Xorijiy davlatlar avtotransport vositalarining Oʻzbekiston Respublikasi hududiga kirganligi hamda tranzit oʻtishi uchun yigʻimlarni undirish tartibi toʻgʻrisidagi nizomga oʻzgartirishlar kiritish haqida (2694-1-son)

12.03.2018

Oʻzbekiston Respublikasi Markaziy banki Boshqaruvi Oʻzbekiston Respublikasi Davlat bojxona qoʻmitasining

Qarori

[Oʻzbekiston Respublikasi Adliya vazirligi tomonidan 2018-yil 12-martda roʻyxatdan oʻtkazildi, roʻyxat raqami 2694-1]

Oʻzbekiston Respublikasining “Oʻzbekiston Respublikasining Markaziy banki toʻgʻrisida”gi Qonuni va Oʻzbekiston Respublikasi Prezidentining 2017-yil 14-fevraldagi PF-4954-son “Yoʻl xoʻjaligini boshqarish tizimini yanada takomillashtirish chora-tadbirlari toʻgʻrisida”gi hamda 2017-yil 2-sentabrdagi PF-5177-son “Valyuta siyosatini liberallashtirish boʻyicha birinchi navbatdagi chora-tadbirlar toʻgʻrisida”gi farmonlariga muvofiq Oʻzbekiston Respublikasi Markaziy banki Boshqaruvi va Davlat bojxona qoʻmitasi qaror qiladi:

1. Oʻzbekiston Respublikasi Markaziy banki Boshqaruvi va Davlat bojxona qoʻmitasining 2015-yil 12-iyundagi 335-V, 02-02/12-26-son qarori (roʻyxat raqami 2694, 2015-yil 9-iyul) (Oʻzbekiston Respublikasi qonun hujjatlari toʻplami, 2015-y., 27-son, 365-modda) bilan tasdiqlangan Xorijiy davlatlar avtotransport vositalarining Oʻzbekiston Respublikasi hududiga kirganligi hamda tranzit oʻtishi uchun yigʻimlarni undirish tartibi toʻgʻrisidagi nizomga ilovaga muvofiq oʻzgartirishlar kiritilsin.

2. Mazkur qaror rasmiy eʼlon qilingan kundan eʼtiboran kuchga kiradi.

Markaziy bank raisi M. NURMURATOV

Toshkent sh.,

2018-yil 7-fevral,

335-V-1-son

Davlat bojxona qoʻmitasi raisi M. TOXIRIY

Toshkent sh.,

2018-yil 7-fevral,

01-02/12-17-son

Oʻzbekiston Respublikasi Markaziy banki Boshqaruvi va Davlat bojxona qoʻmitasining 2018-yil 7-fevraldagi 335-V-1, 01-02/12-17-son qaroriga ILOVA

Xorijiy davlatlar avtotransport vositalarining Oʻzbekiston Respublikasi hududiga kirganligi hamda tranzit oʻtishi uchun yigʻimlarni undirish tartibi toʻgʻrisidagi nizomga kiritilayotgan oʻzgartirishlar

1. 1-band quyidagi tahrirda bayon etilsin:

“1. Mazkur Nizomda quyidagi asosiy tushunchalardan foydalaniladi:

qimmatliklar — milliy valyuta va kassa hujjatlari;

kunlik hujjatlar — operatsion kun davomida rasmiylashtirilgan milliy valyutada amalga oshirilgan operatsiyalar hisobini yuritish hujjatlari;

inkassatsiya xizmati — maxsus kassaning kunlik naqd pul tushumlarini inkassatsiya qilish va qimmatliklarni tashish bilan bogʻliq boʻlgan xizmat.”.

2. 2-banddagi “xorijiy valyutada” degan soʻzlar “milliy valyutada” degan soʻzlar bilan almashtirilsin;

3. 4-band quyidagi tahrirda bayon etilsin:

“4. Yigʻimlarni undirish uchun tegishli bojxona postida tijorat banki tomonidan milliy valyutada toʻlovlarni qabul qiluvchi bank kassasi (bundan buyon matnda maxsus kassa deb yuritiladi) tashkil qilinadi.”.

