Oʻzbekiston Respublikasi Tashqi iqtisodiy faoliyat milliy banki Ustavini tasdiqlash toʻgʻrisida (108-son)

12.02.2018

Oʻzbekiston Respublikasi Vazirlar Mahkamasining

qarori

Oʻzbekiston Respublikasi Prezidentining “Oʻzbekiston Respublikasi Tashqi iqtisodiy faoliyat milliy banki faoliyatini yanada takomillashtirish chora-tadbirlari toʻgʻrisida” 2017-yil 13-noyabrdagi PQ-3383-son qaroriga muvofiq Vazirlar Mahkamasi qaror qiladi:

1. Quyidagilar:

Oʻzbekiston Respublikasi Tashqi iqtisodiy faoliyat milliy banki Ustavi 1-ilovaga muvofiq;

Oʻzbekiston Respublikasi Tashqi iqtisodiy faoliyat milliy banki kengashi (keyingi oʻrinlarda Kengash deb ataladi) tarkibi 2-ilovaga muvofiq tasdiqlansin.

2. Oʻzbekiston Respublikasi Tashqi iqtisodiy faoliyat milliy banki ushbu qaror bilan tasdiqlangan Ustavning Oʻzbekiston Respublikasi Markaziy bankida qonun hujjatlarida belgilangan tartibda roʻyxatdan oʻtkazilishini taʼminlasin.

3. Oʻzbekiston Respublikasi Hukumatining 3-ilovaga muvofiq baʼzi qarorlari oʻz kuchini yoʻqotgan deb hisoblansin.

4. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari S.R. Xolmuradov hamda Oʻzbekiston Respublikasi Tashqi iqtisodiy faoliyat milliy banki boshqaruvi raisi A.K. Mirsoatov zimmasiga yuklansin.

Oʻzbekiston Respublikasining Bosh vaziri A. ARIPOV

Toshkent sh.,

2018-yil 12-fevral,

108-son

Vazirlar Mahkamasining 2018-yil 12-fevraldagi 108-son qaroriga 1-ILOVA

Oʻzbekiston Respublikasi Tashqi iqtisodiy faoliyat milliy banki

USTAVI

1-bob. Umumiy qoidalar

1. Mazkur Ustav Oʻzbekiston Respublikasi tashqi iqtisodiy faoliyat milliy bankining (keyingi oʻrinlarda Bank deb ataladi) maqomi, asosiy vazifalari, funksiyalari, huquq va javobgarligi, faoliyatini tashkil qilish tartibi, shuningdek, uning tomonidan amalga oshiriladigan operatsiyalarni belgilaydi.

2. Oʻzbekiston Respublikasi Vazirlar Mahkamasi Bank muassisi (keyingi oʻrinlarda muassis deb ataladi) hisoblanadi.

3. Bank xoʻjalik yuritish huquqiga asoslangan unitar korxona shaklidagi yuridik shaxs hisoblanadi, mustaqil balansiga ega, oʻz nomidan huquqlarga egalik qiladi va majburiyatlar oladi, sudda daʼvogar va javobgar boʻladi.

Bank xoʻjalik yuritish huquqida oʻziga tegishli boʻlgan mulkka egalik qiladi, undan foydalanadi va uni taqsimlaydi, shuningdek, qonunchilik va mazkur Ustavda belgilangan tartibda bank mulkiga kiradigan va bank faoliyatini amalga oshirish davomida olingan boshqa mulkka ham egalik qiladi.

4. Bank, uning filiallari va vakolatxonalari Oʻzbekiston Respublikasi Davlat gerbi tasviri tushirilgan va oʻz nomi davlat tilida yozilgan muhrga, shuningdek, shtampga, oʻz nomi oʻzbek, ingliz va rus tillarida yozilgan blankalarga, oʻz emblemasiga ega.

Oʻzbekiston Respublikasi Tashqi iqtisodiy faoliyat milliy bankining manzili: Toshkent shahri, Istiqbol koʻchasi, 23.

Bankning elektron pochta manzili: [email protected] va [email protected].

Bankning firma nomi:

davlat tilida: toʻliq — Oʻzbekiston Respublikasi Tashqi iqtisodiy faoliyat milliy banki, qisqartirilgani — “Oʻzmilliybank”;

rus tilida: toʻliq — Natsionalniy bank vneshneekonomicheskoy deyatelnosti Respubliki Uzbekistan, qisqartirilgani — “Uznatsbank”;

ingliz tilida: toʻliq — National Bank for Foreign Economic Activity of the Republic of Uzbekistan, qisqartirilgani — NBU.

5. Bank oʻz faoliyatini tijorat asosida amalga oshiradi.

6. Bank belgilangan tartibda xorijiy mamlakatlarda — respublikaning iqtisodiy sheriklarida tashqi iqtisodiy faoliyat va ikki tomonlama munosabatlarni yanada rivojlantirish, buning asosida milliy ishlab chiqaruvchilar mahsulotlarining eksporti hajmlarini qoʻllab-quvvatlash va ragʻbatlantirish maqsadida vakolatxonalar, filiallar, shuʼba banklar tashkil qiladi.

7. Bank Hukumat topshirigʻiga binoan boshqa davlatlar banklari, xalqaro moliya institutlari va boshqa moliya-kredit tashkilotlari bilan munosabatlarda Oʻzbekiston Respublikasi manfaatlarini himoya qiladi.

8. Bank oʻz faoliyatida Oʻzbekiston Respublikasi Konstitutsiyasiga, Oʻzbekiston Respublikasi qonunlariga, Oʻzbekiston Respublikasi Oliy Majlisi qarorlariga, Oʻzbekiston Respublikasi Prezidentining farmonlari, qarorlari va farmoyishlariga, Oʻzbekiston Respublikasi Vazirlar Mahkamasining qarorlari va farmoyishlariga hamda Oʻzbekiston Respublikasining boshqa meʼyoriy-huquqiy hujjatlariga, shuningdek, mazkur Ustavga amal qiladi.

