Davlat xizmatlari koʻrsatish tizimini jadal rivojlantirish boʻyicha qoʻshimcha chora-tadbirlar toʻgʻrisida (PQ-3662-son)

11.04.2018

Oʻzbekiston Respublikasi Prezidentining

Qarori

Mamlakatimizda davlat xizmatlarini koʻrsatishning milliy tizimini tubdan isloh qilish boʻyicha keng miqyosda boshlangan ishlar doirasida Oʻzbekiston Respublikasi Adliya vazirligi huzurida Davlat xizmatlari agentligi tashkil etildi (keyingi oʻrinlarda — Agentlik).

Hozirgi vaqtda nafaqat tadbirkorlarga, balki aholiga ham eng zarur va talab yuqori boʻlgan davlat xizmatlarini “yagona darcha” tamoyili boʻyicha koʻrsatish maqsadida respublikaning har bir tuman va shaharlarini qamrab olgan Xalq qabulxonalari huzuridagi davlat xizmatlari markazlarining yagona tarmogʻi yaratildi.

Shu bilan birgalikda, amalga oshirilgan chora-tadbirlar va erishilgan yutuqlarga qaramasdan davlat xizmatlari koʻrsatish sohasida foydalanilmagan imkoniyatlar va hal etilmagan muammolar saqlanib qolmoqda. Xususan:

birinchidan, bir qator tashkilotlarda bazaviy axborot tizimlarini joriy etish masalalari va ularning idoralararo integratsiya qilinishi past darajada ekanligi davlat xizmatlarini qulay va oʻz vaqtida koʻrsatishni taʼminlamayapti. Koʻrsatib oʻtilgan kamchiliklar, ayniqsa, Mudofaa vazirligi, Uy-joy kommunal xizmat koʻrsatish vazirligi, Oliy va oʻrta-maxsus taʼlim vazirligi, Qurilish vazirligi, “Oʻztransgaz” AJ va barcha darajadagi mahalliy davlat hokimiyati organlariga taalluqlidir;

ikkinchidan, davlat organlari tomonidan jismoniy va yuridik shaxslar toʻgʻrisidagi maʼlumotlar, koʻchmas mulk obyektlari va boshqa hujjatlar reyestrlari alohida qogʻoz koʻrinishida yuritilishi, elektron arxivlarning mavjud emasligi elektron davlat xizmatlarini koʻrsatishda qiyinchiliklarga olib kelmoqda. Bu kabi salbiy amaliyot, ayniqsa, Yer resurslari, geodeziya, kartografiya va davlat kadastri davlat qoʻmitasi (keyingi oʻrinlarda — Davergeodezkadastr) va “Oʻzarxiv” agentligiga tegishlidir;

uchinchidan, koʻpchilik davlat xizmatlari markazlari hanuzgacha yuqori tezlikdagi Internet tarmogʻiga ulanmaganligi idoralararo elektron hamkorlikning zarur darajada yoʻlga qoʻyilmasligiga sabab boʻlmoqda. Ushbu jiddiy muammolarni bartaraf etish uchun Agentlik, Axborot texnologiyalari va kommunikatsiyalarini rivojlantirish vazirligi va “Oʻzbektelekom” AJ rahbarlari taʼsirchan choralar koʻrmayapti;

toʻrtinchidan, davlat xizmatini koʻrsatuvchi vakolatli organlar va davlat xizmatlari markazlari lozim darajada zamonaviy kompyuter texnikasi va texnik vositalar bilan jihozlanmaganligi davlat xizmatlarini koʻrsatishning ilgʻor va innovatsion metodlarini joriy qilishga toʻsiq boʻlmoqda;

beshinchidan, davlat xizmatlari markazlari zarur bino va xonalar bilan taʼminlamaganligi talab yuqori boʻlgan koʻplab xizmatlarni koʻrsatish uchun tashrif buyuruvchilarni toʻliq va bir vaqtda qamrab olishga imkon bermaydi;

