Qishloq xoʻjaligi va meliorativ texnika hamda mashina-traktor parklari, ustaxonalar va servis punktlarining asbob-uskunalarini texnik koʻrikdan oʻtkazish tartibi toʻgʻrisida (131-son)

02.02.2018

sirdaryo viloyati Sardoba tuman hokimining

Qarori

Oʻzbekiston Respublikasi Vazirlar Maxkamasining 2012-yil 6-dekabrdagi 345-sonli Qarori bilan tasdiqlangan “Oʻzbekiston Respublikasi Qishloq va suv xoʻjaligi vazirligining Mashina va asbob-uskunalarning texnik holatini nazorat qilish davlat bosh inspeksiyasi toʻgʻrisida”gi Nizomiga (Oʻzbekiston Respublikasi qonun xujjatlari toʻplami, 2012-y, 50-son, 559-modda), Oʻzbekiston Respublikasi Qishloq va suv xoʻjaligi vazirligining 2013-yil 2-apreldagi 58-sonli buyrugʻi bilan tasdiqlangan “Qishloq xoʻjaligi va meliorativ texnikani, shuningdek mashina-traktor parklari, ustaxonalar va servis punktlarining asbob uskunalarini texnik koʻrikdan oʻtkazish tartibi toʻgʻrisida”gi Nizom (25.04.2013-yilda roʻyxatdan oʻtkazilgan, raqami 2452, Oʻzbekiston Respublikasi qonun xujjatlari toʻplami, 2013-y, 17-son, 229-modda)ga muvofiq tumanda 2018-yil qishloq xoʻjaligi va meliorativ texnika, mashina-traktor parklari, ustaxonalar va servis punktlarining asbob-uskunalarini har yillik texnik koʻrikdan oʻtkazish maqsadida Oʻzbekiston Respublikasi “Mahalliy davlat hokimiyati toʻgʻrisida”gi Qonunining 6-moddasiga (Oʻzbekiston Respublikasi Oliy Kengashining Axborotnomasi, 1993-y., 9-son, 320-modda) asosan qaror qilaman:

1. Tumandagi qishloq xoʻjaligi va meliorativ texnika, mashina-traktor parklari, ustaxonalar va servis punktlarining asbob-uskunalarini har yillik texnik koʻrikdan oʻtkazish ish rejasi 1-ilovaga* muvofiq, qishloq xoʻjaligi va meliorativ texnika, mashina-traktor parklari, ustaxonalar va servis punktlarining asbob-uskunalarini har yillik texnik koʻrikdan oʻtkazish boʻyicha komissiya tarkibi 2-ilovaga* muvofiq tasdiqlansin.

* 1 — 2-ilovalar berilmaydi.

2. Sirdaryo viloyati “Davtexnazorat” inspeksiyasining qishloq xoʻjaligi texnikalari boʻyicha Sardoba tuman davlat inspektori (I. Boyqulov)ga;

texnikalarni texnik koʻrikdan oʻtkazish ishlarini Oʻzbekiston Respublikasi Qishloq va suv xoʻjaligi vazirligining 2013-yil 2-apreldagi 58-sonli buyrugʻi bilan tasdiqlangan “Qishloq xoʻjaligi va meliorativ texnikani, shuningdek mashina-traktor parklari, ustaxonalar va servis punktlarining asbob uskunalarini texnik koʻrikdan oʻtkazish tartibi toʻgʻrisida”gi Nizomga muvofiq tashkil etish;

texnikaga mulk huquqi asosida ega shaxslarga texnikalarni texnik koʻrikdan oʻtkazish toʻgʻrisidagi bildirishnomani texnik koʻrikdan oʻtkazish kunidan kamida oʻttiz kun oldin yuborish;

mulkchilik shaklidan qatʼi nazar barcha rusumli qishloq xoʻjalik va meliorativ yoʻl-qurilish texnika vositalarini yillik texnik koʻrikdan oʻtkazish maydonchalriga yigʻish;

texnik koʻrikdan oʻtgan texnikalarni dalolatnomalar asosida ishlashga ruxsat berishni tashkil qilish vazifasi topshirilsin.

3. Barcha korxona, tashkilot, mashina traktor parklari, fermer xoʻjalik rahbarlariga;

hisobida mavjud boʻlgan qishloq xoʻjaligi va meliorativ, yoʻl qurilish texnikalarini, mashina va asbob uskunalarni texnik koʻrikdan oʻtkazish uchun tayyorlab, belgilangan maydonchalarga yigʻish va texnik koʻrikga taalluqli toʻlovlarni yuqorida qayd etilgan Nizomda belgilangan miqdorlarda toʻlanishini taʼminlash topshirilsin.

4. Tuman hokimining iqtisodiyot va tadbirkorlik masalalari boʻyicha birinchi oʻrinbosari A. Ergashevga:

Oʻzbekiston Respublikasi Qishloq va suv xoʻjaligi vazirligining 2013-yil 2-apreldagi 58-sonli buyrugʻi bilan tasdiqlangan “Qishloq xoʻjaligi va meliorativ texnikani, shuningdek mashina-traktor parklari, ustaxonalar va servis punktlarining asbob uskunalarini texnik koʻrikdan oʻtkazish tartibi toʻgʻrisida”gi Nizomda belgilangan texnik koʻrikdan oʻtkazish bilan bogʻliq yigʻimlarni undirilishida amaliy yordam berish topshirilsin.

5. Mazkur qaror qabul qilinishi munosabati bilan tuman hokimining 2017-yil 20-yanvardagi “Qishloq xujaligi va meliorativ texnika hamda mashina-traktor parklari, ustaxonalar va servis punktlarining asbob uskunalarini texnik koʻrikdan oʻtkazish ish rejasi va komissiya tarkibini tasdiqlash haqida”gi 115-sonli qarori oʻz kuchini yoʻqotgan deb hisoblansin.

6. Qarorning bajarilishini nazorat qilish tuman hokimining birinchi oʻrinbosari A. Ergashev zimmasiga yuklatilsin.

7. Ushbu qaror rasmiy eʼlon qilingan kundan eʼtiboran kuchga kiradi.

8. Qaror matni tuman hokimligining rasmiy veb-saytiga joylashtirilsin.

Hokim A. XIDIROV

Paxtaobod sh.,

2018-yil 2-fevral,

131-son