Qimmatli qogʻozlar bozori toʻgʻrisidagi Oʻzbekiston Respublikasi qonunchiligining buzilishiga doir ishlarni koʻrib chiqish va jazo qoʻllash tartibi toʻgʻrisida nizomni tasdiqlash haqida (1131-son)

23.04.2002

OʻZBEKISTON RESPUBLIKASI DAVLAT MULKI QOʻMITASI HUZURIDAGI QIMMATBAHO QOGʻOZLAR BOZORI FAOLIYATINI MUVOFIQLASHTIRISH VA NAZORAT QILISH MARKAZI BOSH DIREKTORINING

buyrugʻi

[Oʻzbekiston Respublikasi Adliya vazirligi tomonidan 2002-yil 23-aprelda 1131-son bilan davlat roʻyxatidan oʻtkazilgan]

Oʻzbekiston Respublikasining “Qimmatli qogʻozlar bozori toʻgʻrisida”gi Qonuniga va Oʻzbekiston Respublikasi Vazirlar Mahkamasining 2019-yil 7-avgustdagi 650-son “Oʻzbekiston Respublikasi Kapital bozorini rivojlantirish agentligi va Oʻzbekiston Respublikasi Kapital bozorini rivojlantirish agentligi huzuridagi Kapital bozorini rivojlantirishga koʻmaklashish jamgʻarmasi toʻgʻrisidagi nizomlarni tasdiqlash haqida”gi qaroriga muvofiq buyuraman:

1. Qimmatli qogʻozlar bozori toʻgʻrisidagi Oʻzbekiston Respublikasi qonunchiligining buzilishiga doir ishlarni koʻrib chiqish va jazo qoʻllash tartibi toʻgʻrisidagi nizom ilovaga muvofiq tasdiqlansin.

2. Mazkur buyruq Oʻzbekiston Respublikasi Adliya vazirligida davlat roʻyxatidan oʻtkazilgandan keyin bir oy oʻtgach kuchga kirtilsin.

3. Oʻzbekiston Respublikasi Davlat mulki qoʻmitasi huzuridagi Qimmatli qogʻozlar bozori faoliyatini muvofiqlashtirish va nazorat qilish markazi tomonidan 1998-yil 4-apreldagi 05-1-18/296-son bilan tasdiqlangan Qimmatli qogʻozlar toʻgʻrisidagi qonun hujjatlarini buzganlik uchun sanksiyalarni rasmiylashtirish va qoʻllash tartibi toʻgʻrisidagi nizom (roʻyxat raqami 439-son 1998-yil 22-may), shuningdek Oʻzbekiston Respublikasi Davlat mulki qoʻmitasi huzuridagi Qimmatli qogʻozlar bozori faoliyatini muvofiqlashtirish va nazorat qilish markazi tomonidan 2001-yil 4-iyundagi 2001-5-son bilan tasdiqlangan “Qimmatli qogʻozlar toʻgʻrisidagi qonun hujjatlarini buzganlik uchun sanksiyalarni rasmiylashtirish va qoʻllash tartibi haqidagi nizomga oʻzgartirish va qoʻshimchalar kiritish toʻgʻrisidagi buyruq (roʻyxat raqami 439-1-son, 2001-yil 16-iyun) oʻz kuchini yuqotgan deb hisoblansin.

Bosh direktor M.S. YUNUSMATOV

Toshkent sh.,

2002-yil 13-mart,

2002-04-son

Oʻzbekiston Respublikasi Davlat mulki qoʻmitasi huzuridagi Qimmatli qogʻozlar bozori faoliyatini muvofiqlashtirish va nazorat qilishi markazi bosh direktorining 2002-yil 13-martdagi 2002-04-son buyrugʻi bilanTASDIQLAGAN

Qimmatli qogʻozlar bozori toʻgʻrisidagi Oʻzbekiston Respublikasi qonunchiligining buzilishiga doir ishlarni koʻrib chiqish va jazo qoʻllash tartibi toʻgʻrisidagi nizomni tasdiqlash haqidagi

NIZOM

Mazkur Nizom Oʻzbekiston Respublikasining “Qimmatli qogʻozlar bozori toʻgʻrisida”gi va “Aksiyadorlik jamiyatlari va aksiyadorlarning huquqlarini himoya qilish toʻgʻrisida”gi Qonunlari, shuningdek Oʻzbekiston Respublikasi boshqa normativ huquqiy hujjatlari talablarini buzganligi uchun ishlarni koʻrib chiqish va sanksiyalarni qoʻllash tartibini belgilaydi (bundan buyon matnda — qimmatli qogʻozlar bozori toʻgʻrisidagi qonunchilik hujjatlari deb yuritiladi).