oltinchidan, ruxsat berish va litsenziyalash jarayonlaridan oʻtish hamon murakkab va ortiqcha tartibga solinganligicha qolmoqda, davlat xizmatlarini olish jarayonida ortiqcha talablar va toʻsiqlarning mavjudligi shaffoflikning yoʻqolishiga, huquqni turlicha qoʻllash amaliyotiga va oqibatda suiisteʼmolchiliklar tez-tez sodir etilishiga va boshqa qoidabuzarliklarga olib kelmoqda;

yettinchidan, axborot texnologiyalaridan foydalanish boʻyicha jismoniy va yuridik shaxslarning bilim darajasi va malakasi pastligicha qolmoqda, ularga hujjatlarni elektron shaklda taqdim etish va olishni oʻrgatish boʻyicha tashkillashtirilgan tizim mavjud emas.

Aholiga davlat xizmatlarini koʻrsatish milliy tizimining sifat jihatdan yangi bosqichga jadallik bilan oʻtishini taʼminlash maqsadida, shuningdek, 2017 — 2021-yillarda Oʻzbekiston Respublikasini rivojlantirishning beshta ustuvor yoʻnalishi boʻyicha Harakatlar strategiyasi va Maʼmuriy islohotlar konsepsiyasini izchil amalga oshirish maqsadida:

1. Agentlik, Davergeodezkadastr, “Oʻzarxiv” agentligi, shuningdek, davlat xizmatlarini koʻrsatish sohasidagi boshqa vazirlik va idoralarning ishi qoniqarsiz, deb topilsin.

2. Quyidagilar koʻrsatib oʻtilgan vazirlik va idoralar, davlat xizmatlarini koʻrsatadigan boshqa vakolatli organlarning birinchi darajali vazifalari etib hisoblansin:

davlat xizmatlarini koʻrsatish jarayonlarini yanada unifikatsiyalash va avtomatlashtirish maqsadida axborot tizimlari va axborot resurslarini yaratishga yagona texnologik yondashuvni taʼminlashni hisobga olgan holda axborot-kommunikatsiya texnologiyalarini jadallik bilan rivojlantirish va joriy etish;

vazirliklar va idoralarning arxiv fondini raqamli koʻrinishga oʻtkazish va tegishli axborot resurslariga kirishga imkoniyat berishga doir chora-tadbirlarni amalga oshirishni yanada jadallashtirish;

yagona davlat reyestriga kiritilgan barcha davlat xizmatlari boʻyicha biznes jarayonlarning reinjiniringini amalga oshirish orqali davlat xizmatlarini koʻrsatish jarayonidagi tartibotlarni va ularni koʻrsatish muddatlarini tubdan qisqartirish, blank va shakllarni sezilarli darajada optimallashtirish;

davlat xizmatlarini koʻrsatish jarayoniga jalb etilgan xodimlarning oʻz lavozim majburiyatlarini soʻzsiz, oʻz vaqtida va sifatli bajarishini taʼminlash, ularning masʼuliyatini kuchaytirish, hozirgi zamon talablariga muvofiq ishlash koʻnikmalarini va madaniyatini oshirish, ular ishini obyektiv baholash mexanizmlarini joriy etish;

yuklatilgan vazifa va funksiyalardan kelib chiqqan holda muammolarni hal qilishda davlat organlari va tashkilotlarning davlat xizmatlarini koʻrsatishda ishtiroklari boʻyicha harakatlarni birlashtirish yuzasidan masʼuliyatlarini oshirish;

budjetdan tashqari jamgʻarmalar mablagʻlaridan ustuvor ravishda axborot tizimlari, dasturiy mahsulotlar, maʼlumotlar bazalarini belgilangan talablarga muvofiq ishlab chiqish va takomillashtirish, elektron davlat xizmatlarini joriy etish uchun foydalanish.