9. Bank Oʻzbekiston Respublikasi majburiyatlari boʻyicha javob bermaydi, Oʻzbekiston Respublikasi Bank majburiyatlari boʻyicha, bunday majburiyatlarni oʻziga qabul qilgan holatlardan tashqari, javob bermaydi.

2-bob. Bankning asosiy vazifa va funksiyalari

10. Quyidagilar Bankning asosiy vazifalari hisoblanadi:

tashqi iqtisodiy faoliyatni amalga oshirish;

kichik biznes va xususiy tadbirkorlikni qoʻllab-quvvatlash;

chakana bank xizmatlari koʻrsatish;

innovatsion va investitsion faoliyatni amalga oshirish.

11. Bank oʻziga yuklangan vazifalarga muvofiq quyidagi funksiyalarni amalga oshiradi:

a) tashqi iqtisodiy faoliyat sohasida:

yetakchi xorijiy banklar va xalqaro moliya institutlari bilan hamkorlik aloqalarini faol rivojlantirishni, shu jumladan, amalga oshiriladigan loyihalarni birgalikda moliyalashtirish va oʻzaro hisob-kitoblar mexanizmining xorij amaliyotida keng qoʻllaniladigan usullarni joriy qilish yoʻli bilan amalga oshiradi;

iqtisodiyot tarmoqlariga ilgʻor texnologiyalarni joriy qilish, xomashyoni chuqur qayta ishlash, sanoat korxonalarini modernizatsiyalash va texnologik qayta qurollantirish, respublikaning eksport salohiyatini kengaytirishga qaratilgan loyihalarni moliyalashtirish uchun xorijiy kredit liniyalarini jalb qilishni taʼminlaydi;

xalqaro miqyosda Bank imijini oshirish va tashqi iqtisodiy faoliyatni, shu jumladan xorijiy mamlakatlarda vakolatxonalar, filiallar, shuʼba banklar ochish, xorijiy hamkorlar va tashqi iqtisodiy faoliyat subyektlari ishonchini mustahkamlash uchun bank ishini yuritish tajribasi va ilgʻor amaliyotini faol joriy qilish yoʻli bilan yanada rivojlantiradi;

eksport, import, valyuta operatsiyalari, shuningdek, boshqa xalqaro hisob-kitoblar boʻyicha respublikaning xalqaro toʻlovlarini tashkil qiladi va oʻtkazadi, loyihalarni birgalikda moliyalashtirish va oʻzaro hisob-kitoblarni amalga oshirishning xorij amaliyotida keng qoʻllaniladigan mexanizmlarini joriy qiladi, tashqi iqtisodiy faoliyatni rivojlantiradi;

kreditlar, depozitlar, omonatlar, qarzlar, shuningdek, qonunchilik va xalqaro bank amaliyotiga muvofiq boshqa shakllarda xorijiy valyutadagi mablagʻlarni jalb qiladi;

xorijiy davlatlar va xalqaro moliya institutlari bilan valyuta-moliyaviy hamda kredit-hisob-kitob munosabatlarini takomillashtiradi, ularning samaradorligini oshiradi, kreditlash va hisob-kitoblarning eng tejamkor va ilgʻor shakllarini qoʻllaydi;

xorijiy banklar, konsern, firma va boshqa hamkorlar aybi bilan shartnomani bajarishda toʻlanmagan mablagʻlarni undirish boʻyicha Bank mijozlariga yordam koʻrsatadi;

xorijiy banklar bilan bevosita korrespondent munosabatlarini oʻrnatadi, ular va xalqaro moliya institutlari bilan hamkorlik munosabatlarini rivojlantiradi;

b) kichik biznes va xususiy tadbirkorlikni qoʻllab-quvvatlash sohasida:

respublikada kichik biznes va xususiy tadbirkorlikni rivojlantirishga yordam beradi, tadbirkorlik subyektlariga biznesni tashkil qilish, yuritish va kengaytirishda amaliy va moliyaviy yordam koʻrsatadi;

kichik biznes va xususiy tadbirkorlik subyektlariga barcha turdagi bank xizmatlari, moliyaviy maslahat va axborot koʻmagi, shu jumladan yangi investitsion va innovatsion gʻoyalarni izlash va amalga oshirish, jahon bozorlarini tahlil qilish, ishlab chiqarilgan mahsulot eksportini moliyalashtirish masalalarida yordam koʻrsatadi;

innovatsion tadbirkorlikni joriy qilishni, yangi tadbirkorlik tashabbuslari — startaplar — yoshlar, eng avvalo, oliy va oʻrta maxsus, kasb-hunar taʼlimi muassasalari bitiruvchilarining loyihalarini faol qoʻllab-quvvatlaydi;

yangi investitsion va innovatsion gʻoyalarni izlash va amalga oshirish, jahon bozorlarini tahlil qilish, ishlab chiqarilgan mahsulot eksportini moliyalashtirish masalalarida amaliy, moliyaviy va axborot koʻmagi koʻrsatadi;

v) chakana bank xizmatlari koʻrsatish sohasida:

aholi va tadbirkorlik subyektlariga chakana bank xizmatlari koʻrsatishni rivojlantiradi, mavjud xizmatlarni kengaytirish va takomillashtirish, kredit, moliya, kassa va boshqa bank xizmatlarining yangi shakllarini zamonaviy axborot-kommunikatsion va innovatsion texnologiyalarni keng qoʻllash yoʻli bilan joriy qiladi;

yetakchi xorijiy banklar va moliya institutlari tomonidan keng qoʻllaniladigan tadbirkorlik subyektlari uchun bank mahsulotlari va xizmatlarining yangi shakllarini ishlab chiqadi va joriy qiladi;

aholi va tadbirkorlar uchun xaridorgir boʻlgan mahsulot va xizmatlarni joriy qilish maqsadida respublikaning moliya institutlari bilan faol hamkorlikni amalga oshiradi;

butunjahon axborot Internet tarmogʻi imkoniyatlari vositasida onlayn tartibida va plastik kartochkalar orqali bank xizmatlarini amalga oshirish mexanizmini takomillashtiradi;

