2018-yilda metall parchalarini tayyorlash, qora metallar prokatini ishlab chiqarish va foydalanish chora-tadbirlari toʻgʻrisida (PQ-3438-son)

18.12.2017

Oʻzbekiston Respublikasi Prezidentining

Qarori

Qora metall parchalari va chiqindilarini qayta ishlovchi metallurgiya korxonalari ishlab chiqarish quvvatlarini xom ashyo bilan yanada toʻliq taʼminlash, shuningdek, ikkilamchi resurslardan samarali foydalanish xamda respublika iqtisodiyoti tarmoqlari va sohalarining metall prokatiga boʻlgan talab-ehtiyojini qondirish, ularni ichki va tashqi bozorlarga yetkazib berish hajmlarini oshirish maqsadida:

1. 2018-yilda:

qora metall parchalari, chiqindilarini tayyorlash va foydalanish balansi 1-ilovaga* muvofiq;

“Oʻzmetkombinat” AJ tomonidan ishlab chiqariladigan qora metallar prokatini tayyorlash va sotish balansi 2-ilovaga* muvofiq tasdiqlansin.

2. Belgilansinki, 2018-yilning 1-yanvaridan boshlab:

“Oʻzmetkombinat” AJ tomonidan ishlab chiqarilgan qora metallar prokatini ajratish (yetkazib berish) faqat birja savdolari orqali, shu jumladan, avval qabul qilingan qarorlarda metall prokatini toʻgʻridan toʻgʻri shartnomalar boʻyicha hamda belgilab qoʻyilgan narxlarda yetkazib berish nazarda tutilgan obyektlar orqali amalga oshiriladi;

birja savdolarida sotilmagan qora metallar prokati hajmlari birinchi marta savdoga qoʻyilgan paytdan boshlab bir oy davomida birja savdolariga takroran qoʻyilishi lozim, unga talab boʻlmagan taqdirda esa toʻgʻridan toʻgʻri shartnomalar boʻyicha belgilangan tartibda eksportga sotilishi mumkin boʻladi;

oʻzining quyuv sexlariga ega korxonalar tomonidan qora metall parchalari va chiqindilarini tayyorlash, topshirish, shuningdek, foydalanish boʻyicha 2018-yilgi prognoz topshiriqlari Oʻzbekiston Respublikasi Vazirlar Mahkamasining Geologiya, yoqilgʻi-energetika kompleksi, kimyo, neft-kimyo va metallurgiya sanoati masalalari kompleksi tomonidan tasdiqlanadi;

mahalliy davlat hokimiyati organlariga taʼlim va tibbiyot muassasalari oldiga qora metall parchalari, chiqindilarini tayyorlash va topshirish vazifalarini qoʻyish taqiqlanadi;

korxonalarning toʻlovga qobiliyatsizligi, tugatilishi, rekonstruksiya va modernizatsiya qilinishi davomida hisobdan chiqariladigan jismoniy va maʼnaviy eskirgan uskunalar xamda metall konstruksiyalari majburiy tartibda “Oʻzmetkombinat” AJga qora metall parchalari va chiqindilari sifatida erkin (kelishilgan) narxlarda topshirilishi lozim boʻladi.

“Oʻzmetkombinat” AJ tomonidan ishlab chiqarilgan qora metallar prokatini sotish, istisno tariqasida, markazlashtirilgan manbalar hisobidan moliyalashtiriladigan isteʼmolchilarga Oʻzbekiston Respublikasi Iqtisodiyot va sanoat vazirligining asoslantirilgan takliflari boʻyicha Vazirlar Mahkamasining qarorlari bilan belgilanadigan hajmlarda toʻgʻridan-toʻgʻri shartnomalar va birja kotirovkalarining oʻrtacha narxlari asosida amalga oshirilishi mumkin;

markazlashtirilgan manbalar hisobidan moliyalashtiriladigan isteʼmolchilarga kvartal davomida birja kotirovkalarining oʻrtacha narxlari boʻyicha toʻgʻridan-toʻgʻri shartnomalar asosida sotilmagan qora metallar prokatining hajmlari birja savdolariga majburiy qoʻyilishi lozim.

3. Oʻzbekiston Respublikasi Vazirlar Mahkamasining Geologiya, yoqilgʻi-energetika kompleksi, kimyo, neft-kimyo va metallurgiya sanoati masalalari kompleksi (A.S. Sultonov):

ikki hafta muddatda 1- va 2-ilovalarga* muvofiq tasdiqlangan balanslar parametrlarini oyma-oy bajarish jadvallarini ishlab chiqsin va tasdiqlasin;

xar oy asosida tasdiqlangan balanslarning asosiy parametrlari bajarilishini, zarur hollarda, metallurgiya korxonalarining ishlab chiqarish quvvatlarini xom ashyo bilan yanada toʻliq taʼminlash xamda iqtisodiyot tarmoqlari va sohalarining metall prokatiga boʻlgan talab-ehtiyojini qondirish yuzasidan qoʻshimcha chora-tadbirlarni ishlab chiqqan holda tizimli monitoring qilib borsin.

4. Oʻzbekiston Respublikasi Iqtisodiyot vazirligi (B.A. Xodjayev) Oʻzbekiston Respublikasi Statistika qoʻmitasi, Oʻzbekiston Respublikasi Bojxona qoʻmitasi bilan birgalikda xar chorak asosida, 3-ilovaga* muvofiq, Oʻzbekiston Respublikasi boʻyicha metall prokatining resurs bazasi, uni ishlab chiqarish va sotish yigʻma koʻrsatkichlari tahlillarini oʻtkazib, keyinchalik bu axborotni Oʻzbekiston Respublikasi Vazirlar Mahkamasining Geologiya, yoqilgʻi-energetika kompleksi, kimyo, neft-kimyo va metallurgiya sanoati masalalari kompleksiga taqdim etsin.

* 1 — 3-ilovalar rus tilidagi matnda berilgan.

5. Qora metallar prokatini ishlab chiqarish uchun xoʻjalik yurituvchi subyektlar tomonidan respublikaga olib kelinadigan metallurgiya xom ashyosi (TIF TN kodlari 2619, 7203, 7204, 7207, 7224) 2020-yilning 1-yanvarigacha bojxona toʻlovlaridan (bojxona yigʻimlari bundan mustasno) ozod etilsin.

7. Mazkur qarorning ijrosini nazorat qilish Oʻzbekiston Respublikasi Bosh vazirining oʻrinbosari — “Oʻzbekneftgaz” AJ boshqaruvi raisi A.S. Sultonov, Oʻzbekiston Respublikasi iqtisodiyot vaziri B.A. Xodjayev va “Oʻzmetkombinat” AJ boshqaruvi raisi A.X. Xursanov zimmasiga yuklansin.

Oʻzbekiston Respublikasi Prezidenti Sh. MIRZIYOYEV

Toshkent sh.,

2017-yil 18-dekabr,

PQ-3438-son