Oʻzbekiston Respublikasining 2003-yilgi asosiy makroiqtisodiy koʻrsatkichlari prognozi va Davlat budjeti parametrlari toʻgʻrisida (455-son)

30.12.2002

Oʻzbekiston Respublikasi Vazirlar Mahkamasining

qarori

[Koʻchirma]

Oʻzbekiston Respublikasi Oliy Majlisining “Oʻzbekiston Respublikasining 2003-yilgi Davlat budjeti toʻgʻrisida” 2002-yil 12-dekabrdagi 431-II-son qaroriga muvofiq Vazirlar Mahkamasi qaror qiladi:

1. Quyidagilar:

2003-yilgi asosiy makroiqtisodiy koʻrsatkichlar 1-ilovaga* muvofiq;

Oʻzbekiston Respublikasining 2003-yilgi Davlat budjeti asosiy parametrlari 2-ilovaga* muvofiq tasdiqlansin.

*1, 2 -ilovalar berilmaydi.

2. 2003-yilgi Davlat budjeti taqchilligining cheklangan miqdori yalpi ichki mahsulot hajmiga nisbatan 2,0 foiz miqdorida belgilansin.

Belgilab qoʻyilsinki, davlat budjeti taqchilligini mablagʻ bilan taʼminlash faqat qadrsizlanmaydigan manbalar, shu jumladan davlat mulkini xususiylashtirishdan olinadigan daromadlar, xorijdan mablagʻ jalb qilish hamda 2003-yil 1-yanvardagi holatiga koʻra davlat maqsadli fondlarining boʻsh qoldiqlari hisobiga amalga oshiriladi.

4. 2003-yilda:

barcha soliq solinadigan aylanmalar boʻyicha qoʻshilgan qiymat soligʻi stavkasi 20 foiz miqdorida;

pudrat qurilish tashkilotlari tomonidan qoʻshilgan qiymat soligʻi toʻlashning amaldagi tartibi;

“OʻzDEUavto” aksiyadorlik jamiyatining dilerlari rasmiy maqomiga ega boʻlmagan jismoniy va yuridik shaxslardan “OʻzDEUavto” aksiyadorlik jamiyatida ishlab chiqarilgan olib chiqib ketiladigan avtomobillar uchun yigʻim stavkasi dvigatel hajmining 1 kub santimetri hisobiga 3,0 AQSh dollari miqdoridagi stavka boʻyicha;

Oʻzbekiston Respublikasi Vazirlar Mahkamasining:

“Jismoniy shaxslar ayrim toifalari daromadlariga imtiyozli soliq solish toʻgʻrisida” 1997-yil 24-dekabrdagi 562-son qarorining;

“Davriy matbuotni tarqatuvchi korxonalarni qoʻllab-quvvatlash chora-tadbirlari toʻgʻrisida” 2000-yil 13-apreldagi 143-son qarorining amal qilishi saqlab qolinsin.

Vazirlar Mahkamasining “Bozorni isteʼmol tovarlari bilan toʻldirishni ragʻbatlantirish hamda ishlab chiqaruvchilar va savdo tashkilotlarining oʻzaro munosabatlarini takomillashtirish chora-tadbirlari toʻgʻrisida” 2002-yil 13-noyabrdagi 390-son qarori qoidalarining soʻzsiz bajarilishi nazarda tutilsin.

5. Belgilansinki:

eksport qiluvchi korxonalarda toʻlangan qoʻshilgan qiymat soligʻini qoplash huquqi faqat respublika hududidan tovarlar olib chiqib ketish hamda ularning hisob raqamlariga eksportdan valyuta tushumi tushganligi fakti tasdiqlangandan keyin paydo boʻladi;

mulkchilik shakllaridan hamda idoraviy mansubligidan qatʼi nazar, Oʻzbekiston Respublikasining barcha korxonalari, tashkilotlari va muassasalari har yili 1-yanvardagi holatiga koʻra asosiy fondlarni Oʻzbekiston Respublikasi Iqtisodiyot vazirligi tomonidan tasdiqlangan tartibda qayta baholaydilar.

