Bolalarni davlat maktabgacha taʼlim tashkilotlariga qabul qilish boʻyicha davlat xizmatlari koʻrsatishning maʼmuriy reglamentini tasdiqlash toʻgʻrisida (244-son)

28.03.2018

Oʻzbekiston Respublikasi Vazirlar Mahkamasining

qarori

Oʻzbekiston Respublikasi Prezidentining “Aholiga davlat xizmatlari koʻrsatishning milliy tizimini tubdan isloh qilish chora-tadbirlari toʻgʻrisida” 2017-yil 12-dekabrdagi PF-5278-son Farmoniga muvofiq hamda bolalarni davlat maktabgacha taʼlim tashkilotlariga qabul qilish boʻyicha davlat xizmatlari koʻrsatish tizimini yanada takomillashtirish maqsadida Vazirlar Mahkamasi qaror qiladi:

1. Bolalarni davlat maktabgacha taʼlim tashkilotlariga qabul qilish boʻyicha davlat xizmatlari koʻrsatishning maʼmuriy reglamenti 1-ilovaga muvofiq tasdiqlansin va 2018-yil 1-apreldan boshlab amalga kiritilsin.

2. Belgilansinki:

2018-yil 1-apreldan boshlab, davlat xizmatlaridan foydalanish uchun jismoniy shaxslar faqat davlat xizmatlari markazlari yoki Oʻzbekiston Respublikasi Yagona interaktiv davlat xizmatlari portali (keyingi oʻrinlarda — YIDXP) orqali murojaat qiladilar;

davlat maktabgacha taʼlim tashkilotlaridagi boʻsh joylarning elektron hisobini yuritish, bolalarni tashkilotlarga qabul qilish uchun elektron navbatni shakllantirish va yoʻllanmalarni rasmiylashtirish Oʻzbekiston Respublikasi Maktabgacha va maktab taʼlimi vazirligining “Bolalar bogʻchasi” maktabgacha taʼlimni boshqarish axborot tizimi tomonidan amalga oshiriladi.

3. Oʻzbekiston Respublikasi Maktabgacha va maktab taʼlimi vazirligi quyidagilarni taʼminlasin:

oʻn kun muddatda — Oʻzbekiston Respublikasi Adliya vazirligi bilan kelishgan holda, davlat xizmatlari koʻrsatish uchun zarur boʻlgan namunaviy shakllarni, hujjatlar blankalarini hamda boshqa hujjatlarni ishlab chiqish va tasdiqlash;

bir hafta muddatda — tuman (shahar) maktabgacha taʼlim boʻlimlari rasmiy veb-saytlari (sahifalari)ni takomillashtirish, ularda davlat maktabgacha taʼlim muassasalari haqidagi maʼlumotlarni joylashtirish;

2018-yil mobaynida har chorakda kamida bir marta Oʻzbekiston Respublikasi Adliya vazirligi huzuridagi Davlat xizmatlari agentligi bilan birgalikda, Davlat xizmatlari markazlari, tuman (shahar) maktabgacha taʼlim boʻlimlari, davlat maktabgacha taʼlim muassasalari xodimlari ishtirokida, ushbu qaror bilan tasdiqlangan Maʼmuriy reglamentni amalda qoʻllanish samaradorligi va natijadorligi darajasini oshirishga yoʻnaltirilgan oʻquv seminarlari oʻtkazish.

4. Axborot texnologiyalari va kommunikatsiyalarini rivojlantirish vazirligi Maktabgacha taʼlim vazirligi hamda Oʻzbekiston Respublikasi Adliya vazirligi huzuridagi Davlat xizmatlari agentligi bilan birgalikda 2018-yil 1-aprelgacha boʻlgan muddatda:

tuman (shahar) davlat maktabgacha taʼlim boʻlimlari, davlat maktabgacha taʼlim muassasalari hamda davlat xizmatlari koʻrsatishda ishtirok etuvchi boshqa tuzilmalarning YIDXPga ulanishini taʼminlasin;

YIDXPda bolalarni davlat maktabgacha taʼlim muassasalariga qabul qilish boʻyicha davlat xizmatlari koʻrsatishning har bir bosqichida jismoniy shaxslarning murojaatlari koʻrib chiqilishini kuzatib borish tartibotini joriy etsin.

5. Oʻzbekiston Respublikasi Adliya vazirligi:

tuman (shahar) maktabgacha va maktab taʼlimi boʻlimlari va boshqa tashkilotlarning ular tomonidan bolalarni davlat maktabgacha taʼlim tashkilotlariga qabul qilish boʻyicha davlat xizmatlari koʻrsatishning belgilangan tartibini amalga oshirishga doir faoliyati yuzasidan, shu jumladan YIDXP orqali doimiy nazorat oʻrnatsin;

ushbu qaror bilan tasdiqlangan Maʼmuriy reglament talablari buzilganligi uchun tuman (shahar) davlat maktabgacha taʼlim boʻlimlari va boshqa tashkilotlarning mansabdor shaxslariga nisbatan maʼmuriy jazo choralarini belgilangan tartibda qoʻllasin.

6. Vazirlar Mahkamasining 2017-yil 19-iyuldagi 528-son qarori (Oʻzbekiston Respublikasi QHT, 2017-y., 30-son, 732-modda) bilan tasdiqlangan Davlat maktabgacha taʼlim muassasasi toʻgʻrisidagi nizomga 2018-yilning 1-aprelidan boshlab 2-ilovaga muvofiq oʻzgartirishlar kiritilsin.

7. Oʻzbekiston Respublikasi Maktabgacha taʼlim vazirligi manfaatdor vazirliklar va idoralar bilan birgalikda ular tomonidan qabul qilingan normativ-huquqiy hujjatlarni bir oy muddatda ushbu qarorga muvofiqlashtirsin.