I. UMUMIY QOIDALAR

1. Qimmatli qogʻozlar bozori toʻgʻrisidagi qonunchilik hujjatlarini buzgan qimmatli qogʻozlar bozori ishtirokchilariga qoʻllaniladi:

Oʻzbekiston Respublikasi “Qimmatli qogʻozlar bozori toʻgʻrisida”gi Qonunining 56-moddasida va Oʻzbekiston Respublikasi Vazirlar Mahkamasining 2019-yil 7-avgustdagi 650-son qarori bilan tasdiqlangan Oʻzbekiston Respublikasi Kapital bozorini rivojlantirish agentligi toʻgʻrisidagi nizomda nazarda tutilgan sanksiyalar.

Qimmatli qogʻozlar bozori toʻgʻrisidagi qonunchilik hujjatlarini buzgan qimmatli qogʻozlar bozori ishtirokchilarining mansabdor shaxslariga Oʻzbekiston Respublikasi Maʼmuriy javobgarlik toʻgʻrisidagi Kodeksining 1741-moddasida nazarda tutilgan maʼmuriy jazo qoʻllaniladi.

2. Oʻzbekiston Respublikasi Kapital bozorini rivojlantirish agentligi (bundan buyon matnda Agentlik deb yuritiladi) va uning hududiy organlari ishlarni koʻrib chiqish va sanksiyalarni qoʻllash boʻyicha vakolatli organlardir.

Mazkur Nizomning 1-bandining ikkinchi xatboshisida nazarda tutilgan sanksiyalarni Agentlik va uning hududiy organlari tomonidan qoʻllash, qonunchilik hujjatlarida nazarda tutilgan hollarda va tartibda amalga oshiriladi.

Oʻzbekiston Respublikasi Maʼmuriy javobgarlik toʻgʻrisidagi Kodeksining 245-moddasiga muvofiq ushbu Kodeksning 1741-moddasida nazarda tutilgan maʼmuriy huquqbuzarliklar boʻyicha ishlar maʼmuriy ishlar boʻyicha sudyalar tomonidan koʻrib chiqiladi.

3. Agentlik va uning hududiy organlari:

ishning holatini oʻz vaqtida aniqlash va uni qonunchilik hujjatlarida belgilangan tartibda hal etish;

qabul qilingan qaror ijrosini nazorat qilishni taʼminlaydilar.

4. Agentlikka qimmatli qogʻozlar bozori professional ishtirokchilari va birjalar hamda Agentlik tomonidan qimmatli qogʻozlarni chiqarilishi roʻyhatga olingan emitentlarga nisbatan qimmatli qogʻozlar bozori toʻgʻrisidagi qonunchilik hujjatlarini buzganlik toʻgʻrisidagi ishlar tegishli.

Agentlikning hududiy organlariga:

a) ular tomonidan qimmatli qogʻozlarni chiqarilishi roʻyhatga olingan emitentlarga nisbatan qimmatli qogʻozlar bozori toʻgʻrisidagi qonunchilik hujjatlarini buzganlik toʻgʻrisidagi;

b) agar ularning hududida joylashgan qimmatli qogʻozlar bozorining boshqa ishtirokchilari tomonidan qimmatli qogʻozlar bozori toʻgʻrisidagi qonunchilik hujjatlari buzilganlik toʻgʻrisidagi ishlar tegishlidir, mazkur Nizomning 4-bandining birinchi xatboshisida nazarda tutilgan hollarni istisno etganda.

Agar qimmatli qogʻozlar bozori toʻgʻrisidagi qonunchilik hujjatlarini buzish yuridik shaxsning tizimidagi boshqarmasi tomonidan amalga oshirilgan boʻlsa, mazkur ish u joylashgan joydagi Agentlikning hududiy organi tomonidan koʻrib chiqiladi.

5. Agentlik quyidagilarga haqli:

qimmatli qogʻozlar bozorining har qanday ishtirokchisiga (bir nechta ishtirokchisiga) nisbatan ishni ish yuritishga qabul qilish va koʻrib chiqish yoki Agentlikning tegishli hududiy organiga koʻrib chiqish uchun topshirish;

Agentlikning hududiy organi ish yurituvidagi ishni uni koʻrib chiqishning istalgan bosqichida qabul qilish.

II. Qimmatli qogʻozlar bozori toʻgʻrisidagi qonunchilik hujjatlari buzilganligi toʻgʻrisidagi ishlarni koʻrib chiqish tartibi

6. Agentlik yohud uning hududiy organlari tomonidan qimmatli qogʻozlar bozori toʻgʻrisidagi qonunchilik hujjatlari buzilganlik toʻgʻrisidagi ishlarni ish yuritishga qabul qilish uchun quyidagilar asos hisoblanadi:

jismoniy va yuridik shaxslarning ariza shikoyat va boshqa xabarlari;

hujjatlar va boshqa hujjatli manbalar, shu jumladan tekshirishlar davomida olingan, shuningdek hisobot tarzida olingan maʼlumotlar;

ommaviy axborot vositalari xabarlari;

qimmatli qogʻozlar bozori ishtirokchilarining bunday buzilishlarga olib keladigan xatti-harakatlari (harakatsizligi) haqida dalolat beruvchi boshqa maʼlumotlar

7. Qimmatli qogʻozlar bozori toʻgʻrisidagi qonunchilik hujjatlarini buzganlik toʻgʻrisidagi ishlarni koʻrib chiqish uchun Agentlik tomonidan (Agentlikning hududiy organlari) qimmatli qogʻozlar bozori toʻgʻrisidagi Oʻzbekiston Respublikasi qonunchilik hujjatlarini buzganlik toʻgʻrisidagi ishlarni koʻrib chiqish boʻyicha komissiya (keyingi oʻrinlarda — komissiya deb yuritiladi) tuziladi.

