Iqtisodiyotni kreditlash mexanizmini yanada takomillashtirish chora-tadbirlari toʻgʻrisida (349-son)

22.08.2001

Oʻzbekiston Respublikasi Vazirlar Mahkamasining

qarori

Iqtisodiyotning real sektorini mablagʻ bilan taʼminlashga kredit resurslarini jalb etish mexanizmini takomillashtirish, iqtisodiy jihatdan yuqori samarali ishlab chiqarishlar barpo etishni ragʻbatlantirish, respublikada pul bozorini yanada rivojlantirishga doir chora-tadbirlar koʻrish maqsadida Vazirlar Mahkamasi qaror qiladi:

1. Oʻzbekiston Respublikasi Markaziy banki va tijorat banklarining:

pul massasini bozor prinsiplariga muvofiq resurslarni kredit auksionlari orqali xarid qilish va sotish yoʻli bilan boshqarish, shuningdek yuqori likvidli qimmatli qogʻozlarni xarid qilish (PEPO operatsiyalari) yoʻli bilan kredit berish mexanizmini takomillashtirish;

iqtisodiyotning real sektori loyihalariga tijorat banklari tomonidan, shu jumladan resurslarni kredit auksionlarida xarid qilish hisobidan kredit berishni qoʻshimcha ravishda kengaytirish toʻgʻrisidagi taklifi qabul qilinsin.

2. Tijorat banklariga kredit auksionlarida xarid qilinadigan resurslarni iqtisodiyotning real sektori korxonalariga qayta moliyalashtirishda marjani 2 foizdan ortiq boʻlmagan miqdorda qoʻllash tavsiya etilsin.

3. Belgilab qoʻyilsinki:

tijorat banklari investitsiya loyihalarini mablagʻ bilan taʼminlash uchun kreditlarni belgilangan tartibda ishlab chiqilgan va tasdiqlangan texnik-iqtisodiy asoslash va tavakkalchiliklarning maqbulligini baholagan holda qaytarish, muddatlilik va oʻzini oʻzi qoplash shartlarida beradi;

qarz oluvchi korxonalar rahbarlari investitsiya loyihalarining texnik-iqtisodiy asoslanganligi, axborotning oʻz vaqtida taqdim etilishi va ishonchliligi, loyihalarning texnik-iqtisodiy asoslash parametrlariga va biznes-rejalarga muvofiq amalga oshirilishi uchun qonun hujjatlariga muvofiq javob beradi.

4. Tijorat banklari Kengashlari va Boshqaruvlariga:

bank kredit siyosatining asosiy yoʻnalishlarini ishlab chiqish va tasdiqlashda real sektorni kreditlash koʻlamlari va shakllarini yanada kengaytirishni, kichik korxonalarga, xususiy tadbirkorlarga, dehqon va fermer xoʻjaliklariga mikrokreditlar berishni nazarda tutish;

iqtisodiyotning real sektorini kreditlash boʻyicha buyurtmanomalarni tanlab olishda asosan mahalliy xomashyodan eksportga moʻljallangan mahsulotlar ishlab chiqarishga yoʻnaltirilgan loyihalar tanlab olinishini taʼminlash;

xoʻjalik yurituvchi subyektlarga investitsiya loyihalarini ishlab chiqishda va ularni mablagʻ bilan taʼminlashda marketing, injiniring va konsalting xizmatlarini koʻrsatish orqali ular bilan hamkorlik munosabatlarini takomillashtirish;

ayrim loyihalarni mablagʻ bilan taʼminlashda tavakkalchiliklar bilan bogʻliq salbiy oqibatlarning oldini olish maqsadida ular amalga oshirilishining doimiy monitoringini tashkil etish tavsiya etilsin.

5. Oʻzbekiston Respublikasi Davlat mulki qoʻmitasi, Makroiqtisodiyot va statistika vazirligi, Moliya vazirligi Oʻzbekiston banklar uyushmasi bilan birgalikda ikki oy muddatda bozor infratuzilmasi korxonalari, shu jumladan keyinchalik tijorat banklari tomonidan mablagʻ bilan taʼminlanishi uchun loyihalar tayyorlanishini taʼminlovchi loyiha-injiniring va baholash kompaniyalari faoliyatini yanada kengaytirish chora-tadbirlarini koʻrsinlar.

6. Oʻzbekiston Respublikasi Adliya vazirligi Oʻzbekiston Respublikasi Markaziy banki, Makroiqtisodiyot va statistika vazirligi bilan birgalikda bir oy muddatda:

amaldagi qonun hujjatlariga olinayotgan kreditlar boʻyicha garov sifatida taqdim etilayotgan mulkni sotishning soddalashtirilgan tartibini nazarda tutuvchi oʻzgartirish va qoʻshimchalar kiritish yuzasidan Vazirlar Mahkamasiga taklif kiritsin;

idoraviy normativ hujjatlarni mazkur qarorga muvofiqlashtirsin.

7. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari R.S. Azimov va Oʻzbekiston Respublikasi Markaziy banki raisi F.M. Mullajonov zimmasiga yuklansin.

Vazirlar Mahkamasining Raisi I. KARIMOV

Toshkent sh.,

2001-yil 22-avgust,

349-son