“Oʻzbektelekom” aksiyadorlik kompaniyasining moddiy-texnika bazasini yanada mustahkamlash chora-tadbirlari toʻgʻrisida (266-son)

05.04.2018

Oʻzbekiston Respublikasi Vazirlar Mahkamasining

qarori

“Oʻzbektelekom” aksiyadorlik kompaniyasining moddiy-texnika bazasini yanada mustahkamlash va davlat mulkidan samarali foydalanish maqsadida Vazirlar Mahkamasi qaror qiladi:

1. Oʻzbekiston Respublikasi Axborot texnologiyalari va kommunikatsiyalarini rivojlantirish vazirligi, Xususiylashtirilgan korxonalarga koʻmaklashish va raqobatni rivojlantirish davlat qoʻmitasi, Toshkent viloyati hokimligi hamda “Oʻzbektelekom” aksiyadorlik kompaniyasining “Telmax Elektroniks” MChJga tegishli boʻlgan Toshkent viloyatining Parkent tumanidagi Nevich mahalla fuqarolar yigʻini hududida joylashgan “Nevich sinov-tajriba bazasi”ning bino va inshootlarini tegishli hududi bilan birgalikda (keyingi oʻrinlarda obyekt deb ataladi) “Oʻzbektelekom” aksiyadorlik kompaniyasining ustav kapitaliga davlat ulushini oshirish hisobiga berish toʻgʻrisidagi takliflari maʼqullansin.

2. Oʻzbekiston Respublikasi Axborot texnologiyalari va kommunikatsiyalarini rivojlantirish vazirligi bir oy muddatda “Oʻzbektelekom” aksiyadorlik kompaniyasi ustav kapitalidagi davlat ulushi obyektning baholash tashkiloti tomonidan baholangan qiymatiga oshirilishini hamda topshirish qabul-qilish ishlari amalga oshirilishini va unga boʻlgan huquqning davlat roʻyxatidan oʻtkazilishini taʼminlasin.

3. Oʻzbekiston Respublikasi Vazirlar Mahkamasining “Toshkent viloyati Parkent tumanini 2017-2018-yillarda kompleks rivojlantirish chora-tadbirlari toʻgʻrisida” 2017-yil 5-iyundagi 357-son qaroriga 9-ilovadagi 1-pozitsiya chiqarib tashlansin.

4. Oʻzbekiston Respublikasi Axborot texnologiyalari va kommunikatsiyalarini rivojlantirish vazirligi kelgusida obyektdan hamda uning hududidan maqsadli va samarali foydalanilishini taʼminlasin.

5. Mazkur qarorning bajarilishini nazorat qilish Oʻzbekiston Respublikasi axborot texnologiyalari va kommunikatsiyalarini rivojlantirish vaziri A.I. Axmedxadjayev, Toshkent viloyati hokimi Gʻ.I. Ibragimov zimmasiga va Vazirlar Mahkamasining Axborot tizimlari va telekommunikatsiyalarni rivojlantirish masalalari axborot-tahlil departamentiga yuklansin.

Oʻzbekiston Respublikasining Bosh vaziri A. ARIPOV

Toshkent sh.,

2018-yil 5-aprel,

266-son