Ichki ishlar organlarida majburiy xizmatni oʻtash haqidagi shartnomalarni tuzish hamda shartnoma shartlari bajarilmaganda xarajatlarni qoplash tartibi toʻgʻrisidagi nizomni tasdiqlash haqida (2998-son)

16.04.2018

Oʻzbekiston Respublikasi Ichki ishlar vazirligi Oʻzbekiston Respublikasi Moliya vazirligining

Qarori

[Oʻzbekiston Respublikasi Adliya vazirligi tomonidan 2018-yil 16-aprelda roʻyxatdan oʻtkazildi, roʻyxat raqami 2998]

Oʻzbekiston Respublikasi Prezidentining 2017-yil 29-noyabrdagi PQ-3413-son “Ichki ishlar organlari kadrlari bilan ishlash va ularning xizmatini tashkil etish tartibini tubdan takomillashtirish chora-tadbirlari toʻgʻrisida”gi qaroriga muvofiq Oʻzbekiston Respublikasi Ichki ishlar vazirligi hamda Moliya vazirligi qaror qiladi:

1. Ichki ishlar organlarida majburiy xizmatni oʻtash haqidagi shartnomalarni tuzish hamda shartnoma shartlari bajarilmaganda xarajatlarni qoplash tartibi toʻgʻrisidagi nizom ilovaga muvofiq tasdiqlansin.

2. Mazkur qaror rasmiy eʼlon qilingan kundan eʼtiboran kuchga kiradi.

Ichki ishlar vaziri P. BOBOJONOV

Toshkent sh.,

2018-yil 28-fevral,

18-son

Moliya vaziri D. KUCHKAROV

Toshkent sh.,

2018-yil 28-fevral,

55-son

Oʻzbekiston Respublikasi Ichki ishlar vazirligi va Moliya vazirligining 2018-yil 28-fevraldagi 18 va 55-son qaroriga ILOVA

Ichki ishlar organlarida majburiy xizmatni oʻtash haqidagi shartnomalarni tuzish hamda shartnoma shartlari bajarilmaganda xarajatlarni qoplash tartibi toʻgʻrisidagi

NIZOM

Mazkur Nizom Oʻzbekiston Respublikasi Prezidentining 2017-yil 29-noyabrdagi PQ-3413-son “Ichki ishlar organlari kadrlari bilan ishlash va ularning xizmatini tashkil etish tartibini tubdan takomillashtirish chora-tadbirlari toʻgʻrisida”gi qaroriga muvofiq Oʻzbekiston Respublikasi Ichki ishlar vazirligining (bundan buyon matnda Vazirlik deb yuritiladi) oliy harbiy taʼlim muassasalariga oʻqishga kirgan fuqarolar (bundan buyon matnda kursant deb yuritiladi) hamda Vazirlik tomonidan xorijiy davlatlar oliy taʼlim muassasalariga oʻqishga yuboriladigan fuqarolar (bundan buyon matnda tinglovchi deb yuritiladi) bilan belgilangan tartibda oʻqishni tamomlaganidan keyin besh kalendar yili mobaynida ichki ishlar organlarida, shuningdek taqsimot boʻyicha yuborilganda boshqa davlat idoralarida majburiy uzluksiz xizmat oʻtashlari haqida belgilangan tartibda shartnoma tuzish hamda shartnoma shartlari bajarilmaganda xarajatlarni qoplash tartibini belgilaydi.

1-bob. Umumiy qoidalar

1. Mazkur Nizom talablari Vazirlik oliy harbiy taʼlim muassasalarining kunduzgi taʼlim shaklini hamda xorijiy oliy taʼlim muassasalarini tamomlagan va majburiy uzluksiz xizmat oʻtash uchun ichki ishlar organlariga yoki taqsimot boʻyicha boshqa davlat idoralariga yuborilgan shaxslarga (bundan buyon matnda xodim deb yuritiladi) nisbatan tatbiq etiladi.

