Oʻzbekiston Respublikasi Qishloq xoʻjaligi vazirligi faoliyatini tashkil etish chora-tadbirlari toʻgʻrisida (PQ-3671-son)

17.04.2018

Oʻzbekiston Respublikasi Prezidentining

Qarori

Oʻzbekiston Respublikasi Prezidentining 2018-yil 17-apreldagi “Qishloq va suv xoʻjaligi davlat boshqaruvi tizimini tubdan takomillashtirish chora-tadbirlari toʻgʻrisida”gi PF-5418-son Farmonini ijro etish hamda Oʻzbekiston Respublikasi Qishloq xoʻjaligi vazirligi samarali faoliyat koʻrsatishini taʼminlash maqsadida:

3. Belgilab qoʻyilsinki:

Vazirlik Oʻzbekiston Respublikasi Qishloq va suv xoʻjaligi vazirligi barcha huquq, majburiyat va shartnomalarining qishloq xoʻjaligi qismi boʻyicha huquqiy vorisi hisoblanadi;

Vazirlikning oʻz vakolatlari doirasida qabul qiladigan qarorlari davlat va xoʻjalik boshqaruvi organlari, mahalliy ijroiya hokimiyati organlari, shuningdek, korxona va muassasalar tomonidan bajarilishi majburiy hisoblanadi;

Qoraqalpogʻiston Respublikasi Vazirlar Kengashi raisining, viloyatlar va tumanlar (shaharlar) hokimlarining qishloq va suv xoʻjaligi masalalari uchun masʼul boʻlgan tegishli oʻrinbosarlari Vazirlik va Oʻzbekiston Respublikasi Suv xoʻjaligi vazirligi hududiy boʻlinmalarining hamkorlikdagi faoliyatini taʼminlaydi.

5. Qishloq xoʻjaligi sohasidagi davlat siyosati ustuvor yoʻnalishlarining muvofiqlashtirilgan holda amalga oshirilishini taʼminlash maqsadida quyidagilar belgilab qoʻyilsin:

a) Oʻzbekiston Respublikasining qishloq xoʻjaligi vaziri quyidagilar uchun shaxsan javobgardir:

Oʻzbekiston Respublikasining qonunlari, Oʻzbekiston Respublikasi Prezidenti va Vazirlar Mahkamasining qarorlari, shuningdek, normativ-huquqiy hujjatlar talablarining oʻz vaqtida va sifatli bajarilishi;

Vazirlik zimmasiga yuklatilgan vazifa va funksiyalar bajarilishini tashkil etish, Vazirlik faoliyatini rejalashtirish, shuningdek, uning faoliyati bilan bogʻliq prognoz koʻrsatkichlariga erishilishini soʻzsiz taʼminlash;

qishloq xoʻjaligini rivojlantirish, shuningdek, hududlarni ijtimoiy-iqtisodiy rivojlanishi va qishloq xoʻjaligi sohasidagi muammoli masalalarni hal etish boʻyicha dasturlar, chora-tadbirlar rejalari, “yoʻl xaritalari” va boshqa dasturiy hujjatlarni samarali amalga oshirish;

kadrlarni tanlash va joy-joyiga qoʻyish, Vazirlik xodimlarini qayta tayyorlash va malakasi oshirilishini tashkil etish, ular samarali faoliyat koʻrsatishlari uchun zarur shart-sharoitlar yaratish, mehnat intizomini va qonun hujjatlari talablarini qoʻpol ravishda buzgan xodimlarga nisbatan intizomiy va boshqa turdagi javobgarlik choralarini koʻrish;

xorijiy mamlakatlarning qishloq xoʻjaligi idoralari va xalqaro tashkilotlar bilan hamkorlikni yoʻlga qoʻyish, ilgʻor tajribani tizimli oʻrganish va joriy qilish;

qishloq xoʻjaligi tashkilotlari va muassasalari faoliyatining ochiqligini taʼminlash, jismoniy va yuridik shaxslarning murojaatlarini koʻrib chiqish boʻyicha ishlarni samarali tashkil etish, aholi bilan toʻgʻridan-toʻgʻri va ochiq muloqotni yoʻlga qoʻyish, fuqarolar shaxsiy qabulini tizimli ravishda oʻtkazib borish;

b) qishloq xoʻjaligi vazirining birinchi oʻrinbosari quyidagilar uchun shaxsan javobgardir:

paxta va texnik ekinlarni yetishtirishga doir agrotexnik tadbirlarni oʻz vaqtida va sifatli oʻtkazilishini taʼminlash, shuningdek, boshoqli, dukkakli va moyli ekinlar yetishtirishni rivojlantirish;