8. Belgilab qoʻyilsinki, Oʻzbekiston Respublikasi Maktabgacha va maktab taʼlimi vazirligi va Adliya vazirligi rahbarlari ushbu qarorda nazarda tutilgan vazifalarning oʻz vaqtida, toʻliq va sifatli bajarilishi uchun shaxsan javob beradilar.

9. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari Q.V. Akmalov va Oʻzbekiston Respublikasi adliya vaziri R.K. Davletov zimmasiga yuklansin.

Oʻzbekiston Respublikasining Bosh vaziri A. ARIPOV

Toshkent sh.,

2018-yil 28-mart,

244-son

Vazirlar Mahkamasining 2018-yil 28-martdagi 244-son qaroriga 1-ILOVA

Bolalarni davlat maktabgacha taʼlim tashkilotlariga qabul qilish boʻyicha davlat xizmatlari koʻrsatishning

MAʼMURIY REGLAMENTI

1-bob. Umumiy qoidalar

1. Ushbu Reglament bolalarni quyidagi maktabgacha taʼlim tashkilotlariga (keyingi oʻrinlarda — tashkilot) qabul qilish tartibini belgilaydi:

umumiy turdagi davlat maktabgacha taʼlim tashkilotlari, Ilk rivojlanish markazlari (otaliqqa olgan tashkilot xodimlarining bolalari uchun kvotalar bundan mustasno);

qoʻshma turdagi davlat maktabgacha taʼlim tashkilotlari (imkoniyati cheklangan bolalar uchun ajratilgan oʻrinlar bundan mustasno);

davlat oliy taʼlim tashkilotlari huzuridagi davlat maktabgacha taʼlim tashkilotlari (ushbu tashkilotlar xodimlari va talabalarining farzandlari bundan mustasno);

umumiy turdagi davlat idoraviy maktabgacha taʼlim tashkilotlari (belgilangan kvotalar boʻyicha);

davlat-xususiy sheriklikka asoslangan nodavlat maktabgacha taʼlim tashkilotlari (ijtimoiy koʻmakka muhtoj oilalar va maxsus kontingent bolalari uchun belgilangan kvotalar boʻyicha).

2. Ushbu Reglamentning amal qilishi bolalarni davlat koʻp tarmoqli ixtisoslashtirilgan maktabgacha taʼlim tashkilotlariga, davlat maktabgacha taʼlim tashkilotlarining mobil guruhlariga, maktabga bir yillik bepul majburiy tayyorlov guruhlariga qabul qilishda tatbiq etilmaydi.

3. Ushbu Reglamentda quyidagi asosiy tushunchalardan foydalaniladi:

vakolatli organ — tuman (shahar) maktabgacha va maktab taʼlimi boʻlimlari;

davlat-xususiy sheriklik — xususiy investitsiyalarni jalb qilish, resurslarni birlashtirish va xavf-xatarlarni taqsimlash maqsadida davlat sherigi va xususiy sherikning aniq muddatga yuridik rasmiylashtirilgan maktabgacha taʼlim sohasidagi oʻzaro samarali hamkorligi;

ijtimoiy koʻmakka muhtoj oilalar — davlat-xususiy sheriklikka asoslangan nodavlat maktabgacha taʼlim tashkilotlariga kvota berilgan Ijtimoiy reyestrga kiritilgan oilalar, aʼzolari nogironligi boʻlgan shaxslardan iborat boʻlgan oilalar, boquvchisini yoʻqotgan oilalar, bolaning ota-onasi kvotalar boʻyicha hududlarga taqsimlangan ijtimoiy soha xodimlari boʻlgan oilalar, toʻrt yoki undan koʻp bolalari boʻlgan oilalar;

imtiyozli roʻyxat — davlat maktabgacha taʼlim tashkilotlariga ustunlik bilan qabul qilinish huquqiga ega boʻlgan bolalar roʻyxati;

maxsus kontingent — davlat-xususiy sheriklikka asoslangan nodavlat maktabgacha taʼlim tashkilotlariga kvota berilgan harbiy xizmatchilarning va huquqni muhofaza qiluvchi organlar xodimlarining bolalari, maktabgacha taʼlim tizimi xodimlari va davlat umumtaʼlim maktablari pedagog xodimlarining bolalari;

otaliq — otaliqqa olingan maktabgacha taʼlim tashkilotiga Oʻzbekiston Respublikasi qonunchilik hujjatlariga muvofiq jismoniy yoki yuridik shaxs (otaliq) tomonidan iqtisodiy, moliyaviy, madaniy, taʼlim yoki boshqa begʻaraz tizimli yordam koʻrsatish boʻyicha faoliyat;

tashkilot — davlat maktabgacha taʼlim tashkiloti, davlat-xususiy sheriklikka asoslangan nodavlat maktabgacha taʼlim tashkiloti, shu jumladan, oilaviy turdagi maktabgacha taʼlim tashkiloti;

umumiy roʻyxat — davlat maktabgacha taʼlim tashkilotlariga ustunlik bilan qabul qilinish huquqiga ega boʻlmagan bolalar roʻyxati.

