Ijtimoiy ahamiyatga ega boʻlgan isteʼmol tovarlari bilan savdo qilishni tartibga solishga doir qoʻshimcha chora-tadbirlar toʻgʻrisida (433-son)

31.10.2001

Oʻzbekiston Respublikasi Vazirlar Mahkamasining

qarori

Ijtimoiy ahamiyatga ega boʻlgan ayrim isteʼmol tovarlari narxlarining sunʼiy oshirib yuborilishiga yoʻl qoʻymaslik, shuningdek ularni respublika tashqarisiga noqonuniy olib chiqib ketish hollarini bartaraf etish maqsadida Vazirlar Mahkamasi qaror qiladi:

1. Belgilansinki, 2001-yil 1-noyabrdan boshlab chetdan keltiriladigan va respublikada ishlab chiqariladigan un, oʻsimlik yogʻi va qand-shakarni sotish faqat yuridik shaxslar tomonidan shartnomaviy narxlar boʻyicha amalga oshiriladi.

Oʻzbekiston Respublikasi Moliya vazirligi Monopoliyadan chiqarish va raqobatni rivojlantirish davlat qoʻmitasi, Davlat soliq qoʻmitasi bilan birgalikda savdo tashkilotlari tomonidan ijtimoiy ahamiyatga ega boʻlgan isteʼmol tovarlarining koʻrsatib oʻtilgan turlariga cheklangan savdo ustamalarini qoʻllanish tartibi toʻgʻrisidagi nizomni shu yilning 1-noyabrigacha ishlab chiqsin va belgilangan tartibda tasdiqlasin.

2. Oʻzbekiston Respublikasi Davlat soliq qoʻmitasi Moliya vazirligi hamda Oʻzbekiston Respublikasi Monopoliyaga qarshi kurashish qoʻmitasi bilan birgalikda:

savdo korxonalari tomonidan kundalik ehtiyoj isteʼmol tovarlariga narxlarni shakllantirishning belgilangan tartibiga rioya qilinishi ustidan qatʼiy nazoratni taʼminlasin;

kundalik ehtiyoj isteʼmol tovarlari narxlarining asossiz ravishda oshirib yuborilishiga urinishlarga yoʻl qoʻymaslik va ularning oldini olish boʻyicha zarur chora-tadbirlarni koʻrsin, qonun buzuvchilarga nisbatan amaldagi qonun hujjatlariga muvofiq iqtisodiy jazo choralarini qoʻllasin.

4. Quyidagilar:

Oʻzbekiston Respublikasi hududiga jismoniy shaxslar tomonidan keltiriladigan tijorat faoliyati uchun moʻljallanmagan tovarlardan olinadigan yigʻim miqdori Oʻzbekiston Respublikasi Vazirlar Mahkamasining “Importni tariflar bilan boshqarish chora-tadbirlari toʻgʻrisida” 1998-yil 24-fevraldagi 80-son qarorida belgilangan amaldagi miqdorlarda va uni undirish tartibi saqlab qolinsin.

5. “Yogʻmoytamakisanoat” uyushmasi va oʻsimlik yogʻi ishlab chiqaruvchi korxonalar tomonidan xoʻjaliklar resurslaridan ishlab chiqarilgan va belgilangan tartibda ularga qaytariladigan oʻsimlik (paxta) yogʻini ushbu xoʻjaliklarning topshirigʻiga binoan yoki ishonchnomalari boʻyicha boshqa xoʻjalik yurituvchi subyektlarga sotilishi taqiqlansin.

Belgilab qoʻyilsinki:

oʻsimlik (paxta) yogʻining tuzilgan shartnomalarga muvofiq xoʻjaliklar tomonidan sotib olinmagan miqdori ishlab chiqaruvchi korxonalar tomonidan qonun hujjatlarida belgilangan tartibda sotiladi;

ishlab chiqaruvchi korxonalarning xoʻjaliklar resurslaridan ishlab chiqarilgan oʻsimlik (paxta) yogʻini mazkur xoʻjaliklarning topshirigʻiga binoan yoki ishonchnomasi boʻyicha boshqa xoʻjalik yurituvchi subyektlarga sotishdan olingan tushumi davlat soliq organlari tomonidan qonunchilikda belgilangan tartibda davlat budjetiga undiriladi, mansabdor shaxslarga nisbatan qonunchilikka muvofiq javobgarlik choralari qoʻllaniladi.

6. Oʻzbekiston Respublikasi Davlat bojxona qoʻmitasi kundalik ehtiyoj isteʼmol tovarlarining respublika tashqarisiga noqonuniy olib chiqib ketilishi hollarining oldini olishni taʼminlovchi bojxona nazoratini kuchaytirsin.

7. Oʻzbekiston Respublikasi Adliya vazirligi tegishli vazirliklar va idoralar bilan birgalikda bir hafta muddatda idoraviy normativ hujjatlarni ushbu qarorga muvofiqlashtirsin.

8. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosarlari M.Z. Usmonov va R.S. Azimov zimmasiga yuklansin.

Vazirlar Mahkamasining Raisi I. KARIMOV

Toshkent sh.,

2001-yil 31-oktabr,

433-son