Oʻzbekiston Respublikasi Bosh prokuraturasi va Adliya vazirligi zamonaviy davlat xizmatlarini joriy etish masalalariga tegishli ravishda yondashmayotgan davlat organlarining mansabdor shaxslariga nisbatan qonun hujjatlarida belgilangan javobgarlik choralarini koʻrsin.

3. Kelgusida davlat xizmatlarini joriy etishni yanada jadallashtirishni taʼminlash va ularni koʻrsatishdagi zaif tomonlarni aniqlash uchun quyidagicha tartib oʻrnatilsin:

2018-yilning 1-iyunidan ilovadagi roʻyxat boʻyicha davlat xizmatlari markazlari tomonidan tajriba tariqasida 70 — 100 turdagi talab yuqori boʻlgan davlat xizmatlari koʻrsatiladi;

tajriba tariqasida joriy etiladigan davlat xizmatlari boʻyicha Oʻzbekiston Respublikasi Prezidentining fuqarolar huquqlarini himoya qilish, murojaatlar bilan ishlashni nazorat qilish va muvofiqlashtirish masalalari boʻyicha maslahatchisi tomonidan tasdiqlanadigan vaqtinchalik maʼmuriy reglamentlar qabul qilinadi;

tajriba tariqasida joriy etiladigan davlat xizmatlari roʻyxati aholining dolzarb ehtiyojlari asosida shakllantiriladi va Oʻzbekiston Respublikasi Adliya vazirligining taklifiga asosan Oʻzbekiston Respublikasi Prezidentining fuqarolar huquqlarini himoya qilish, murojaatlar bilan ishlashni nazorat qilish va muvofiqlashtirish masalalari boʻyicha maslahatchisi boʻlinmalari tomonidan tasdiqlanadi;

tajriba tariqasida joriy etiladigan davlat xizmatlari roʻyxatiga kiritilgan davlat xizmatlari faqat davlat xizmatlari markazlari orqali taqdim etiladi;

davlat xizmatlarini koʻrsatish tajriba tariqasida joriy etilgan kundan boshlab vakolatli organ tomonidan davlat xizmatlarini koʻrsatish haqidagi arizalarni bevosita arizachilardan qabul qilish taqiqlanadi.

Oʻzbekiston Respublikasi Adliya vazirligi tegishli manfaatdor idoralar bilan birgalikda 2019-yilning 1-iyuniga qadar davlat xizmatlarini tajriba tariqasida koʻrsatish natijalariga koʻra, mazkur davlat xizmatlarini koʻrsatishni respublikaning barcha hududlarida joriy etish va davlat xizmatlari markazlarining faoliyatini takomillashtirish boʻyicha takliflar kiritsin.

Ushbu bandda nazarda tutilgan chora-tadbirlarni moliyalashtirish manbalari etib Davlat xizmatlarini rivojlantirish jamgʻarmasi, Budjetdan tashqari adliya organlari va muassasalarini rivojlantirish jamgʻarmasi mablagʻlari, shuningdek, qonun hujjatlarida taqiqlanmagan boshqa manbalar belgilansin.

4. Oʻzbekiston Respublikasi Vazirlar Mahkamasi ikki hafta muddatda davlat xizmatlari markazlarini tuman (shahar)ning transport kesishuvlari fuqarolar uchun qulay boʻlgan markaziy qismida joylashgan binolarga, birinchi navbatda, kasb-hunar kollejlari va akademik litseylar binolarini operativ boshqaruv huquqi asosida berish orqali, koʻchirib oʻtkazishni nazarda tutuvchi hukumat qarorini qabul qilsin.

Qoraqalpogʻiston Respublikasining Vazirlar Kengashiga, viloyatlar va Toshkent shahar hokimliklariga davlat xizmatlari markazlarining yangi binolarini faqat budjetdan tashqari manbalardan, ayniqsa, davlat-xususiy sherikchilik asosida barpo etish huquqi berilsin.

