Idoraviy axborot tizimlarini jadal integratsiyalashtirish va innovatsion loyihalarni amalga oshirishga doir tashkiliy chora-tadbirlari toʻgʻrisida (PQ-3673-son)

18.04.2018

Oʻzbekiston Respublikasi Prezidentining

Qarori

[Koʻchirma]

Davlat organlari va tashkilotlari axborot tizimlarining oʻzaro samarali hamkorligi va integratsiyasini, axborotlarni tahlil qilish, qayta ishlash va saqlash, keyinchalik hududlarni ijtimoiy-iqtisodiy rivojlantirish loyihalari va dasturlarini ishlab chiqishda ulardan foydalanish, innovatsion gʻoyalar, ishlanmalar va ishni tashkil qilish texnologiyalarini keng joriy etish, shuningdek, qoʻshni mamlakatlar bilan savdo-iqtisodiy munosabatlarni mustahkamlashni taʼminlash maqsadida:

1. Oʻzbekiston Respublikasi Prezidentining “Oʻzbekiston Respublikasi Prezidenti huzuridagi Loyiha boshqaruvi milliy agentligi faoliyatini tashkil etish toʻgʻrisida” 2017-yil 27-iyuldagi PQ-3150-son va “Axborot-kommunikatsiya texnologiyalari sohasida loyiha boshqaruvi tizimini yanada takomillashtirish chora-tadbirlari toʻgʻrisida” 2017-yil 29-avgustdagi PQ-3245-son qaroriga muvofiq:

Davlat axborot tizimlarini yaratish va qoʻllab-quvvatlash boʻyicha yagona integrator (keyingi oʻrinlarda — Yagona integrator) tashkil etilgani;

respublika ijtimoiy-iqtisodiy rivojlanishini tizimli tahlil qilish va prognozlash imkonini beruvchi, davlat va boshqa axborot tizimlari bilan integratsiyalashgan Oʻzbekiston Respublikasi Loyiha boshqaruvining yagona milliy axborot tizimini 2019-yil 1-yanvarga qadar ishga tushirish belgilangani maʼlumot oʻrnida qabul qilinsin.

2. Oʻzbekiston Respublikasi Axborot texnologiyalari va kommunikatsiyalarini rivojlantirish vazirligi, Bosh prokuratura, Davlat xavfsizlik xizmati, Oʻzbekiston Respublikasi Prezidenti huzuridagi Loyiha boshqaruvi milliy agentligining:

a) Qoraqalpogʻiston Respublikasi, viloyatlar va Toshkent shahrida Yagona integratorning maʼlumotlarni qayta ishlash markazlarini tashkil etish va ularga quyidagilarni:

davlat organlari va tashkilotlari maʼlumotlar bazalaridagi barcha axborotlarni saqlashni;

davlat organlari va tashkilotlarining barcha axborot tizimlari (keyingi oʻrinlarda — axborot tizimlari) oʻrtasida mustahkam oʻzaro aloqani;

maʼlumotlarni xavfsiz saqlash va barcha axborot tizimlarining barqaror ishlashini;

tarqoq axborot tizimlaridagi maʼlumotlarni keyinchalik tahliliy qayta ishlash boʻyicha platforma yaratishni taʼminlash vazifalarini yuklash;

b) Oʻzbekiston Respublikasi Loyiha boshqaruvining yagona milliy axborot tizimi funksiyalarini Yagona integratorga berish toʻgʻrisidagi takliflari qabul qilinsin.

3. Belgilansinki, Yagona integrator va maʼlumotlarga ishlov berish markazlarining faoliyati:

axborot tizimlari, resurslar va dasturiy mahsulotlarning samarali faoliyat yuritishi, ularning “Elektron hukumat” tizimiga integratsiyasi, shuningdek, davlat organlari va tashkilotlarida zamonaviy axborot-kommunikatsiya texnologiyalarini joriy etishni muvofiqlashtirish sohasida — Oʻzbekiston Respublikasi Axborot texnologiyalari va kommunikatsiyalarini rivojlantirish vazirligi tomonidan;

Oʻzbekiston Respublikasini rivojlantirish davlat dasturlari va investitsiya loyihalarini ishlab chiqishning shaffofligi, sifatli va oʻz vaqtida amalga oshirish sohasida — Oʻzbekiston Respublikasi Prezidenti huzuridagi Loyiha boshqaruvi milliy agentligi tomonidan;

davlat organlari va tashkilotlarining oʻz faoliyati shaffofligini, davlat xizmatlari qulayligi va sifatini oshirish borasidagi faoliyati ustidan nazorat qilish sohasida — Oʻzbekiston Respublikasi Bosh prokuraturasi tomonidan;

Yagona integratorning xavfsiz faoliyat yuritishi, tashqi va ichki tahdidlar, xakerlik hujumlaridan, shu jumladan infratuzilma obyektlarini himoya qilish sohasida — Oʻzbekiston Respublikasi Davlat xavfsizlik xizmati tomonidan taʼminlanadi.

