Mikrokredit tashkilotlarida buxgalteriya hisobi hisobvaraqlari rejasiga oʻzgartirish va qoʻshimchalar kiritish haqida (1639-3-son)

05.04.2018

Oʻzbekiston Respublikasi Markaziy banki Boshqaruvining

Qarori

[Oʻzbekiston Respublikasi Adliya vazirligi tomonidan 2018-yil 5-aprelda roʻyxatdan oʻtkazildi, roʻyxat raqami 1639-3]

Oʻzbekiston Respublikasining “Oʻzbekiston Respublikasining Markaziy banki toʻgʻrisida”gi va “Soliq va budjet siyosatining 2018-yilga moʻljallangan asosiy yoʻnalishlari qabul qilinganligi munosabati bilan Oʻzbekiston Respublikasining ayrim qonun hujjatlariga oʻzgartish va qoʻshimchalar kiritish toʻgʻrisida”gi qonunlariga muvofiq Oʻzbekiston Respublikasi Markaziy banki Boshqaruvi qaror qiladi:

1. Oʻzbekiston Respublikasi Markaziy banki Boshqaruvining 2006-yil 7-oktabrdagi 24/5-son qarori (roʻyxat raqami 1639, 2006-yil 11-noyabr) (Oʻzbekiston Respublikasi qonun hujjatlari toʻplami, 2006-y., 46-47-son, 463-modda) bilan tasdiqlangan Mikrokredit tashkilotlarida buxgalteriya hisobi hisobvaraqlari rejasiga ilovaga muvofiq oʻzgartirish va qoʻshimchalar kiritilsin.

2. Mazkur qaror rasmiy eʼlon qilingan kundan eʼtiboran kuchga kiradi.

Markaziy bank raisi M. NURMURATOV

Toshkent sh.,

2018-yil 24-fevral,

7/7-son

Oʻzbekiston Respublikasi Markaziy banki Boshqaruvining 2018-yil 24-fevraldagi 7/7-son qaroriga ILOVA

Mikrokredit tashkilotlarida buxgalteriya hisobi hisobvaraqlari rejasiga kiritilayotgan oʻzgartirish va qoʻshimchalar

1. II boʻlimda:

a) “10507 — Banklarga qoʻyilgan muddatli depozitlar” balans hisobvaragʻidan soʻng quyidagi mazmundagi 10509 balans hisobvaragʻi bilan toʻldirilsin:

“10509 — Yoʻldagi naqdsiz mablagʻlar”;

b) “16323 — Mikrolizing (moliyaviy ijara) boʻyicha olish uchun hisoblangan foizlar” balans hisobvaragʻidan soʻng quyidagi mazmundagi 16377 balans hisobvaragʻi bilan toʻldirilsin:

“16377 — Muddati oʻtgan hisoblangan foizlar”;

v) “16397 — Boshqa olinishi lozim boʻlgan hisoblangan foizlar (vositachilik haqi)” balans hisobvaragʻidagi “(vositachilik haqi)” degan soʻzlar chiqarib tashlansin;

g) “16397 — Boshqa olinishi lozim boʻlgan hisoblangan foizlar (vositachilik haqi)” balans hisobvaragʻidan soʻng quyidagi mazmundagi 16400, 16401, 16405, 16409, 16413, 16499 balans hisobvaraqlari bilan toʻldirilsin:

“16400 — Hisoblangan foizsiz daromadlar

16401 — Koʻrsatilgan xizmatlar uchun hisoblangan toʻlovlar

16405 — Hisoblangan jarima va penyalar

16409 — Operatsion ijara boʻyicha hisoblangan daromad

16413 — Hisoblangan boshqa foizsiz daromadlar

16499 — Hisoblangan foizsiz daromadlar boʻyicha koʻrilishi mumkin boʻlgan zararlarni qoplash zaxirasi (kontr-aktiv)”;

d) “16563 — Ombordagi asosiy vositalarning yigʻilgan eskirish summasi(kontr-aktiv)” balans hisobvaragʻidan soʻng quyidagi mazmundagi 16575, 16579 balans hisobvaraqlari bilan toʻldirilsin:

“16575 — Olingan kreditlar boʻyicha garovga qoʻyilgan asosiy vositalar

16579 — Olingan kreditlar boʻyicha garovga qoʻyilgan asosiy vositalarning yigʻilgan eskirish summasi (kontr-aktiv)”;

e) “19905 — Olingan kreditlar boʻyicha garovga qoʻyilgan mulklar va mulkiy huquqlar” balans hisobvaragʻi chiqarib tashlansin;

j) “20000 — Majburiyatlar” balans hisobvaragʻidan soʻng quyidagi mazmundagi 21400, 21402, 21404 balans hisobvaraqlari bilan toʻldirilsin:

“21400 — Jalb qilingan qarz mablagʻlar

21402 — Taʼsischilarning qarz mablagʻlari

21404 — Boshqa shaxslardan jalb qilingan qarz mablagʻlar”;

z) “22400 — Toʻlanishi lozim boʻlgan hisoblangan foizlar” balans hisobvaragʻidan soʻng quyidagi mazmundagi 22402, 22404 balans hisobvaraqlari bilan toʻldirilsin:

“22402 — Taʼsischilarning qarz mablagʻlari boʻyicha hisoblangan foizlar

22404 — Boshqa shaxslardan jalb qilingan qarz mablagʻlar boʻyicha hisoblangan foizlar”;

i) “22510 — Nafaqa (pensiya) fondi bilan boʻladigan hisob-kitoblar” balans hisobvaragʻining nomi quyidagi tahrirda bayon qilinsin:

“22510 — Hisoblangan yagona ijtimoiy toʻlov”;

k) “22512 — Bandlik fondi va boshqa fondlar bilan boʻladigan hisob-kitoblar” balans hisobvaragʻining nomi quyidagi tahrirda bayon qilinsin:

“22512 — Jamgʻarmalar bilan boʻladigan hisob-kitoblar”;

l) “50000 — Xarajatlar” balans hisobvaragʻidan soʻng quyidagi mazmundagi 50600, 50601, 50603 balans hisobvaraqlari bilan toʻldirilsin:

“50600 — Jalb qilingan mablagʻlar boʻyicha foizli xarajatlar

50601 — Taʼsischilarning qarz mablagʻlari boʻyicha foizli xarajatlar

50603 — Boshqa shaxslardan jalb qilingan qarz mablagʻlar boʻyicha foizli xarajatlar”;

m) “56122 — Bandlik fondi va boshqa fondlar uchun badallar” balans hisobvaragʻining nomi quyidagi tahrirda bayon qilinsin:

“56122 — Jamgʻarmalarga badallar”;

n) “56418 — Kitob, gazeta va boshqa davriy nashriyotlar boʻyicha xarajatlar” balans hisobvaragʻidan soʻng quyidagi mazmundagi 56500, 56502, 56506, 56510 balans hisobvaraqlari bilan toʻldirilsin:

“56500 — Reprezentatsiya va xayriya

56502 — Reprezentatsiya va koʻngilochar tadbirlar xarajatlari

56506 — Aʼzolik badallari

56510 — Xayr-ehson va xayriya xarajatlari”;

o) “56630 — Ombordagi asosiy vositalarning eskirish summasi” balans hisobvaragʻidan soʻng quyidagi mazmundagi 56632 balans hisobvaragʻi bilan toʻldirilsin:

“56632 — Olingan kreditlar boʻyicha garovga qoʻyilgan asosiy vositalarning eskirish summasi”;

p) “56830 — Asosiy vositalari boʻyicha koʻrilishi mumkin boʻlgan zararlarni baholash” balans hisobvaragʻi chiqarib tashlansin.

2. III boʻlimda:

a) “10507 — Banklarga qoʻyilgan muddatli depozitlar” balans hisobvaragʻidan soʻng quyidagi mazmundagi 10509 balans hisobvaragʻi bilan toʻldirilsin:

“10509 — Yoʻldagi naqdsiz mablagʻlar

Hisobvaraqning taʼrifi: ushbu hisobvaraqda mikrokredit tashkilotining bankdagi depozit hisobvaragʻiga kirim qilinadigan, lekin kelib tushmagan naqdsiz pul mablagʻlari summasi aks ettiriladi.