5. Oʻzbekiston Respublikasi Adliya vazirligi Axborot texnologiyalari va kommunikatsiyalarini rivojlantirish vazirligi va boshqa manfaatdor idoralar bilan birgalikda davlat xizmatlarini koʻrsatish amaliyotini tanqidiy va chuqur oʻrganish, aholi orasida soʻrovlar oʻtkazish orqali sifatiga nisbatan norozilik kelib chiqayotgan davlat xizmatlarini aniqlagan va ularni takomillashtirish boʻyicha zarur choralarni koʻrgan holda har chorakda talab yuqori boʻlgan davlat xizmatlarini baholab borsin.

6. Belgilab qoʻyilsinki:

2019-yil 1-yanvardan boshlab elektron davlat xizmatlarini koʻrsatish doirasida idoralararo elektron hamkorlik amalga oshirilayotganda jismoniy shaxsning shaxsiy identifikatsiya raqami, soliq toʻlovchining identifikatsiya raqami hamda koʻchmas mulk obyektlarining kadastr raqamidan foydalanish majburiy hisoblanadi;

2018-yil 1-iyulgacha Oʻzbekiston Respublikasi Davlat soliq qoʻmitasi huzuridagi “Yangi texnologiyalar” ilmiy-axborot markazi” DUKning elektron raqamli imzo kalitlari sertifikatlari ushbu qarorning ilovasida koʻrsatilgan davlat xizmatlari markazlari tomonidan fuqarolarga bepul beriladi;

Davlat axborot tizimlarini yaratish va qoʻllab-quvvatlash boʻyicha yagona integrator, uning pudratchi (subpudratchi) tashkilotlari axborot tizimlarini, resurslari, maʼlumot bazalari, dasturiy taʼminot mahsulotlarini ishlab chiqish, shuningdek, Adliya vazirligi, uning hududiy boshqarmalari va davlat xizmatlari markazlarini zarur apparat-dasturiy komplekslari bilan jihozlash ishlarini texnik va loyiha hujjatlarini Oʻzbekiston Respublikasi Iqtisodiyot va sanoat vazirligi huzuridagi “Loyiha va import shartnomalarini kompleks ekspertizadan oʻtkazish markazi” DUKda tezlashtirilgan tartibda kelishgandan soʻng amalga oshiradi.

7. Oʻzbekiston Respublikasi Vazirlar Mahkamasi huzuridagi Davlat personallashtirish markazi Oʻzbekiston Respublikasi Ichki ishlar vazirligi va boshqa manfaatdor idoralar bilan birgalikda keyinchalik “Elektron hukumat” tizimi bilan integratsiya qilish maqsadida uch oy muddatda oʻzlarining axborot tizimlaridagi fuqarolar shaxsiy maʼlumotlari toʻgʻrisidagi axborotlarni yangilashni taʼminlasin.

9. Davergeodezkadastr:

tegishli aholi punktlari, koʻchalar, tor koʻchalar va boshqalarga unikal kodlar bergan holda koʻchmas mulk obyektlari manzillari yagona reyestrini shakllantirishni va yuritishni taʼminlasin;

manfaatdor vazirliklar va idoralar bilan birgalikda bir oy muddatda koʻchmas mulk obyektlarining manzillari reyestrini shakllantirish va yuritish tartibini ishlab chiqsin va tasdiqlasin.

10. Oʻzbekiston Respublikasi Moliya vazirligi, Markaziy banki Adliya vazirligi va Axborot texnologiyalari va kommunikatsiyalarini rivojlantirish vazirligi bilan birgalikda 2019-yil 1-yanvargacha boʻlgan muddatda elektron davlat xizmatlarini koʻrsatganlik uchun boj, yigʻim va boshqa toʻlovlarni onlayn tarzda amalga oshirish mexanizmini joriy etishni taʼminlasin.