6. Belgilab qoʻyilsinki, 2003-yil 1-yanvardan boshlab umumiy ovqatlanish sohasidagi faoliyat faqat yuridik shaxs shaklida tashkil etilgan tadbirkorlik subyektlari tomonidan, qonun hujjatlarida belgilangan tartibda amalga oshiriladi.

Ushbu tartib umumiy ovqatlanish sohasida uy sharoitlarida yoki davlat hokimiyati organlarining qarori bilan maxsus ajratilgan joylarda oʻtirish joylari tashkil qilmasdan donalab sotiladigan ovqatlarning ayrim turlarini tayyorlash va sotish boʻyicha xizmatlar koʻrsatishga tatbiq etilmaydi.

Qoraqalpogʻiston Respublikasi Vazirlar Kengashi, viloyatlar, shaharlar va tumanlar hokimliklari umumiy ovqatlanish sohasida yuridik shaxs boʻlgan holda ushbu faoliyat bilan shugʻullanish istagini bildirgan yakka tartibdagi tadbirkorlarni 2003-yil 1-martgacha qayta roʻyxatdan oʻtkazishni taʼminlasinlar.

Umumiy ovqatlanish sohasida faoliyatni amalga oshiruvchi, 2003-yil 1-yanvargacha belgilangan tartibda roʻyxatdan oʻtkazilgan yakka tartibdagi tadbirkorlar 2003-yil yanvar-fevral oylari uchun faoliyatning koʻrsatilgan turidan olingan daromadlardan belgilangan soliqlarni Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari tomonidan 2002-yilda ular uchun belgilangan stavkalar boʻyicha toʻlaydilar.

7. 2003-yil 1-yanvardan boshlab:

sotilmagan tayyor mahsulotning normativdan ortiq qoldiqlari uchun toʻlov;

ifloslantiruvchi moddalarni tabiiy muhitga chiqarib tashlaganlik, oqizganlik hamda chiqindilarni Oʻzbekiston Respublikasi hududida joylashtirganlik uchun toʻlov bekor qilinsin.

8. 2003-yil 1-yanvardan boshlab:

bojxona toʻlovlari va davlat maqsadli jamgʻarmalariga toʻlovlar boʻyicha hisoblanadigan penya miqdori budjetga toʻlovlar boʻyicha hisoblanadigan penya singari, toʻlov muddati oʻtgan har bir kun uchun 0,07 foizli stavka boʻyicha belgilansin.

9. Mahalliy hokimiyat va boshqaruv organlarining tegishli budjetlarga tushumlarning toʻliq tushishi, tasdiqlangan xarajatlarni oʻz vaqtida mablagʻ bilan taʼminlanishi uchun javobgarligi va manfaatdorligini oshirish maqsadida:

suv resurslaridan foydalanganlik uchun soliq;

ekologiya soligʻi;

yuridik shaxs boʻlmasdan tadbirkorlik faoliyati bilan shugʻullanuvchi jismoniy shaxslar daromadlaridan olinadigan belgilangan soliq;

yuridik va jismoniy shaxslarning tadbirkorlik faoliyati ayrim turlarini amalga oshirishdan oladigan daromadlaridan olinadigan belgilangan soliq;

respublikada ishlab chiqariladigan pivo, oʻsimlik yogʻi, kir sovun va atir sovunga aksiz soligʻi boʻyicha tushumlar toʻliq miqdorda mahalliy budjetlar daromadlariga oʻtkazilsin.

10. 2003-yil uchun:

Qoraqalpogʻiston Respublikasi budjeti, viloyatlar va Toshkent shahar mahalliy budjetlari daromadlari va xarajatlari hajmlari, respublika budjetidan dotatsiyalarning cheklangan miqdorlari 21-ilovaga* muvofiq;

umumdavlat soliqlari tushumlaridan Qoraqalpogʻiston Respublikasi budjetiga, viloyatlar va Toshkent shahar mahalliy budjetlariga ajratmalar normativlari 22-ilovaga* muvofiq;

Qoraqalpogʻiston Respublikasi budjeti, viloyatlar va Toshkent shahar mahalliy budjetlari aylanma kassa naqd pul mablagʻining yoʻl qoʻyiladigan eng kam miqdorlari 23-ilovaga* muvofiq tasdiqlansin.