4. Bolalarni tashkilotga qabul qilish tartibotini amalga oshirishda:

a) tashkilotlar rahbarlari tashkilot quvvati va tarbiyalanuvchilar toʻgʻrisidagi maʼlumotlarning doimiy ravishda, shuningdek, tashkilotning boʻsh oʻrni haqidagi maʼlumotlarning guruh ochilgan yoki yopilgan, guruh quvvati yoki taʼlim turi oʻzgargan, bola qabul qilingan va tashkilotdan chiqarilgan yoki boshqa guruhga oʻtkazilgan vaqtdan boshlab bir ish kuni ichida Oʻzbekiston Respublikasi Maktabgacha va maktab taʼlimi vazirligining (keyingi oʻrinlarda — vazirlik) “Bolalar bogʻchasi” maktabgacha taʼlimni boshqarish axborot tizimiga (keyingi oʻrinlarda — MTBAT) kiritib borilishini taʼminlaydilar;

b) davlat-xususiy sheriklikka asoslangan nodavlat maktabgacha taʼlim tashkilotlari mazkur bandning “a” kichik bandida nazarda tutilgan axborot bilan birgalikda MTBATga ijtimoiy koʻmakka muhtoj oilalar va maxsus kontingent uchun ajratilgan kvotalar joylariga qabul qilingan bolalar haqidagi maʼlumotni kiritadilar;

v) tashkilotlarda boʻsh joylarning elektron hisobini yuritish, bolalarni tashkilotlarga qabul qilish boʻyicha elektron navbatni shakllantirish, bolalarni tashkilotlarga qabul qilish, shu jumladan, davlat-xususiy sheriklikka asoslangan nodavlat maktabgacha taʼlim tashkilotlarida ijtimoiy koʻmakka muhtoj oilalar va maxsus kontingent uchun ajratilgan kvotalar boʻyicha yoʻllanmalarni (keyingi oʻrinlarda — yoʻllanma) shakllantirish MTBAT tomonidan avtomatik ravishda amalga oshiriladi;

g) tashkilotlar bolalarni yoʻllanmalar asosida qabul qiladi.

d) yetim bolalar va ota-ona qaramogʻidan mahrum boʻlgan bolalar hamda Falastindan Oʻzbekistonga olib kelingan fuqarolar farzandlari davlat maktabgacha taʼlim tashkilotlariga navbatga qoʻyilmagan holda, “Inson” ijtimoiy xizmatlar markazlaridagi ijtimoiy xodimlar guruhlari tomonidan yoki bevosita qonuniy vakillari orqali tegishli tashkilotga murojaat etgan holda joylashtiriladi.

e) umumiy turdagi davlat maktabgacha taʼlim tashkilotlari, Ilk rivojlanish markazlarida ochiladigan inklyuziv taʼlim guruhlarining belgilangan oʻrinlariga (3 tagacha) alohida taʼlimga ehtiyoji boʻlgan bolalar navbatga qoʻyilmagan holda, psixologik-tibbiy-pedagogik komissiyaning xulosasi asosida qabul qilinadi.

41. Tazyiq va zoʻravonlikdan jabr koʻrgan shaxslar hamda Ijtimoiy reyestrga kiritilgan oilalarning bolalari “Inson” ijtimoiy xizmatlar markazlaridagi ijtimoiy xodimlar guruhlari tomonidan ham maktabgacha va maktab taʼlimi boʻlimlariga talabnoma kiritish orqali imtiyozli navbatga qoʻyiladi.

5. Davlat xizmatlari markazlari, vakolatli organlar va tashkilotlar oʻrtasida axborotlar almashuvi faqat idoralararo elektron oʻzaro hamkorlik orqali elektron raqamli imzoni qoʻllagan holda amalga oshiriladi.

6. Bolalarni tashkilotga ushbu Reglamentga 1-ilovaga muvofiq sxema boʻyicha qabul qilinadi.

2-bob. Davlat xizmatlarini koʻrsatish tartibi

7. Maktab va maktabgacha taʼlim vazirligi oʻz tizimidagi tashkilotlar toʻgʻrisidagi maʼlumotlarning avtomatik ravishda muntazam yangilanib borilishi uchun oʻz rasmiy veb-saytining MTBAT bilan integratsiyalashuvini taʼminlaydi, unda quyidagilar koʻrsatiladi:

a) har bir tashkilot manzili, uning ixtisoslashuvi, guruhlar soni, tashkilotda guruhlar boʻyicha (bolalarning yoshi, taʼlim tili va smenasini koʻrsatgan holda) oʻrinlar soni va boʻsh oʻrinlarning mavjudligi;

b) bolalarni tashkilotga qabul qilish boʻyicha navbatga kiritilgan soʻrovnomalar roʻyxati, shu jumladan, Oʻzbekiston Respublikasi Yagona interaktiv davlat xizmatlari portalidagi (keyingi oʻrinlarda — YIDXP) soʻrovnoma raqami, ariza berilgan sana hamda tashkilotdagi guruhlar boʻyicha navbat raqami;

v) ushbu Reglamentning 18-bandiga muvofiq bolalarni tashkilotga qabul qilish boʻyicha navbatga kiritilgan soʻrovnomalar roʻyxati (keyingi oʻrinlarda — imtiyozli roʻyxat), shu jumladan, YIDXPdagi soʻrovnoma raqami, tashkilotdagi guruhlar boʻyicha navbat raqami.

8. Ota-onalar, ularning oʻrnini bosuvchi shaxslar (farzandlikka oluvchilar, vasiylar va homiylar), bolalarning yaqin qarindoshlari (bobosi, buvisi, voyaga yetgan akasi yoki opasi) yoki uchinchi shaxslar (keyingi oʻrinlarda — ariza beruvchilar) yoʻllanmalar olish uchun Davlat xizmatlari markazlariga oʻzlari kelib murojaat qiladilar yoki elektron shaklda davlat xizmatlaridan foydalanish uchun otasi yoki onasi (farzandlikka oluvchisi) mustaqil ravishda YIDXPda roʻyxatdan oʻtadilar.

Davlat xizmatidan kompleks tarzda foydalanish uchun Fuqarolik holati dalolatnomalarini yozish organiga tugʻilishni qayd etish bilan bir vaqtda murojaat qilish mumkin.

