Oliy taʼlim va ilmiy tadqiqotlar sohasida hamkorlik toʻgʻrisida

08.02.2017

OʻZBEKISTON RESPUBLIKASI HUKUMATI BILAN quvayt davlati HUKUMATI OʻRTASIDA

Bitim

Oʻzbekiston Respublikasi Hukumati va Quvayt Davlati Hukumati, keyingi oʻrinlarda “Tomonlar” deb ataluvchilar,

oliy taʼlim hamda ilmiy tadqiqotlar sohasida hamkorlikni rivojlantirish orqali Tomonlar davlatlari oʻrtasidagi doʻstlik aloqalari va ikki tomonlama munosabatlarni mustahkamlash istagida,

quyidagilar toʻgʻrisida kelishib oldilar:

1-modda

Tomonlar oʻz davlatlarining milliy qonunchiligiga muvofiq oliy taʼlim, fan va ilmiy tadqiqotlar sohasida, shuningdek ikki davlat oliy taʼlim muassasalari va ilmiy tadqiqot markazlarida tegishli taʼlim sifatini taʼminlashda hamkorlikni qoʻllab-quvvatlaydilar.

2-modda

1. Tomonlar oliy taʼlim va ilmiy tadqiqotlar sohasidagi talabalar hamda tadqiqotchilarga har yili oʻzarolilik asosida stipendiyalar taqdim etadilar.

2. Taʼlim sohalaridagi stipendiyalar soni Tomonlarning oʻzaro kelishuvi asosida diplomatik kanallar orqali aniqlanadi hamda nomzodlar oliy taʼlim va ilmiy tadqiqot uchun oʻqishga qabul qilish talablariga muvofiq boʻlishi lozim.

3-modda

Tomonlar taʼlim va fanning oʻzaro manfaatli boʻlgan sohalaridagi ikki tomonlama hamkorlikni mustahkamlash va yanada rivojlantirish maqsadida talabalar, oʻqituvchilar va tadqiqotchilar hamda ilmiy delegatsiyalar oʻzaro almashinuvini ragʻbatlantiradilar.

4-modda

Tomonlar oʻz davlatlari milliy qonunchiligiga muvofiq oliy taʼlim va ilmiy tadqiqotlar sohasida axborot va tajriba, shu jumladan bosma materiallar, davriy nashrlar, maqolalar hamda oʻquv rejalari bilan almashadilar.

5-modda

Tomonlar ikki davlatdagi oliy taʼlim muassasalari va ilmiy tadqiqot markazlari oʻrtasida toʻgʻridan toʻgʻri aloqalarning rivojlanishini ragʻbatlantiradilar.

6-modda

Tomonlar oʻz davlatlari hududida hamda xalqaro miqyosda oʻtkaziladigan oliy taʼlim va ilmiy tadqiqot sohasidagi konferensiya, seminar, uchrashuv va koʻrgazmalarda oʻz vakillari ishtirokini qoʻllab-quvvatlaydilar.

7-modda

Tomonlar ikki davlat hududida tashkillashtiriladigan taʼlim, madaniyat va sport boʻyicha tadbirlarda ishtirok etish uchun oliy taʼlim muassasalari talabalari delegatsiyalari bilan almashadilar.

8-modda

Yuboruvchi Tomon shaxslar va delegatsiyalarning safar xarajatlarini, qabul qiluvchi Tomon esa turar-joy va ichki transport xarajatlarini qoplaydi.

9-modda

Tomonlar quyidagi ijro etuvchi organlarni mazkur Bitim amalga oshirilishi uchun masʼul etib belgilaydilar:

Oliy va oʻrta maxsus taʼlim vazirligi — Oʻzbekiston Respublikasi Hukumati nomidan;

Oliy taʼlim vazirligi — Quvayt Davlati Hukumati nomidan.

10-modda

1. Tomonlar ushbu Bitimni amalga oshirish, bu jarayonni nazorat qilish va baholash, shuningdek tegishli tashkilotlarga hisobotlarni muntazam taqdim etish maqsadida Qoʻshma ishchi guruh tashkil qilishlari mumkin.

2. Qoʻshma ishchi guruh Tomonlardan birining soʻrovnomasiga koʻra navbat bilan Oʻzbekiston Respublikasi yoki Quvayt Davlatida yigʻiladi va quyidagi vazifalarni bajaradi:

mazkur Bitim doirasida ijro dasturlarini imzolash;

ushbu Bitimga kiritilishi mumkin boʻlgan oʻzgartirish va qoʻshimchalarni muhokama qilish.

11-modda

Ushbu Bitimning qoʻllanishi va talqin qilinishida yuzaga kelishi mumkin boʻlgan har qanday nizolar diplomatik kanallar va maslahatlashuv yoki muzokaralar orqali doʻstona hal qilinadi.

12-modda

Mazkur Bitim qoidalari ikki davlatda amalda boʻlgan qonunchilik yoki ularning biri ishtirokchisi boʻlgan shartnoma va xalqaro konvensiyalardan kelib chiqadigan huquq yoxud majburiyatlarga daxl qilmaydi.

13-modda

1. Mazkur Bitim Tomonlar uning kuchga kirishi uchun zarur boʻlgan ichki huquqiy protseduralarni tugatganliklari toʻgʻrisida bir-birlarini xabardor qiluvchi oxirgi yozma xabarnomani diplomatik kanallar orqali olgan sanadan boshlab kuchga kiradi.

2. Mazkur Bitimga Tomonlarning oʻzaro yozma roziligi asosida istalgan vaqtda oʻzgartirishlar kiritilishi mumkin. Oʻzgartirishlar ushbu moddaning 1-bandida belgilangan tartibda kuchga kiradi.

3. Mazkur Bitim kuchga kirgan sanadan boshlab besh (5) yil davomida amal qiladi va oʻz-oʻzidan keyingi besh (5) yillik muddatlarga uzayaveradi.

4. Bir Tomon boshqa Tomonni mazkur Bitimning amal qilishini tugatish niyati toʻgʻrisida yozma va diplomatik kanallar orqali uning muddati tugashidan olti (6) oy oldin xabardor qilishi orqali ushbu Bitimning amal qilishi tugatilishi mumkin.

5. Ushbu Bitimning tugatilishi unga muvofiq amalga oshirilayotgan alohida kelishuv, loyiha va tadbirlarning amal qilishi va davom etishiga taʼsir koʻrsatmaydi.

Al-Quvayt shahrida 2017-yilning 8-fevralida ikki asl nusxada, har biri oʻzbek, arab va ingliz tillarida tuzildi, bunda barcha matnlar bir xil kuchga ega. Ushbu Bitim qoidalarini talqin qilishda tafovut yuzaga kelgan taqdirda, ingliz tilidagi matn ustuvor hisoblanadi.

(imzolar)