Hisobvaraqning debetida mikrokredit tashkilotining bankdagi depozit hisobvaragʻiga kirim qilinadigan, lekin kelib tushmagan naqdsiz pul mablagʻlari aks ettiriladi.

Hisobvaraqning kreditida bankdan olingan depozit hisobvaragʻi koʻchirmasi asosida naqdsiz pul mablagʻlar summasini hisobdan chiqarilishi aks ettiriladi.

Tahliliy hisob har bir mijoz boʻyicha alohida shaxsiy hisobvaraqlarda olib boriladi.”;

b) “16323 — Mikrolizing (moliyaviy ijara) boʻyicha olish uchun hisoblangan foizlar” balans hisobvaragʻi taʼrifidan soʻng quyidagi mazmundagi 16377 balans hisobvaragʻining nomi va taʼrifi bilan toʻldirilsin:

“16377 — Muddati oʻtgan hisoblangan foizlar

Hisobvaraqning taʼrifi: kredit shartnomasi boʻyicha olish uchun hisoblangan, biroq muddatida toʻlanmagan foizlar hisobi olib boriladi.

Hisobvaraqning debetida shartnoma boʻyicha olish uchun hisoblangan, biroq muddatida toʻlanmagan foizlar summasi aks ettiriladi.

Hisobvaraqning kreditida toʻlangan (qoplangan) va/yoki hisobdan chiqarilgan foizlar summasi aks ettiriladi.

Tahliliy hisob har bir qarzdor boʻyicha alohida shaxsiy hisobvaraqlarda olib boriladi.”;

v) “16397 — Boshqa olinishi lozim boʻlgan hisoblangan foizlar (vositachilik haqi)” balans hisobvaragʻining nomi va taʼrifidagi “(vositachilik haqi)” degan soʻzlar chiqarib tashlansin;

g) “16397 — Boshqa olinishi lozim boʻlgan hisoblangan foizlar (vositachilik haqi)” balans hisobvaragʻi taʼrifidan soʻng quyidagi mazmundagi 16400, 16401, 16405, 16409, 16413, 16499 balans hisobvaraqlarining nomi va taʼrifi bilan toʻldirilsin:

“16400 — Hisoblangan foizsiz daromadlar

16401 — Koʻrsatilgan xizmatlar uchun hisoblangan toʻlovlar

Hisobvaraqning taʼrifi: hisoblangan, lekin hali olinmagan koʻrsatilgan xizmat haqlari summalarining hisobi olib boriladi.

Hisobvaraqning debetida hisoblangan koʻrsatilgan xizmat haqlari summasi aks ettiriladi

Hisobvaraqning kreditida toʻlangan (qoplangan) va/yoki hisobdan chiqarilgan, shuningdek, notoʻgʻri hisoblangan koʻrsatilgan xizmat haqlarining qaytarilish summasi aks ettiriladi.

Tahliliy hisob xizmat haqi turlari boʻyicha alohida shaxsiy hisobvaraqlarda olib boriladi.

16405 — Hisoblangan jarima va penyalar

Hisobvaraqning taʼrifi: kreditlar, koʻrsatilgan xizmatlar uchun hisoblangan, lekin hali olinmagan jarima va penyalar summalarining hisobi olib boriladi.

Hisobvaraqning debetida olish uchun hisoblangan jarima va penyalar summasi aks ettiriladi

Hisobvaraqning kreditida undirilgan va/yoki hisobdan chiqarilgan, shuningdek, notoʻgʻri hisoblangan jarima va penyalar qaytarilish summasi aks ettiriladi.

Tahliliy hisob mijozlar boʻyicha alohida shaxsiy hisobvaraqlarda olib boriladi.

16409 — Operatsion ijara boʻyicha hisoblangan daromad

Hisobvaraqning taʼrifi: operatsion ijara boʻyicha hisoblangan, lekin hali olinmagan daromad hisobi olib boriladi.