Bolani YIDXP orqali tashkilotga navbatga qoʻyish (soʻrovnomadagi telefon raqamini oʻzgartirish) faqat uning otasi yoki onasi (farzandlikka oluvchisi) tomonidan amalga oshiriladi.

Farzandini davlat maktabgacha taʼlim tashkilotlariga qabul qilinishini istagan chet el fuqarolari va fuqaroligi boʻlmagan (chet elda doimiy yashovchi) shaxslar YIDXP orqali oʻrnatilgan tartibda ariza yuboradi.

9. Ariza beruvchi oʻzi kelib murojaat qilingan taqdirda, davlat xizmatlari markazi xodimi ariza beruvchi nomidan, YIDXP orqali murojaat qilingan taqdirda esa, ariza beruvchi davlat xizmatlaridan foydalanish uchun soʻrovnomani elektron shaklda mustaqil ravishda yoki vakolatli organ xodimlari yordamida, Maktab va maktabgacha taʼlim vazirligining rasmiy veb-saytida hamda YIDXPda joylashtirilgan maʼlumotdan (mavjud boʻsh oʻrinlar, soʻrovnomaning navbati, tashkilot manzili va boshqalar) foydalangan holda, ushbu Reglamentga 2-ilovaga muvofiq shakl boʻyicha toʻldiradi.

Ijtimoiy koʻmakka muhtoj oilalarning bolalari hamda maxsus kontingentga kiruvchi bolalarni davlat-xususiy sheriklikka asoslangan nodavlat maktabgacha taʼlim tashkilotlariga qabul qilish uchun ariza beruvchilar soʻrovnomani ushbu Reglamentga 3-ilovaga muvofiq shakl boʻyicha toʻldiradi;

Ariza beruvchi bolani tashkilotga qabul qilish shartlari, amalga oshiriladigan toʻlovlar, oʻzaro huquq-majburiyatlarni oʻzida aks ettiruvchi ommaviy ofertani tasdiqlaydi.

10. Ariza beruvchilar quyidagi huquqlarga egadirlar:

soʻrovnomada tashkilotning bola uchun toʻgʻri keladigan yoshdagi boʻsh oʻrinlarga ega boʻlgan guruhini (yoʻllanma olish uchun) yoki boʻsh oʻrinlarga ega boʻlmagan guruhini (navbatga kiritilishi uchun) koʻrsatish (tanlash);

bolani tugʻilgan vaqtdan boshlab tashkilotga navbatga qoʻyish;

bir vaqtda uchtagacha tashkilotga bolani navbatga qoʻyish;

xato kiritilgan maʼlumotlarni tuzatish;

davlat xizmati koʻrsatilayotgan har qanday bosqichda undan foydalanishni rad etish;

soʻrovnoma yuborilgandan soʻng uni istalgan vaqtda bekor qilish.

11. Joriy oʻquv yilining 31-may kuniga qadar yetti yoshga toʻladigan bolalarning soʻrovnomalari ushbu sanada bekor qilinadi hamda avtomatik ravishda navbatdan chiqariladi.

Bola bir nechta tashkilotga navbatga qoʻyilib, ulardan biriga yoʻllanma shakllangan va bola rasmiylashtirilgan boʻlsa, boshqa tashkilotlarga navbatga qoʻyish boʻyicha soʻrovnomalar bekor qilinadi hamda avtomatik ravishda navbatdan chiqariladi, tashkilotning qisqa muddatli guruhlari, Ilk rivojlanish markazlariga qabul qilingan holatlar bundan mustasno.

12. Soʻrovnomaga zarur maʼlumotlarni rasmiylashtirgandan va kiritgandan soʻng ariza beruvchi uni identifikatsiya qilishning tegishli vositalari (daktiloskopiya, elektron imzo, Mobil-ID va boshqalar) bilan tasdiqlaydi.

Ariza beruvchi onlayn tarzda navbatni kuzatishi va YIDXPda xabarnomalarni olishi, shuningdek, tashkilotda bolani qabul qilish uchun ariza berish shartlaridan (YIDXP yoki davlat xizmatlari markazlari orqali) qatʼiy nazar, davlat xizmatlari markazlarida murojaat holati toʻgʻrisida maʼlumotni bepul olishi mumkin.

13. Bolalarni tashkilotga qabul qilish boʻyicha davlat xizmati bepul koʻrsatiladi.

Shu bilan birga, navbat kelganligi va (yoki) navbatdagi holat oʻzgarganligi haqida maxsus raqamga soʻrov yuborish orqali sms-xabar olish imkoniyati yaratiladi.

Bunda har bir kiruvchi SMS-xabar uchun toʻlovlar ariza beruvchi Davlat xizmatlari markazlari orqali ariza yuborganda — Adliya vazirligining Davlat xizmatlarini rivojlantirish jamgʻarmasi mablagʻlari hisobidan, YIDXP orqali murojaat qilganda — Raqamli texnologiyalar vazirligining Raqamli texnologiyalarni rivojlantirish jamgʻarmasi mablagʻlari hisobidan belgilangan miqdorda amalga oshiriladi.

14. Tashkilotning yopilishi, shuningdek, soʻrovnomada notoʻgʻri maʼlumotlar koʻrsatilganligi, shu jumladan, maʼlumotlarning ushbu Reglamentning 7 va 18-bandlarida nazarda tutilgan maʼlumotlarga nomuvofiqligi davlat xizmati koʻrsatishni rad etish uchun asos hisoblanadi.

Bunda arizada toʻgʻirlash mumkin boʻlgan xatolar mavjud boʻlsa, ularni besh ish kuni ichida toʻgʻrilash uchun ariza beruvchiga imkoniyat beriladi.