chakana bank xizmatlarini rivojlantiradi, kengaytiradi va takomillashtiradi, shuningdek, yetakchi xorijiy banklar va moliya institutlari tomonidan keng qoʻllaniladigan yangi turdagi bank xizmatlari va mahsulotlarini joriy qiladi;

respublika moliya institutlari bilan hamkorlikni amalga oshiradi, butun jahon axborot Internet tarmogʻi imkoniyatlari vositasida onlayn tartibida va plastik kartochkalar orqali bank xizmatlarini amalga oshirish mexanizmini takomillashtiradi;

g) innovatsion va investitsion faoliyat sohasida:

eksportga yoʻnaltirilgan va import oʻrnini bosuvchi ishlab chiqarishlarni tashkil qilish va rivojlantirish uchun milliy va xorijiy valyutada kreditlar berishni amalga oshiradi;

iqtisodiyot tarmoqlariga ilgʻor texnologiyalarni joriy qilish, xomashyoni chuqur qayta ishlash, sanoat korxonalarini modernizatsiyalash va texnologik qayta qurollantirish, respublikaning eksport salohiyatini kengaytirishga qaratilgan loyihalar va dasturlarni moliyalashtiradi;

innovatsion tadbirkorlikni joriy qilish, yoshlarning yangi tadbirkorlik tashabbuslarini amalga oshirishni qoʻllab-quvvatlaydi;

valyuta mablagʻlarini toʻplaydi;

ichki, xalqaro moliya bozorlariga valyuta mablagʻlarini joylashtiradi.

Bank, shuningdek, qonunchilik doirasida, xalqaro bank amaliyotiga muvofiq milliy va xalqaro valyutada boshqa bank operatsiyalarini amalga oshiradi.

3-bob. Bankning huquqlari va javobgarligi

12. Bank oʻziga yuklangan vazifa va funksiyalarni amalga oshirish uchun quyidagi huquqlarga ega:

Oʻzbekiston Respublikasi Prezidenti va Vazirlar Mahkamasining qarorlariga muvofiq amalga oshiriladigan iqtisodiyotning ustuvor tarmoqlaridagi loyihalarni, shu jumladan belgilangan tartibda xoʻjalik jamiyatlariga investitsiyalar kiritish yoʻli bilan amalga oshirish;

ishonchnoma asosida xoʻjalik boshqaruvi organlarida va moliya organlarida tashkilot manfaatlarini himoya qilish;

kreditlanayotgan tashkilotlardan ularning toʻlov qobiliyatini tasdiqlovchi hisobotlar, balans va boshqa hujjatlarni olish;

Bank kreditlari ishtirokida amalga oshiriladigan qurilish, obyektlarni texnik qayta qurollantirish va boshqa faoliyat boʻyicha loyiha qarorlarni ekspertizadan oʻtkazishni talab qilish;

kredit shartnomalarida koʻzda tutilgan majburiyatlar buzilganda, notoʻgʻri hisobotlar aniqlanganda kredit berishni toʻxtatish, berilgan kreditlarni muddatidan ilgari undirish;

aktiv va passiv operatsiyalarni yuritish uchun shartnoma asosida foiz stavkalarini belgilash, shuningdek, koʻrsatilgan xizmatlar uchun komission mukofot miqdorlarini oʻrnatish;

xorijiy mamlakatlarda — respublikaning iqtisodiy sheriklarida belgilangan tartibda vakolatxonalar, filiallar, shuʼba banklar tashkil qilish;

Oʻzbekiston Respublikasi Davlat budjeti mablagʻlarini depozit sifatida jalb qilish;

yosh, istiqbolli, mutaxassislar hamda oliy va oʻrta maxsus taʼlim muassasalarining bitiruvchilariga moliyaviy yordam koʻrsatish;

majburiyatlarni, shu jumladan soliqlar va boshqa majburiy toʻlovlar boʻyicha, moliyaviy holatidan qatʼi nazar, tashkil qilingan boʻlimlar boʻyicha majburiyatlarni toʻlash.

Bank qonunchilikka muvofiq boshqa huquqlarga ham ega boʻlishi mumkin.

13. Bank oʻziga yuklangan vazifa va funksiyalarni samarali bajarish uchun javob beradi.

4-bob. Bankning mulki va kredit resurslari

14. Xoʻjalik yuritish huquqi asosida oʻziga tegishli boʻlgan bank mulki pul mablagʻlari va bankka tegishli boʻlgan bino, inshoot, uskuna, transport vositalari hamda boshqa qimmatliliklardan iborat boʻladi.

Bankning koʻchmas mulki Bank kengashi qarori asosida sotilishi, ijaraga berilishi yoki boshqacha tarzda topshirilishi mumkin.

Bankning qolgan mulki, shu jumladan majburiyatlarni (Bank oldidagi qarzlarni) toʻlash hisobiga oʻtkazilgan mulk Bank kengashi tomonidan belgilangan tartibda sotilishi, ijaraga berilishi yoki boshqacha tarzda topshirilishi mumkin.

15. Bankning ustav kapitali 4.321.067.384.252,00 soʻmni (toʻrt trillion uch yuz yigirma bir milliard oltmish yetti million uch yuz sakson toʻrt ming ikki yuz ellik ikki soʻmni) tashkil qiladi.

16. Ustav kapitali maqsadli tushumlar, Oʻzbekiston Respublikasi respublika budjeti mablagʻlaridan va qonunchilikda taqiqlanmagan boshqa manbalardan shakllantiriladi va tegishli qaror bilan oʻzgartirilishi mumkin.

17. Bankda bank operatsiyalari boʻyicha ehtimoliy zararlarni qoplash uchun moʻljallangan va sof foydaning olti foizi miqdorida ustav kapitalining ellik foiziga yetgunga qadar har yili ajratiladigan mablagʻlar hisobidan zaxira fondi shakllantiriladi.

18. Bank mulkini sotish va ijaraga berishdan tushgan mablagʻlar Bank ixtiyorida qoladi va ulardan Ustavdagi faoliyatga muvofiq mustaqil foydalanilishi mumkin.