Muayyan ishni koʻrib chiqish uchun komissiya shaxsiy tarkibi komissiya raisi, aʼzolari, shuningdek komissiya aʼzosi boʻlmagan kotibdan iborat tarkibda Agentlik bosh direktori (Agentlikning hududiy organi boshligʻi) tomonidan ishni ish yuritishga qabul qilish toʻgʻrisidagi qarorda belgilanadi.

Komissiya tarkibiga Agentlik (Agentlikning hududiy organi) mansabdor shaxslari va hodimlari, shuningdek boshqa davlat boshqaruvi va nodavlat notijorat tashkilotlarining vakillari, shu jumladan qimmatli qogʻozlar bozori professional ishtirokchilarining birlashmalari (uyushmalari) vakillari kiritilishi mumkin. Komissiya aʼzolarining umumiy soni toq boʻlishi va uch kishidan kam boʻlmasligi lozim.

Komissiya majlisi uchun kvorum komissiya aʼzolarining umumiy sonini kamida 75 foizini tashkil etadi.

Komissiya aʼzosining uzrli sabablariga koʻra ishtirok etish mumkin boʻlmagan taqdirda, uning yoʻqligi butun davr uchun yohud ishni koʻrib chiqish butun muddati davomida Agentlik bosh direktorining (Agentlikning hududiy organi) buyrugʻi asosida almashtirish amalga oshiriladi.

8. Agentlik boshqarmalari (Agentlikning hududiy organlari boʻlimlari) boshliqlari Agentlik direktoriga (Agentlik hududiy organi boshligʻiga) qimmatli qogʻozlar bozori toʻgʻrisidagi qonunchilik hujjatlarini buzganlik toʻgʻrisidagi ishni koʻrib chiqishda asoslagan materiallar asosida taqdim etadi.

Maʼmuriy huquqbuzarlik belgilari aniqlangan taqdirda Agentlik boshqarmalari (Agentlikning hududiy organlari boʻlimlari) boshliqlari oʻz vakolatlariga muvofiq Agentlik direktoriga (Agentlikning hududiy organi boshligʻiga) qimmatli qogʻozlar bozori toʻgʻrisidagi qonunchilik hujjatlarini buzganlik toʻgʻrisidagi ishlarni koʻrib chiqishga qabul qilmasdan, ularni sudga joʻnatishni asoslangan materiallar asosida taqdim etadilar.

9. Yetarli asoslar mavjud boʻlganda Agentlik direktori (Agentlikning hududiy organi boshligʻi) ishlarni qabul qilish toʻgʻrisida qaror qabul qiladi (1-ilova) va ishni koʻrib chiqishi uchun komissiyaga yuboradi.

Ishlarni qabul qilish toʻgʻrisidagi qarorning nusxasi uch kundan kechiktirmasdan javobgarlikka tortiladigan shaxsga buyurtma xat bilan yuborilishi yoki imzo ostida topshirilishi yohud (agar mavjud boʻlsa) elektron pochta orqali yuborilishi lozim.

Qimmatli qogʻozlar bozori toʻgʻrisidagi qonunchilik hujjatlarini buzganlik toʻgʻrisidagi ish qonun buzilish holatlari aniqlangan kundan boshlab ikki oy ichida ish yurituvga qabul qilinadi.

10. Qimmatli qogʻozlar bozori toʻgʻrisidagi qonunchilik hujjatlarini buzganlik toʻgʻrisidagi ish ish yurituvga qabul qilinishi mumkin emas va koʻrib chiqilayotgan ish quyidagi hollarda tugatilishi kerak:

qimmatli qogʻozlar bozori toʻgʻrisidagi qonunchilik hujjatlari buzilmaganligi;

yuridik shaxsning toʻlovga qobiliyatsiz (bankrot) deb tan olinishi yoki tugatilishi yoxud jismoniy shaxs vafot etganligi munosabati bilan;

javobgarlikni belgilovchi qonunchilik normasining bekor qilinishi;

javobgarlikka tortilayotgan qimmatli qogʻozlar bozori ishtirokchisiga (uning mansabdor shaxsiga) nisbatan mazkur xolat yuzasidan jinoyat ishi mavjud boʻlganda;