*21—23-ilovalar berilmaydi.

Oʻzbekiston Respublikasi Moliya vazirligiga tegishli budjetlarga dotatsiyalar ajratishda ularning miqdorlarini hududlar boʻyicha barcha undiriladigan soliqlar va toʻlovlarning toʻliq tushishidan, shuningdek budjetlarning birinchi navbatdagi xarajatlarining (ustamalari bilan ish haqi, nafaqalar, stipendiyalar va ularga tenglashtirilgan toʻlovlarning) mablagʻ bilan soʻzsiz taʼminlanishi zarurligidan kelib chiqqan holda aniqlashtirish huquqi berilsin.

11. 2003-yil uchun Oʻzbekiston Respublikasining Kafolat jamgʻarmasi miqdori, Oʻzbekiston Respublikasi Vazirlar Mahkamasining zaxira jamgʻarmalari hamda Qoraqalpogʻiston Respublikasi, viloyatlar va Toshkent shahar budjetlari miqdorlari 24-ilovaga* muvofiq tasdiqlansin.

*24-ilova berilmaydi.

12. 2003-yilda Hukumatning xorijdan mablagʻ jalb qilish cheklangan hajmi, shu jumladan ularga kafolatlangan kreditlar keyingi yillarda ularga xizmat koʻrsatish va ularni qaytarishning 2003-yilgi darajasidan oshmaydigan miqdorlarda cheklab qoʻyilsin.

14. Oʻzbekiston Respublikasi Iqtisodiyot vazirligi va Moliya vazirligi makroiqtisodiy koʻrsatkichlar prognozining bajarilishi hamda Oʻzbekiston Respublikasi Davlat budjetining ijrosi tahlili natijalari boʻyicha har chorakda Vazirlar Mahkamasiga:

ijtimoiy-iqtisodiy rivojlanish yakunlarini baholash haqida va iqtisodiy islohotlarning borishi toʻgʻrisida axborot;

zarurat boʻlganda, Davlat budjetining asosiy parametrlariga tuzatishlar boʻyicha takliflar kiritsinlar.

15. Oʻzbekiston Respublikasi Moliya vazirligining:

asosiy makroiqtisodiy koʻrsatkichlarning oʻzgarishi va xarajatlarning maqbullashtirilishi munosabati bilan 2002-yilgi Oʻzbekiston Respublikasi Davlat budjetining asosiy parametrlarini daromadlar boʻyicha 1842,2 mlrd soʻm, xarajatlar boʻyicha 1927,4 mlrd soʻm miqdorida hamda taqchillik boʻyicha 85,2 mlrd soʻm yoki (yalpi ichki mahsulotga nisbatan 1,1%) miqdorida yoki Oʻzbekiston Respublikasi Oliy Majlisi tomonidan tasdiqlangan Davlat budjeti taqchilligining cheklangan miqdori doirasida aniqlashtirish haqidagi;

Oʻzbekiston Respublikasi Markaziy banki bilan kelishuvga koʻra 2003-yil yanvar oyida 2002-yil uchun barcha darajalardagi budjetlar bilan yakuniy aylanmalar oʻrtasidagi oʻzaro hisob-kitoblarni tartibga solishga doir operatsiyalarni 2002-yilgi Davlat budjetining ijrosi toʻgʻrisidagi hisobotda oʻtkazilgan operatsiyalarni aks ettirgan holda oʻtkazish toʻgʻrisidagi takliflari qabul qilinsin.

16. Oʻzbekiston Respublikasi Vazirlar Mahkamasining 25-ilovaga muvofiq qarorlari oʻz kuchini yoʻqotgan deb hisoblansin.

Oʻzbekiston Respublikasi Hukumatining 26-ilovaga muvofiq ayrim qarorlariga oʻzgartirishlar va qoʻshimchalar kiritilsin.

17. Oʻzbekiston Respublikasi Adliya vazirligi manfaatdor vazirliklar va idoralar bilan birgalikda mazkur qarorning qabul qilinishi munosabati bilan amaldagi qonun hujjatlariga oʻzgartirishlar va qoʻshimchalar yuzasidan Vazirlar Mahkamasiga ikki hafta muddatda takliflar kiritsin.

