Ustav fondlarida Davlat mulki ulushi boʻlgan bankrot korxonalarni tugatish boʻyicha tugatish komissiyalari toʻgʻrisidagi nizomni tasdiqlash haqida (548-son)

31.12.1999

Oʻzbekiston Respublikasi Vazirlar Mahkamasining

qarori

Ustav fondlarida davlat mulki ulushi boʻlgan bankrot korxonalarni tugatish boʻyicha tugatish komissiyalarini tuzish jarayonlarini va ularning faoliyatini tartibga solish maqsadida Vazirlar Mahkamasi qaror qiladi:

1. Ustav fondlarida davlat mulki ulushi boʻlgan bankrot korxonalarni tugatish boʻyicha tugatish komissiyalari toʻgʻrisidagi Nizom ilovaga muvofiq tasdiqlansin.

2. Mazkur qarorning bajarilishini nazorat qilish Bosh vazir oʻrinbosari B.S. Hamidov zimmasiga yuklansin.

Vazirlar Mahkamasining Raisi I. KARIMOV

Toshkent sh.,

1999-yil 31-dekabr,

548-son

Vazirlar Mahkamasining 1999-yil 31-dekabrdagi 548-son qaroriga ILOVA

Ustav fondlarida davlat mulki ulushi boʻlgan bankrot korxonalarni tugatish boʻyicha tugatish komissiyalari toʻgʻrisida

NIZOM

1. Ushbu Nizom “Bankrotlik toʻgʻrisida”gi Oʻzbekiston Respublikasi Qonuniga, Oʻzbekiston Respublikasi Prezidentining 1999-yil 23-iyuldagi PF-2342-son Farmoniga va Oʻzbekiston Respublikasi Vazirlar Mahkamasining 1999-yil 26-iyuldagi 362-son qaroriga muvofiq, ustav fondlarida davlat mulki ulushi boʻlgan bankrot korxonalarni tugatish boʻyicha tugatish komissiyalari (bundan keyin tugatish komissiyasi deb ataladi) faoliyatini tashkil etishning huquqiy asoslarini belgilash maqsadida ishlab chiqilgan.

2. Bankrot deb eʼtirof etilgan korxonalarni ixtiyoriy ravishda yoki xoʻjalik sudi qaroriga binoan tugatish ishlarini amalga oshirish tugatish komissiyasining asosiy vazifasi hisoblanadi.

Tugatish komissiyasini tuzish

3. Tugatish komissiyasi:

ixtiyoriy ravishda tugatish toʻgʻrisida qaror qabul qilinganda — bankrot korxona mulkdorlari tomonidan tuziladi. Bunda tugatish komissiyasi raisligiga nomzod Oʻzbekiston Respublikasi Makroiqtisodiyot va statistika vazirligi huzuridagi Iqtisodiy nochor korxonalar ishlari qoʻmitasi (bundan keyin Qoʻmita deb ataladi) bilan kelishiladi. Tugatish komissiyasini tuzish Qoʻmita buyrugʻi bilan rasmiylashtiriladi;

bankrot korxona xoʻjalik sudi qaroriga binoan tugatilganda — Qoʻmita tomonidan tuziladi. Tugatish komissiyasi aʼzolari qoʻmita buyrugʻi bilan tayinlanadi. Tugatish komissiyasiga ishonchli vakil boshchilik qiladi, keyinchalik uning nomzodi xoʻjalik sudi tomonidan tasdiqlanadi.

4. Tugatish komissiyasi tarkibiga:

qarzdorning;

mulkdorning;

soliq organining;

moliya organining;

bankning vakillari kiritiladi.

Tugatish komissiyasi tarkibiga kreditorlar vakili kiritilishi mumkin, u kreditorlar majlisida saylanadi.

5. Ixtiyoriy ravishda tugatishda tugatish komissiyasi raisi tayinlangan va majburiy ravishda tugatishda ishonchli shaxs tasdiqlangan vaqtdan boshlab qarzdorning ishlarini boshqarish boʻyicha barcha vakolatlar, shu jumladan qarzdorning mulkini tasarruf etish boʻyicha vakolatlar ularga oʻtadi.

Tugatish komissiyasining ish tartibi

6. Tugatish komissiyasiga tugatish komissiyasining raisi (ishonchli vakil) boshchilik qiladi, u ishlarga rahbarlik qiladi, komissiya majlislarini olib boradi, majlislar protokollarini, tugatish rejasini va boshqa hujjatlarni tasdiqlaydi. Tugatish rejasi qonun hujjatlari bilan belgilangan tartibda tasdiqlanadi. Tugatish davomida tugatish rejasiga u yoki bu holatlarga bogʻliq holda oʻzgartirishlar kiritilishi mumkin.

7. Tugatish komissiyasi majlislari zaruriyatga koʻra, biroq har oyda kamida bir marta oʻtkaziladi.

8. Tugatish komissiyasi majlisi unda tugatish komissiyasi jami aʼzolarining uchdan ikki qismi qatnashganda huquqiy kuchga ega boʻladi. Qarorlar tugatish komissiyasining majlisda qatnashayotgan aʼzolarining koʻpchilik ovozi bilan qabul qilinadi. Tugatish komissiyasining qarori protokol bilan rasmiylashtiriladi.

9. Tugatish komissiyasi aʼzolari uning majlislarida qatnashishga majburdirlar. Tugatish komissiyasi majlislarida bankrot korxona mehnat jamoasi vakili ovoz berish huquqisiz qatnashishi mumkin.