2. Vazirlik oliy harbiy taʼlim muassasalariga oʻqishga qabul qilingan va Vazirlik tomonidan xorijiy davlatlar oliy taʼlim muassasalariga oʻqishga yuborilgan fuqarolar hamda Vazirlik oʻrtasida oʻqishni tamomlagandan keyin besh kalendar yili mobaynida ichki ishlar organlarida, shuningdek taqsimot boʻyicha yuborilganda boshqa davlat idoralarida majburiy uzluksiz xizmat oʻtashlari haqida shartnoma tuziladi.

3. Shartnoma shartlari hamda uning bajarilmasligi sababli moddiy javobgarlik haqida nomzod (shuningdek uning ota-onasi) oʻqishga kirguniga qadar dastlabki tanlov davrida yozma ravishda ogohlantiriladi.

Bunda Vazirlikning tegishli bosh boshqarmalari, Qoraqalpogʻiston Respublikasi Ichki ishlar vazirligi, Toshkent shahar ichki ishlar bosh boshqarmasi, viloyatlar ichki ishlar boshqarmalarida tuziladigan ishchi guruhlar tomonidan nomzod (shuningdek uning ota-onasi) yozma ravishda ogohlantiriladi va ulardan mazkur Nizomning 1-ilovasiga muvofiq shaklda tilxat olinadi.

4. Kursant, tinglovchi yoki xodim tomonidan shartnoma shartlari bajarilmasa undan Oʻzbekiston Respublikasi Davlat budjetidan (bundan buyon matnda davlat budjeti deb yuritiladi) oʻqishiga sarflangan mablagʻlar qonunchilik hujjatlariga muvofiq undiriladi.

2-bob. Shartnoma tuzish

5. Shartnoma oliy harbiy taʼlim muassasalariga oʻqishga kirgan fuqarolar hamda Vazirlik tomonidan xorijiy davlatlar oliy taʼlim muassasalariga oʻqishga yuboriladigan fuqarolar bilan belgilangan tartibda oʻqishni tamomlaganidan keyin besh kalendar yili mobaynida ichki ishlar organlarida, shuningdek taqsimot boʻyicha yuborilganda boshqa davlat idoralarida majburiy uzluksiz xizmat oʻtashlari uchun tuziladi.

6. Kursant va Vazirlik nomidan Vazirlik oliy harbiy taʼlim muassasasi rahbari oʻrtasida mazkur Nizomning 2-ilovasiga muvofiq shaklda shartnoma tuziladi.

Tinglovchi va Vazirlik nomidan Oʻzbekiston Respublikasi Ichki ishlar vazirining oʻrinbosari — Kadrlar bosh boshqarmasi boshligʻi oʻrtasida mazkur Nizomning 3-ilovasiga muvofiq shaklda shartnoma tuziladi.

Kursantlar yoki tinglovchilar safidan chiqarilib oʻqishga qayta tiklangan kursant va tinglovchi bilan qayta shartnoma tuzilishi shart.

7. Shartnoma ikki nusxada davlat yoki rus tilida tuziladi.

Shartnomani tuzish tomonlarning imzolashlari orqali amalga oshiriladi.

8. Kursant yoki tinglovchi shartnoma tuzishni rad qilganda, mazkur holat boʻyicha masʼul xodim tomonidan dalolatnoma rasmiylashtiriladi.

Dalolatnomada kursant yoki tinglovchining shartnoma tuzishni rad etish sabablari, kursant yoki tinglovchini oʻqishga kirganligini tasdiqlovchi hujjatning raqami va sanasi koʻrsatiladi.

9. Tuzilgan shartnomaning bir nusxasi kursant yoki tinglovchiga beriladi ikkinchi nusxasi kursant yoki tinglovchining shaxsiy hujjatlar yigʻmajildiga biriktiriladi.

