Yaponiya Hukumati tomonidan sogʻliqni saqlash va madaniyat sohasi ehtiyojlari uchun vaksinalar va asbob-uskunalar xarid qilishga grant ajratilishi toʻgʻrisida (330-son)

23.08.2000

Oʻzbekiston Respublikasi Vazirlar Mahkamasining

qarori

Respublikaga 204 mln Yaponiya iyenasi miqdoridagi bolalar vaksinalari va Davlat amaliy sanʼat muzeyini jihozlash uchun 46 mln Yaponiya iyenasi miqdoridagi asbob-uskunalar yetkazib berish uchun Yaponiya tomonidan begʻaraz berilayotgan mablagʻlardan samarali foydalanishni taʼminlash maqsadida Vazirlar Mahkamasi qaror qiladi:

1. Oʻzbekiston Respublikasi Bosh vazirining oʻrinbosari H.S. Karomatov ikkala loyiha boʻyicha Oʻzbekiston Respublikasi hukumati nomidan Ayirboshlash notalarini imzolashga vakil qilinsin.

2. Quyidagilar:

Oʻzbekiston Respublikasi Sogʻliqni saqlash vazirligi va Madaniyat ishlari vazirligiga begʻaraz yordamni olish uchun barcha tartibotlarni Yaponiya tomoni bilan kelishgan muddatlarda rasmiylashtirish va bolalar vaksinalari hamda muzey uchun asbob-uskunalarni yetkazib berishga ajratiladigan mablagʻlardan maqsadli foydalanish;

Oʻzbekiston Respublikasi Tashqi iqtisodiy faoliyat milliy bankiga Yaponiya Hukumatining yuqorida koʻrsatib oʻtilgan grantlariga hisob-kitob xizmati koʻrsatish vazifasi yuklansin.

3. Oʻzbekiston Respublikasi Davlat bojxona qoʻmitasi Oʻzbekiston Respublikasiga begʻaraz yordam doirasida kelayotgan vaksina, asbob-uskuna, texnika va xizmatlarni bojxona toʻlovlari hamda yigʻimlar toʻlashdan ozod qilsin.

4. “Oʻzbekiston havo yoʻllari” milliy aviakompaniyasi:

vaksinalar va asbob-uskunalarni ortish-tushirish va aeroportda yukning barcha saqlanish davrida omborlarga joylashtirish ishlarining toʻxtovsiz boʻlishini taʼminlasin;

yukning insonparvarlik xususiyatini eʼtiborga olib ichki avialiniyalarda vaksinalar va asbob-uskunalarni aviakompaniya samolyotlarida pulsiz tashishni hal qilsin.

5. Oʻzbekiston Respublikasi Moliya vazirligi Sogʻliqni saqlash vazirligi va Madaniyat ishlari vazirligining soʻmdagi mablagʻlarini begʻaraz yordamga hisob-kitob xizmati koʻrsatishni amalga oshirish uchun Yaponiya tomoniga vositachilik haqlari toʻlash uchun erkin almashtirishni nazarda tutsin.

6. Oʻzbekiston Respublikasi Tashqi ishlar vazirligi Sogʻliqni saqlash vazirligi va Madaniyat ishlari vazirligining buyurtmanomalari boʻyicha loyihani amalga oshirishda qatnashuvchi xorijiy mutaxassislarga kirish vizalarini konsullik yigʻimlarini undirmasdan belgilangan tartibda rasmiylashtirishni taʼminlasin.

7. Oʻzbekiston Respublikasi Ichki ishlar vazirligi Sogʻliqni saqlash vazirligi va Madaniyat ishlari vazirligining buyurtmanomalari boʻyicha koʻrsatib oʻtilgan loyihalarning yaponiyalik qatnashchilarini vaqtinchalik roʻyxatga olishni va vaqtinchalik roʻyxatga olishni uzaytirishni, davlat boji toʻlashdan ozod qilgan holda taʼminlasin.

8. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari H.S. Karomatov zimmasiga yuklansin.

Vazirlar Mahkamasining Raisi I. KARIMOV

Toshkent sh.,

2000-yil 23-avgust,

330-son