19. Bankning kredit resurslari quyidagilar hisobidan shakllanadi:

ustav kapitali, zaxira va boshqa fondlar mablagʻlari;

Bank schyotlaridagi mijozlar mablagʻlari, shu jumladan muddatli omonat va depozitlar;

boshqa fond va banklarning, shu jumladan xorijiy, xalqaro moliya institutlari, xorijiy mamlakatlar kredit va qarzlari;

imzolangan shartnoma va kelishuvlarga muvofiq jalb qilingan tashkilotlar, shu jumladan, xorijiy tashkilotlar mablagʻlari;

qimmatli qogʻozlar chiqarish natijasida olingan mablagʻlar;

muddatli va talab qilib olingungacha jalb qilingan fuqarolar omonatlari;

qonunchilikda taqiqlanmagan boshqa jalb qilingan mablagʻlar.

Bankning taqsimlanmagan foydasi kreditlash resursi sifatida ishlatilishi mumkin.

5-bob. Bank operatsiyalari

20. Bank qonunchilikka muvofiq kredit, moliya, hisob-kitob, kassa va boshqa bank xizmatlarini milliy va xorijiy valyutada koʻrsatadi, shu jumladan:

boshqa davlatlar banklari, kredit va boshqa tashkilotlari bilan korrespondentlik munosabatlari oʻrnatish, eksport, import, nosavdo va boshqa operatsiyalar boʻyicha xalqaro hisob-kitoblarni amalga oshirish tartibi va shartlari toʻgʻrisida, bank schyotlarini yuritish tartibi toʻgʻrisida, loyihalarni birgalikda amalga oshirish toʻgʻrisida hamda mazkur Ustavda koʻzda tutilgan boshqa operatsiyalarni amalga oshirish toʻgʻrisida shartnomalar tuzadi;

xorijiy va xalqaro banklardan va boshqa tashkilotlardan xalqaro bank amaliyotida qoʻllanadigan shakllarda kredit va qarzlar oladi, shuningdek, olingan kredit va qarzlar boʻyicha Bank veksellari, obligatsiyalari va boshqa majburiyatlari tarzida taʼminot taqdim qiladi;

Bankning tashqi iqtisodiy faoliyatni amalga oshiruvchi mijozlariga eksportga yoʻnaltirilgan va import oʻrnini bosuvchi ishlab chiqarishlar uchun milliy va xorijiy valyutada kreditlar beradi;

banklarda, shu jumladan xorijiy banklarda pul mablagʻlari operatsiyalarini amalga oshirish va saqlash uchun korrespondentlik schyotlari ochadi;

milliy va xalqaro valyutada schyotlar va omonatlarga banklar, xalqaro va boshqa tashkilotlar, shuningdek, Oʻzbekiston Respublikasi fuqarolaridan, xorijiy fuqarolardan mablagʻlar qabul qiladi va ularni qimmatli qogʻozlar hamda badallarga joylashtiradi;

Oʻzbekiston Respublikasi banklari, xorijiy va xalqaro banklar va boshqa moliya institutlari korrespondentlik schyotlarida boʻlgan mablagʻlarni tasarruf etish tartibini, ushbu schyotlarni ochish va yuritish tartibini hamda mablagʻlarni Bank omonatlariga joylashtirish shartlarini shartnoma asosida belgilaydi;

Oʻzbekiston Respublikasi hududida va undan tashqarida xorijiy valyutani sotish va sotib olish, boshqa valyuta qimmatliliklarini (cheklar, veksellar, akkreditivlar va shu kabilarni) xarid qilish va sotishni, shuningdek, valyuta qimmatliliklari bilan operatsiyalar va bitimlarni amalga oshiradi;

xorijda xalqaro bank amaliyotiga muvofiq xorijiy valyutani sotish va sotib olish (diling) hamda boshqa valyuta operatsiyalarini amalga oshiradi;

pul shaklidagi majburiyatlar ijrosini koʻzda tutuvchi uchinchi shaxslar uchun topshiriq, kafolat va boshqa majburiyatlar beradi;

tovarlarni yetkazish va xizmatlar koʻrsatishdan kelib chiqadigan talablarga huquqlarni xarid qiladi, bunday talablarni bajarish tavakkalchiligini, ushbu talablar inkassatsiyalarini (faktoringni) qabul qiladi;

uskunalar, hisob terminallari, bankomat, transport vositalari va boshqa mulkni xarid qiladi va ijaraga beradi;

mablagʻlar egasi va tasarrufchisining topshirigʻiga koʻra kapital qoʻyilmalarni moliyalashtiradi;

toʻlov hujjatlari va boshqa qimmatli qogʻozlar chiqaradi;

davlat toʻlov hujjatlari va boshqa qimmatli qogʻozlarni sotib oladi, sotadi va saqlaydi, ular bilan boshqa operatsiyalarni amalga oshiradi;

zamonaviy texnika va texnologiyalarni, kredit va elektron kartochkalarni joriy qilish, Bankni jahon banklararo telekommunikatsiyalar tarmogʻiga ulash yoʻli bilan Bank mijozlariga xizmat koʻrsatish shakllarini takomillashtiradi;

qimmatbaho metallarni schyotlarga va omonatlarga jalb qiladi va joylashtiradi, ularni sotadi, sotib oladi va ham ichki, ham xalqaro bozorda tabiiy qimmatbaho metallar va toshlar bilan boshqa operatsiyalarni bajaradi;

ishontirish operatsiyalarini amalga oshiradi: mablagʻlarni jalb qiladi va joylashtiradi, qimmatli qogʻozlar va boshqa operatsiyalarni mijoz topshirigʻiga koʻra boshqaradi;

mijozlar va korrespondent banklar schyotlarini yuritadi;

mijozlar bilan tuzilgan shartnoma asosida xorijiy valyuta, qimmatbaho metallar, boshqa qimmatliliklarni saqlashga qabul qiladi;

bank faoliyati bilan bogʻliq maslahat va konsalting xizmatlari koʻrsatadi;

qimmatbaho qogʻozlar bilan savdolarda tuzilgan bitimlar natijalari boʻyicha hisob-kitoblarni amalga oshiradi;

narx darajasi, qimmatli qogʻozlarga talab va taklifni saqlash uchun market-meyker xizmatlari koʻrsatadi;

zamonaviy, shu jumladan, bank schyotlariga masofaviy va kontaktsiz xizmatlar koʻrsatishni taʼminlaydigan bank mahsulotlari va texnologiyalarini joriy qiladi;

qonunchilikka muvofiq boshqa bank operatsiyalarni amalga oshiradi.