3-bob. Oʻqitishga sarflangan mablagʻlarni qoplash

10. Xizmatni majburiy oʻtashi lozim boʻlgan muddatdan oldin boʻshatilgan xodim uning Vazirlik oliy harbiy taʼlim muassasasida yoki xorijiy davlatlar oliy taʼlim muassasasida taʼlim olishi uchun davlat budjetidan sarflangan mablagʻlar u xizmatdan boʻshatilgan kundan boshlab 30 kun ichida davlat budjetiga qaytarilishi kerakligi haqida ogohlantiriladi.

11. Xodim tomonidan qaytarilishi lozim boʻlgan pul mablagʻlari yuridik shaxslar tomonidan toʻlab berilishi mumkin. Bunda pul mablagʻlarini davlat budjeti mablagʻlari hisobidan toʻlab berishga yoʻl qoʻyilmaydi.

12. Xodim qaytarilishi lozim boʻlgan pul mablagʻlarini toʻlagandan keyin tasdiqlovchi hujjatning nusxasini oʻzining soʻnggi ish joyiga taqdim qilishi lozim.

13. Xodim tomonidan qaytarilishi lozim boʻlgan pul mablagʻlari muddatida qaytarilmagan taqdirda u belgilangan tartibda sud orqali undiriladi.

14. Pul mablagʻlarini toʻlagan xodim xizmatga tiklangan taqdirda undan undirilgan pul mablagʻlari toʻliq qaytariladi.

15. Xodim Vazirlik oliy harbiy taʼlim muassasasini yoki xorijiy davlatlar oliy taʼlim muassasasini tamomlagandan keyin shartnomani muddatidan ilgari bekor qilganda, undan undiriladigan pul mablagʻlari besh kalendar yili mobaynida oʻtalgan va oʻtalmay qolgan xizmat davrining nisbatidan kelib chiqib hisoblanadi.

Bunda xodimni Vazirlik oliy harbiy taʼlim muassasasida yoki xorijiy davlatlar oliy taʼlim muassasasida oʻqitishga sarflangan xarajatlar xodim uchun yoʻnaltirilgan davlat budjeti mablagʻlari miqdoridan kelib chiqib, xodim xizmatni ichki ishlar organlari tizimida oʻtagan boʻlsa Vazirlikning tegishli tarkibiy tuzilmasi yoki xodim xizmatni taqsimot boʻyicha yuborilgan davlat idoralarida oʻtagan taqdirda Vazirlik tomonidan hisoblanadi.

16. Xodimning Vazirlik oliy harbiy taʼlim muassasasida yoki xorijiy davlatlar oliy taʼlim muassasasida oʻqishi uchun sarflangan mablagʻlarni hisoblashda quyidagilar eʼtiborga olinadi:

professor-oʻqituvchilar tarkibining ish haqi;

kursantga toʻlangan stipendiya;

dori vositalari taʼminoti;

kiyim-kechak taʼminoti;

oziq-ovqat taʼminoti;

kursantlarning ish oʻrganish amaliyotini (stajirovkani) tashkil etish bilan bogʻliq xizmat safari xarajatlari;

yoʻl xarajatlari (tinglovchilar uchun).

17. Davlat budjetidan 1 ta kursant yoki tinglovchi uchun 1 yilda sarflanadigan mablagʻning belgilangan qiymati har yili 1-aprelga qadar Vazirlik oliy harbiy taʼlim muassasasi yoki Vazirlikning oʻtgan moliya yili koʻrsatkichlaridan kelib chiqib hisoblanadi hamda tegishli rahbar tomonidan tasdiqlanadi, shuningdek belgilangan tartibda saqlanadi.

18. Davlat budjetidan 1 ta kursant uchun 1 yilda sarflanadigan mablagʻ quyidagi formulaga asosan aniqlanadi:

SMY = (POʻIH + S + DV + KK + OO + XSX) / SHS,

SMY — 1 yilda davlat budjetining 1 ta kursant uchun sarflanadigan mablagʻlar yigʻindisi;

POʻIH — professor-oʻqituvchilar tarkibi ish haqi;

S — stipendiya;

DV — dori vositalari;

KK — kiyim kechak;

OO — oziq-ovqat;

XSX — xizmat safari xarajatlari;

SHS — kursantlarning umumiy soni.