11. Oʻzbekiston Respublikasi Axborot texnologiyalari va kommunikatsiyalarini rivojlantirish vazirligi:

2019-yil 1-yanvargacha boʻlgan muddatda barcha davlat xizmatlari markazlari optik tolali aloqa liniyalariga ulanishini taʼminlasin;

2018-yil 1-sentabrgacha boʻlgan muddatda telefon orqali kelib tushadigan murojaatlarni saqlash imkoniyatini yaratgan holda qoʻngʻiroqlarni qayta ishlash tizimini yaratsin va amalga kiritsin;

Agentlik bilan birgalikda 2018-yil 1-dekabrga qadar talab yuqori boʻlgan elektron davlat xizmatlarini koʻrsatish uchun ixtisoslashgan mobil ilovaning ishlab chiqilishi va joriy etilishini taʼminlasin;

Agentlik bilan birgalikda 2019-yil 1-yanvargacha boʻlgan muddatda axborot tizimlarini, resurslari, maʼlumot bazalari, dasturiy taʼminot mahsulotlarini ishlab chiqish, shuningdek, Agentlik, uning hududiy boshqarmalari va davlat xizmatlari markazlarini zarur apparat-dasturiy komplekslari bilan jihozlashni taʼminlasin;

davlat organlari va boshqa tashkilotlar bilan birga ularning axborot va telekommunikatsiya tizimlari, maʼlumotlar bazalari, server va boshqa jihozlarini xatlovdan oʻtkazib, “Elektron hukumat” tizimi va Agentlikning axborot tizimlariga integratsiya qilsin, shuningdek, idoralararo elektron hamkorlikni joriy etsin.

Mazkur bandda koʻrsatilgan chora-tadbirlarni moliyalashtirish manbasi etib Axborot-kommunikatsiya texnologiyalarini rivojlantirish fondi mablagʻlari va davlat organlarining budjetdan tashqari mablagʻlari belgilansin.

12. Davlat xizmatlari koʻrsatuvchi davlat organlari va boshqa tashkilotlar quyidagilarni taʼminlasin:

davlat xizmatlarini koʻrsatish uchun zarur boʻlgan, qogʻoz shaklda saqlanayotgan maʼlumotlarni, elektron maʼlumotlar bazalarini shakllantirish va idoralararo elektron hamkorlikni yoʻlga qoʻyishni nazarda tutgan holda, bosqichma-bosqich raqamli koʻrinishga keltirish;

ortiqcha tartibotlarni yoʻqotish va byurokratik unsurlarni kamaytirishni nazarda tutgan holda koʻrsatilayotgan davlat xizmatlarini maqbullashtirish, natijalarga koʻra Oʻzbekiston Respublikasi Axborot texnologiyalari va kommunikatsiyalarini rivojlantirish vazirligi va Adliya vazirligi bilan kelishgan holda ularni elektron shaklga oʻtkazish boʻyicha chora-tadbirlar rejalari ishlab chiqish;

oʻzlarining idoraviy axborot tizimlari va resurslarini “Elektron hukumat” va Agentlik axborot tizimlari bilan integratsiya qilish.

Oʻzbekiston Respublikasi Vazirlar Mahkamasi bir oy muddatda chora-tadbirlarning qisqa muddatlarda ijro etilishini nazarda tutgan holda mazkur band ijrosini taʼminlash boʻyicha qaror qabul qilsin.

13. Vazirliklar, idoralar, mahalliy davlat hokimiyati organlari rahbarlariga moddiy-texnik vositalarni oʻz vaqtida xarid qilish, “Elektron hukumat” va Adliya vazirligi tizimlariga integratsiya qilish imkoniyatini hisobga olgan holda axborot tizimlari, resurslari va maʼlumotlar bazalarini yaratish va takomillashtirish, davlat xizmatlari markazlari va Yagona interaktiv davlat xizmatlari portalida davlat xizmatlarini oʻz vaqtida va sifatli yoʻlga qoʻyish uchun shaxsiy javobgarlik yuklatilsin.

