Toshkent shahridagi Turin politexnika universitetida aviakosmik muhandisligi sohasida kadrlar tayyorlashni tashkil etish toʻgʻrisida (996-son)

19.12.2017

Oʻzbekiston Respublikasi Vazirlar Mahkamasining

qarori

“Oʻzbekiston havo yoʻllari” Milliy aviakompaniyasining havo kemalariga texnik xizmat koʻrsatish va aeroportlardan foydalanish boʻyicha muhandislarga boʻlgan ehtiyojidan kelib chiqib, Kadrlar tayyorlash milliy dasturining maqsad va vazifalariga muvofiq va oliy taʼlim sifatiga qoʻyiladigan umumeʼtirof etilgan xalqaro talablarga muvofiq Vazirlar Mahkamasi qaror qiladi:

1. Oʻzbekiston Respublikasi Oliy va oʻrta maxsus taʼlim vazirligi, Iqtisodiyot vazirligi va “Oʻzbekiston havo yoʻllari” Milliy aviakompaniyasining Toshkent shahridagi Turin politexnika universitetida “Aviakosmik muhandisligi” taʼlim yoʻnalishi boʻyicha mutaxassislarni maqsadli tayyorlash toʻgʻrisidagi taklifiga rozilik berilsin.

2. Toshkent shahridagi Turin politexnika universitetiga:

Oliy va oʻrta maxsus taʼlim vazirligi hamda Turin politexnika universiteti (Italiya Respublikasi) bilan 2017/2018-oʻquv yilining ikkinchi semestridan “Mashinasozlik texnologiyasi” taʼlim yoʻnalishining uchinchi kursi negizida “Aviakosmik muhandisligi” taʼlim yoʻnalishi boʻyicha talabalarning 25 kishidan iborat dastlabki akademik guruhni tayyorlashni boshlash uchun bakalavriatning tegishli oʻquv dasturiga oʻzgartirishlar kiritish masalasini kelishish;

oʻquv dasturiga oʻzgartirishlar kiritishda birinchi navbatda “Oʻzbekiston havo yoʻllari” Milliy aviakompaniyasining ushbu taʼlim yoʻnalishi bitiruvchilariga qoʻyadigan talablarini inobatga olish tavsiya etilsin.

3. Quyidagilar maʼlumot uchun qabul qilinsin:

xorijiy professor-oʻqituvchilarni jalb qilish va oʻquv dasturini ishlab chiqish ishlari Toshkent shahridagi Turin politexnika universiteti hamda Turin politexnika universiteti (Italiya Respublikasi) oʻrtasida tuziladigan shartnomalar asosida amalga oshiriladi;

ushbu taʼlim yoʻnalishi boʻyicha oʻquv jarayonini tashkil etish tadbirlari Toshkent shahridagi Turin politexnika universiteti Vasiylik kengashi qarorlari asosida jalb etilgan mablagʻlar, shuningdek, homiylar mablagʻlari va qonun hujjatlarida taqiqlanmagan boshqa manbalar hisobidan amalga oshiriladi.

4. “Oʻzbekiston havo yoʻllari” Milliy aviakompaniyasi Toshkent shahridagi Turin politexnika universiteti tomonidan tayyorlangan mutaxassislar tomonidan malaka amaliyotini oʻtash uchun laboratoriya bazasi va baza sifatida foydalanish uchun kompaniya korxonalarining moddiy-texnika bazasini taqdim etsin.

5. Oʻzbekiston Respublikasi oliy va oʻrta maxsus taʼlim vazirligi har yili Toshkent shahridagi Turin politexnika universitetiga qabul kvotasini tasdiqlash toʻgʻrisidagi hukumat qarorlari loyihalarini tayyorlashda “Oʻzbekiston havo yoʻllari” Milliy aviakompaniyasi mutaxassislariga boʻlgan ehtiyojga muvofiq yangi ochilgan taʼlim yoʻnalishini hisobga olsin.

6. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosarlari K.V. Akmalov, N.S. Otajonov, Oʻzbekiston Respublikasi oliy va oʻrta maxsus taʼlim vaziri I.U. Majidov va “Oʻzbekiston havo yoʻllari” milliy aviakompaniyasi bosh direktori U.U. Rozukulov zimmasiga yuklansin.

Oʻzbekiston Respublikasining Bosh vaziri A. ARIPOV

Toshkent sh.,

2017-yil 19-dekabr,

996-son