mazkur Nizomga muvofiq javobgarlika tortilayotgan qimmatli qogʻozlar bozorining ishtirokchisiga nisbatan qimmatli qogʻozlar bozori toʻgʻrisidagi qonunchilik hujjatlarini buzganlik toʻgʻrisidagi ishning mavjudligi;

javobgarlikka tortilayotgan shaxsga nibatan Agentlikning (Agentlikning hududiy organi) sanksiyalarni qoʻllash toʻgʻrisidagi qarori yohud ish yuritishni toʻxtatish toʻgʻrisidagi bekor qilinmagan qaror mavjudligi;

qimmatli qogʻozlar bozori ishtirokchisiga nisbatan xuddi shu ish boʻyicha sudning ish yurituvida ishning yoki ushbu xolat boʻyicha sudning qonuniy kuchga kirgan qarorning mavjudligi;

qimmatli qogʻozlar bozori toʻgʻrisidagi qonunchilik hujjatlarini buzilganligi toʻgʻrisidagi ish jismoniy yoki yuridik shaxsning ariza, shikoyat yoki boshqa xabari asosida buzilgan huquqlar tiklanganligi munosabati bilan uni koʻrib chiqmasdan qoldirish toʻgʻrisida yozma yohud elektron murojaati kelib tushganda.

11. Qimmatli qogʻozlar bozori toʻgʻrisidagi qonunchilik hujjatlarini buzganlik toʻgʻrisidagi ish komissiya tomonidan ishni koʻrib chiqishga qabul qilish toʻgʻrisida qaror qabul qilingan kundan eʼtiboran bir oy ichida koʻrib chiqiladi. Ishni koʻrib chiqish muddati Agentlik direktori (hududiy organ boshligʻi) tomonidan bir oydan ortiq boʻlmagan muddatga uzaytirilishi mumkin.

12. Ishda ishtirok etayotgan shaxslar yigʻilish oʻtkaziladigan sanadan kamida uch kun oldin ishni koʻrib chiqish joyi va vaqti toʻgʻrisida yozma ravishda xabardor qilinadi. Ishda ishtirok etayotgan shaxslar javobgarlikka tortiladigan shaxs, huquqlari buzilgan shaxs, ekspert va tarjimon, shuningdek ish boʻyicha oydinlik kiritishi mumkin boʻlgan har qanday vaziyatni biladigan shaxs sifatida tan olinadi.

Komissiyaning majlisiga yozma xabarnoma ishda ishtirok etuvchi shaxsga buyurtma xat bilan yuboriladi yoki imzo ostida topshiriladi yohud xabarnoma faktini aniqlashni taʼminlovchi aloqa vositalaridan (telefaks, telefon, elektron pochta va boshqalar) foydalangan holda yuboriladi va yuridik shaxsning nomi (jismoniy shaxsning familiyasi, ismi, sharifi) koʻrsatiladi.

13. Ishda ishtirok etayotgan shaxslar komissiya majlislariga kelishlari va uzlariga maʼlum boʻlgan maʼlumot va holatlar hamda ishga tegishli hujjatlarni taqdim etishi haqida xabar berishlari lozim.

Agar shaxslar ishni koʻrib chiqish joyi va vaqti toʻgʻrisida belgilangan tartibda xabardor qilingan boʻlsa, ish arizachi va javobgar sifatida jalb qilingan shaxslar ishtirokisiz koʻrib chiqilishi mumkin.

14. Ishni koʻrib chiqishga tayyorgarlik koʻrish jarayonida komissiya quyidagi huquqlarga ega:

zarur hujjatlarni taqdim etishni talab qilish, ulardan nusxalar olish va ularni ish materiallariga qonunchilik hujjatlarida belgilangan tartibda qoʻshish;

ishda ishtirok etayotgan shaxslardan, shu jumladan ularning rahbarlari (mansabdor shaxslari) va xodimlaridan yozma va ogʻzaki tushuntirishlar olish;

soʻrovlar asosida qimmatli qogʻozlar bozorida qonun buzilish holatlarini oʻrganish uchun zarur boʻlgan qimmatli qogʻozlar bozori qatnashchilariga nisbatan boshqa davlat organlaridan axborot va materiallarni olish, shuningdek mazkur faktlarni birgalikda oʻrganish;

kelishuv asosida boshqa shaxslarni ishda ishtirok etishga jalb qilish.

Komissiya ish holatlarini oʻz vaqtida, har tomonlama va holisona aniqlash uchun boshqa choralar xam koʻrish huquqiga ega.

15. Ishni koʻrib chiqish komissiya tarkibini eʼlon qilish bilan boshlanadi. Komissiya raisi quyidagilarni eʼlon qiladi: qaysi ishni koʻrib chiqish kerakligi va shaxslar, ishda ishtirok etayotgan shaxslarga ularning huquq va majburiyatlarini tushuntiradi, ishda ishtirok etayotgan shaxslarning vakolatlarini belgilaydi. Shundan soʻng qimmatli qogʻozlar bozori toʻgʻrisidagi qonunchilik hujjatlarini buzganlik toʻgʻrisidagi ishni ish yurituvga qabul qilish toʻgʻrisida qaror qabul qiladi.

