Oʻzbekiston Respublikasi Favqulodda vaziyatlar vazirligining moddiy-texnika bazasini mustahkamlash hamda xodimlarini moddiy ragʻbatlantirish chora-tadbirlari toʻgʻrisida (968-son)

05.12.2017

Oʻzbekiston Respublikasi Vazirlar Mahkamasining

qarori

Oʻzbekiston Respublikasi Prezidentining “Favqulodda vaziyatlarning oldini olish va bartaraf etish tizimi samaradorligini tubdan oshirish chora-tadbirlari toʻgʻrisida” 2017-yil 1-iyundagi PF-5066-son Farmoni talablarini bajarish hamda Oʻzbekiston Respublikasi Favqulodda vaziyatlar vazirligining moddiy-texnika bazasini mustahkamlash, shuningdek, xodimlarini moddiy ragʻbatlantirish maqsadida Vazirlar Mahkamasi qaror qiladi:

1. Oʻzbekiston Respublikasi Favqulodda vaziyatlar vazirligi, Moliya vazirligi va Iqtisodiyot vazirligining Oʻzbekiston Respublikasi Favqulodda vaziyatlar vazirligining moddiy-texnika bazasini mustahkamlash, shuningdek, xodimlarini moddiy ragʻbatlantirish boʻyicha budjetdan tashqari maxsus jamgʻarmasini (keyingi oʻrinlarda Budjetdan tashqari maxsus jamgʻarma deb ataladi) tashkil etish toʻgʻrisidagi taklifiga rozilik berilsin.

2. Quyidagilar Budjetdan tashqari maxsus jamgʻarma daromadlarini shakllantirish manbalari etib belgilansin:

kemalarni, shu jumladan kichik hajmli kemalarni roʻyxatdan (qayta roʻyxatdan) oʻtkazish, kichik hajmli kemalarni texnik koʻrikdan oʻtkazish, kemalarni qurishda, foydalanishda, qayta jihozlashda va taʼmirlashda koʻrikdan oʻtkazishdan tushgan mablagʻlarning 60 foizi miqdoridagi ajratmalar;

aholini va hududlarni tabiiy hamda texnogen xususiyatli favqulodda vaziyatlardan muhofaza qilish, shuningdek, fuqaro muhofazasi toʻgʻrisidagi qonun hujjatlari talablarini bajarmaslik, kichik hajmli kemalarni roʻyxatdan oʻtkazish qoidalarini, shuningdek, bunday kemalardan va ular turadigan bazalardan (inshootlardan) foydalanish qoidalarini buzganlik, kema haydovchilarining kichik hajmli kemalarni mast holda boshqargani uchun belgilangan tartibda solinadigan jarimalar summasining 60 foizi miqdoridagi ajratmalar;

Oʻzbekiston Respublikasi Favqulodda vaziyatlar vazirligining hududiy boshqarmalari, tarkibiy tuzilmalari va idoraviy mansub tashkilotlarini rivojlantirish boʻyicha budjetdan tashqari jamgʻarmalar foydasining 15 foizi miqdoridagi ajratmalar;

Oʻzbekiston Respublikasi aholisiga xabar berish va maʼlumot (axborot) yetkazishning avtomatlashtirilgan tizimidan reklama-marketing maʼlumotlarni translyatsiya qilish uchun foydalanishdan tushadigan daromadlar;

yuridik va jismoniy shaxslar, shu jumladan Oʻzbekiston Respublikasi norezidentlarining xayriya mablagʻlari;

vaqtincha boʻsh turgan mablagʻlarni tijorat banklarining depozitlariga joylashtirishdan tushadigan daromadlar;

qonun hujjatlarida taqiqlanmagan boshqa daromadlar.

3. Oʻzbekiston Respublikasi Favqulodda vaziyatlar vazirligining moddiy-texnika bazasini mustahkamlash, shuningdek, xodimlarini moddiy ragʻbatlantirish boʻyicha Budjetdan tashqari maxsus jamgʻarmasi mablagʻlarini shakllantirish va ulardan foydalanish tartibi toʻgʻrisidagi nizom 1-ilovaga muvofiq tasdiqlansin.

4. Oʻzbekiston Respublikasi Favqulodda vaziyatlar vazirligi Oʻzbekiston Respublikasi Moliya vazirligi bilan kelishgan holda Oʻzbekiston Respublikasi Favqulodda vaziyatlar vazirligining hududiy boshqarmalari, tarkibiy tuzilmalari va idoraviy mansub tashkilotlarini rivojlantirish boʻyicha budjetdan tashqari jamgʻarmalar mablagʻlarini shakllantirish va ulardan foydalanish tartibi toʻgʻrisidagi nizomni bir oy muddatda tasdiqlansin.