21. Bankning mijozlar va boshqa hamkorlar bilan munosabatlari shartnoma asosida tashkil etiladi.

6-bob. Bank faoliyatini tashkil qilish

22. Bank muassisga hisobot beradi.

Muassis:

Bank Ustavini, unga oʻzgartirish va qoʻshimchalarni tasdiqlaydi;

Bank ustav kapitalini oʻzgartirish toʻgʻrisida qaror qabul qiladi;

Bankni tugatish va qayta tashkil etish toʻgʻrisida qaror qabul qiladi;

Bank faoliyati toʻgʻrisidagi hisobotlarni eshitadi;

qonunchilikka muvofiq boshqa vakolatlarni amalga oshiradi.

23. Bank kengashi va Bank boshqaruvi Bankning boshqaruv organlari hisoblanadi.

24. Bank kengashi Bankning yuqori kollegial boshqaruv organi hisoblanadi, u beshta aʼzodan, shu jumladan raisdan iborat boʻladi. Bank kengashi tarkibi Oʻzbekiston Respublikasi Vazirlar Mahkamasi tomonidan tasdiqlanadi.

25. Bank kengashi majlislari yiliga kamida ikki marta oʻtkaziladi.

Bank kengashi majlisi, zarur hollarda, muassis tashabbusi bilan, Oʻzbekiston Respublikasi Markaziy banki, Bank kengashi raisi, Bank kengashining ikki va undan ortiq aʼzolari, Bank boshqaruvi, Bankning ichki audit xizmati rahbari, shuningdek, tashqi auditori tomonidan chaqirilishi mumkin.

Bank kengashi qarorlari qatnashadigan aʼzolarning kamida toʻrtdan uch qismi ovoz berganda qabul qilinadi. Bank kengashi majlisida uning har bir aʼzosi bir ovozga ega boʻladi.

Bank kengashi majlislari uning roʻyxatdagi tarkibidan kamida yetmish besh foiz aʼzo ishtirok etganda vakolatli sanaladi. Bunda kengash raisining majlisda ishtiroki majburiy hisoblanadi.

Bank kengashi oʻz faoliyatida Oʻzbekiston Respublikasi qonunchiligiga va mazkur Ustavga amal qiladi.

Bank bank kengashiga belgilangan tartibda mukofot toʻlaydi, shuningdek, xizmat safari, vakillik va boshqa xarajatlarni tasdiqlangan biznes-rejaga muvofiq amalga oshiradi.

26. Bank kengashi:

Bank faoliyatini (omonatchilar, kreditorlar va muassislar manfaatlarini himoya qilish maqsadida) nazorat qiladi, kreditlash va investitsiyalashning toʻgʻriligini tekshiradi;

Bankning adekvat kapitallashuvini taʼminlaydi;

Bank siyosatini shakllantiradi;

Bank Ustavi, unga qoʻshimcha va oʻzgarishlar loyihalarini Oʻzbekiston Respublikasi Vazirlar Mahkamasiga tasdiqlash uchun kiritadi;

Bank ustav kapitalini oʻzgartirish toʻgʻrisida takliflarni Oʻzbekiston Respublikasi Vazirlar Mahkamasiga tasdiqlash uchun taqdim etadi;

Bank faoliyatining yillik natijalarini tasdiqlaydi;

Bank boshqaruvi taqdimnomasiga koʻra foydani taqsimlash, shuningdek, zararlarni qoplash tartibini tasdiqlaydi;

Bankning yillik biznes-rejasini tasdiqlaydi;

Bank boshqaruvi aʼzolari tarkibini tasdiqlaydi, boshqaruv raisi va rais oʻrinbosarlari bundan mustasno;

kreditlash, aktivlar va passivlarni boshqarish, investitsiyalarni amalga oshirish, Bank mijozlariga yangi turdagi xizmatlar koʻrsatish sohasidagi Bank siyosatining asosiy yoʻnalishlarini belgilaydi;

Bank boshqaruvi hisobotlarini, ichki audit xizmati rahbarining maʼruzalarini eshitadi;

Bank bilan bogʻliq shaxslarga kredit taqdim qilish va kafolatlar berish toʻgʻrisida qaror qabul qiladi;

qiymati bitim tuzish toʻgʻrisida qaror qabul qilingan kunda Bank sof aktivlarining oʻn besh foizidan ortiqni tashkil etadigan bitimlar va bir nechta oʻzaro bogʻlangan bitimlar tuzish toʻgʻrisida qaror qabul qiladi;

qonunchilikda belgilangan tartibda Bankning koʻchmas mulkini sotish, ijaraga berish va boshqacha tarzda topshirishni amalga oshirish toʻgʻrisida qaror qabul qiladi (majburiyatlar va qarzlarni toʻlash hisobiga Bankka oʻtgan koʻchmas mulk bundan mustasno);

majburiyat va qarzlarni toʻlash hisobiga Bank mulkiga oʻtgan mulkni sotish tartibini belgilaydi;

filiallar, vakolatxonalar, shuʼba banklarni (shu jumladan, chet ellarda) tashkil qilish, qayta tashkil qilish va tugatish toʻgʻrisida qaror qabul qiladi, vakolatxonalar, shuʼba banklar ustav va nizomlarini tasdiqlaydi;

qonunchilikka va mazkur Ustavga muvofiq Bank kengashi vakolatlariga kiradigan boshqa masalalar boʻyicha qarorlar qabul qiladi.

27. Oʻn bitta aʼzodan, shu jumladan boshqaruvga rahbarlik qiladigan raisdan iborat boʻlgan boshqaruv Bankning ijro etuvchi organi hisoblanadi.

Bank boshqaruvi raisi va uning oʻrinbosarlari Oʻzbekiston Respublikasi Vazirlar Mahkamasi tomonidan lavozimga tayinlanadi va lavozimdan ozod qilinadi.