16. Yigʻilishda komissiya quyidagi masalalarni aniqlaydi:

qimmatli qogʻozlar bozori toʻgʻrisidagi qonunchilik hujjatlari buzilganligidan dalolat beruvchi maʼlumotlarning mavjudligi;

qonunbuzarlikni ixtiyoriy ravishda bartaraf etish uchun barcha choralarning koʻrilganligi;

javobgarlikka tortiladigan shaxsning ishni kechiktirish va bunday kechikishning sabablari, hujjatlar bilan oldindan tanishish iltimosnomalari va boshqalar.

17. Qimmatli qogʻozlar bozori toʻgʻrisidagi qonunchilik hujjatlarini buzganlik toʻgʻrisidagi ishni koʻrib chiqishda ularning rahbarlari va/yoki ularning vakillari yuridik shaxslar nomidan ishtirok etishga haqlidir.

Yuridik shaxs rahbarlari oʻz vakolatlarini, oʻz hizmat mavqeyini tasdiqlovchi hujjatlar bilan tasdiqlaydilar.

Vakillarning vakolatlari ishonchnomada belgilanishi kerak.

18. Koʻrib chiqilayotgan ish boʻyicha maxsus bilimlarga ehtiyoj paydo boʻlganda, komissiya davlat boshqaruv organlari (vazirliklar va idoralar), shuningdek xoʻjalik yurituvchi subyektlar va tashkilotlarning vakillaridan ekspertni kelishuv asosida jalb qilish huquqiga ega.

Banklar tomonidan qimmatli qogʻozlar bozori toʻgʻrisidagi qonunchilik hujjatlarini buzganlik toʻgʻrisidagi ishlarni koʻrib chiqishda ekspert sifatida Oʻzbekiston Respublikasi Markaziy bankining vakolatli vakili kelishilgan holda taklif etiladi.

19. Javobgarlikka tortilayotgan shaxs komissiyasi tomonidan taklif etilgan ekspertning nomzodidan norozi boʻlgan taqdirda, mazkur shaxs oʻz hisobidan boshqa ekspertni taklif qilishga haqli.

20. Ekspert ekspertiza predmeti bilan bogʻliq ish materiallari bilan tanishish, xulosa berish uchun zarur boʻlgan qoʻshimcha ish materiallari berish toʻgʻrisida iltimosnoma kiritish, ishni koʻrib chiqishda yigʻilishda ishtirok etish va ishda ishtirok etayotgan shaxsga va boshqa shaxslarga savollar berish huquqiga ega.

21. Javobgarlikka tortiladigan shaxs (uning vakili) quyidagi huquqlarga ega:

ish materiallari bilan tanishib chiqish va ulardan koʻchirmalar olish;

dalillarni taqdim etish;

dalillarni tekshirish va ishni muhokama qilishda ishtirok etish;

ariza berish;

ish boʻyicha qaror ustidan shikoyat qilish;

ogʻzaki va yozma tushuntirishlar berish;

advokat xizmatlaridan foydalanish;

boshqa huquqlardan foydalanish.

22. Koʻrib chiqilayotgan ish boʻyicha dalillar aniq maʼlumotlar boʻlib, uning asosida komissiya qonun buzilishining mavjudligi yoki mavjud emasligi, shuningdek ishni toʻgʻri koʻrib chiqish uchun zarur boʻlgan boshqa holatlarni aniqlaydi.

Ishda ishtirok etayotgan shaxslar koʻrib chiqilayotgan ish boʻyicha dalil sifatida xizmat qilishi mumkin boʻlgan holatlarni aniqlash uchun maʼlumotlar taqdim etishlari shart va bila turib yolgʻon (notoʻgʻri) maʼlumotlarni taqdim etganligi uchun javobgardirlar.

23. Komissiya majlisida kotib komissiya raisi va barcha aʼzolar tomonidan imzolanadigan majlis bayonnomasini yuritadi. Kotib boʻlmagan taqdirda majlis bayonnomasini yuritish komissiya raisi tomonidan komissiya aʼzolaridan biriga topshirilishi mumkin.

24. Ishni koʻrib chiqish kechiktirilishi mumkin:

qoʻshimcha dalillarni olish yoki ekspert va (yoki) boshqa shaxslarni ishga jalb qilish zarurligi munosabati bilan;

ushbu yigʻilishda ishni koʻrib chiqish mumkin boʻlmagan boshqa hollarda.

Ishni kechiktirganda, ishni koʻrib chiqish muddati toʻxtamaydi, ammo koʻrib chiqish jarayoni boshidan boshlanadi.