Davlat xizmatlari koʻrsatishni boshqa asoslarga koʻra rad etish qatʼiyan taqiqlanadi.

15. Ariza beruvchi davlat xizmatlaridan foydalanishni ularni koʻrsatishning istalgan bosqichida rad etish huquqiga ega.

Ariza beruvchi tomonidan davlat xizmatlaridan foydalanish rad etilgan taqdirda, uning soʻrovnomasi tizim tomonidan avtomatik ravishda koʻrib chiqilmasdan qoldiriladi va navbatdan chiqariladi. Bunda navbatga turish haqidagi xabarnoma yoki yoʻllanma soʻrovnoma bilan birgalikda bekor qilinadi.

16. Davlat xizmatlari markaziga oʻzi kelgan holda yoki YIDXP orqali murojaat qilinganda, toʻldirilgan soʻrovnoma avtomatik ravishda MTBATga yuboriladi.

Bunda MTBATda avtomatik ravishda quyidagi harakatlar amalga oshiriladi:

tegishli tashkilot va guruhda boʻsh oʻrin boʻlganda — yoʻllanma shakllantiriladi;

tegishli tashkilot va guruhda boʻsh oʻrin boʻlmaganda — soʻrovnoma tegishlicha umumiy yoki imtiyozli roʻyxatga kiritiladi hamda xabarnoma shakllantiriladi.

Maktab va maktabgacha taʼlim vazirligining rasmiy veb-saytida tashkilotlar va guruhlardagi boʻsh oʻrinlar soni toʻgʻrisidagi maʼlumotlar doimiy ravishda yangilab boriladi.

17. Ushbu Reglamentning 16-bandiga muvofiq yoʻllanmalar MTBATda avtomatik ravishda tashkilotda oʻrinlar boʻshagan kuni navbatga muvofiq rasmiylashtiriladi.

18. Bolalarning quyidagi kontingenti soʻrovnomalari imtiyozli roʻyxatga kiritiladi:

I va II guruh nogironligi boʻlgan shaxslarning bolalari;

koʻp bolali oilalarning bolalari;

yetim bolalar yoki ota-onasining qarovisiz qolgan bolalar;

tazyiq va zoʻravonlikdan jabr koʻrgan shaxslarning bolalari;

Ijtimoiy reyestrga kiritilgan oilalarning bolalari;

“Ayollar daftari”ga kiritilgan ijtimoiy himoyaga muhtoj yolgʻiz ayollarning bolalari;

kontrakt boʻyicha harbiy xizmatchilarning, ichki ishlar va bojxona organlari xodimlarining bolalari;

talabalar va pedagoglarning bolalari;

akalari yoki opalari ushbu muassasaning tarbiyalanuvchilari jumlasidan boʻlgan bolalar;

koʻp tarmoqli ixtisoslashtirilgan maktabgacha tashkilotlardan umumiy turdagi maktabgacha tashkilotlarga oʻtkazilayotgan sogʻaygan bolalar.

Bolalarni imtiyozli roʻyxat boʻyicha qabul qilish davlat-xususiy sheriklikka asoslangan nodavlat maktabgacha taʼlim tashkilotlariga tatbiq etilmaydi.

Mazkur bandning toʻrtinchi, beshinchi va sakkizinchi xatboshilaridagi imtiyozli roʻyxatga kiritilgan, shuningdek, maxsus kontingentga kiruvchi bolalarning hamda ijtimoiy koʻmakka muhtoj oilalar bolalarining soʻrovnomalari Davlat xizmatlari markazlariga borgan holda beriladi.

Qolgan imtiyozlar turlari boʻyicha ariza beruvchi davlat xizmatidan mazkur Reglamentga asosan umumiy tartibda foydalanadi va mazkur imtiyozlarning mavjudligi “Raqamli hukumat” tizimi idoralararo integratsiyalashuv platformasi orqali quyidagi axborot tizimlaridan aniqlanadi:

I va II guruh nogironligi boʻlgan shaxslar toʻgʻrisidagi maʼlumotlar “Tibbiy-ijtimoiy ekspertiza” elektron axborot tizimidan;

Ijtimoiy reyestrga kiritilganlar haqidagi maʼlumotlar “Yagona milliy ijtimoiy himoya” axborot tizimidan;

“Ayollar daftari”ga kiritilgan ijtimoiy himoyaga muhtoj yolgʻiz ayollar haqidagi maʼlumotlar “Ayollar daftari” axborot tizimidan;

bolaning otasi yoki onasi talaba ekanligi haqidagi maʼlumotlar Oliy taʼlim, fan va innovatsiyalar vazirligining axborot tizimidan;

bolaning otasi yoki onasi pedagog ekanligi haqidagi maʼlumotlar “Yagona milliy mehnat tizimi” idoralararo dasturiy-apparat kompleksidan;

bolaning koʻp bolali oilalar toifasiga mansub ekanligi Adliya vazirligining axborot tizimidan;

akalari yoki opalari ushbu muassasaning tarbiyalanuvchilari jumlasidan boʻlgan bolalar hamda koʻp tarmoqli ixtisoslashtirilgan maktabgacha tashkilotlardan umumiy turdagi maktabgacha tashkilotlarga oʻtkazilayotgan sogʻaygan bolalar haqidagi maʼlumotlar MTBAT tizimidan.

Davlat xizmatlari markazi direktori taqdim etilgan hujjatlardagi maʼlumotlarning tekshirilishi va soʻrovnomada ishonchli maʼlumot koʻrsatilishini nazorat qilish uchun shaxsan javobgar hisoblanadi.

Ariza beruvchilarda ushbu bandga muvofiq ustunlik huquqining mavjudligi toʻgʻrisidagi maʼlumot soʻrovnomada koʻrsatiladi.