Vazirlik hamda Suv xoʻjaligi vazirligining suvdan foydalanish sohasida oʻzaro hamkorlikda ishlashini taʼminlash;

qishloq xoʻjaligini mexanizatsiyalash darajasini oshirish, shuningdek, agrokimyoviy tadbirlarni amalga oshirish;

qishloq xoʻjaligi ekinlarini yetishtirishning ilgʻor agrotexnologiyalari, resurs hamda suvni tejovchi texnologiyalarni joriy qilish;

kontraktatsiya shartnomalari tuzilishi va ijro qilinishi ustidan monitoring yuritilishini tashkil etish va qishloq xoʻjaligida davlat xaridlarini shakllantirish;

v) qishloq xoʻjaligi vazirining oʻrinbosarlari quyidagilar uchun shaxsan javobgardir:

bogʻdorchilik, uzumchilik, chorvachilik, parrandachilik, naslchilik ishlari, asalarichilik, baliqchilik va pillachilikni rivojlantirish;

barqaror narxlarda aholini yil davomida va uzluksiz taʼminlash uchun zarur boʻlgan hajmdagi qishloq xoʻjaligi va oziq-ovqat mahsulotlari zaxirasi shakllantirilishini tashkil etish;

qishloq xoʻjaligi va oziq-ovqat mahsulotlarining chuqur qayta ishlanishi va saqlanishini taʼminlash;

qishloq xoʻjaligi va oziq-ovqat mahsulotlari ishlab chiqarilishining iqtisodiy tahlilini, shuningdek, narx va meʼyorlar shakllantirilishini amalga oshirish;

agrar sohada iqtisodiy islohotlarni chuqurlashtirish boʻyicha ishlarni muvofiqlashtirish, agrar tadbirkorlikni davlat tomonidan qoʻllab-quvvatlash, davlat-xususiy sheriklik mexanizmlarini takomillashtirish;

qishloq xoʻjaligi mahsulotlari bozori konyunkturasini oʻrganish boʻyicha chuqur marketing tadqiqotlarini olib borish, aholining oziq-ovqat mahsulotlariga boʻlgan ehtiyojini oʻrganish, agrar sohaning eksport salohiyatini sezilarli darajada oshirish choralarini ishlab chiqish va amalga oshirish;

qishloq xoʻjaligiga investitsiyalarni jalb qilish va ulardan samarali foydalanish ustidan monitoring olib borish;

qishloq xoʻjaligiga innovatsiyalar va axborot-kommunikatsiya texnologiyalarini joriy etish;

qishloq xoʻjaligi infratuzilmasini rivojlantirish, tarmoq moddiy-texnika bazasini mustahkamlash.

6. Oʻzbekiston Respublikasi Prezidentining 2018-yil 17-apreldagi “Qishloq va suv xoʻjaligi davlat boshqaruvi tizimini tubdan takomillashtirish chora-tadbirlari toʻgʻrisida”gi PF-5418-son Farmoniga muvofiq Oʻzbekiston Respublikasi Qishloq xoʻjaligi vazirligi huzurida Qishloq xoʻjaligini rivojlantirish va oziq-ovqat taʼminoti jamgʻarmasi (keyingi oʻrinlarda Jamgʻarma) tashkil etilganligi maʼlumot uchun qabul qilinsin.

Jamgʻarma mablagʻlarini shakllantirishning asosiy manbalari etib quyidagilar belgilansin:

Vazirlik tarkibiga kiruvchi oʻzini oʻzi moliyalashtiradigan tashkilotlar sof foydasining oʻz ixtiyorida qoldiriladigan qismidan tuzilgan shartnomalar asosidagi ajratmalari;

Oʻzbekiston Respublikasi Moliya vazirligi huzuridagi Qishloq xoʻjaligini qoʻllab-quvvatlash jamgʻarmasiga tushumlarning 0,2 foizi miqdoridagi ajratmalar;

jismoniy va yuridik shaxslarning xayriya mablagʻlari;

xalqaro grantlar va texnik koʻmak mablagʻlari;

qonun hujjatlari bilan taqiqlanmagan boshqa manbalar.