Hisobvaraqning debetida operatsion ijara boʻyicha olinishi lozim boʻlgan daromad summasi aks ettiriladi

Hisobvaraqning kreditida olishi lozim boʻlgan toʻlovlar va/yoki hisobdan chiqarilgan summasi aks ettiriladi.

Tahliliy hisob har bir shartnoma boʻyicha alohida shaxsiy hisobvaraqlarda olib boriladi.

16413 — Hisoblangan boshqa foizsiz daromadlar

Hisobvaraqning taʼrifi: hisoblangan, lekin hali olinmagan boshqa foizsiz daromadlar hisobi olib boriladi.

Hisobvaraqning debetida hisoblangan boshqa foizsiz daromadlar summasi aks ettiriladi

Hisobvaraqning kreditida toʻlangan (qoplangan) va/yoki hisobdan chiqarilgan, shuningdek, notoʻgʻri hisoblangan boshqa foizsiz daromadlarning qaytarilish summasi aks ettiriladi.

Tahliliy hisob har bir shartnoma boʻyicha alohida shaxsiy hisobvaraqlarda olib boriladi.

16499 — Hisoblangan foizsiz daromadlar boʻyicha koʻrilishi mumkin boʻlgan zararlarni qoplash zaxirasi (kontr-aktiv)

Hisobvaraqning taʼrifi: olinishi lozim boʻlgan hisoblangan foizsiz daromadlarning undirib olinmasligi natijasida vujudga kelishi mumkin boʻlgan zararlar boʻyicha yaratilgan zaxira hisobi olib boriladi.

Hisobvaraqning kreditida tashkil etilgan zaxiraning baholash summasi va/yoki uning oʻsish summasi aks ettiriladi.

Hisobvaraqning debetida zaxiraning kamayish summasi va/yoki bekor qilingan summasi aks ettiriladi.

Tahliliy hisob aktivlarning turi boʻyicha tashkil etilgan zaxiralar boʻyicha alohida shaxsiy hisobvaraqlarda olib boriladi.”;

d) “16563 — Ombordagi asosiy vositalarning yigʻilgan eskirish summasi (kontr-aktiv)” balans hisobvaragʻi taʼrifidan soʻng quyidagi mazmundagi 16575, 16579 balans hisobvaraqlarining nomi va taʼrifi bilan toʻldirilsin:

“16575 — Olingan kreditlar boʻyicha garovga qoʻyilgan asosiy vositalar

Hisobvaraqning taʼrifi: olingan kreditlar boʻyicha mikrokredit tashkiloti tomonidan garovga qoʻyilgan asosiy vositalarning hisobi yuritiladi.

Hisobvaraqning debetida mikrokredit tashkiloti tomonidan olingan kreditlarning taʼminoti sifatida qoʻyilgan asosiy vositalarning hamda qayta baholash natijasida kiritilgan tuzatishlar summasi aks ettiriladi.

Hisobvaraqning kreditida qaytarilmagan kreditni qoplash uchun foydalanilgan, shuningdek kreditni qoplashdagi va kredit shartnomasi muddati tugagandagi asosiy vositalar hamda qayta baholash natijasida kiritilgan tuzatishlar summasi aks ettiriladi.

Tahliliy hisob har bir garovga qoʻyilgan asosiy vositalar boʻyicha alohida shaxsiy hisobvaraqlarda olib boriladi.

16579 — Olingan kreditlar boʻyicha garovga qoʻyilgan asosiy vositalarning yigʻilgan eskirish summasi (kontr-aktiv)

Hisobvaraqning maqsadi: olingan kreditlar boʻyicha mikrokredit tashkiloti tomonidan garovga qoʻyilgan asosiy vositalarning yigʻilgan eskirish summasi hisobi yuritiladi.

Hisobvaraqning kreditida olingan kreditlar boʻyicha garovga qoʻyilgan asosiy vositalarning eskirishini baholash summasi, qadrsizlanish natijasida koʻrilgan zararlar, shuningdek qayta baholash natijasida kiritilgan tuzatishlar summasi aks ettiriladi.

