Hisob-kitoblar maʼlumotnomasini rasmiylashtirish tartibi toʻgʻrisida nizomni tasdiqlash haqida (1137-son)

14.05.2002

Oʻzbekiston Respublikasi Markaziy bank Boshqaruvi Oʻzbekiston Respublikasi Davlat bojxona qoʻmitasining

Qarori

[Oʻzbekiston Respublikasi Adliya vazirligi tomonidan 2002-yil 14-mayda 1137-son bilan davlat roʻyxatidan oʻtkazilgan]

Oʻzbekiston Respublikasi Prezidentining 1996-yil 24-yanvardagi “Toʻlov intizomi va oʻzaro hisob-kitoblar tizimini mustahkamlash chora-tadbirlari toʻgʻrisida”gi PF-1363-sonli va 2002-yil 31-yanvardagi “Sugʻurta bozorini yanada erkinlashtirish va rivojlantirish chora-tadbirlari toʻgʻrisida”gi PF-3022-sonli farmonlariga asosan, Oʻzbekiston Respublikasi Markaziy banki va Davlat bojxona qoʻmitasi Boshqaruvi qaror qiladi:

1. “Hisob-kitoblar maʼlumotnomasini rasmiylashtirish tartibi toʻgʻrisidagi nizom” (yangi tahrirda) ilovaga muvofiq tasdiqlansin.

2. Ushbu qaror Oʻzbekiston Respublikasi Adliya vazirligida davlat roʻyxatidan oʻtkazilgan kundan boshlab 10 kundan soʻng kuchga kiritilsin.

3. Mazkur qaror kuchga kiritilganidan soʻng Oʻzbekiston Respublikasi Adliya vazirligida 1999-yil 1-aprelda 696-raqam bilan roʻyxatga olingan “Hisob-kitoblar maʼlumotnomasini rasmiylashtirish tartibi” oʻz kuchini yoʻqotgan deb hisoblansin.

Markaziy bank raisining birinchi oʻrinbosari M.R. JUMAGALDIYEV

Toshkent sh.,

2002-yil 22-aprel,

215-V-son

Davlat bojxona qoʻmitasi raisining birinchi oʻrinbosari S.A. ARIPOV

Toshkent sh.,

2002-yil22-aprel,

02/19-10-son

Oʻzbekiston Respublikasi Markaziy bank Boshqaruvi va Davlat bojxona qoʻmitasining 2002-yil 22-apreldagi 215-V, 02/19-10-son qaroriga ILOVA

Hisob-kitoblar maʼlumotnomasini rasmiylashtirish tartibi toʻgʻrisida

NIZOM

(yangi tahriri)

Mazkur Nizom Oʻzbekiston Respublikasi Prezidentining “Toʻlov intizomi va oʻzaro hisob-kitoblar tizimini mustahkamlash chora-tadbirlari toʻgʻrisida” 1996-yil 24-yanvardagi PF-1363-sonli va “Sugʻurta bozorini yanada erkinlashtirish va rivojlantirish chora-tadbirlari toʻgʻrisida” 2002-yil 31-yanvardagi PF-3022-sonli farmonlariga muvofiq ishlab chiqilgan boʻlib, eksport qilinayotgan tovarlarni bojxonada rasmiylashtirishda hisob-kitoblar maʼlumotnomasini rasmiylashtirish tartibini belgilaydi.

1. Korxona va tashkilotlar eksportga chiqarilayotgan tovarlarni bojxonada rasmiylashtirishda bojxona organlariga 2-sonli ilovada koʻrsatilgan talablarga muvofiq toʻldirilgan 1-sonli ilovada belgilangan shakl boʻyicha hisob-kitoblar maʼlumotnomasini taqdim etadilar.

Hisob-kitoblar maʼlumotnomasini blanklari eksport qiluvchi korxonaga xizmat koʻrsatayotgan vakolatli bank tomonidan bosmaxona usulida, oʻzining indeksini koʻrsatgan holda tayyorlanadi. Berilgan maʼlumotnoma vakolatli bankning masʼul shaxsi tomonidan imzolanadi va bank muhri bilan tasdiqlanadi. Hisob-kitoblar maʼlumotnomasi qatʼiy hisobda turadigan blank boʻlib, unda hisob yuritish seriyasi, raqami va himoya darajasi boʻlishi shart.

Mahsulot taqsimotiga oid Bitimlarni amalga oshirish doirasida qazib olingan (ishlab chiqarilgan) va Oʻzbekiston Respublikasining norezidentlari tomonidan koʻrsatilgan Bitimlar shartlariga muvofiq eksport qilinayotgan mahsulotni bojxona rasmiylashtiruvida vakolatli bank tomonidan mazkur Nizomning 3-ilovasida keltirilgan shakldagi hisob-kitoblar maʼlumotnomasi taqdim etiladi. Bunda koʻrsatilgan maʼlumotnomani berish vakolatli bankda shartnomani hisobga qoʻymagan holda amalga oshiriladi.

2. Hisob-kitoblar maʼlumotnomasi xaridorlarga xizmat koʻrsatuvchi bank kafolatli yoki eksport shartnomalarini siyosiy va tijorat xatarlaridan sugʻurtalash polisi mavjud boʻlganda yoki oldindan haq olinganda yoxud joʻnatilayotgan mahsulot summasiga akkreditiv ochilganda, shartnomani hisobga olish uchun qabul qilgan bank muassasasi tomonidan ikki nusxada toʻldiriladi. Bir nusxasi mijozga beriladi, ikkinchisi esa bankda qoladi.

Eksport qilinadigan tovarlarni bojxonada rasmiylashtirishda bojxona organlariga hisob-kitoblar maʼlumotnomasining asli va uning korxona rahbari tomonidan tasdiqlangan nusxasini taqdim etadilar.