4. 6-band quyidagi tahrirda bayon etilsin:

“6. Maxsus kassa tijorat banki tomonidan yonmaydigan temir shkaf (seyf), telefon aloqasi, qoʻriqlash va yongʻin xavfsizligi signalizatsiyasi, milliy valyutani naqd pulsiz shaklda qabul qiluvchi toʻlov terminali, kompyuter, printer, hisoblash texnikasi, pul sanash mashinkasi, pullarni oʻrab-bogʻlash uchun banderol, tizimcha va plombalar, kassir uchun biriktirilgan maxsus plombir, amaliyot kassasining nomi yozilgan yoki uning tartib raqami koʻrsatilgan muhr va shtamplar hamda blankalar bilan taʼminlangan boʻlishi shart.”.

5. 7, 8, 22-bandlardagi “vakolatli bank” degan soʻzlar “tijorat banki” degan soʻzlar bilan almashtirilsin.

6. 9, 12 — 18, 24, 26, 29-bandlar va 3-ilova oʻz kuchini yoʻqotgan deb topilsin.

7. 10 va 11-bandlar quyidagi tahrirda bayon etilsin:

“10. Yigʻimlar undirilganligi haqida kassir tomonidan mazkur Nizomning 1-ilovasiga muvofiq shaklda kirim hujjati rasmiylashtiriladi. Bunda kassir hujjatda mijozning imzosi qoʻyilganligini hamda toʻgʻri va toʻliq toʻldirilganligini tekshirishi shart.

11. Kirim hujjati bir nusxada tayyorlanadi. Kirim hujjatning maʼlumotnoma qismi kunlik kassa hujjatlariga tikib qoʻyiladi, kvitansiya qismi naqd pulni topshirgan mijozga taqdim etiladi.”.

8. 19-band quyidagi tahrirda bayon etilsin:

“19. Kassir tomonidan operatsion kun yakunida maxsus kassada qimmatliklar asosida amalga oshirilgan operatsiyalar boʻyicha mazkur Nizomning 2-ilovasiga muvofiq shaklda hisobot tuziladi va imzolanadi.”.

9. 20-banddagi “vakolatli bankka” degan soʻzlar “tijorat bankiga” degan soʻzlar bilan almashtirilsin.

10. 21-banddagi “vakolatli bankning” degan soʻzlar “tijorat bankining” degan soʻzlar bilan almashtirilsin.

11. 23-band quyidagi tahrirda bayon etilsin:

“23. Yigʻimlardan tushgan mablagʻlar (bundan buyon matnda mablagʻlar deb yuritiladi) tijorat banklari tomonidan Oʻzbekiston Respublikasi Vazirlar Mahkamasi huzuridagi Respublika yoʻl jamgʻarmasining shaxsiy gʻazna hisobvaragʻiga oʻtkaziladi.”.

12. 25-band quyidagi tahrirda bayon etilsin:

“25. Operatsion kun yakunida maxsus kassa tomonidan qabul qilingan mablagʻlar tegishli tijorat bankiga inkassatsiya xizmati orqali topshiriladi. Mablagʻlar keyingi ish kunidan kechikmagan holda Jamgʻarmaning tegishli shaxsiy gʻazna hisobvaraqlariga oʻtkazib beriladi.”.

13. 27-banddagi “Vakolatli bank” degan soʻzlar “Tijorat banki” degan soʻzlar bilan almashtirilsin.

14. 1-ilova mazkur oʻzgartirishlarning 1-ilovasiga muvofiq tahrirda bayon etilsin.

15. 2-ilova mazkur oʻzgartirishlarning 2-ilovasiga muvofiq tahrirda bayon etilsin.

16. Mazkur oʻzgartirishlar Oʻzbekiston Respublikasi Vazirlar Mahkamasi huzuridagi Respublika yoʻl jamgʻarmasi bilan kelishilgan.

Vazirlar Mahkamasi huzuridagi Respublika yoʻl jamgʻarmasi ijrochi direktori M. ALLABERGANOV

2018-yil 7-fevral

“Xorijiy davlatlar avtotransport vositalarining Oʻzbekiston Respublikasi hududiga kirganligi hamda tranzit oʻtishi uchun yigʻimlarni undirish tartibi toʻgʻrisidagi nizomga 1-ILOVA

“Xorijiy davlatlar avtotransport vositalarining Oʻzbekiston Respublikasi hududiga kirganligi hamda tranzit oʻtishi uchun yigʻimlarni undirish tartibi toʻgʻrisidagi nizomga 2-ILOVA

(Qonun hujjatlari maʼlumotlari milliy bazasi, 12.03.2018-y., 10/18/2694-1/0880-son)