Adliya vazirligi Oʻzbekiston Respublikasi Bosh prokuraturasi bilan birgalikda har chorak yakuniga koʻra Oʻzbekiston Respublikasi Prezidenti Administratsiyasiga davlat xizmatlarini yoʻlga qoʻyish va ularni elektron shaklga oʻtkazishda masʼuliyatsizlikka yoʻl qoʻyayotgan aniq shaxslarni koʻrsatgan holda mazkur qarorning amalga oshirilishi boʻyicha maʼlumot kiritib borsin.

14. Oʻzbekiston Respublikasi Investitsiyalar boʻyicha davlat qoʻmitasi manfaatdor vazirlik va idoralar bilan birgalikda 2018-yilning 1-iyuniga qadar Agentlikning asoslantirilgan soʻrovlari boʻyicha xalqaro moliya institutlarining grantlarini jalb qilgan holda davlat xizmatlari markazlarini zarur asbob-uskuna va jihozlar bilan taʼminlash loyihalarini moliyalashtirish boʻyicha aniq takliflar kiritsin.

Agentlik 2018-yilning 1-mayiga qadar Oʻzbekiston Respublikasi Investitsiyalar boʻyicha davlat qoʻmitasiga davlat xizmatlari markazlarini zarur asbob-uskuna va jihozlar bilan taʼminlash loyihalarini moliyalashtirish boʻyicha asoslantirilgan takliflar kiritsin.

181. Multimedia markazining zamonaviy telestudiyasini tashkil etish uchun belgilangan tartibda shakllantiriladigan roʻyxatlar boʻyicha olib kiriladigan televizion uskunalar jamlanmasi, uchuvchisiz uchish apparatlari, kompyuter texnikasi, dasturiy taʼminot va boshqa texnika vositalari bojxona toʻlovlaridan (bojxona rasmiylashtiruvi uchun yigʻimlardan tashqari) ozod etilsin.

20. Davlat xizmatlari markazlari va boshqa tashkilotlar mutaxassislarini jalb etgan holda 2018/2019 oʻquv yilidan boshlab barcha oʻrta va kasb-hunar taʼlim muassasalarining oxirgi kursida (sinfida) yoshlarning zarur bilim va koʻnikmalarini shakllantirishga qaratilgan “Davlat xizmatlaridan foydalanish madaniyati” mavzusida oʻquv seminarlari va ochiq darslarni oʻtkazish amaliyoti joriy etilsin.

Xalq taʼlimi vazirligi, Oliy va oʻrta maxsus taʼlim vazirligining Kasb-hunar taʼlimi markazi Agentlik va Axborot texnologiyalari va kommunikatsiyalarini rivojlantirish vazirligi bilan birgalikda bir oy muddatda oʻquv seminarlari va ochiq darslarni tashkil etish dasturini ishlab chiqsin va tasdiqlasin.

21. Oʻzbekiston Respublikasi Adliya vazirligi:

Yuristlar malakasini oshirish markazida ikki oy muddatda yuzaga keladigan nizoli masalalarni hal qilish, katta ish hajmiga ruhiy tayyorgarlik, muomala hamda davlat xizmatini koʻrsatish madaniyatini oshirishga qaratilgan oʻquv kurslarini tashkil etish hamda doimiy ravishda davlat xizmatlari markazlari rahbar va boshqa xodimlari oʻqishini taʼminlasin;

davlat xizmatlari markazlari xodimlarining Yuristlar malakasini oshirish markazida oʻz vaqtida va toʻliq oʻqishi ustidan doimiy nazorat oʻrnatsin.