25. Agentlikda (Agentlikning hududiy organida) sudda va (yoki) soliq va huquqni muhofaza qilish organlarida boshqa koʻrib chiqilayotgan ishning natijalari uchun ahamiyatga ega boʻlganda, komissiya tomonidan talab qilingan maʼlumotlar (axborot, dalillar) taqdim etilmagan taqdirda koʻrib chiqish toʻxtatilib qoʻyilishi mumkin.

Ishni koʻrib chiqish uning koʻrib chiqilishini toʻxtatishga sabab boʻlgan holatlar bartaraf etilgandan keyin qayta tiklanadi.

Ishni koʻrib chiqish toʻxtatilganda ishni koʻrib chiqish muddati toʻxtatiladi va ish qayta boshlangan paytdan boshlab davom etadi. Ishni koʻrib chiqish ishni toʻxtatib qoʻyishdan oldin komissiya majlisi tugagan paytdan boshlab davom etadi.

26. Komissiya majlisining bayonnomasida komissiyaning ishni koʻrib chiqishni kechiktirish, toʻxtatib turish yoki qayta tiklash toʻgʻrisidagi qarori aks ettiriladi. Ishni koʻrib chiqishni kechiktirish, toʻxtatib turish yoki qayta tiklash toʻgʻrisidagi bayonnomadan koʻchirma komissiya raisi tomonidan imzolanadi va qaror qabul qilingan kundan boshlab uch kun muddatda javobgarlikka tortiladigan shaxsga yuboriladi.

261. Mazkur Nizomning 6-bandiga muvofiq Agentlik direktori (Agentlikning ruxsati bilan ishda ishtirok etayotgan shaxslar tomonidan sodir etilgan qoʻshimcha qoidabuzarliklarga taalluqli hujjatlar ish yurituviga qabul qilingan ishlarga qoʻshib qoʻyiladi.

Koʻrsatilgan hujjatlar ishga qoʻshilganda majlis bayonnomasida komissiyaning maqsadli qarori aks ettiriladi. Komissiya raisi tomonidan imzolangan mazkur materiallarni kiritish toʻgʻrisidagi majlis bayonnomasidan koʻchirma bayonnoma imzolangan kundan eʼtiboran uch kun muddatda javobgarlikka tortiladigan shaxsga (shaxslarga) yuboriladi. Bunda mazkur Nizomning 11-bandida belgilangan tartibda ishni koʻrib chiqish muddati uzaytirilishi mumkin.

Ishda ishtirok etmagan shaxs (shaxslar) tomonidan sodir etilgan qoidabuzarliklar aniqlangan taqdirda, komissiya taqdimnomasiga asosan Agentlik direktori (Agentlikning ishni alohida ish yuritishga ajratish toʻgʻrisida qaror qabul qiladi. Mazkur ishni koʻrib chiqish muddatini hisoblash ishni alohida ish yuritishga ajratish toʻgʻrisidagi qaror qabul qilingan kundan boshlanadi.

27. Qimmatli qogʻozlar bozori toʻgʻrisidagi qonunchilik hujjatlarini buzganlik toʻgʻrisidagi ishni koʻrib chiqish natijalari boʻyicha komissiya, majlis bayonnomasida komissiya tomonidan aniqlangan holatlar bayon etiladi va ishni koʻrib chiqish natijasida kelgan xulosalarni belgilovchi qaror qabul qiladi.

Agar qabud qilingan qarordan norozi boʻlgan komissiya raisi yoki aʼzolari oʻz fikrini yozma tarzda bayon qilishga va uni komissiya bayonnomasiga qoʻshib qoʻyishga haqlidir.

28. Komissiya qarori ishda ishtirok etayotgan shaxslar ishtirokisiz, komissiya majlisida ishtirok etayotgan komissiya aʼzolarining oddiy koʻpchilik ovozi bilan ochiq ovoz berish orqali qabul qilinadi.

Komissiya raisi va aʼzolari ovoz berishda betaraf boʻlish huquqiga ega emaslar. Rais oʻz ovozini oxirida taqdim etadi.

29. Komissiya quyidagi qarorlar qabul qilish huquqiga ega:

qimmatli qogʻozlar bozori toʻgʻrisidagi qonunchilik hujjatlari buzilishini bartaraf etish boʻyicha koʻrsatmalar kiritish;

investorlar, qimmatli qogʻozlar egalari, davlat manfaatlari boʻyicha davlat boji toʻlamasdan sudga daʼvo arizasi kiritish;

qimmatli qogʻozlar bozorining professional ishtirokchisi sifatida qimmatli qogʻozlar bozorida professional faoliyatni amalga oshirish uchun berilgan litsenziyaning amal qilishini oʻn ish kunidan ortiq boʻlmagan muddatga toʻxtatib turish;

qonunchilik hujjatlarida nazarda tutilgan hollarda va tartibda qimmatli qogʻozlar bozori ishtirokchilari tomonidan qimmatli qogʻozlar bozorida alohida operatsiyalarni oʻtkazishning oʻn ish kunidan ortiq boʻlmagan muddatga toʻxtatib turish;

qonunchilik hujjatlarida belgilangan tartibda qimmatli qogʻozlar bilan professional faoliyatni amalga oshirish huquqini beruvchi malaka attestatsini toʻxtatib turish yoki mahrum etish;

ishni boshqa vakolatli organlarga yuborish;

ish yuritishni tugatish.