Vazirliklar va idoralar, Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari ilgari chiqarilgan normativ hujjatlarini bir hafta muddatda mazkur qarorga muvofiqlashtirsinlar.

18. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari R.S. Azimov zimmasiga yuklansin.

Vazirlar Mahkamasining Raisi I. KARIMOV

Toshkent sh.,

2002-yil 30-dekabr,

455-son

Vazirlar Mahkamasining 2002-yil 30-dekabrdagi 455-son qaroriga 25-ILOVA

Oʻzbekiston Respublikasi Vazirlar Mahkamasining 2003-yil 1-yanvardan boshlab oʻz kuchini yoʻqotgan qarorlari

ROʻYXATI

1. Oʻzbekiston Respublikasi Vazirlar Mahkamasining “Muddatli xizmat harbiy xizmatchilariga va ularning oila aʼzolariga qoʻshimcha imtiyozlar berish toʻgʻrisida” 1994-yil 3-oktabrdagi 496-son qarori (Oʻzbekiston Respublikasi QT, 1994-y., 10-son, 47-modda)ning 2-bandi.

2. Oʻzbekiston Respublikasi Vazirlar Mahkamasining “Oʻzbekiston Respublikasi advokatlik birlashmalarida advokatlik faoliyati bilan shugʻullanuvchi shaxslarni ijtimoiy himoya qilish chora-tadbirlari toʻgʻrisida” 1996-yil 15-iyuldagi 250-son qarori.

3. Oʻzbekiston Respublikasi Vazirlar Mahkamasining “Ijtimoiy sugʻurtaga badallar miqdorlari toʻgʻrisida” 1999-yil 30-iyuldagi 372-son qarorining 1-bandi.

4. Oʻzbekiston Respublikasi Vazirlar Mahkamasining “Oʻzbekiston Respublikasining 2000-yilgi asosiy makroiqtisodiy koʻrsatkichlari prognozi va Davlat budjeti toʻgʻrisida” 1999-yil 31-dekabrdagi 554-son qarorining 25-bandi va qarorga 21-ilova.

5. Oʻzbekiston Respublikasi Vazirlar Mahkamasining “Oʻzbekiston Respublikasi Hukumatining ayrim qarorlariga oʻzgartirish va qoʻshimchalar kiritish toʻgʻrisida” 2000-yil 2-oktabrdagi 375-son qarori (Oʻzbekiston Respublikasi QT, 2000-y., 10-son, 63-modda)ga ilovaning 4-bandi.

6. Oʻzbekiston Respublikasi Vazirlar Mahkamasining “Oʻzbekiston Respublikasi Mehnat va aholini ijtimoiy muhofaza qilish vazirligi hamda Tashqi mehnat migratsiyasi masalalari agentligi toʻgʻrisidagi nizomlarni tasdiqlash haqida” 2001-yil 6-apreldagi 162-son qarori (Oʻzbekiston Respublikasi QT, 2001-y., 4-son, 21-modda)ga 3-ilovaning 28-bandi ikkinchi xatboshi.

7. Oʻzbekiston Respublikasi Vazirlar Mahkamasining “Gastrol-konsert faoliyati sohasida soliq solishni va audio-video kassetalarni tarqatishni takomillashtirish chora-tadbirlari toʻgʻrisida” 2001-yil 29-iyundagi 285-son qarori (Oʻzbekiston Respublikasi QT, 2001-y., 6-son, 36-modda) 3-bandining uchinchi xatboshi va ushbu qarorga 3-ilova.

8. Oʻzbekiston Respublikasi Vazirlar Mahkamasining “Oʻzbekiston Respublikasining 2002-yilgi asosiy makroiqtisodiy koʻrsatkichlari prognozi va Davlat budjeti parametrlari toʻgʻrisida” 2001-yil 31-dekabrdagi 490-son qarorining 6, 14-bandlari, 12-bandining oltinchi xatboshi va mazkur qarorga 3, 6—10, 12—18-ilovalar.