7. Toshkent davlat agrar universiteti va uning filiallari, Andijon qishloq xoʻjaligi instituti hamda Samarqand qishloq xoʻjaligi instituti Vazirlik tarkibidan chiqarilsin.

Oʻzbekiston Respublikasi Vazirlar Mahkamasi bir oy muddatda Vazirlik tarkibidan chiqarilayotgan taʼlim muassasalari, shuningdek, Qishloq xoʻjaligi yoʻnalishidagi oliy taʼlim muassasalarini qoʻllab-quvvatlash jamgʻarmasini yanada takomillashtirish boʻyicha takliflar kiritsin.

8. Kasb-hunar taʼlimi tizimini yanada takomillashtirishni muvofiqlashtirish Respublika komissiyasi (A.A. Abduxakimov) kasb-hunar kollejlarini tegishli vazirlik va idoralarning tasarrufiga oʻtkazish boʻyicha takliflar tayyorlashda:

Qoraqalpogʻiston Respublikasi va viloyatlardagi kasb-hunar kollejlarini qishloq xoʻjaligi sohasida kadrlar tayyorlash boʻyicha ixtisoslashtirish;

qayd etib oʻtilgan kasb-hunar kollejlarini Vazirlik tasarrufiga ularning balansida boʻlgan binolar, imoratlar, laboratoriyalar, jihozlar, boshqa obyektlar va moddiy boyliklar bilan birgalikda oʻtkazish masalalarini koʻrib chiqsin.

9. Toshkent viloyati, Qibray tumani, Universitet koʻchasi, 2-uy manzilida joylashgan Toshkent davlat agrar universiteti balansidagi bino belgilangan tartibda Vazirlik balansiga oʻtkazilib, kelgusida Vazirlik markaziy apparati mazkur binoda joylashtirilsin.

Moliya vazirligi Oʻzbekiston Respublikasi Vazirlar Mahkamasining zaxira jamgʻarmasidan Vazirlik binosini kapital taʼmirlash, unga tutash hududni obodonlashtirish, xizmat xonalarini mebel, kompyuter, tashkiliy texnika va inventar bilan jihozlash uchun zarur boʻlgan mablagʻlarni ajratsin.

Oʻzbekiston Respublikasi Axborot texnologiyalari va kommunikatsiyalarini rivojlantirish vazirligi Vazirlikni belgilangan tartibda zarur aloqa vositalari, shu jumladan, hukumat aloqa vositalari bilan hamda yuqori tezlikdagi Internet tarmogʻiga ulanishini taʼminlasin.

10. Oʻzbekiston Respublikasi Vazirlar Mahkamasi bir oy muddatda:

Oʻzbekiston Respublikasi Qishloq xoʻjaligi vazirligi toʻgʻrisidagi nizomni;

Oʻzbekiston Respublikasi Qishloq xoʻjaligi vazirligi va uning tarkibiga kiruvchi tashkilotlar xodimlarini moddiy ragʻbatlantirish tartibi toʻgʻrisidagi nizomni tasdiqlasin.

11. Vazirlik:

bir oy muddatda “Maʼmuriy-xoʻjalik xizmati” DUK ustavini ishlab chiqsin va belgilangan tartibda davlat roʻyxatidan oʻtkazilishini taʼminlasin;

Oʻzbekiston Respublikasi Suv xoʻjaligi vazirligi, Adliya vazirligi hamda boshqa manfaatdor vazirliklar va idoralar bilan birgalikda uch oy muddatda qonun hujjatlariga mazkur qarordan kelib chiqadigan oʻzgartirish va qoʻshimchalar toʻgʻrisida Vazirlar Mahkamasiga takliflar kiritsin.

12. Mazkur qarorning ijrosini nazorat qilish Oʻzbekiston Respublikasining Bosh vaziri A.N. Aripov va Oʻzbekiston Respublikasi Bosh prokurori O.B. Murodov zimmasiga yuklansin.

Oʻzbekiston Respublikasi Prezidenti Sh. MIRZIYOYEV

Toshkent sh.,

2018-yil 17-aprel,

PQ-3671-son