Hisobvaraqning debetida kreditor tomonidan qaytarilmagan kreditni qoplash uchun foydalanilganda, shuningdek kreditni qoplashdagi va kredit shartnomasi muddati tugagandagi garovga qoʻyilgan asosiy vositalarning yigʻilgan eskirish summasining hisobdan chiqarilishi hamda qayta baholash natijasida kiritilgan tuzatishlar summasi aks ettiriladi.

Tahliliy hisob garovga qoʻyilgan asosiy vositalar turi boʻyicha alohida shaxsiy hisobvaraqlarda olib boriladi.”;

e) “19905 — Olingan kreditlar boʻyicha garovga qoʻyilgan mulklar va mulkiy huquqlar” balans hisobvaragʻining nomi va taʼrifi chiqarib tashlansin;

j) “20000 — Majburiyatlar” balans hisobvaragʻidan soʻng quyidagi mazmundagi 21400, 21402, 21404 balans hisobvaraqlarining nomi va taʼrifi bilan toʻldirilsin:

“21400 — Jalb qilingan qarz mablagʻlar

21402 — Taʼsischilarning qarz mablagʻlari

Hisobvaraqning taʼrifi: mikrokredit tashkiloti taʼsischilaridan olingan qarz mablagʻlarning hisobi olib boriladi.

Hisobvaraqning kreditida mikrokredit tashkiloti taʼsischilaridan olingan qarzlar summasi aks ettiriladi.

Hisobvaraqning debetida toʻlangan/hisobdan chiqarilgan qarzlar summasi hisobi yuritiladi.

Tahliliy hisob har bir kreditor boʻyicha shartnomalar qirqimida alohida shaxsiy hisobvaraqlarda olib boriladi.

21404 — Boshqa shaxslardan jalb qilingan qarz mablagʻlari

Hisobvaraqning taʼrifi: boshqa shaxslardan jalb qilingan qarz mablagʻlarining hisobi olib boriladi.

Hisobvaraqning kreditida boshqa shaxslardan jalb qilingan qarz mablagʻlarining summasi aks ettiriladi.

Hisobvaraqning debetida toʻlangan/hisobdan chiqarilgan qarz mablagʻlarining summasi hisobi yuritiladi.

Tahliliy hisob har bir kreditor boʻyicha shartnomalar qirqimida alohida shaxsiy hisobvaraqlarda olib boriladi.”;

z) “22006 — Banklardan olingan uzoq muddatli kreditlar” balans hisobvaragʻining taʼrifidagi “1 yil muddatgacha” degan soʻzlar “1 yildan ortiq muddatga” degan soʻzlar bilan almashtirilsin;

i) “22400 — Toʻlanishi lozim boʻlgan hisoblangan foizlar” balans hisobvaragʻi taʼrifidan soʻng quyidagi mazmundagi 22402, 22404 balans hisobvaraqlarining nomi va taʼrifi bilan toʻldirilsin:

“22402 — Taʼsischilarning qarz mablagʻlari boʻyicha hisoblangan foizlar

22404 — Boshqa shaxslardan jalb qilingan qarz mablagʻlar boʻyicha hisoblangan foizlar

Yuqorida koʻrsatilgan balans hisobvaraqlari oʻz xususiyatlari boʻyicha bir xil boʻlganligi uchun ularning taʼrifi umumlashtirilib berilmoqda.

Hisobvaraqning taʼrifi: mikrokredit tashkiloti taʼsischilaridan hamda boshqa shaxslardan jalb qilingan qarz mablagʻlari boʻyicha hisoblangan, lekin toʻlanmagan foizlar hisobi olib boriladi.

Hisobvaraqning kreditida toʻlanishi lozim boʻlgan hisoblangan foizlar summasi aks ettiriladi.

Hisobvaraqning debetida toʻlangan foizlar summasi, shuningdek notoʻgʻri hisoblangan foizlarning qaytarilgan summasi hisobdan chiqariladi.