9. Oʻzbekiston Respublikasi Vazirlar Mahkamasining “Oʻzbekiston Respublikasi Prezidentining “Savdo va umumiy ovqatlanish sohasida soliqqa tortish tizimini yanada takomillashtirish toʻgʻrisida”gi Farmonini amalga oshirish chora-tadbirlari haqida” 2002-yil 13-iyundagi 208-son qarori (Oʻzbekiston Respublikasi QT, 2002-y., 6-son, 31-modda)ning 1-bandi va ushbu qarorga 1—4-ilovalar.

10. Oʻzbekiston Respublikasi Vazirlar Mahkamasining “Oʻzbekiston Respublikasi Vazirlar Mahkamasining “Oʻzbekiston Respublikasining 2002-yilgi asosiy makroiqtisodiy koʻrsatkichlari prognozi va Davlat budjeti parametrlari toʻgʻrisida” 2001-yil 31-dekabrdagi 490-son qaroriga oʻzgartirishlar kiritish haqida” 2002-yil 17-iyundagi 215-son qarori 1-bandining uchinchi va toʻrtinchi xatboshi hamda mazkur qarorga 1-ilova.

11. Oʻzbekiston Respublikasi Vazirlar Mahkamasining “Savdo va umumiy ovqatlanish korxonalariga soliq solish tartibi toʻgʻrisida” 12-iyul 2002-yil 249-son qarori bilan tasdiqlangan Savdo va umumiy ovqatlanish korxonalarining yalpi tushumidan (tovar aylanmasi hajmidan) olinadigan yagona soliqni hisoblab chiqish va toʻlash tartibi toʻgʻrisida Nizomga 1-ilova.

12. Oʻzbekiston Respublikasi Vazirlar Mahkamasining “Oʻzbekiston Respublikasi Hukumatining ayrim qarorlariga oʻzgartirishlar kiritish toʻgʻrisida” 2002-yil 5-noyabrdagi 379-son qaroriga ilovaning 1-bandi va 2-bandning “v” kichik bandi.

13. Oʻzbekiston Respublikasi Vazirlar Mahkamasining “Soliq solishning soddalashtirilgan tizimiga oʻtgan mikrofirmalar va kichik korxonalarga soliq solish tartibi toʻgʻrisida” 15.04.1998-yil 159-son qarori bilan tasdiqlangan Mikrofirmalar va kichik korxonalar uchun soliq solishning soddalashtirilgan tizimini qoʻllash Tartibining V boʻlim 4-bandi.

Vazirlar Mahkamasining 2002-yil 30-dekabrdagi 455-son qaroriga 26-ILOVA

Oʻzbekiston Respublikasi Hukumatining ayrim qarorlariga 2003-yil 1-yanvardan boshlab kiritilayotgan oʻzgartirish va qoʻshimchalar

ROʻYXATI

4. Oʻzbekiston Respublikasi Vazirlar Mahkamasining “Budjet tashkilotlarini mablagʻ bilan taʼminlash tartibini takomillashtirish toʻgʻrisida” 1999-yil 3-sentabrdagi 414-son qarorining 4-bandida “2 yil muddatga” soʻzlari “2005-yil 1-yanvargacha” soʻzlari bilan almashtirilsin.

5. Oʻzbekiston Respublikasi Vazirlar Mahkamasining “Sogʻlom avlod” davlat dasturi toʻgʻrisida” 2000-yil 15-fevraldagi 46-son qaroriga 1-ilovaning “Tadbirlar nomi” ustunida 54-bandda “darsliklar toʻplami bilan bepul taʼminlash” soʻzlari “oʻquv yili tamom boʻlgandan keyin maktab kutubxona fondiga qaytariladigan darsliklar toʻplami bilan bepul taʼminlash” soʻzlari bilan almashtirilsin.

7. Oʻzbekiston Respublikasi Vazirlar Mahkamasining “Bozorni isteʼmol tovarlari bilan toʻldirishni ragʻbatlantirish hamda ishlab chiqaruvchilar va savdo tashkilotlarining oʻzaro munosabatlarini takomillashtirish chora-tadbirlari toʻgʻrisida” 2002-yil 13-noyabrdagi 390-son qarori 1-bandining oltinchi xatboshiga “va zargarlik buyumlaridan” soʻzlaridan keyin “kir sovun va atir sovun, shuningdek benzin” soʻzlari qoʻshilsin.