Respublikada tabiiy pardozbop tosh konlarini qazib olishni tartibga solish va takomillashtirish toʻgʻrisida (15-son)

14.01.1992

OʻZBEKISTON RESPUBLIKASI PREZIDENTI HUZURIDAGI VAZIRLAR MAHKAMASINING

qarori

Toʻlanmaydigan tabiiy resurs boʻlgan pardozbop tosh konlaridan oqilona foydalanish, shuningdek, marmar va granit bloklarni qazib olishda ularni toʻla qayta ishlash va tegishli tartib oʻrnatish maqsadida Vazirlar Mahkamasi qaror qiladi:

1. Oʻzbekiston Respublikasi Binokorlik materiallari sanoati vazirligi zimmasiga korxonalar, tashkilotlar, kichik korxonalar, kooperativlar va xoʻjalik faoliyati boshqa shakllarining tabiiy pardozbop toshlarni qazib olish va qayta ishlash borasidagi yumushlarini muvofiqlashtirish, shuningdek, uni qayta ishlayotganda chiqitsiz texnologiyani joriy etishni nazorat qilib borish vazifasi yuklatilsin.

2. Belgilab qoʻyilsinki:

mazkur qarorning ilovasida koʻrsatilgan vazirliklar, idoralar, korxonalar va tashkilotlar tomonidan tabiiy tosh konlarini qidirib topish va qazib olish Oʻzbekiston Respublikasi Iqtisodiyot qoʻmitasi, Davlat geologiya va mineral resurslar qoʻmitasi hamda Binokorlik materiallari sanoati vazirligi bilan kelishilgan holda amalga oshiriladi;

tabiiy toshlar hisoblab chiqilgan talablar doirasida, respublikaning toshga ishlov berish korxonalarida uni toʻla qayta ishlashni va ishlab chiqarish chiqitlaridan foydalanishni hisobga olgan holda qazib olinadi;

tabiiy toshdan tayyorlangan bloklarning hamma turlari va undan yasalgan buyumlarni respublikadan chetga chiqarishga Vazirlar Mahkamasining ruxsati bilan, banklarning boshqa xillariga yoki ishlab chiqarish-texnika maqsadlaridagi mahsulotlarga va xalq isteʼmoli mollariga ayirboshlash sharti bilan yoʻl qoʻyiladi.

3. Tabiiy tosh konlarini qazib oluvchi va ularni qayta ishlovchi kichik korxonalar, kooperativlar va ish faoliyatining boshqa shakllariga ishlab chiqarishni tashkil etish bilan bogʻliq boʻlgan masalalarni tezda va sifatli hal etish maqsadida, ularning bundan buyon Oʻzbekiston Respublikasining Binokorlik materiallari sanoati vazirligi huzurida shartnoma asosida faoliyat koʻrsatishi masalasini koʻrib chiqish va qaror qabul qilish tavsiya etilsin.

4. Xalq deputatlari mahalliy Kengashlarning ijroiya qoʻmitalari tabiiy tosh konlarini qazib olish uchun yer uchastkalarini belgilangan tartibda faqat Binokorlik materiallari sanoati vazirligi bilan kelishilgan talabnoma boʻyicha va Oʻzbekiston Respublikasi Davlat geologiya va mineral resurslar qoʻmitasi tomonidan berilgan xulosa boʻlgan taqdirdagina ajratsinlar.

5. Oʻzbekiston Respublikasi Iqtisodiyot qoʻmitasi respublikani ijtimoiy va iqtisodiy rivojlantirishning asosiy koʻrsatkichlari yillik loyihasini ishlab chiqayotganda davlat ehtiyojlari uchun tabiiy pardozbop toshdan buyumlar ishlab chiqarish va ularni yetkazib berish hajmlarini kelishib olsin.

Ushbu mahsulotlarni respublika isteʼmolchilariga taqsimlash va ularni ishlab chiqarish uchun korxonalarni shartnoma asosida xomashyo resurslari bilan taʼminlash Binokorlik materiallari sanoati vazirligi zimmasiga yuklatilsin.

6. Oʻzbekiston Respublikasi Binokorlik materiallari sanoati vazirligi:

oʻz tuzilmasiga qabul qilinadigan kichik korxonalar, kooperativlar va faoliyatning boshqa shakllari bilan oʻzaro munosabatlarni qatʼiyan shartnoma asosida koʻrsin, xomashyo, olmos va abraziv asboblar bilan taʼminlashda, mahsulot chiqarishni koʻpaytirish va uni Isteʼmolchilarga sotish masalalarini hal etishda ularga yaqindan yordam bersin;

bir oy muddat ichida konlar hududida va ishlov berish korxonalaridagi kichik hajmli va talabga javob bermaydigan tabiiy tosh bloklari zaxiralarini roʻyxatdan oʻtkazsin, ularni boshqa korxonalarga sotishni shartnoma asosida amalga oshirsin.