Tahliliy hisob har bir kreditor boʻyicha qarz shartnomalari qirqimida alohida shaxsiy hisobvaraqlarda olib boriladi.”;

k) “22502 — Hisoblangan foyda soliqlari” balans hisobvaragʻining taʼrifidagi “foyda, ijtimoiy infratuzilmani rivojlantirish va qonunchilikka muvofiq ravishda” degan soʻzlari “foyda soligʻi va” degan soʻzlar bilan almashtirilsin;

l) “22510 — Nafaqa (pensiya) fondi bilan boʻladigan hisob-kitoblar” balans hisobvaragʻining nomi va taʼrifi quyidagi tahrirda bayon qilinsin:

“22510 — Hisoblangan yagona ijtimoiy toʻlov

Hisobvaraqning taʼrifi: qonunchilikka muvofiq mikrokredit tashkiloti tomonidan yagona ijtimoiy toʻlov boʻyicha mablagʻlar hisobi yuritiladi.

Hisobvaraqning kreditida mikrokredit tashkiloti tomonidan yagona ijtimoiy toʻlovga oʻtkaziladigan mablagʻlar summasi aks ettiriladi.

Hisobvaraqning debetida yagona ijtimoiy toʻlovga oʻtkazilgan mablagʻlar summasi aks ettiriladi.

Tahliliy hisob alohida shaxsiy hisobvaraqlarda olib boriladi.”;

m) “22512 — Bandlik fondi va boshqa fondlar bilan boʻladigan hisob-kitoblar” balans hisobvaragʻining nomi va taʼrifi quyidagi tahrirda bayon qilinsin:

“22512 — Jamgʻarmalar bilan boʻladigan hisob-kitoblar

Hisobvaraqning taʼrifi: mikrokredit tashkiloti tomonidan qonun hujjatlariga muvofiq jamgʻarmalarga oʻtkaziladigan toʻlovlar hisobi olib boriladi.

Hisobvaraqning kreditida jamgʻarmalarga oʻtkaziladigan toʻlovlar summasi aks ettiriladi.

Hisobvaraqning debetida jamgʻarmalarga oʻtkazilgan toʻlovlar summasi aks ettiriladi.

Tahliliy hisob har bir jamgʻarma va toʻlovlar turi boʻyicha alohida shaxsiy hisobvaraqlarda olib boriladi.”;

n) “31203 — Taqsimlanmagan foyda (aktiv-passiv)” balans hisobvaragʻining taʼrifi quyidagi tahrirda bayon etilsin:

“Hisobvaraqning taʼrifi: mikrokredit tashkilotining oʻtgan moliyaviy yillardagi faoliyati davomida olgan taqsimlanmagan foydasi (zarari)ning hisobi olib boriladi.

Hisobvaraqning kreditida 31206 — “Sof foyda (zarar) (aktiv-passiv)” hisobvaragʻidan oʻtkazilgan sof foyda hamda zaxira kapitalidan taqsimlanmagan foydaga oʻtkazilgan summalar aks ettiriladi.

Hisobvaraqning debetida taqsimlanmagan foyda hisobidan har xil fondlar uchun ajratmalar, 31206 — “Sof foyda (zarar) (aktiv-passiv)” hisobvaragʻidan oʻtkazilgan zarar summasi, shuningdek taʼsischilar qaroriga muvofiq mikrokredit tashkilotining ustav fondiga qilingan qayta investitsiya (reinvestitsiya)lash hamda eʼlon qilingan dividendlar summalari aks ettiriladi.

Tahliliy hisob bitta shaxsiy hisobvaraqda yuritiladi.”;

o) “31206 — Sof foyda (zarar) (aktiv-passiv)” balans hisobvaragʻining taʼrifi quyidagi tahrirda bayon etilsin:

“Hisobvaraqning taʼrifi: hisobot yili davomida mikrokredit tashkiloti moliyaviy faoliyati natijasida olingan sof foyda (zarar)lar hamda ushbu davr davomida eʼlon qilingan dividendlar summasi hisobi olib boriladi.

Hisobvaraqning kreditida hisobot yili davomida mikrokredit tashkiloti tomonidan olingan foyda, 31203 — “Taqsimlanmagan foyda (aktiv-passiv)” hisobvaragʻiga oʻtkazilgan zarar summasi, shuningdek notoʻgʻri eʼlon qilingan dividendlarning qaytarilishi aks ettiriladi.