22. Agentlik bir oy muddatda davlat xizmatlari markazlari xodimlari tomonidan fuqarolarga Oʻzbekiston Respublikasi Yagona interaktiv davlat xizmatlari portali orqali xizmatlardan foydalanishning qulayligi va ustunligini, jumladan, aholiga mazkur tartibni chuqur oʻrgatish orqali ularning Internet tarmogʻidan murojaat qilishini ragʻbatlantirish amaliyotini joriy etsin.

23. Oʻzbekiston Respublikasi Adliya vazirligining davlat xizmatlari markazlari orqali davlat xizmatlarini samarali joriy etganligi uchun davlat organlarining masʼul rahbarlari va xodimlarini har chorak yakuni boʻyicha Davlat xizmatlarini rivojlantirish jamgʻarmasi hisobidan mehnatga haq toʻlashning eng kam miqdori 3,52 baravarida ragʻbatlantirish mexanizmini joriy etish haqidagi taklifi maʼqullansin.

24. Oʻzbekiston Respublikasi Adliya vazirligi manfaatdor vazirlik va idoralar bilan birgalikda ikki oy muddatda qonun hujjatlariga ushbu qarordan kelib chiqadigan oʻzgartirish va qoʻshimchalar toʻgʻrisida Oʻzbekiston Respublikasi Vazirlar Mahkamasiga takliflar kiritsin.

25. Mazkur qarorning bajarilishini nazorat qilish Oʻzbekiston Respublikasining Bosh vaziri A.N. Aripov, Oʻzbekiston Respublikasi Prezidentining Davlat maslahatchisi T.A. Xudaybergenov, Oʻzbekiston Respublikasi Prezidenti Davlat maslahatchisining birinchi oʻrinbosari B.M. Mavlonov va Oʻzbekiston Respublikasining Bosh prokurori O.B. Murodov zimmasiga yuklansin.

Oʻzbekiston Respublikasi Prezidenti Sh. MIRZIYOYEV

Toshkent sh.,

2018-yil 11-aprel,

PQ-3662-son

Oʻzbekiston Respublikasi Prezidentining 2018-yil 11-apreldagi PQ-3662-sonli qaroriga ILOVA

2018-yilning 1-iyunidan tajriba tariqasida 70 — 100 turdagi talab yuqori boʻlgan davlat xizmatlari koʻrsatiladigan davlat xizmatlari markazlari

ROʻYXATI

T/r Davlat xizmatlari markazlari nomi Qoraqalpogʻiston Respublikasi 1. Nukus shahri davlat xizmatlari markazi Andijon viloyati 2. Andijon shahar davlat xizmatlari markazi Buxoro viloyati 3. Kogon shahar davlat xizmatlari markazi Jizzax viloyati 4. Doʻstlik tumani davlat xizmatlari markazi Navoiy viloyati 5. Zarafshon shahar davlat xizmatlari markazi Namangan viloyati 6. Namangan shahar davlat xizmatlari markazi Samarqand viloyati 7. Pastdargʻom tumani davlat xizmatlari markazi Sirdaryo viloyati 8. Sirdaryo tumani davlat xizmatlari markazi Surxondaryo viloyati 9. Termiz shahar davlat xizmatlari markazi Qashqadaryo viloyati 10. Shaxrisabz tumani davlat xizmatlari markazi Toshkent viloyati 11. Chirchiq tumani davlat xizmatlari markazi Fargʻona viloyati 12. Qoʻqon shahar davlat xizmatlari markazi Xorazm viloyati 13. Xonqa tumani davlat xizmatlari markazi Toshkent shahri 14. Yunusobod tumani davlat xizmatlari markazi

Izoh: mazkur Roʻyxatga davlat xizmatlari markazlari bino va xonalarining tayyorligidan kelib chiqib, Oʻzbekiston Respublikasi Prezidentining fuqarolar huquqlarini himoya qilish, murojaatlar bilan ishlashni nazorat qilish va muvofiqlashtirish masalalari boʻyicha maslahatchisi tomonidan oʻzgartirish kiritilishi mumkin.