Oʻzbekiston Respublikasi Turizmni rivojlantirish davlat qoʻmitasining faoliyatini yanada takomillashtirish chora-tadbirlari toʻgʻrisida (PQ-3510-son)

06.02.2018

Oʻzbekiston Respublikasi Prezidentining

Qarori

Oʻzbekiston Respublikasi Prezidentining “Oʻzbekiston Respublikasi turizm salohiyatini rivojlantirish uchun qulay sharoitlar yaratish boʻyicha qoʻshimcha tashkiliy chora-tadbirlar toʻgʻrisida”gi 2018-yil 3-fevraldagi PF-5326-son Farmonini ijro etish, shuningdek Oʻzbekiston Respublikasi Turizmni rivojlantirish davlat qoʻmitasi faoliyatining samaradorligini oshirish, turizm sohasiga xorijiy investitsiyalarni jalb qilishda uning rolini kuchaytirish, kirish va ichki turizmni rivojlantirish maqsadida:

1. Quyidagilar:

Oʻzbekiston Respublikasi Turizmni rivojlantirish davlat qoʻmitasining yangilangan tashkiliy tuzilmasi 1-ilovaga muvofiq;

Oʻzbekiston Respublikasi Turizmni rivojlantirish davlat qoʻmitasining boshqaruv xodimlari cheklangan soni 107 nafar boʻlgan markaziy apparatining yangilangan tuzilmasi 2-ilovaga muvofiq;

Oʻzbekiston Respublikasi Turizmni rivojlantirish davlat qoʻmitasining hududiy boshqarmalari va Turizmni rivojlantirish departamentlarining namunaviy tuzilmasi 3 va 3a-ilovalarga muvofiq tasdiqlansin.

Oʻzbekiston Respublikasi Turizmni rivojlantirish davlat qoʻmitasi raisiga, zarur hollarda, xodimlarning shtatdagi belgilangan umumiy soni doirasida qoʻmita markaziy apparati va hududiy boʻlinmalari tuzilmasiga oʻzgartirishlar kiritish huquqi berilsin.

2. Belgilansinki, Oʻzbekiston Respublikasi Turizmni rivojlantirish davlat qoʻmitasining markaziy apparati xodimlarining soni bosqichma-bosqich koʻpaytiriladi, jumladan:

birinchi bosqich — 2018-yil 10-fevraldan Qoʻmita markaziy apparati xodimlarining soni 79 nafargacha;

ikkinchi bosqich — 2019-yil 1-yanvardan Qoʻmita markaziy apparati xodimlarining soni 107 nafargacha yetkaziladi.

3. Belgilab qoʻyilsinki, Buxoro, Samarqand, Xorazm viloyatlari va Toshkent shahri Turizmni rivojlantirish departamentlari, shuningdek, Toshkent viloyati Turizmni rivojlantirish departamenti Oʻzbekiston Respublikasi Turizmni rivojlantirish davlat qoʻmitasi hamda tegishli viloyatlar va Toshkent shahri hokimliklari tasarrufida boʻladi.

4. Oʻzbekiston Respublikasi Prezidentining “Oʻzbekiston Respublikasi Turizmni rivojlantirish davlat qoʻmitasi faoliyatini tashkil etish toʻgʻrisida”gi 2016-yil 2-dekabrdagi PQ–2666-son qaroriga 4-ilovaga muvofiq oʻzgartirish va qoʻshimchalar kiritilsin.

5. Mazkur qarorning ijrosini nazorat qilish Oʻzbekiston Respublikasining Bosh vaziri A.N. Aripov, Oʻzbekiston Respublikasi Bosh vazirining oʻrinbosari S.R. Xolmuradov hamda Oʻzbekiston Respublikasi Turizmni rivojlantirish davlat qoʻmitasining raisi A.A. Abduxakimov zimmasiga yuklansin.

Oʻzbekiston Respublikasi Prezidenti Sh. MIRZIYOYEV

Toshkent sh.,

2018-yil 6-fevral,

PQ-3510-son

Oʻzbekiston Respublikasi Prezidentining 2018-yil 6-fevraldagi PQ-3510-son qaroriga 1-ILOVA

Oʻzbekiston Respublikasi Turizmni rivojlantirish davlat qoʻmitasining

TAShKILIY TUZILMASI*

Izoh: Oʻzbekiston Respublikasi Turizmni rivojlantirish davlat qoʻmitasi tashkiliy tuzilmasiga tomonlarning kelishuvi asosida faoliyati turizm sohasi bilan bogʻliq boʻlgan boshqa jamoat tashkilotlari ham kiritilishi mumkin.