Bank boshqaruvi raisi Bankning yuqori mansabdor shaxsi hisoblanadi. Bankning ushbu Ustavi bilan berilgan vakolatlarga muvofiq Bank faoliyatiga rahbarlik qiladi va Bankka yuklangan vazifalarning bajarilishi uchun shaxsan javob beradi.

Bank boshqaruvi raisi va uning oʻrinbosarlari bilan bir qatorda, Bankning tarkibiy boʻlinmalari rahbarlari boshqaruv tarkibiga kiradi.

28. Bank boshqaruvi:

Bankning operativ faoliyatini tashkil qiladi va amalga oshiradi, Ustav vazifalari, Oʻzbekiston Respublikasi Prezidenti, Vazirlar Mahkamasi va Bank kengashi qarorlari ijrosini taʼminlaydi;

mazkur Ustavga muvofiq Bank kengashida va Oʻzbekiston Respublikasi Vazirlar Mahkamasida koʻriladigan masalalarni dastlab oʻrganib chiqadi, ular boʻyicha tegishli materiallar, takliflar va qarorlar loyihalarini tayyorlaydi;

Bank filiali toʻgʻrisidagi nizomni tasdiqlaydi;

boshqaruv koʻrib chiqishiga kiritilgan boshqa masalalarni hal qiladi.

Bank boshqaruvi valyuta-moliya munosabatlari sohasida Hukumat siyosatini Bank tomonidan amalga oshirish, Bankni rivojlantirish va uning joriy faoliyatiga doir barcha masalalarni kollegiallik asosida va boshqaruv aʼzolari fikrlarini hisobga olgan holda koʻrib chiqadi.

Bank boshqaruvi qarorlari unda qatnashadigan aʼzolarning kamida toʻrtdan uch qismi ular uchun ovoz berganda qabul qilingan hisoblanadi.

Bank boshqaruvi majlislari, agar unda boshqaruvning roʻyxat boʻyicha aʼzolarining kamida yetmish besh foizi qatnashsa, vakolatli sanaladi. Majlislarda rais albatta ishtirok etishi kerak.

29. Bank boshqaruvi raisi:

Bank faoliyati masalalarini hal qiladi, mazkur Ustavga koʻra Oʻzbekiston Respublikasi Vazirlar Mahkamasi, Bank kengashi va boshqaruvi vakolatiga tegishli masalalar bundan mustasno;

ishonchnomasiz Bank nomidan faoliyat yuritadi, barcha respublika tashkilotlari va organlarida Bank manfaatlarini ifodalaydi;

Bankning koʻchmas mulkidan tashqari boshqa mulkini tasarruf etadi;

shartnomalar, shu jumladan, mehnat shartnomalari tuzadi;

ishonchnomalar beradi;

mablagʻlarni, shu jumladan xayriya maqsadlari uchun tasarruf etish huquqidan foydalanadi, xizmat safari, vakillik va Bank kengashi aʼzolari va xodimlarning boshqa xarajatlari meʼyorlarini belgilaydi;

Bank, uning filiali va vakolatxonalarining shtat roʻyxatlarini tasdiqlaydi;

mehnat haqini, Bank xodimlarining boshqa daromadlarini toʻlash shakli va miqdorlarini mustaqil belgilaydi;

xodimlarni, tarkibiy boʻlinmalardagi xodimlarni mukofotlash, Bank xodimlarining lavozim yoʻriqnomalari toʻgʻrisidagi nizomlarni tasdiqlaydi;

Bankning barcha xodimlari uchun bajarish shart boʻlgan buyruqlar chiqaradi va farmoyishlar beradi;

mini-banklarni tashkil qilish, shu jumladan ularni samarasiz faoliyati natijalari boʻyicha tugatish toʻgʻrisida qarorlar qabul qiladi;

Bank faoliyati bilan bogʻliq boshqa masalalarni koʻrib chiqadi va hal qiladi.

7-bob. Bank foydasini taqsimlash

30. Bankning sof foydasi Oʻzbekiston Respublikasi Davlat budjetiga va davlat maqsadli jamgʻarmalariga barcha soliqlar va majburiy toʻlovlar toʻlangandan keyin Bank ixtiyorida qoladi va Bank kengashi tomonidan belgilanadigan tartibda ishlatiladi.

8-bob. Bank hisobi va hisoboti

31. Bankda buxgalteriya hisobi va hisobot Oʻzbekiston Respublikasi Markaziy banki tomonidan belgilangan qoidalarga muvofiq amalga oshiriladi. Bank Markaziy bankka Oʻzbekiston Respublikasi Markaziy banki tomonidan belgilangan hajmda va muddatlarda buxgalteriya balansi, hisobotlar va boshqa materiallarni taqdim etadi.

32. Bank yillik balans, foyda va zararlar toʻgʻrisidagi hisobotlarni, auditorlik tashkiloti maʼlumotlarning toʻgʻriligini tasdiqlagandan keyin, Oʻzbekiston Respublikasi Markaziy banki tomonidan belgilanadigan shakllar va muddatlarda eʼlon qiladi.

33. Bankning operatsion yili 1-yanvarda boshlanadi va 31-dekabrda tugaydi.

9-bob. Bank faoliyatini taftish qilish va tekshirish

34. Bankning moliya-xoʻjalik faoliyatini nazorat qilish va tekshirish Bankning ichki audit xizmati, mustaqil auditorlik tashkilotlari, shuningdek, qonunchilikka muvofiq bunga vakolatli nazorat organlari tomonidan amalga oshiriladi.