Mazkur bandning toʻrtinchi, beshinchi va sakkizinchi xatboshilaridagi imtiyozli roʻyxatga kiritilgan, shuningdek, maxsus kontingentga kiruvchi bolalarga berilgan yoʻllanmalar hamda ularning ustunlik huquqini yoki tegishli kontingentga kirishini tasdiqlovchi hujjatlarning asl nusxalari bolalarni tashkilotga qabul qilish uchun asos hisoblanadi.

Bunda tashkilot rahbari taqdim etilgan hujjatlardagi maʼlumotlarning tekshirilishi va MTBAT tizimiga ishonchli maʼlumot kiritilishi uchun shaxsan javobgar hisoblanadi.

181. Ariza beruvchi davlat xizmatidan foydalanish uchun bergan soʻrovnomasidagi telefon raqamini istalgan vaqtda oʻzgartirishi mumkin. Ariza beruvchi soʻrovnomadagi telefon raqamini oʻzgartirish boʻyicha Davlat xizmatlari markaziga oʻzi kelgan holda yoki YIDXP orqali elektron murojaat qiladi. Bunda soʻrovnomadagi telefon raqami yangi kiritiladigan telefon raqamiga keladigan tasdiqlash kodini kiritish yoʻli bilan oʻzgartiriladi.

19. Imtiyozli va umumiy roʻyxatda turgan soʻrovnomalar bolaning yoshiga mos guruhlardagi boʻsh oʻrinlar soniga qarab quyidagi tartibda navbatma-navbat shakllantiriladi va yoʻllanmalar beriladi:

imtiyozli roʻyxatdan bitta soʻrovnoma;

umumiy roʻyxatdan bitta soʻrovnoma;

agar bolalar egizak boʻlsa, bir vaqtda egizaklarning soʻrovnomalari (guruhda ikkinchi bolaga boʻsh oʻrin boʻlmagan taqdirda, guruhning quvvatini oshirish hisobiga).

20. Birinchi marta tarbiyalanuvchilar qabul qilayotgan yangi qurilgan davlat maktabgacha taʼlim tashkilotlariga Maktab va maktabgacha taʼlim vazirligi tomonidan tasdiqlangan tegishli mikrouchastkalardagi hududlarda yashovchi bolalar maktabgacha taʼlim vazirining buyrugʻi asosida ustunlik huquqi bilan qabul qilinadi. Bunda mikrouchastkalarga kirmaydigan hududlardan bolalarni tashkilotga qabul qilish mikrouchastkalarga tegishli hududlardan bolalar qabul qilingandan soʻng qolgan boʻsh oʻrinlarga mazkur Reglamentda belgilangan tartibda umumiy va imtiyozli roʻyxat asosida amalga oshiriladi.

21. Taʼmirlash ishlarini amalga oshirish uchun vaqtincha yopilgan davlat maktabgacha taʼlim tashkilotlari tarbiyalanuvchilari taʼmirlash davrida vakolatli organ qarori asosida vaqtincha boshqa tashkilotlarga navbatsiz taqsimlanadi. Bunda bolalarni vaqtincha boshqa tashkilotlarga qabul qilish tashkilotdagi boʻsh oʻrinlar hisobidan amalga oshirilmaydi hamda amaldagi qonunchilik hujjatlari talablariga muvofiq guruhlardagi bolalarning eng koʻp sonidan vaqtincha oshishga ruxsat beriladi.

Davlat maktabgacha taʼlim tashkilotida taʼmirlash ishlari yakunlangandan soʻng uning vaqtincha boshqa tashkilotga taqsimlangan tarbiyalanuvchilari ushbu tashkilotga vakolatli organ qarori asosida navbatsiz qabul qilinadi.

Koʻp tarmoqli ixtisoslashtirilgan maktabgacha taʼlim tashkilotlari umumiy turdagi tashkilotlarga aylantirilganda, ixtisoslashtirilgan maktabgacha taʼlim tashkilotlari tarbiyalanuvchilari boʻlgan bolalar Qoraqalpogʻiston Respublikasi Maktabgacha va maktab taʼlimi vazirligi, viloyatlar va Toshkent shahar maktabgacha va maktab taʼlimi boshqarmalari qarorlari asosida ushbu tashkilotlarga navbatsiz qabul qilinadi.

22. MTBAT tomonidan bolalarni tashkilotga joylashtirish boʻyicha yoʻllanma shakllanganligi haqidagi xabarnomalar tanlangan tashkilotga va ariza beruvchining telefon raqamiga yuboriladi.

23. Bolalarni tashkilotga qabul qilish ariza beruvchi xabarnomadagi tasdiq kodini taqdim etgan kundan boshlab ikki ish kuni mobaynida tashkilotning buyrugʻini chiqarish orqali rasmiylashtiriladi.

Bolalarni tashkilotga qabul qilish tashkilotning yoki buyruq rasmiylashtirishda ishtirok etuvchi boshqa idoralarning aybi bilan kechikkanda, yoʻllanma oʻz kuchida qoladi.

Bolalarni tashkilotlarga xabarnomasiz qabul qilish taqiqlanadi, ushbu Reglamentning 20 va 21-bandlarida nazarda tutilgan holatlar bundan mustasno.

24. Ariza beruvchi bolalarni tashkilotga qabul qilishni yoʻllanma shakllangandan soʻng 15 ish kuni mobaynida rasmiylashtirmagan taqdirda, yoʻllanma haqiqiy emas deb hisoblanadi.

3-bob. Yakunlovchi qoidalar

25. Soʻrovnomada koʻrsatilgan tashkilot yoki guruh yopilgan taqdirda, Maktab va maktabgacha taʼlim vazirligi tomonidan soʻrovnoma bekor qilinadi va ariza beruvchi bu haqda xabardor qilinadi.