Mazkur bandning ikkinchi — oltinchi xatboshida nazarda tutilgan, qimmatli qogʻozlar bozori toʻgʻrisidagi qonunchilik hujjatlarini buzganlik toʻgʻrisidagi ishni koʻrib chiqish natijalariga qarab bir yoki bir vaqtning oʻzida bir nechta sanksiyalar komissiya qarorida koʻrsatilishi mumkin.

30. Komissiya qaroriga asosan besh kun muddat ichida qimmatli qogʻozlar bozori toʻgʻrisidagi qonunchilik hujjatlarini buzilishini bartaraf etish toʻgʻrisida koʻrsatma rasmiylashtiriladi va/yoki Agentlikning (Agentlikning hududiy organi) 2, 3-ilovaga muvofiq shakldagi qarori chiqariladi.

31. Ish yuritishni tugatish toʻgʻrisidagi qaror mazkur Nizomning 10-bandida (4-ilova) nazarda tutilgan hollarda chiqariladi.

32. Agentlik qarori (koʻrsatmasi) nusxasi Agentlik (Agentlikning hududiy organi) tomonidan qabul qilingan kundan eʼtiboran uch kun ichida buyurtma xat orqali yoki imzo ostida yohud elektron pochta orqali (agar mavjud boʻlsa) qaror chiqarilgan shaxsga topshiriladi va uning arizasiga koʻra huquqlari buzilgan shaxsga hamda qaror ijrosini taʼminlashlari lozim boʻlgan qimmatli qogʻozlar bozori ishtirokchilariga yuboriladi.

Qaror (koʻrsatma) yuborilganligi toʻgʻrisida pochta va boshqa hujjatlar ish materiallariga qoʻshib qoʻyiladi.

33. Agentlik va uning huduiy organlari shaxsning yuqori boshqaruv organiga javobgarlikka tortilgan shaxsni mehnat qonunchiligiga muvofiq uning mansabdor shaxslariga intizomiy javobgarlik choralarini qabul qilish va/yoki ular tomonidan bevosita yetkazilgan zarar miqdorini undirish, agar bu shaxsga moddiy javobgarlik yetkazilgan boʻlsa, tavsiya etishga haqli.

III. Qaror va koʻrsatmalarni bajarish

34. Koʻrsatmani bajarish muddati bir oy, bartaraf etish bir oydan koʻproq vaqtni talab qiladigan qoidabuzarlik hollari bundan mustasno.

35. Qimmatli qogʻozlar bozori ishtirokchilari qarorda belgilangan muddat davomida sanksiyalarni qoʻllash toʻgʻrisidagi qaror ijrosini taʼminlashlari shart.

37. Agentlikning (Agentlik hududiy organining) qarori yoki koʻrsatmasini ijro etgan shaxs, qaror yoki koʻrsatma ijrosi toʻgʻrisidagi dalillarni Agentlikka (Agentlik hududiy organiga) taqdim etadi.

38. Qimmatli qogʻozlar bozori toʻgʻrisidagi qonunchilik hujjatlari buzilishiga yoʻl qoʻygan qimmatli qogʻozlar bozori ishtirokchisini qaror yoki koʻrsatmani ijro etishi yetkazilgan zararni qoplash majburiyatini bajarishdan ozod qilmaydi.

39. Qaror yoki koʻrsatma ijrosi quyidagi hollarda toʻxtatiladi:

yuridik shaxsning toʻlovga qobiliyatsiz (bankrot) deb tan olinishi yoki tugatilishi yoxud jismoniy shaxs vafot etganligi munosabati bilan;

javobgarlikni belgilovchi qonunchilik normasining bekor qilinishi.

40. Qimmatli qogʻozlar bozori ishtirokchilari qaror yoki koʻrsatmani bajarish muddatini uzaytirish toʻgʻrisida iltimosnoma berishlari mumkin.

Mazkur muddatni uzaytirish toʻgʻrisida qaror ishni koʻrib chiqqan komissiya tomonidan qabul qilinadi, mazkur Nizomning 8-bandining uchinchi xatboshisidagi holatlar bundan mustasno.

Agar uzaytirish haqidagi iltimosnoma qanoatlantirilsa, komissiya raisi va aʼzolari tomonidan imzolanadigan komissiya qarori chiqariladi.

IV. Qaror va koʻrsatmalar ustidan shikoyat qilish tartibi

41. Mazkur Nizomning 42-bandida belgilangan tartibda Agentlikning (Agentlik hududiy organining) qarori yoki koʻrsatmasi ustidan shikoyat qilinishi mumkin.