Eksport qilinayotgan tovarni rasmiylashtirayotgan bojxona postining mansabdor shaxsi hisob-kitoblar maʼlumotnomasining asli va uning nusxasi orqasiga bojxona yuk deklaratsiyasining tartib raqami, eksport qilinayotgan tovarning miqdori va qiymatini koʻrsatgan holda imzo qoʻyadi va ularni shaxsiy raqamli muhri bilan tasdiqlaydi. Hisob-kitoblar maʼlumotnomasining asli deklarantga qaytarib beriladi, uning nusxasi esa bojxona organida qoladi.

Bitta hisob-kitoblar maʼlumotnomasi qiymati doirasida tovarlar bir nechta partiyalarda eksport qilingan holatda, eksport qilinadigan tovarlarning har bir partiyasining bojxona rasmiylashtiruvi ushbu bandning ikkinchi va uchinchi xatboshilariga muvofiq amalga oshiriladi. Bunda eksport qilinadigan tovarlarning ikkinchi va keyingi partiyalarini bojxonada rasmiylashtirishda hisob-kitoblar maʼlumotnomasining asli va uning nusxasi orqa tarafidagi bojxona organlarining yozuvlari bilan, korxona rahbari tomonidan ham orqa tarafi tasdiqlanadi va bojxona organlariga taqdim qilinadi.

3. Eksport qilinadigan tovarlarning bojxonada rasmiylashtirilishiga faqat toʻldirilgan hisob-kitoblar maʼlumotnomasi mavjud boʻlgan holdagina yoʻl qoʻyiladi. Oʻzbekiston Respublikasi hududidan tashqarida joylashgan omborlardan FOB, EX Warehouse shartlarida markazlashtirilgan holda yuklab joʻnatish, milliy valyuta — soʻmda toʻlov amalga oshirish sharti bilan birja va yarmarka savdolarida tuzilgan kontraktlar boʻyicha hamda chet el valyutasida toʻlov amalga oshirish sharti bilan Oʻzbekiston Respublikasi tovar – xomashyo birjasida tuzilgan eksport shartnomalari boʻyicha yuklab joʻnatish bundan mustasno.

Bunda, tashqariga chiqarilayotgan tovarlar, shu jumladan, bir nechta partiyalarda chiqarilayotgani summasi olingan kafolatlar yoki eksport shartnomalarni siyosiy va tijorat xatarlaridan sugʻurtalash polisi, oldindan toʻlangan haq yoki maʼlumotnomada koʻrsatilgan akkreditiv summasidan oshmasligi shart.

4. Barter kontraktlar boʻyicha sotilishi uchun maxsus ruxsatnoma mavjud boʻlgan tovarlar shartnomaning umumiy summasiga kafolat yoki eksport shartnomalarni siyosiy va tijorat xatarlaridan sugʻurtalash polisi mavjud boʻlganda tashqariga chiqariladi, bu haqda hisob-kitoblar maʼlumotnomasida qayd etiladi.

Barter shartnomalari boʻyicha import tovarlar Oʻzbekiston Respublikasiga amalda kirib kelgan boʻlsa, bojxona idoralari tovarlarni hisob-kitoblar maʼlumotnomasisiz tashqariga chiqaradi.

5. Vakolatli banklar xorijiy vakil banklar kafolatlarini qabul qiladilar.

Agar kafolatnoma vakillik munosabatlari oʻrnatilmagan bank tomonidan berilgan boʻlsa, vakolatli banklar bevosita vakillik munosabatlari oʻrnatilgan xorijiy banklardan kafolat tasdiq xatini olishlari lozim.

6. Vakolatli banklarning rahbarlari hisob-kitoblar maʼlumotnomasini toʻgʻri rasmiylashtirilishi, shuningdek, obyektiv sabablar boʻlmay turib, uning oʻz vaqtida rasmiylashtirilmaganligi uchun javobgardirlar.

Hisob-kitoblar maʼlumotnomasini rasmiylashtirish tartibi toʻgʻrisidagi nizomga 1-sonli ILOVA

Hisob-kitoblar maʼlumotnomasini rasmiylashtirish tartibi toʻgʻrisidagi nizomga 2-sonli ILOVA

Hisob-kitoblar maʼlumotnomasini rasmiylashtirishga qoʻyiladigan

TALABLAR

1-xatboshida maʼlumotnomani rasmiylashtirgan bank muassasasining toʻliq nomi koʻrsatiladi;

2-xatboshida tovar joʻnatuvchi/eksport qiluvchi korxonaning toʻliq nomi, KTUT kodi;

3-xatboshida tovar oluvchi/import qiluvchi korxonaning toʻliq nomi;

4-xatboshida shartnomaning sanasi va raqami;

5-xatboshida shartnomaning umumiy summasi;

6-xatboshida shartnoma shartlariga muvofiq tovarning nomi;

7-xatboshida xorijiy bankning kafolati yoki eksport shartnomalarni siyosiy va tijorat xatarlaridan sugʻurtalash polisi mavjudligi, oldindan kelib tushadigan haqning tushishi, hujjatning summasi, sanasi va amal qilish muddati koʻrsatilgan holda akkreditivning ochilganligi koʻrsatiladi.

Hisob-kitoblar maʼlumotnomasini rasmiylashtirish tartibi toʻgʻrisidagi nizomga 3-ILOVA

(3-ilova Oʻzbekiston Respublikasi Markaziy banki Boshqaruvi va Davlat bojxona qoʻmitasining 2008-yil 26-yanvardagi 215-V-3, 01-02/19-12-son qarori (roʻyxat raqami 1137-3,05.03.2008-y.) bilan kiritilgan — OʻR QHT, 2008-y., 10-11-son, 68-modda)