Bunda soʻrovnoma davlat xizmatlari markazi yoki YIDXP orqali shakllantirilganligidan kelib chiqib, soʻrovnoma bekor qilinganligi toʻgʻrisidagi xabar ariza beruvchilarga tegishlicha davlat xizmatlari markazi yoki vakolatli organ tomonidan bir ish kuni mobaynida, shu jumladan, axborot-kommunikatsiya tizimi orqali yetkaziladi.

26. Davlat xizmatlari markazlari, vakolatli organlar va tashkilotlar oʻz faoliyatini amalga oshirish natijasida olingan ariza beruvchi toʻgʻrisidagi maʼlumotlarning maxfiyligini taʼminlashi kerak.

27. Oʻzbekiston Respublikasi Adliya vazirligi, Qoraqalpogʻiston Respublikasi Adliya vazirligi, viloyatlar va Toshkent shahar adliya boshqarmalari va davlat xizmatlari markazlari Maktab va maktabgacha taʼlim vazirligi va uning hududiy boshqarmalari bilan hamkorlikda ushbu Reglament talablarining bajarilishi boʻyicha davlat organlari va boshqa tashkilotlarning faoliyati yuzasidan, shu jumladan, YIDXP orqali doimiy nazoratni va monitoringni amalga oshiradilar.

28. Davlat organlari va boshqa tashkilotlar xodimlarining xatti-harakatlari yuzasidan ariza beruvchi tomonidan qonunchilikda belgilangan tartibda shikoyat qilinishi mumkin.

29. Ushbu Nizom kuchga kirgunga qadar tashkilotga qabul qilish uchun soʻrovnomasi imtiyozli roʻyxatga kiritilgan bolalarning imtiyozlari ularga yoʻllanma berilgunga qadar saqlanib qoladi.

Bolalarni davlat maktabgacha taʼlim tashkilotlariga qabul qilish boʻyicha davlat xizmatlari koʻrsatishning maʼmuriy reglamentiga 1-ILOVA

Bolalarni davlat maktabgacha taʼlim tashkilotlariga qabul qilish ishlarini amalga oshirish

SXEMASI

Bosqichlar Subyektlar Tadbirlar Bajarish muddati 1-bosqich Maktab va maktabgacha taʼlim vazirligi Maktabgacha taʼlim axborot tizimi hamda rasmiy veb-saytida oʻz tizimidagi tashkilotlar toʻgʻrisidagi maʼlumotlarning joylashtirilishini va ularning muntazam onlayn tarzda yangilab borilishini taʼminlash Doimiy ravishda 2-bosqich Ariza beruvchi Davlat xizmatlari markaziga oʻzi kelib murojaat qilish yoki davlat xizmatlaridan foydalanish uchun YIDXPda roʻyxatdan oʻtish Xohishiga koʻra 3-bosqich 1. Davlat xizmatlari markazi 2. YIDXP Soʻrovnomani maktabgacha taʼlimni boshqarish axborot tizimiga kiritish 1. 1 soat ichida 2. Avtomatik tarzda 4-bosqich Maktabgacha taʼlimni boshqarish axborot tizimi a) bolaning tashkilotga qabul qilinganligi boʻyicha yoʻllanma shakllanganligi haqidagi xabarnomani rasmiylashtirish — koʻrsatilgan tashkilot guruhida boʻsh joy mavjud boʻlsa; b) soʻrovnomani tegishli ravishda umumiy yoki imtiyozli roʻyxatga kiritish, shuningdek, navbatga qoʻyilganligi haqida xabarnomani rasmiylashtirish — koʻrsatilgan tashkilot guruhida boʻsh joy mavjud boʻlmasa; v) xabarnomani tanlangan tashkilotga va ariza beruvchining telefon raqamiga yuborish. Avtomatik tarzda 5-bosqich Ariza beruvchi Bolalarni tashkilotga qabul qilish boʻyicha xabarnomadagi tasdiq kodini tashkilotga taqdim etish. Xabarnoma shakllangandan soʻng 15 ish kunida 6-bosqich Maktabgacha taʼlim tashkiloti Tasdiq kodi asosida bolani tashkilotga qabul qilish boʻyicha buyruq chiqarish. Tasdiq kodi tashkilotga taqdim etilgandan soʻng 2 ish kunida

Bolalarni davlat maktabgacha taʼlim tashkilotlariga qabul qilish boʻyicha davlat xizmatlari koʻrsatishning maʼmuriy reglamentiga 2-ILOVA