42. Qimmatli qogʻozlar bozori ishtirokchilari qabul qilingan choralardan norozi boʻlgan taqdirda:

Agentlik hududiy organining qarori ustidan oʻzining noroziligi toʻgʻrisidagi ariza bilan Agentlikka yoki sud tartibida;

Agentlik qarorlari ustidan — sud tartibida shikoyat qilishlari mumkin.

Boʻysunuv tartibida yuqori turuvchi organga shikoyat berilganligi, shunday shikoyat shikoyat bilan sudga sudga shikoyat qilish huquqidan mahrum etmaydi.

Qimmatli qogʻozlar bozori ishtirokchilari tomonidan sudga shikoyat berish sud qarori qonuniy kuchga kirgunga qadar ular tomonidan shikoyat qilinayotgan harakat yoki qarorning ijrosini toʻxtatib turadi. Qimmatli qogʻozlar bozori ishtirokchilari tegishli tasdiqlovchi hujjatlarni ilova qilgan holda sudga shikoyat berish toʻgʻrisida Agentlikni (Agentlikning hududiy organini) xabardor qilishlari shart.

43. Agentlik tomonidan arizani koʻrib chiqilishi uning kelib tushgan kundan boshlab 15 kundan kechiktirmay zudlik bilan koʻrib chiqiladi, qoʻshimcha oʻrganish va tekshirishni talab qiluvchi ariza boʻlsa, bir oygacha boʻlgan muddatda amalga oshiriladi.

V. Yakunlovchi qoidalar

46. Qimmatli qogʻozlar bozori ishtirokchilari qimmatli qogʻozlar bozori toʻgʻrisidagi qonunchilik hujjatlarini buzganligi uchun Agentlik yoki uning hududiy organi tomonidan aniqlangan kundan boshlab uch yil mobaynida javobgarlikka tortilishi mumkin.

47. Agentlik va Agentlikning hududiy organi qimmatli qogʻozlar bozori toʻgʻrisidagi qonunchilik hujjatlarini buzganligi va qoʻllanilgan sanksiyalarni hisobga olish reyestrini yuritadi.

Qimmatli qogʻozlar bozori toʻgʻrisidagi qonunchilikning buzilish boʻyicha ish materiallarining har biri alohida papkada saqlanadi.

48. Agentlik va uning hududiy organlari xodimlari oʻz faoliyati davomida olingan tijorat va hizmat maʼlumotlarining maxfiyligiga rioya etishlari shart.

Qimmatli qogʻozlar bozori toʻgʻrisidagi Oʻzbekiston Respublikasi qonunchiligining buzilishiga doir ishlarni koʻrib chiqish va sanksiya qoʻllash tartibi toʻgʻrisidagi nizomga 1-ILOVA

(1-ilova Oʻzbekiston Respublikasi adliya vazirining 2021-yil 30-noyabrdagi 20-mh-sonli buyrugʻi (roʻyxat raqami 3338, 30.11.2021-y.) tahririda — Qonunchilik maʼlumotlari milliy bazasi, 30.11.2021-y., 10/21/3338/1117-son)

Qimmatli qogʻozlar bozori toʻgʻrisidagi Oʻzbekiston Respublikasi qonunchiligining buzilishiga doir ishlarni koʻrib chiqish va sanksiya qoʻllash tartibi toʻgʻrisidagi nizomga 2-ILOVA

(2-ilova Oʻzbekiston Respublikasi adliya vazirining 2021-yil 30-noyabrdagi 20-mh-sonli buyrugʻi (roʻyxat raqami 3338, 30.11.2021-y.) tahririda — Qonunchilik maʼlumotlari milliy bazasi, 30.11.2021-y., 10/21/3338/1117-son)

Qimmatli qogʻozlar bozori toʻgʻrisidagi Oʻzbekiston Respublikasi qonunchiligining buzilishiga doir ishlarni koʻrib chiqish va sanksiya qoʻllash tartibi toʻgʻrisidagi nizomga 3-ILOVA

(3-ilova Oʻzbekiston Respublikasi adliya vazirining 2021-yil 30-noyabrdagi 20-mh-sonli buyrugʻi (roʻyxat raqami 3338, 30.11.2021-y.) tahririda — Qonunchilik maʼlumotlari milliy bazasi, 30.11.2021-y., 10/21/3338/1117-son)

Qimmatli qogʻozlar bozori toʻgʻrisidagi Oʻzbekiston Respublikasi qonunchiligining buzilishiga doir ishlarni koʻrib chiqish va sanksiya qoʻllash tartibi toʻgʻrisidagi nizomga 4-ILOVA

(4-ilova Oʻzbekiston Respublikasi adliya vazirining 2021-yil 30-noyabrdagi 20-mh-sonli buyrugʻi (roʻyxat raqami 3338, 30.11.2021-y.) tahririda — Qonunchilik maʼlumotlari milliy bazasi, 30.11.2021-y., 10/21/3338/1117-son)