10-bob. Bank faoliyatini toʻxtatish

35. Bank faoliyati qonun hujjatlariga muvofiq Oʻzbekiston Respublikasi Hukumatining qaroriga binoan toʻxtatiladi.

Vazirlar Mahkamasining 2018-yil 12-fevraldagi 108-son qaroriga 2-ILOVA

Oʻzbekiston Respublikasi Tashqi iqtisodiy faoliyat milliy banki kengashi

TARKIBI

Xolmuradov S.R. — Oʻzbekiston Respublikasi Bosh vazirining oʻrinbosari, Kengash raisi Bekenov S.X. — Oʻzbekiston Respublikasi Iqtisodiyot vazirining birinchi oʻrinbosari, Kengash raisining oʻrinbosari Xaydarov A.Y. — Oʻzbekiston Respublikasi Moliya vazirining birinchi oʻrinbosari Vafayev Sh.A. — Oʻzbekiston Tiklanish va taraqqi�t jamgʻarmasining ijrochi direktori Aminov R.A. — Xususiylashtirilgan korxonalarga koʻmaklashish va raqobatni rivojlantirish davlat qoʻmitasi raisining birinchi oʻrinbosari

Izoh. Kengash aʼzolari boshqa ishga oʻtgan taqdirda uning tarkibiga ushbu lavozimlarga yangidan tayinlangan yoxud zimmasiga tegishli funksiyalarni bajarish yuklangan shaxslar kiritiladi.

Vazirlar Mahkamasining 2018-yil 12-fevraldagi 108-son qaroriga 3-ILOVA

Oʻzbekiston Respublikasi Hukumatining oʻz kuchini yoʻqotgan deb eʼtirof etilayotgan baʼzi qarorlari

ROʻYXATI

1. Vazirlar Mahkamasining “Oʻzbekiston Respublikasi Tashqi iqtisodiy faoliyat milliy banki toʻgʻrisida” 1993-yil 21-yanvardagi 45-son qarorining 1-bandi, shuningdek, qarorga ilova.

2. Vazirlar Mahkamasining “Oʻzbekiston Respublikasi Tashqi iqtisodiy faoliyat milliy bankining ustav sarmoyasini koʻpaytirish toʻgʻrisida” 1996-yil 31-dekabrdagi 471-son qarorining 3-bandi, shuningdek, qarorga ilova.

3. Vazirlar Mahkamasining “Ustav sarmoyasida davlat ulushi 50 foizdan ortiq boʻlgan tijorat banklari kengashlari raislarini tasdiqlash toʻgʻrisida” 2000-yil 11-iyuldagi 265-son qarori.

4. Vazirlar Mahkamasining “Oʻzbekiston Respublikasi Hukumatining ayrim qarorlariga oʻzgartirishlar kiritish toʻgʻrisida” 2003-yil 28-fevraldagi 112-son qaroriga (Oʻzbekiston Respublikasi QT, 2003-y., 2-son, 19-modda) ilovaning 1-bandi.

5. Vazirlar Mahkamasining “Oʻzbekiston Respublikasi Tashqi iqtisodiy faoliyat milliy banki ustaviga oʻzgartirishlar kiritish toʻgʻrisida” 2003-yil 3-noyabrdagi 480-son qarori.

6. Vazirlar Mahkamasining “Oʻzbekiston Respublikasi hukumatining ayrim qarorlarini oʻz kuchini yoʻqotgan deb hisoblash hamda baʼzilariga oʻzgartirishlar kiritish toʻgʻrisida” 2005-yil 22-fevraldagi 73-son qaroriga (Oʻzbekiston Respublikasi QT, 2005-y., 2-son, 13-modda) 2-ilovaning 1-bandi.

7. Vazirlar Mahkamasining “Oʻzbekiston Respublikasi Hukumatining ayrim qarorlariga oʻzgartirish va qoʻshimchalar kiritish, shuningdek baʼzilarini oʻz kuchini yoʻqotgan deb hisoblash toʻgʻrisida” 2005-yil 10-avgustdagi 192-son qaroriga (Oʻzbekiston Respublikasi QT, 2005-y., 8-son, 41-modda) 1-ilovaning 1-bandi.

8. Vazirlar Mahkamasining “Oʻzbekiston Respublikasi Hukumatining ayrim qarorlariga oʻzgartirishlar kiritish haqida (Oʻzbekiston Respublikasi Prezidentining “Qimmatli qogʻozlar bozorini yanada rivojlantirish chora-tadbirlari toʻgʻrisida” 2006-yil 27-sentabrdagi PQ-475-son qarori)” 2006-yil 9-noyabrdagi 234-son qaroriga (Oʻzbekiston Respublikasi QT, 2006-y., 11-son, 85-modda) ilovaning 1-bandi.

9. Vazirlar Mahkamasining “Oʻzbekiston Respublikasi Tashqi iqtisodiy faoliyat milliy banki Ustaviga oʻzgartirishlar kiritish toʻgʻrisida (Oʻzbekiston Respublikasi Prezidentining “Tijorat banklarining investitsiya loyihalarini moliyalashtirishga yoʻnaltiriladigan uzoq muddatli kreditlari ulushini koʻpaytirishni ragʻbatlantirish borasidagi qoʻshimcha chora-tadbirlar toʻgʻrisida” 2009-yil 28-iyuldagi PQ-1166-son qarori)” 2009-yil 28-oktabrdagi 285-son qarori (Oʻzbekiston Respublikasi QHT, 2009-y., 44-son, 469-modda).

10. Vazirlar Mahkamasining “Oʻzbekiston Respublikasi Hukumatining ayrim qarorlariga oʻzgartirishlar kiritish toʻgʻrisida (Oʻzbekiston Respublikasi Prezidentining “Oʻzbekiston Respublikasi Vazirlar Mahkamasining ijro etuvchi tuzilmasini qisman oʻzgartirish toʻgʻrisida” 2009-yil 13-noyabrdagi PQ-1227-son qarori)” 2009-yil 28-dekabrdagi 336-son qaroriga (Oʻzbekiston Respublikasi QHT, 2009-y., 52-son, 574-modda) ilovaning 1-bandi.

11. Vazirlar Mahkamasining “Davlat va xoʻjalik boshqaruvi organlari, mahalliy davlat hokimiyati organlari va boshqa tashkilotlarda xizmat yengil avtomobillaridan foydalanishni yanada tartibga solish boʻyicha chora-tadbirlar toʻgʻrisida” 2011-yil 26-maydagi 153-son qaroriga 2-ilovaning 61-pozitsiyasi.