4. Qoraqalpogʻiston Respublikasi Vazirlar Kengashi Raisi, viloyatlar va Toshkent shahar hokimliklari maʼlumotlarni qayta ishlash markazlarining zaxira elektr taʼminoti, sovutish va xavfsizlik tizimiga ulangan, muhandislik-kommunikatsiya infratuzilmasi rivojlangan joylarga joylashtirilishini taʼminlasin.

5. Maʼlumotlarni qayta ishlash markazlari oʻz faoliyatini samarali tashkil etishi uchun maqsadida server uskunalari, texnikalar, dasturiy taʼminot, ehtiyot qismlari va boshqa vositalarni olib kirganlik uchun bojxona toʻlovlari (bojxona rasmiylashtiruvi uchun yigʻimlardan tashqari)dan ozod etilsin.

6. Belgilab qoʻyilsinki, davlat organlari va tashkilotlarining axborot tizimlari, resurslari va dasturiy mahsulotlarini ishlab chiqish, joriy etish va integratsiya qilishni nazarda tutuvchi normativ-huquqiy hujjatlar loyihalari, shuningdek, ularning loyihaviy va texnik hujjatlari majburiy ravishda Yagona integrator bilan kelishiladi.

13. Oʻzbekiston Respublikasi Prezidenti huzuridagi Loyiha boshqaruvi milliy agentligi, Oʻzbekiston Respublikasi Iqtisodiyot vazirligi, Moliya vazirligi, Ichki ishlar vazirligi, Davlat soliq qoʻmitasining quyidagilarni:

soliq toʻlovchilarni hisobga olishni kengaytirish va soliq tushumlari ustidan nazoratni kuchaytirish hisobiga budjet daromadlarini koʻpaytirish imkonini beradigan “onlayn” nazorat-kassa mashinalari tizimlarini;

telekommunikatsiya xizmatlari uchun budjet mablagʻlarini tejashni, telefon soʻzlashuvlarining xavfsizligi va nazoratini taʼminlash imkonini beradigan hukumat mobil aloqa tizimini;

haydovchilik guvohnomasidan tashqari, pasportlar, tugʻilganlik toʻgʻrisidagi guvohnomalar va shaxsni tasdiqlovchi boshqa hujjatlarning mavjud tizimi oʻrniga (respublika ichida) har bir fuqaroning yagona identifikatsiya raqami, uning shaxsiy maʼlumotlarini oʻzida jamlagan va davlat xizmatlaridan foydalanishda shaxsni aniqlash uchun ishlatiluvchi identifikatsiya kartalari (ID-kartalar) tizimini;

amaldagi davlat raqamlarini xalqaro namunadagi raqamlarga almashtirish, tegishli maʼlumotlarni avtomobil egalarining identifikatsiya kartalari (ID-kartalari)ga kiritgan holda transport vositalari uchun qogʻoz hujjatlarni bekor qilishni nazarda tutuvchi transport vositalarini hisobga olish tizimini joriy etish toʻgʻrisidagi takliflariga rozilik berilsin.

14. Oʻzbekiston Respublikasi Prezidenti huzuridagi Loyiha boshqaruvi milliy agentligi, Oʻzbekiston Respublikasi Investitsiyalar boʻyicha davlat qoʻmitasi masʼul vazirliklar va idoralar, yetakchi konsalting kompaniyalari va xorijlik mutaxassislar bilan birgalikda:

2018-yil 1-iyulga qadar ushbu qarorning 13-bandida nazarda tutilgan loyihalarni, shu jumladan, xalqaro moliya institutlari kreditlari, donor tashkilotlar, xorijiy davlatlarning grantlari va investorlarning xayriya mablagʻlari hisobiga moliyalashtirish boʻyicha aniq takliflar kiritsin;

2018-yil 1-avgustga qadar ushbu qarorning 13-bandida nazarda tutilgan loyihalarning texnik topshiriqlari va texnik-iqtisodiy asoslarini tayyorlash va ekspertizadan oʻtkazishni taʼminlasin;

2018-yil 1-noyabrga qadar loyihalarni budjetdan tashqari mablagʻlar hisobiga Toshkent shahrida joriy etish va pilot tartibida ishga tushirishni taʼminlasin.

15. Oʻzbekiston Respublikasi Bosh prokuraturasi va Davlat xavfsizlik xizmati masʼul vazirlik va idoralarni jalb etgan holda ushbu qarorda nazarda tutilgan chora-tadbirlarning oʻz vaqtida va toʻliq amalga oshirilishi ustidan tizimli monitoring olib borsin.

16. Oʻzbekiston Respublikasi Adliya vazirligi bir oy muddatda qonun hujjatlariga ushbu qarordan kelib chiqadigan oʻzgartirish va qoʻshimchalar toʻgʻrisida Vazirlar Mahkamasiga takliflar kiritsin.

17. Mazkur qarorning ijrosini nazorat qilish Oʻzbekiston Respublikasining Bosh vaziri A.N. Aripov, Oʻzbekiston Respublikasi Davlat xavfsizlik xizmati raisi I.B. Abdullayev va Oʻzbekiston Respublikasi Bosh prokurori O.B. Murodov zimmasiga yuklansin.

Oʻzbekiston Respublikasi Prezidenti Sh. MIRZIYOYEV

Toshkent sh.,

2018-yil 18-aprel,

PQ-3673-son