__________________(sana)________________________(t/r)Bolalarni davlat maktabgacha taʼlim tashkilotlariga qabul qilish boʻyicha davlat xizmatlaridan foydalanish uchunSOʻROVNOMAI. Ariza beruvchi haqida maʼlumot:1. Bolaga nisbatan (ota, ona, ularning oʻrnini bosuvchi shaxs, yaqin qarindoshlar (bobosi, buvisi, akasi, opasi va boshqalar) yoki ishonchnoma asosida harakat etuvchi uchinchi shaxs:2. F.I.O.:3. Pasport maʼlumotlari (raqami va seriyasi):4. Manzili:5. Telefon raqami:6. Elektron pochta manzili (mavjud boʻlsa):7. Ishonchnomaning rekvizitlari (uchinchi shaxslar uchun):II. Bola haqidagi maʼlumot:1. F.I.O.:2. Tugʻilgan yili:3. Tugʻilish haqida guvohnoma maʼlumotlari (raqami va seriyasi):4. Bola egizakmiHaYoʻqIII. Tashkilot haqida maʼlumot:1. Tashkilot raqami:1.2.3.2. Guruhi:IV. Imtiyozli huquq borligi haqida maʼlumotlarva ularni tasdiqlovchi hujjatlar (mavjud boʻlsa)1. I va II guruh nogironligi boʻlgan shaxslarning bolalari (nogironlik toʻgʻrisidagi guvohnomaning nusxasi)2. Yetim bolalar yoki ota-onasining qarovisiz qolgan bolalar (bitta yoki yolgʻiz ota-onaning vafoti toʻgʻrisidagi guvohnoma, ota-ona huquqlaridan mahrum etilganlik toʻgʻrisidagi sud qarori nusxalari va boshqalar)3. “Ayollar daftari”ga kiritilgan ijtimoiy himoyaga muhtoj yolgʻiz ayollarning bolalari (“Ayollar daftari”ga kiritilganlik holati axborot tizimi tomonidan avtomatik ravishda tekshiriladi)4. Akalari yoki opalari ushbu tashkilotning tarbiyalanuvchilari jumlasidan boʻlgan bolalar (qabul qilish toʻgʻrisidagi buyruqning sanasi va raqami)5. Kontrakt boʻyicha harbiy xizmatchilarning, ichki ishlar va bojxona organlari xodimlarining bolalari (ish joyidan maʼlumotnoma)6. Koʻp tarmoqli ixtisoslashtirilgan maktabgacha tashkilotlardan umumiy turdagi maktabgacha tashkilotlarga oʻtkazilayotgan sogʻaygan bolalar (tibbiy-psixologik-pedagogik komissiyaning bola sogʻlomligi toʻgʻrisidagi xulosasi)V. Xabar berish tartibi1. Pochta orqali (pochta manzili)2. SMS yoki telefon orqali (telefon raqami)3. Elektron pochta orqali (elektron pochta manzili)

Bolalarni davlat maktabgacha taʼlim tashkilotlariga qabul qilish boʻyicha davlat xizmatlari koʻrsatishning maʼmuriy reglamentiga 3-ILOVA

__________________(sana)________________________(t/r)Bolalarni davlat-xususiy sheriklikka asoslangan maktabgacha taʼlim tashkilotlariga qabul qilish boʻyicha davlat xizmatlaridan foydalanish uchun SOʻROVNOMAI. Ariza beruvchi haqida maʼlumot:1. Bolaga nisbatan (ota, ona, ularning oʻrnini bosuvchi shaxs, yaqin qarindoshlar (bobosi, buvisi, akasi, opasi va b.) yoki ishonchnoma asosida harakat etuvchi uchinchi shaxs:2. F.I.O.:3. Pasport maʼlumotlari (raqami va seriyasi):4. Manzili:5. Telefon raqami:6. Elektron pochta manzili (mavjud boʻlsa):7. Ishonchnomaning rekvizitlari (uchinchi shaxslar uchun):II. Bola haqidagi maʼlumot:1. F.I.O.:2. Tugʻilgan yili:3. Tugʻilish haqida guvohnoma maʼlumotlari (raqami va seriyasi):4. Bola egizakmi HaYoʻqIII. Tashkilot haqida maʼlumot:1. Tashkilot raqami:1.2.3.2. Guruhi:IV. Ijtimoiy koʻmakka muhtoj oilaga mansubligi haqida maʼlumotlarva ularni tasdiqlovchi hujjatlar (talab etiladigan hujjatlar)1. Ijtimoiy reyestrga kiritilgan oilalarning bolalari2. Aʼzolari nogironligi boʻlgan shaxslardan iborat boʻlgan oilalarning bolalari (nogironlik toʻgʻrisidagi guvohnomaning nusxasi)3. Boquvchisini yoʻqotgan oilalarning bolalari (boquvchisini yoʻqotganlik holati axborot tizimi tomonidan avtomatik ravishda tekshiriladi)4. Bolaning ota-onasi kvotalar boʻyicha hududlarga taqsimlangan ijtimoiy soha xodimlari boʻlgan oilalarning bolalari (tibbiyot, madaniyat, fan, taʼlim va sport sohalari vakillarining ish joyidan maxsus kvota asosida boshqa hududga taqsimlanganligi toʻgʻrisidagi buyruq nusxasi)5. Toʻrt yoki undan koʻp bolalari boʻlgan oilalarning bolalari (tugʻilganlik haqida guvohnomalarning nusxalari)V. Maxsus kontingentga mansubligi haqida maʼlumotlar va ularni tasdiqlovchi hujjatlar (talab etiladigan hujjatlar)1. Harbiy xizmatchilarning va huquqni muhofaza qiluvchi organlar xodimlarining bolalari (ish joyidan maʼlumotnoma)2. Maktabgacha taʼlim tizimi xodimlari va davlat umumtaʼlim maktablari pedagog xodimlarining bolalari (ish joyidan maʼlumotnoma)V. Xabar berish tartibi1. Pochta orqali (pochta manzili)2. SMS yoki telefon orqali (telefon raqami)3. Elektron pochta orqali (elektron pochta manzili)

Vazirlar Mahkamasining 2018-yil 28-martdagi 244-son qaroriga 2-ILOVA

Vazirlar Mahkamasining 2017-yil 19-iyuldagi 528-son qarori bilan tasdiqlangan Davlat maktabgacha taʼlim muassasasi toʻgʻrisida Nizomga kiritilayotgan oʻzgartirishlar

1. 20-band quyidagi tahrirda bayon qilinsin:

“20. Davlat maktabgacha taʼlim muassasasiga bolalarni qabul qilish Vazirlar Mahkamasi tomonidan belgilanadigan tartibda beriladigan yoʻllanma asosida amalga oshiriladi”.

2. 21 — 31-bandlar va 1 — 3-ilovalar oʻz kuchini yoʻqotgan deb hisoblansin.