19. Davlat budjetidan 1 ta tinglovchi uchun 1 yilda sarflanadigan mablagʻ quyidagi formulaga asosan aniqlanadi:

SMY = KK + YX,

SMY — 1 yilda davlat budjetining 1 ta tinglovchi uchun sarflanadigan mablagʻlar yigʻindisi;

KK — kiyim-kechak;

YX — yoʻl xarajatlari.

20. Xodim Vazirlik oliy harbiy taʼlim muassasasida yoki xorijiy davlatlar oliy taʼlim muassasasida oʻqishining butun davri uchun sarflangan davlat budjeti mablagʻlarining miqdori har yili kursant yoki tinglovchi uchun sarflangan davlat budjeti mablagʻlarining yigʻindisini qoʻshgan holda aniqlanadi.

21. Vazirlik oliy harbiy taʼlim muassasasida yoki xorijiy davlatlar oliy taʼlim muassasasida taʼlim olganlik uchun xodimlar tomonidan qoplanishi kerak boʻlgan davlat budjeti mablagʻlarining miqdori quyidagi formulaga asosan aniqlanadi:

MM = (5 — TXY — TXO / 12 — XOʻK / 365) × (SBMM / 5),

MM — mablagʻlar miqdori;

TXY — xodim Vazirlik oliy harbiy taʼlim muassasasini yoki xorijiy davlatlar oliy taʼlim muassasasini tamomlaganidan keyin ichki ishlar organlarida yoki taqsimot boʻyicha yuborilgan davlat idorasida toʻliq xizmat oʻtagan yillar;

TXO — xodim ichki ishlar organlaridan yoki taqsimot boʻyicha yuborilgan davlat idorasidan xizmatdan boʻshatilgan yiliga kelib toʻliq xizmat oʻtagan oylar;

XOʻK — xodim xizmatdan boʻshatilish yilida ichki ishlar organlarida yoki taqsimot boʻyicha yuborilgan davlat idorasida xizmat oʻtagan kunlar;

SBMM — oʻqishning butun davri uchun sarflangan davlat budjeti mablagʻlarining miqdori.

4-bob. Yakuniy qoidalar

22. Ushbu Nizomda qayd etilgan masalalar yuzasidan kelib chiqadigan nizolar qonunchilik hujjatlariga muvofiq hal etiladi.

23. Ushbu Nizom talablari buzilishida aybdor boʻlgan shaxslar qonunchilik hujjatlarida belgilangan tartibda javob beradilar.

Ichki ishlar organlarida majburiy xizmatni oʻtash haqidagi shartnomalarni tuzish hamda shartnoma shartlari bajarilmaganda xarajatlarni qoplash tartibi toʻgʻrisidagi nizomga 1-ILOVA

Ichki ishlar organlarida majburiy xizmatni oʻtash haqidagi shartnomalarni tuzish hamda shartnoma shartlari bajarilmaganda xarajatlarni qoplash tartibi toʻgʻrisidagi nizomga 2-ILOVA

(2-ilova Oʻzbekiston Respublikasi adliya vazirining 2021-yil 28-iyuldagi 16-mh-sonli buyrugʻi (roʻyxat raqami 3313, 28.07.2021-y.) tahririda — Qonunchilik maʼlumotlari milliy bazasi, 28.07.2021-y., 10/21/3313/0724-son)

Ichki ishlar organlarida majburiy xizmatni oʻtash haqidagi shartnomalarni tuzish hamda shartnoma shartlari bajarilmaganda xarajatlarni qoplash tartibi toʻgʻrisidagi nizomga 3-ILOVA

(3-ilova Oʻzbekiston Respublikasi adliya vazirining 2021-yil 28-iyuldagi 16-mh-sonli buyrugʻi (roʻyxat raqami 3313, 28.07.2021-y.) tahririda — Qonunchilik maʼlumotlari milliy bazasi, 28.07.2021-y., 10/21/3313/0724-son)