Oʻzbekiston montaj va maxsus qurilish ishlari uyushmasi faoliyatini tashkil etishni takomillashtirish toʻgʻrisida (400-son)

18.08.2004

Oʻzbekiston Respublikasi Vazirlar Mahkamasining

qarori

Oʻzbekiston Respublikasi Prezidentining “Xoʻjalik boshqaruvi organlari tizimini takomillashtirish toʻgʻrisida” 2003-yil 22-dekabrdagi PF-3366-son Farmonini bajarish yuzasidan hamda montaj va maxsus qurilish ishlarini boshqarishni yanada erkinlashtirish, ular faoliyatini tashkil etishni takomillashtirish va korporativ boshqaruv normalari va prinsiplarini keng joriy etish maqsadida Vazirlar Mahkamasi qaror qiladi:

1. 1-ilovaga muvofiq montaj, ixtisoslashtirilgan qurilish, sozlash va loyihalashtirish tashkilotlarining, metall konstruksiyalari tayyorlovchi sanoat korxonalari va boshqa ishlab chiqarish tuzilmalarining Oʻzbekiston montaj va maxsus qurilish ishlari uyushmasi (“Oʻzmontajmaxsusqurilish” uyushmasi) tarkibiga uyushma qatnashchilari huquqi bilan ixtiyoriy ravishda kirish toʻgʻrisidagi takliflariga rozilik berilsin.

2. Quyidagilar:

“Oʻzmontajmaxsusqurilish” uyushmasi faoliyati oʻzini oʻzi mablagʻ bilan taʼminlash prinsiplari asosida, 1-ilovaga muvofiq uning tarkibiga kiruvchi korxonalar va tashkilotlarning ajratmalari hamda qonun hujjatlarida taqiqlanmagan boshqa mablagʻlar hisobiga amalga oshirilishi;

“Oʻzmontajmaxsusqurilish” uyushmasi uning tarkibiga kirish xohishini bildirgan korxonalar va tashkilotlar uchun ochiq ekanligi, uning qatnashchilari esa uning tarkibidan erkin chiqib ketish huquqiga ega ekanligi;

“Oʻzmontajmaxsusqurilish” uyushmasi ijro etuvchi organining funksiyalari, huquqlari va majburiyatlari uning qatnashchilari umumiy yigʻilishi tomonidan belgilanishi maʼlumot uchun qabul qilinsin.

3. Quyidagilar “Oʻzmontajmaxsusqurilish” uyushmasining asosiy vazifalari va faoliyatining yoʻnalishlari etib belgilansin:

uyushma tarkibiga kiruvchi montaj, ixtisoslashtirilgan qurilish, sozlash va loyihalashtirish tashkilotlarining, sanoat korxonalarining investitsiya loyihalarini amalga oshirish, respublika iqtisodiyotining yuqori sifatli qurilish mahsulotiga, yuqori texnologiyali, maxsus qurilish-montaj va ishga tushirish-sozlash ishlariga boʻlgan ehtiyoji qondirilishini taʼminlashga doir faoliyatini muvofiqlashtirish;

raqobatbardoshli mahsulotlarning yangi turlarini ishlab chiqarishni oʻzlashtirishda, montaj qilish hamda asbob-uskunalar, zamonaviy qurilish texnologiyalaridan foydalanishning ilgʻor tizimlarini joriy etishda koʻmaklashish;

korxonalar va tashkilotlarga marketing tadqiqotlari oʻtkazishda, ishlab chiqarishlarni zamonaviylashtirish va texnologik jihatdan qayta jihozlashda, ushbu maqsadlar uchun xorijiy investitsiyalarni jalb etgan holda koʻmaklashish;

uyushma tarkibiga kiruvchi korxona va tashkilotlarga axborot xizmatlari koʻrsatish;

tarmoq uchun kadrlar tayyorlashni, ularni qayta tayyorlashni va ularning malakasini oshirishni tashkil etishda yordam berish.

4. “Oʻzmontajmaxsusqurilish” uyushmasi qatnashchilari tomonidan belgilangan, xodimlarning cheklangan umumiy soni 20 kishi, shu jumladan boshqaruv xodimlari soni 15 kishi boʻlgan Uyushma ijro etuvchi apparatining tuzilmasi 2-ilovaga muvofiq maʼqullansin.