Oʻzbekiston Respublikasi Prezidentining 2018-yil 6-fevraldagi PQ-3510-son qaroriga 2-ILOVA

Oʻzbekiston Respublikasi Turizmni rivojlantirish davlat qoʻmitasi markaziy apparatining

TUZILMASI

Boshqaruv xodimlarining umumiy cheklangan soni — 107 nafar.

* Shtatdan tashqari xorijiy maslahatchilar tayinlanishi mumkin.

* Texnik va xizmat koʻrsatuvchi xodimlar soni oʻrnatilgan meʼyorlarga muvofiq belgilanadi.

Oʻzbekiston Respublikasi Prezidentining 2018-yil 6-fevraldagi PQ-3510-son qaroriga 3-ILOVA

Oʻzbekiston Respublikasi Turizmni rivojlantirish davlat qoʻmitasi hududiy boshqarmalarining

NAMUNAVIY TUZILMASI

Barcha hududiy boshqarmalar boshqaruv xodimlarining umumiy cheklangan soni — 94 nafar.

Texnik va xizmat koʻrsatuvchi xodimlar soni oʻrnatilgan meʼyorlarga muvofiq belgilanadi.

Oʻzbekiston Respublikasi Prezidentining 2018-yil 6-fevraldagi PQ-3510-son qaroriga 3a-ILOVA

Turizmni rivojlantirish departamentining

NAMUNAVIY TUZILMASI*

*Boshqaruv xodimlarining umumiy cheklangan soni — Buxoro, Samarqand, Toshkent va Xorazm viloyatlarida 25 nafar, Toshkent shahrida 24 nafar.

Texnik va xizmat koʻrsatuvchi xodimlar soni oʻrnatilgan meʼyorlarga muvofiq belgilanadi.

Oʻzbekiston Respublikasi Prezidentining 2018-yil 6-fevraldagi PQ-3510-son qaroriga 4-ILOVA

Oʻzbekiston Respublikasi Prezidentining “Oʻzbekiston Respublikasi Turizmni rivojlantirish davlat qoʻmitasi faoliyatini tashkil etish toʻgʻrisida”gi 2016-yil 2-dekabrdagi PQ-2666-son qaroriga kiritilayotgan oʻzgartirishlar va qoʻshimchalar

1. 4-band quyidagi tahrirda bayon etilsin:

“4. Oʻzbekiston Respublikasi Turizmni rivojlantirish davlat qoʻmitasi toʻgʻrisidagi Nizom ilovaga muvofiq tasdiqlansin.”

2. 8-band quyidagi tahrirda bayon etilsin:

“8. Oʻzbekiston Respublikasi Turizmni rivojlantirish davlat qoʻmitasi Toshkent shahri, Mirzo Ulugʻbek tumani, Istiqlol koʻchasi, 47 uyda, “Milliy PR markazi” Toshkent shahri, Mirobod tumani, Oybek koʻchasi, 18-uyda joylashtirilsin.

Belgilansinki:

Oʻzbekiston Respublikasi Turizmni rivojlantirish davlat qoʻmitasi markaziy apparatiga 5 ta shaxsan biriktirilgan (xorijiy maslahatchilarga biriktirilganlarni hisobga olmagan holda), 1 ta maxsus (yoʻlsiz joylarda yura oladigan), 2 ta navbatchi avtomobil va 1 ta mikroavtobus limiti ajratilishi nazarda tutiladi;

Qoʻmitaga tegishli xizmat avtomobil transportiga Oʻzbekiston Respublikasi Vazirlar Mahkamasi tomonidan belgilangan yillik kilometr masofa limiti tatbiq etilmaydi.”

3. 4-ilovada:

a) ilova belgisidan “4-” soʻzlari chiqarib tashlansin;

b) 9-bandda:

oʻn ikkinchi xatboshi quyidagi tahrirda bayon etilsin:

“mamlakatning yuqori turistik imijini saqlash maqsadida turizm sohasini targʻib qiluvchi reklama va boshqa mahsulotlarni (mamlakatning turizm salohiyatini aks ettiruvchi reklama audio-videomateriallar, risolalar, fotoalbomlar, kitoblar, xaritalar va boshqa reklama-axborot materiallari, maqolalar, kompyuter dasturlari, veb-saytlar, portallar) yaratish, chop etish, koʻpaytirishni amalga oshirish, suvenirlar va boshqa mahsulotlar sotib olish, shuningdek, mamlakat hududida va xorijda tadbirlar tashkil etish uchun mehmonxona, transport, umumiy ovqatlanish va boshqa xizmatlar koʻrsatuvchi tadbirkorlik subyektlarini jalb qilish maqsadida mustaqil yoki idoraviy mansub tashkilotlar orqali belgilangan tartibda shartnomalar tuzish”;

quyidagi mazmundagi yigirma birinchi — yigirma yettinchi xatboshilar bilan toʻldirilsin:

“Qoʻmita huzuridagi budjetdan tashqari Turizm sohasini qoʻllab-quvvatlash jamgʻarmasi mablagʻlari hisobidan jurnalistlar, blogerlar va suratga olish guruhlarini xorijga va Oʻzbekiston hududlariga Oʻzbekistonning turizm salohiyati haqida reportajlar, videoroliklar tayyorlash, Qoʻmita delegatsiyalari va turizm kompaniyalari ishtirok etadigan koʻrgazma, muzokara va boshqa shunday tadbirlarni yoritish uchun yuborish;

Qoʻmita huzuridagi budjetdan tashqari Turizm sohasini qoʻllab-quvvatlash jamgʻarmasi mablagʻlari hisobidan mahalliy va xorijiy ishtirokchilar oʻrtasida turizmning istiqbolli turlari va yoʻnalishlarini, mamlakatning turizm salohiyatini targʻib va reklama qilishga qaratilgan sovrinli tanlov va viktorinalar oʻtkazish;

xorijiy teleradiokompaniyalar va boshqa ommaviy axborot vositalari, shu jumladan bosma va raqamli ommaviy axborot vositalari bilan marketing strategiyasidan kelib chiqib, xorijiy bozorlarga moʻljallangan reklama, reportaj va boshqa roliklarni translatsiya qilish, maqolalar, reklamalar, bosma mahsulotlar, shu jumladan turizm xaritalari, risolalar va kitoblar, internet videoroliklari tayyorlash va chop etish, shuningdek reklama va fotoreportajlarni hamda shu kabi boshqa mahsulotlarni suratga olish va tayyorlash uchun shartnomalar tuzish;

gazetalar, jurnallar va boshqa ommaviy axborot vositalariga taʼsischi boʻlish, shu jumladan idoraviy mansub tashkilotlari orqali;

Qoʻmita balansida turgan koʻchmas mulkdan foydalanish uchun oʻzining idoraviy mansub tashkilotlariga ijara toʻlovlari uchun nol qiymat belgilash.

Qoʻmita va uning idoraviy mansub tashkilotlari ixtisoslashtirilgan xalqaro (chet el) tashkilotlariga aʼzo boʻlish huquqiga ega.

Qoʻmita oʻziga uchinchi shaxslar tomonidan jalb qilingan kreditlar boʻyicha kredit majburiyatlarini olish, shuningdek kafillik vazifasini bajarish yoki kafolat berish huquqiga ega emas”;

yigirma ikkinchi xatboshi yigirma sakkizinchi xatboshi deb hisoblansin.

v) 11-bandda:

ikkinchi xatboshi quyidagi tahrirda bayon etilsin:

“Qoʻmita Oʻzbekiston Respublikasi Prezidenti tomonidan tayinlanadigan va lavozimidan ozod etiladigan toʻrtta oʻrinbosar, shu jumladan bitta birinchi oʻrinbosarga ega.”;

quyidagi mazmundagi uchinchi xatboshi bilan toʻldirilsin:

“Qoʻmita raisi maqomi boʻyicha vazirga, raisning birinchi oʻrinbosari — vazirning birinchi oʻrinbosariga, rais oʻrinbosarlari — vazir oʻrinbosarlariga tenglashtiriladi”;

g) 12-bandda:

quyidagi mazmundagi toʻqqizinchi xatboshi bilan toʻldirilsin:

“Qoʻmitaning markaziy apparati xodimlari, hududiy boʻlinmalar va idoraviy mansub tashkilotlar rahbarlarini moddiy ragʻbatlantirishning qoʻshimcha mexanizmlarini belgilaydi”;

toʻqqizinchi xatboshi oʻninchi xatboshi deb hisoblansin;

d) 13-bandning birinchi xatboshisidagi “birinchi oʻrinbosari va oʻrinbosari” soʻzlarini “oʻrinbosarlari” degan soʻz bilan almashtirilsin”.

e) 15-bandning “g” kichik bandi ikkinchi xatboshisi “oshirish” soʻzidan soʻng “ikki barobar” soʻzlari bilan toʻldirilsin.