Tugatish komissiyasining vakolatlari

10. Tugatish komissiyasi qoʻyilgan vazifalarga muvofiq:

bankrot korxonaning mulkini va majburiyatlarini xatlovdan oʻtkazadi, oraliq tugatish balansini tuzadi, tugatilayotgan ashyolar miqdorini shakllantiradi va uning qiymatini aniqlaydi;

bankrot korxona mulkini sotadi;

kreditorlar talablarini uzadi;

belgilangan tartibda tugatish balansini tayyorlaydi va davlat reyestridan chiqaradi.

11. Tugatish ishlari davomida tugatish komissiyasi qarzdor korxonaning bitta bankdagi faqat yagona soʻmdagi va yagona valyutadagi hisob raqamidan foydalanishi shart.

Qarzdor korxonaning tugatish ishlari boshlangan vaqtda bankda maʼlum boʻlgan, shuningdek tugatish jarayonida aniqlangan boshqa hisob raqamlari ularning aniqlanishiga koʻra tugatish komissiyasi raisi (ishonchli shaxs) tomonidan yopilishi kerak.

Tugatish ishlari davomida kelib tushadigan pul mablagʻlari ham qarzdor korxonaning yagona hisob raqamiga oʻtkaziladi.

12. Tugatish komissiyasi oʻz vakolatlarini amalga oshirish chogʻida qarzdor korxonaning bankrot boʻlishigacha olib kelinishi munosabati bilan qonunchilikka muvofiq korxona majburiyatlari boʻyicha subsidiar javob beruvchi uchinchi shaxslarga nisbatan talablar qoʻyishga haqlidir.

13. Tugatish komissiyasi tugatish ishlari tartibotini oʻtkazish natijalari boʻyicha yakuniy hisobot tayyorlaydi va uni qarzdor korxonani tugatish toʻgʻrisida qaror qabul qilgan organga tasdiqlash uchun uch kun muddatda taqdim etadi.

Tugatish toʻgʻrisida qaror qabul qilgan organ oʻn kun muddatda yakunlovchi hisobotni tasdiqlashi shart.

Yakuniy hisobot koʻrsatib oʻtilgan muddatda tasdiqlanmagan taqdirda u, qaytarish sabablari koʻrsatib oʻtilgan holda, puxtalashtirish uchun qaytariladi. Tugatish komissiyasi oʻn kun muddatda aniqlangan kamchiliklarni bartaraf etadi va yakunlovchi hisobotni tasdiqlash uchun takroran taqdim etadi.

14. Yakuniy hisobot tasdiqlangan taqdirda u bankrot korxonani davlat reyestridan chiqarish uchun roʻyxatdan oʻtkazuvchi organga:

ixtiyoriy ravishda tugatilgan hollarda — tugatish komissiyasi raisi tomonidan;

majburiy ravishda tugatilgan hollarda — xoʻjalik sudi tomonidan joʻnatiladi.

15. Roʻyxatdan oʻtkazuvchi organ ikki kun muddatda bankrot korxonani belgilangan tartibda davlat reyestridan chiqaradi.

Tugatishni amalga oshirish muddati

16. Tugatish komissiyasi bankrot korxonani tugatishni bir yilgacha boʻlgan muddatda amalga oshiradi.

17. Tugatish bir yil davomida tugallanmagan taqdirda tugatish komissiyasi tugatish muddatini olti oyga uzaytirish toʻgʻrisidagi ariza bilan Qoʻmitaga murojaat qiladi.

18. Qoʻmita materiallarni tayyorlaydi va bankrot korxonani tugatish muddatini uzaytirish yoxud muddatni uzaytirishni rad etish toʻgʻrisidagi taklifni Korxonalar bankrotligi va sanatsiyasi masalalari boʻyicha Hukumat komissiyasiga (keyingi oʻrinlarda — Komissiya deb ataladi) tasdiqlash uchun kiritadi.

19. Komissiya majlisining bankrot korxonani tugatish muddatini uzaytirishni tasdiqlash toʻgʻrisidagi protokoli nusxasi Qoʻmita tomonidan uch kun muddatda tugatish komissiyasi raisi (ishonchli vakil)ga beriladi.

20. Bankrot korxonaning barcha mulki belgilangan muddatda sotilmagan taqdirda tugatish komissiyasi raisi (ishonchli vakil) tugatish ishlarini tugallash maqsadida mulkning sotilmagan qismini davlat mulkiga oʻtkazish toʻgʻrisida Qoʻmitaga murojaat qiladi.

Qoʻmita bankrot korxona mulkining sotilmagan qismini Oʻzbekiston Respublikasi Davlat mulki qoʻmitasi tasarrufiga oʻtkazish toʻgʻrisida Komissiya majlisiga taklif kiritadi.

Mulkning sotilmagan qismini oʻtkazish Komissiyaning koʻrib chiqish natijalariga koʻra, qonun hujjatlariga muvofiq amalga oshiriladi. Mulk oʻtkazilgandan keyin yakuniy hisobot tuziladi.

Yakuniy qoidalar

21. Mazkur Nizomda nazarda tutilgan talablar buzilgan hollarda tugatish komissiyasi harakatlari yuzasidan manfaatdor shaxslar tomonidan xoʻjalik sudiga shikoyat qilinishi mumkin.

22. Tugatish komissiyasi vakolati bankrot korxona yuridik shaxslarning yagona davlat reyestridan chiqarilgan vaqtdan boshlab toʻxtatiladi.