Hisobvaraqning debetida hisobot yili davomida mikrokredit tashkiloti tomonidan koʻrilgan zarar, 31203 — “Taqsimlanmagan foyda (aktiv-passiv)” hisobvaragʻiga oʻtkazilgan foyda summasi, eʼlon qilingan dividendlar, shuningdek zaxira kapitaliga oʻtkazilgan summa aks ettiriladi.

Tahliliy hisob sof foyda hisobi boʻyicha alohida shaxsiy hisobvaraqlarda yuritiladi.”;

p) “50000 — Xarajatlar” balans hisobvaragʻi taʼrifidan soʻng quyidagi mazmundagi 50600, 50601, 50603 balans hisobvaraqlarining nomi va taʼrifi bilan toʻldirilsin:

“50600 — Jalb qilingan mablagʻlar boʻyicha

50601 — Taʼsischilarning qarz mablagʻlari boʻyicha foizli xarajatlar

50603 — Boshqa shaxslardan jalb qilingan qarz mablagʻlar boʻyicha foizli xarajatlar

Yuqorida koʻrsatilgan balans hisobvaraqlari oʻz xususiyatlari boʻyicha bir xil boʻlganligi uchun ularning taʼrifi umumlashtirilib berilmoqda.

Hisobvaraqning taʼrifi: jalb qilingan qarz mablagʻlari boʻyicha mikrokredit tashkilotining foizli xarajatlari hisobi olib boriladi.

Hisobvaraqlarning debetida jalb qilingan qarz mablagʻlari boʻyicha toʻlanishi lozim boʻlgan hisoblangan foizli xarajatlar summasi aks ettiriladi.

Hisobvaraqlarning kreditida notoʻgʻri hisoblangan yoki toʻlangan foizlarning qaytarilish summasi, shuningdek hisobot yilining oxirida mikrokredit tashkilotining moliyaviy natijasi sifatida 31206 — “Sof foyda (zarar) (aktiv-passiv)” hisobvaragʻiga oʻtkaziladigan summa aks ettiriladi.”;

r) “55910” balans hisobvaragʻi raqami “55906” balans hisobvaragʻi raqami bilan almashtirilsin;

s) “56114 — Ijtimoiy sugʻurta boʻyicha badallar” balans hisobvaragʻining taʼrifidagi “mikrokredit tashkilotining ish haqi fondidan budjetdan tashqari Pensiya fondiga ajratmalari,” degan soʻzlar chiqarib tashlansin;

t) “56122 — Bandlik fondi va boshqa fondlar uchun badallar” balans hisobvaragʻining nomi va taʼrifi quyidagi tahrirda bayon qilinsin:

“56122 — Jamgʻarmalarga badallar

Hisobvaraqning taʼrifi: qonun hujjatlariga muvofiq jamgʻarmalarga ajratmalar, shuningdek xodimlarning sogʻliqlarini majburiy va ixtiyoriy sugʻurtalash va boshqa badallar hisobi olib boriladi.

Hisobvaraqning debetida jamgʻarmalarga ajratmalar summasi aks ettiriladi.

Hisobvaraqning kreditida notoʻgʻri toʻlangan xarajatlarning qaytarilish summasi, shuningdek moliyaviy hisobot yilining oxirida mikrokredit tashkilotining moliyaviy natijasi sifatida 31206 — “Sof foyda (zarar) (aktiv-passiv)” hisobvaragʻiga oʻtkaziladigan summa aks ettiriladi.”;

u) “56418 — Kitob, gazeta va boshqa davriy nashriyotlar boʻyicha xarajatlar” balans hisobvaragʻi taʼrifidan soʻng quyidagi mazmundagi 56500, 56502, 56506, 56510 balans hisobvaraqlarining nomi va taʼrifi bilan toʻldirilsin:

“56500 — Reprezentatsiya va xayriya

56502 — Reprezentatsiya va koʻngilochar tadbirlar xarajatlari

Hisobvaraqning taʼrifi: mikrokredit tashkiloti tomonidan oʻz mavqeyi va faoliyatini rivojlantirish maqsadida amalga oshirilgan reprezentatsiya va koʻngil ochar tadbirlar uchun qilingan xarajatlar summasi hisobga olinadi.

