulotlarini olib chiqishda “Hunarmand” uyushmasi Badiiy kengashining (bundan buyon matnda Badiiy kengash deb yuritiladi) xulosasi va Oʻzbekiston Respublikasi Madaniyat vazirligi huzuridagi Badiiy ekspertiza boshqarmasining (bundan buyon matnda Badiiy ekspertiza boshqarmasi deb yuritiladi) sertifikatini olishi lozim.
4. Hunarmandchilik mahsulotlarini xorijiy davlatlarda oʻtkaziladigan koʻrgazma, tanlov va yarmarkalarda namoyish etish uchun olib chiqishda Badiiy kengashning xulosasi (bundan buyon matnda xulosa deb yuritiladi) tovarning kuzatuv hujjati hisoblanadi.
5. Hunarmandlar oʻzlari ishlab chiqargan hunarmandchilik mahsulotlarini xorijiy mamlakatlarda oʻtkaziladigan koʻrgazma, tanlov va yarmarkalarda namoyish etish uchun Badiiy kengashga taqdim etadi.
6. Badiiy kengash hunarmandchilik mahsulotlarini bir kun muddatda oʻrganib chiqib, ularni Oʻzbekiston Respublikasi Prezidentining 2017-yil 17-noyabrdagi PF-5242-son Farmoni bilan tasdiqlangan Hunarmandchilik faoliyatining asosiy yoʻnalishlari, hunarmandlar tomonidan ishlab chiqariladigan buyumlar va tovarlar (ish, xizmat koʻrsatish) turlarining roʻyxatidagi mahsulot turlariga mosligini va tannarxini aniqlab, tegishli xulosa beradi.
7. Xulosada olib chiqiladigan hunarmandchilik mahsulotlarining nomi, miqdori, qiymati, rejalashtirilgan koʻrgazma, tanlov va yarmarkalarning oʻtkazilish sanasi va joyi toʻgʻrisidagi maʼlumotlar koʻrsatiladi.
8. Xulosada koʻrsatilgan maʼlumotlarning ishonchliligi va toʻgʻriligi uchun hunarmand va “Hunarmand” uyushmasi javobgar hisoblanadi.
9. “Hunarmand” uyushmasi hunarmandchilik mahsulotlarini badiiy ekspertizadan oʻtkazish va tegishli sertifikat rasmiylashtirish uchun hujjatlarni Badiiy ekspertiza boshqarmasiga taqdim etadi.
10. Qiymati 5 000 (besh ming) AQSh dollaridan yuqori boʻlgan hunarmandchilik mahsulotlarini bojxona rasmiylashtiruvi umumiy tartibda amalga oshiriladi.
11. Hunarmand xorijiy davlatlarda oʻtkaziladigan koʻrgazma va yarmarkalarda namoyish etish uchun olib chiqiladigan hunarmandchilik mahsulotlarini sotishdan tushadigan mablagʻlarni Oʻzbekiston Respublikasi tijorat banklaridagi oʻz hisobraqamlariga, shu jumladan bank oʻtkazmalari, shuningdek, xorijiy valyutadagi naqd pul shaklida kiritish huquqiga ega
12. Hunarmandlar mazkur Nizomning 10-bandida koʻrsatib oʻtilgan mablagʻlarni erkin tasarruf etish, shu jumladan bank hisob raqamlaridan naqd pul shaklida olishlari mumkin.
3-bob. Xorijiy mamlakatlarda oʻtkaziladigan koʻrgazma, tanlov va yarmarkalarda hunarmandchilik mahsulotlarini namoyish etish uchun koʻmaklashish
13. “Hunarmand” uyushmasi hunarmandga ular tomonidan ishlab chiqarilgan hunarmandchilik mahsulotlarini xorijiy mamlakatlarda oʻtkaziladigan koʻrgazma, tanlov va yarmarkalarda namoyish etish uchun olib chiqishi va mazkur tadbirlarda qatnashishida har tomonlama qoʻllab-quvvatlaydi, shuningdek zaruriy hujjatlarni rasmiylashtirishda hamda vujudga keladigan muammo va kamchiliklarni bartaraf etishda koʻmaklashadi.
14. Oʻzbekiston Respublikasi Savdo-sanoat palatasi Investitsiyalar, sanoat va savdo vazirligi bilan birgalikda “Hunarmand” uyushmasining xorijiy mamlakatlardagi hunarmandchilik yoʻnalishida faoliyat olib boruvchi tashkilotlar bilan hamkorligini yoʻlga qoʻyish va rivojlantirish, hunarmandchilik subyektlarining xorijga amaliy tashriflarini tashkil etish, respublika va xorijda hunarmandchilik bilan bogʻliq anjuman, savdo-koʻrgazma va yarmarkalarni oʻtkazishda koʻmaklashadi.
15. Oʻzbekiston Respublikasi Tashqi ishlar vazirligi tomonidan qonunchilik hujjatlariga muvofiq hunarmandga xorijga chiqish va kirish masalasida oʻz vakolati doirasida amaliy yordam koʻrsatilishi taʼminlanadi. Shuningdek, “Hunarmand” uyushmasiga elchixonalar va boshqa xorijiy vakolatxonalar bilan hunarmandchilik yoʻnalishi boʻyicha aloqalarning amalga oshirilishida koʻmaklashadi.
16. “Oʻzbekiston havo yoʻllari” milliy aviakompaniyasi hunarmandga belgilangan normadan ortiq boʻlgan yuklari (hunarmandchilik mahsulotlari) uchun amalga oshiriladigan toʻlovlarda 25 (yigirma besh) foiz maxsus chegirmalar berilishini taʼminlaydi.
4-bob. Yakuniy qoida
17. Ushbu Nizom Oʻzbekiston Respublikasi Markaziy banki, Savdo-sanoat palatasi, “Hunarmand” uyushmasi va “Oʻzbekiston havo yoʻllari” MAK bilan kelishilgan.
Markaziy bank raisi M. NURMURATOV
2018-yil 9-aprel
Savdo-sanoat palatasi raisi A. IKRAMOV
2018-yil 9-aprel
“Hunarmand” uyushmasi raisi U. ABDULLAYEV
2018-yil 9-aprel
“Oʻzbekiston havo yoʻllari” MAK bosh direktori v.b. B. XAKIMOV
2018-yil 9-aprel