Belgilansinki, “Oʻzmontajmaxsusqurilish” uyushmasi raisi, zarurat boʻlganda, xodimlarning belgilangan soni doirasida Uyushma ijro etuvchi apparati tuzilmasiga oʻzgartirish kiritish huquqiga ega.

5. “Oʻzmontajmaxsusqurilish” uyushmasi ikki oy muddatda qatnashchilarning umumiy yigʻilishini oʻtkazsin, Uyushmaning yangi tahrirdagi ustavini tasdiqlasin va davlat roʻyxatidan oʻtkazish uchun Oʻzbekiston Respublikasi Adliya vazirligiga taqdim etsin.

6. Quyidagilar:

Vazirlar Mahkamasining “Oʻzbekiston montaj va maxsus qurilish ishlari (“Oʻzmontajmaxsusqurilish”) uyushmasi faoliyatini tashkil etish masalalari” toʻgʻrisida 1992-yil 6-noyabrdagi 513-son qarori;

Vazirlar Mahkamasining “Kapital qurilishni boshqarish tashkiliy tuzilmasini yanada takomillashtirish chora-tadbirlari toʻgʻrisida” 1998-yil 28-noyabrdagi 500-son qaroriga 7 va 8-ilovalar oʻz kuchini yoʻqotgan deb hisoblansin.

7. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari R.F. Fayzullayev zimmasiga yuklansin.

Vazirlar Mahkamasining Raisi I. KARIMOV

Toshkent sh.,

2004-yil 18-avgust,

400-son

Vazirlar Mahkamasining 2004-yil 18-avgustdagi 400-son qaroriga 1-ILOVA

“Oʻzmontajmaxsusqurilish” uyushmasi tarkibiga qatnashchilar huquqi bilan kiruvchi korxonalar va tashkilotlar roʻyxati

I. Qurilish, montaj va maxsus qurilish ishlari korxonalari

1. “93-Maxsus trest” OAJ

2. “Oʻzelektrmontaj” OAJ

3. “Poʻlatqurilma” OAJ

4. “Santexgazmontajqurilish tresti” OAJ

5. “Sanoatventilyatsiya” OAJ

6. “Santexyigʻish” OAJ

7. “Portlatishsanoat” OAJ

8. “Maxsusavtomatika” OAJ

9. “Avtomatika” OAJ

10. “Qoʻqonqurilish” OAJ

11. “Raytek” YoAJ

12. “Sanoataloqamontaj” MChJ

13. “Tol-servis” MChJ

14. “Issiqlikmontaj” MChJ

15. “Agrosantexgazmontaj” XB

16. “Fargʻonaneftkimyomontaj” MChJ

17. “Neftzavodmontaj” MChJ

18. “Al-meʼmor” MChJ

19. “Maxsussantexgazmontaj” MChJ

20. “Firuz-lak” MChJ

21. “Gidroizolsintez” XF

22. “Elekom” XF

23. “Qurilishmontaj” XF

24. “Binokor” sanoat-qurilish kompaniyasi” MChJ

II. Sanoat korxonalari va tashkilotlari

26. “Toʻytepa metall qurilmalari zavodi” OAJ

27. “Santexnika jihozlari zavodi” OAJ

28. “Toshkent quvur zavodi QK” MChJ

29. “Mashsanoatqurilish” MChJ

30. “Vent-kon” XF

31. “Kitob KK” MChJ

32. “ Agrokeramika QK” MChJ

33. “Puls – Bax QK” MChJ

34. “Djan plast QK” MChJ

35. “Osiyo – vayer QK” MChJ

36. “Velizol QK” MChJ

37. “RIGGER GLASS QK” MChJ

38. “Boyler korporeyshn QK” MChJ

39. “Temir injiniring QK” MChJ

III. Loyihalash tashkilotlari

40. “Montajloyiha LTI” MChJ

IV. Ishlab chiqarish-texnik butlash korxonalari

41. “Oʻztaʼminbutlash” OAJ

Vazirlar Mahkamasining 2004-yil 18-avgustdagi 400-son qaroriga 2-ILOVA

“Oʻzmontajmaxsusqurilish” uyushmasi ijro etuvchi apparatining tuzilmasi