7. Vazirliklar, idoralar, tashkilotlar:

1992-yilning yanvaridan boshlab belgilangan muddatlarda Oʻzbekiston geologiya fondiga idoralarga qarashli korxonalar qazib oladigan tabiiy tosh konlari zaxiralarining holati haqida maʼlumot bersinlar;

zaxiralar tasdiqlangan kundan boshlab ikki yil mobaynida Sanoatda foydalanishga topshirilmagan pardozbop tosh konlarini shartnoma asosida qazib olish yoki ana shu konlardan foydalanish uchun qoʻshma korxonalar tuzish maqsadida boshqa vazirliklar, idoralar, korxonalarga ularni berish masalasini bir oy muddat ichida koʻrib chiqsinlar.

1992-yilda tabiiy toshlar tajriba-sanoat usulida qazib olinadigan konlar boʻyicha zarur loyiha-smeta hujjatlarini ishlab chiqsinlar va tasdiqlasinlar;

1992-yilning 1-yanvariga qadar Oʻzbekiston Respublikasi Davlat geologiya va mineral resurslar qoʻmitasi ishtirokida sanoat uchun ahamiyatini yoʻqotgan pardozbop toshlar konlari zaxirasini belgilangan tartibda roʻyxatdan chiqarsinlar;

tabiiy toshlarni qazib olish va ularga ishlov berish obyektlarini koʻrish boʻyicha loyiha-smeta hujjatlarini oʻz vaqtida ishlab chiqishni, kon ishlarini rivojlantirish rejalarini belgilangan tartibda kelishilgan holda tuzishni, shuningdek, kon qazish korxonalarida geologiya-marksheyderlik xizmati faoliyatini lozim darajada tashkil etishni taʼminlasinlar.

8. Oʻzbekiston Respublikasi Davlat geologiya va mineral resurslar qoʻmitasi mazkur qarorning ilovasida koʻrsatilgan vazirliklar, idoralar, korxonalar va tashkilotlar bilan shartnomalar boʻyicha pardozbop tosh konlarida geologiya-qidiruv ishlarini oʻtkazishni taʼminlasin.

9. Oʻzbekiston Respublikasi Tabiatni muhofaza qilish qoʻmitasi pardozbop tosh konlarini qazib olishda va ularga ishlov berishda tabiatni muhofaza qilish ishlarining oʻz vaqtida bajarilishi va buzilgan yer uchastkalarini rekultivatsiya qilishda korxonalarga nisbatan talabchanlikni oshirsin,

10. Oʻzbekiston Respublikasi Sanoatda ishlarning bexatar olib borilishini nazorat qilish va konchilik nazorati davlat qoʻmitasi mazkur qarorda tabiiy tosh konlarini qazib olishni tashkil etish boʻyicha oʻrnatilgan tartibni nazorat qilishni kuchaytirsin.

11. Oʻzbekiston Respublikasi Davlat statistika qoʻmitasi vazirliklar, idoralar, tashkilotlar, korxonalar, xalq deputatlari Mahalliy Kengashlari ijroiya qoʻmitalari, kichik korxonalar bilan birgalikda 1992-yilning 1-yanvaridan boshlab yilning har choragida Vazirlar Mahkamasiga tabiiy pardozbop toshdan buyumlar ishlab chiqarish hajmlari toʻgʻrisida statistik hisobot berib borsin.

12. Respublika Bojxona qoʻmitasi tabiiy toshdan tayyorlangan pardozbop buyumlarning respublikadan chetga chiqarilishi tartibiga rioya qilinishi ustidan nazorat oʻrnatsin.

Vazirlar Mahkamasi Raisining Birinchi oʻrinbosari I. JOʻRABEKOV

Toshkent sh.,

1992-yil 14-yanvar,

15-son

Vazirlar Mahkamasining 1992-yil 14-yanvardagi 15-son qaroriga ILOVA

TABIIY PARDOZBOP TOSh KONLARIDAN SANOAT MAQSADIDA FOYDALANISh HUQUQI BERILGAN VAZIRLIKLAR, IDORALAR, TAShKILOTLAR ROʻYXATI

Oʻzbekiston Respublikasi Davlat geologiya va mineral resurslar qoʻmitasi

“Vostok” (Yangiobod shahri) IB

Langar kon boshqarmasi

“Qizilqumkamyobmetalloltin” konserni

“Qizilqum” firmasi

Oʻzbekiston Respublikasi Avtomobil yoʻllari vazirligi

Oʻzbekiston Respublikasi Mahalliy sanoat vazirligi