Hisobvaraqning debetida mikrokredit tashkiloti tomonidan oʻz mavqeyi va faoliyatini rivojlantirish maqsadida amalga oshirilgan reprezentatsiya va koʻngil ochar tadbirlar uchun qilingan xarajatlar summasi aks ettiriladi.

Hisobvaraqning kreditida mikrokredit tashkiloti tomonidan oʻz mavqeyi va faoliyatini rivojlantirish maqsadida amalga oshirilgan reprezentatsiya va koʻngil ochar tadbirlar uchun qilingan xarajatlar boʻyicha notoʻgʻri hisoblangan, shuningdek moliyaviy hisobot yilining oxirida mikrokredit tashkilotining moliyaviy natijasi sifatida 31206 — “Sof foyda (zarar) (aktiv-passiv)” hisobvaragʻiga oʻtkaziladigan summa aks ettiriladi.

56506 — Aʼzolik badallari

Hisobvaraqning taʼrifi: mikrokredit tashkiloti tomonidan klublar, uyushmalar, jamoat va boshqa tashkilotlarga aʼzo boʻlib kirganda toʻlanadigan aʼzolik badallari summasi hisobga olinadi.

Hisobvaraqning debetida klublar, uyushmalar, jamoat va boshqa tashkilotlarga aʼzo boʻlib kirganda toʻlangan aʼzolik badallari summasi aks ettiriladi.

Hisobvaraqning kreditida klublar, uyushmalar, jamoat va boshqa tashkilotlarga aʼzo boʻlib kirganda toʻlangan aʼzolik badallari boʻyicha notoʻgʻri hisoblangan, shuningdek moliyaviy hisobot yilining oxirida mikrokredit tashkilotining moliyaviy natijasi sifatida 31206 — “Sof foyda (zarar) (aktiv-passiv)” hisobvaragʻiga oʻtkaziladigan summa aks ettiriladi.

56510 — Xayr-ehson va xayriya xarajatlari

Hisobvaraqning taʼrifi: mikrokredit tashkilotining xayriya jamgʻarmalariga, boshqa notijorat faoliyat bilan shugʻullanmaydigan xayriya tashkilotlariga, shuningdek tabiiy ofatdan talafot koʻrganlarga koʻrsatgan xayr-ehson summalari hisobga olinadi.

Hisobvaraqning debetida mikrokredit tashkilotining xayriya jamgʻarmalariga, boshqa notijorat faoliyat bilan shugʻullanmaydigan xayriya tashkilotlariga, shuningdek tabiiy ofatdan talafot koʻrganlarga koʻrsatgan xayr-ehson summalari aks ettiriladi.

Hisobvaraqning kreditida mikrokredit tashkilotining xayriya jamgʻarmalariga, boshqa notijorat faoliyat bilan shugʻullanmaydigan xayriya tashkilotlariga, shuningdek tabiiy ofatdan talafot koʻrganlarga koʻrsatgan xayr-ehsonlar boʻyicha notoʻgʻri hisoblangan, shuningdek moliyaviy hisobot yilining oxirida mikrokredit tashkilotining moliyaviy natijasi sifatida 31206 — “Sof foyda (zarar) (aktiv-passiv)” hisobvaragʻiga oʻtkaziladigan summa aks ettiriladi.”;

f) “56630 — Ombordagi asosiy vositalarning eskirish summasi” balans hisobvaragʻi taʼrifidan soʻng quyidagi mazmundagi 56632 balans hisobvaragʻining nomi bilan toʻldirilsin:

“56632 — Olingan kreditlar boʻyicha garovga qoʻyilgan asosiy vositalarning eskirish summasi”;

x) “56830 — Asosiy vositalari boʻyicha koʻrilishi mumkin boʻlgan zararlarni baholash” balans hisobvaragʻi chiqarib tashlansin;

ts) “56902 — Foyda soligʻini baholash” balans hisobvaragʻining taʼrifidagi “, obodonlashtirish va ijtimoiy infratuzilmani rivojlantirish soligʻi” degan soʻzlar chiqarib tashlansin.