12. Vazirlar Mahkamasining “Oʻzbekiston Respublikasi Hukumatining ayrim qarorlariga oʻzgartirishlar kiritish, shuningdek baʼzilarini oʻz kuchini yoʻqotgan deb hisoblash toʻgʻrisida (Oʻzbekiston Respublikasi Prezidentining “Oʻzbekiston Respublikasi Vazirlar Mahkamasining ijro etuvchi apparati tuzilmasiga qisman oʻzgartirish kiritish toʻgʻrisida” 2011-yil 24-oktabrdagi PQ-1630-son hamda “Oʻzbekiston Respublikasi Vazirlar Mahkamasi tuzilmasiga oʻzgartirish kiritish toʻgʻrisida” 2012-yil 13-yanvardagi PQ-1686-son qarorlari)” 2012-yil 23-fevraldagi 48-son qaroriga (Oʻzbekiston Respublikasi QT, 2012-y., 2-son, 11-modda) 1-ilovaning 1-bandi.

13. Vazirlar Mahkamasining “Oʻzbekiston Respublikasi Tashqi iqtisodiy faoliyat milliy bankining Ustaviga oʻzgartirish va qoʻshimchalar kiritish toʻgʻrisida” 2013-yil 23-yanvardagi 15-son qarorining (Oʻzbekiston Respublikasi QHT, 2013-y., 4-son, 46-modda) 4 va 5-bandlari, shuningdek, qarorga 2-ilova.

14. Vazirlar Mahkamasining “Oʻzbekiston Respublikasi Tashqi iqtisodiy faoliyat milliy banki kengashi tarkibini tasdiqlash toʻgʻrisida” 2013-yil 6-sentabrdagi 242-son qarori (Oʻzbekiston Respublikasi QHT, 2013-y., 37-son, 483-modda).

15. Vazirlar Mahkamasining “Oʻzbekiston Respublikasi Tashqi iqtisodiy faoliyat milliy banki va uning shuʼba tuzilmalari faoliyati takomillashtirilishi munosabati bilan Oʻzbekiston Respublikasi Hukumatining ayrim qarorlariga oʻzgartirishlar kiritish toʻgʻrisida” 2014-yil 3-martdagi 44-son qaroriga (Oʻzbekiston Respublikasi QT, 2014-y., 3-son, 15-modda) ilovaning 1-bandi.

16. Vazirlar Mahkamasining “Oʻzbekiston Respublikasi Tashqi iqtisodiy faoliyat milliy banki va uning shuʼba tuzilmalari faoliyati takomillashtirilishi munosabati bilan Oʻzbekiston Respublikasi Hukumatining ayrim qarorlariga oʻzgartirish va qoʻshimchalar kiritish toʻgʻrisida” 2015-yil 26-martdagi 70-son qaroriga (Oʻzbekiston Respublikasi QHT, 2015-y., 12-son, 140-modda) ilovaning 1-bandi.

17. Vazirlar Mahkamasining “Oʻzbekiston Respublikasi Hukumatining ayrim qarorlariga oʻzgartirish va qoʻshimchalar kiritish toʻgʻrisida (Oʻzbekiston Respublikasining “Qimmatli qogʻozlar bozori toʻgʻrisida”gi Oʻzbekiston Respublikasi Qonuniga oʻzgartish va qoʻshimchalar kiritish haqida” 2015-yil 3-iyundagi OʻRQ-387-son hamda “Investitsiya va pay fondlari toʻgʻrisida” 2015-yil 25-avgustdagi OʻRQ-392-son qonunlari)” 2015-yil 23-sentabrdagi 274-son qaroriga (Oʻzbekiston Respublikasi QT, 2015-y., 9-son, 84-modda) ilovaning 1-bandi.

18. Vazirlar Mahkamasining “Oʻzbekiston Respublikasi Tashqi iqtisodiy faoliyat milliy banki ustaviga oʻzgartirishlar kiritish toʻgʻrisida” 2015-yil 18-dekabrdagi 367-son qarori (Oʻzbekiston Respublikasi QHT, 2015-y., 51-son, 634-modda).

19. Vazirlar Mahkamasining “Oʻzbekiston Respublikasi Hukumatining ayrim qarorlariga oʻzgartirish va qoʻshimchalar kiritish, shuningdek baʼzilarini oʻz kuchini yoʻqotgan deb hisoblash toʻgʻrisida (Oʻzbekiston Respublikasining “Oʻzbekiston Respublikasining Budjet kodeksini tasdiqlash toʻgʻrisida” 2013-yil 26-dekabrdagi OʻRQ-360-son hamda “Soliq va budjet siyosatining 2016-yilga moʻljallangan asosiy yoʻnalishlari qabul qilinganligi munosabati bilan Oʻzbekiston Respublikasining Soliq kodeksiga oʻzgartish va qoʻshimchalar kiritish toʻgʻrisida” 2015-yil 31-dekabrdagi OʻRQ-398-son qonunlari)” 2016-yil 26-apreldagi 122-son qaroriga (Oʻzbekiston Respublikasi QT, 2016-y., 4-son, 28-modda) 1-ilovaning 4-bandi.

20. Vazirlar Mahkamasining “Oʻzbekiston Respublikasi Hukumatining ayrim qarorlariga oʻzgartirish va qoʻshimchalar kiritish, shuningdek baʼzilarini oʻz kuchini yoʻqotgan deb hisoblash toʻgʻrisida (Oʻzbekiston Respublikasi Prezidentining “Oʻzbekiston Respublikasi Xususiylashtirilgan korxonalarga koʻmaklashish va raqobatni rivojlantirish davlat qoʻmitasini tashkil etish toʻgʻrisida” 2017-yil 18-apreldagi PF-5016-son Farmoni)” 2017-yil 16-avgustdagi 638-son qaroriga (Oʻzbekiston Respublikasi QHT, 2017-y., 33-son, 863-modda) 1-ilovaning 68-bandi.

21. Vazirlar Mahkamasining “Oʻzbekiston Respublikasi Tashqi iqtisodiy faoliyat milliy banki ustaviga oʻzgartirish va qoʻshimchalar kiritish toʻgʻrisida” 2017-yil 30-sentabrdagi 776-son qarori.