6. Mazkur qarorning bajarilishini nazorat qilish Oʻzbekiston Respublikasi Bosh vazirining birinchi oʻrinbosari — “Oʻzbekiston temir yoʻllari” AJ boshqaruvi raisi A.J. Ramatov va Oʻzbekiston Respublikasi Favqulodda vaziyatlar vaziri R.M. Djurayev zimmasiga yuklansin.

Oʻzbekiston Respublikasining Bosh vaziri A. ARIPOV

Toshkent sh.,

2017-yil 5-dekabr,

968-son

Vazirlar Mahkamasining 2017-yil 5-dekabrdagi 968-son qaroriga 1-ILOVA

Oʻzbekiston Respublikasi Favqulodda vaziyatlar vazirligining moddiy-texnika bazasini mustahkamlash, shuningdek, xodimlarini moddiy ragʻbatlantirish boʻyicha Budjetdan tashqari maxsus jamgʻarmasi toʻgʻrisida

NIZOM

1-bob. Umumiy qoidalar

1. Ushbu Nizom Oʻzbekiston Respublikasi Favqulodda vaziyatlar vazirligining moddiy-texnik bazasini mustahkamlash, shuningdek, xodimlarini moddiy ragʻbatlantirish boʻyicha Budjetdan tashqari maxsus jamgʻarmasi (keyingi oʻrinlarda Jamgʻarma deb ataladi) mablagʻlarini shakllantirish va ulardan foydalanish tartibini belgilaydi.

2. Jamgʻarma oʻz faoliyatini Oʻzbekiston Respublikasi Konstitutsiyasi va qonunlariga, Oʻzbekiston Respublikasi Oliy Majlisi palatalarining qarorlariga, Oʻzbekiston Respublikasi Prezidentining farmonlari, qarorlari va farmoyishlariga, Oʻzbekiston Respublikasi Vazirlar Mahkamasining qarorlari va farmoyishlariga, boshqa qonun hujjatlariga, shuningdek, mazkur Nizomga muvofiq amalga oshiradi.

3. Jamgʻarma Oʻzbekiston Respublikasi Favqulodda vaziyatlar vazirligida (keyingi oʻrinlarda Vazirlik deb ataladi) yuridik shaxsni tashkil etmagan holda tuziladi.

4. Jamgʻarma mablagʻlari Vazirlikning budjetdan tashqari maxsus hisob raqamida jamlanadi.

2-bob. Jamgʻarma mablagʻlarini shakllantirish va ulardan foydalanish tartibi

5. Jamgʻarma mablagʻlari:

kemalarni, shu jumladan kichik hajmli kemalarni roʻyxatdan (qayta roʻyxatdan) oʻtkazish, kichik hajmli kemalarni texnik koʻrikdan oʻtkazish, kemalarni qurishda, foydalanishda, qayta jihozlashda va taʼmirlashda koʻrikdan oʻtkazishdan tushgan mablagʻlarning 60 foizi miqdoridagi ajratmalar;

aholini va hududlarni tabiiy hamda texnogen xususiyatli favqulodda vaziyatlardan muhofaza qilish, shuningdek fuqaro muhofazasi toʻgʻrisidagi qonun hujjatlari talablarini bajarmaslik, kichik hajmli kemalarni roʻyxatdan oʻtkazish qoidalarini, shuningdek, bunday kemalardan va ular turadigan bazalardan (inshootlardan) foydalanish qoidalarini buzganlik, kema haydovchilarining kichik hajmli kemalarni mast holda boshqargani uchun belgilangan tartibda solinadigan jarimalar summasining 60 foizi miqdordagi ajratmalar;

Vazirlikning hududiy boshqarmalari, tarkibiy tuzilmalari va idoraviy mansub tashkilotlarini rivojlantirish boʻyicha budjetdan tashqari jamgʻarmalari foydasining 15 foizi miqdoridagi ajratmalar;

Oʻzbekiston Respublikasi aholisiga xabar berish va maʼlumot (axborot) yetkazishning avtomatlashtirilgan tizimidan reklama-marketing maʼlumotlarni translyatsiya qilish uchun foydalanishdan tushadigan daromadlar;

yuridik va jismoniy shaxslar, shu jumladan Oʻzbekiston Respublikasi norezidentlarining xayriya mablagʻlari;

vaqtincha boʻsh turgan mablagʻlarni tijorat banklarining depozitlariga joylashtirishdan tushadigan daromadlar;

qonun hujjatlarida taqiqlanmagan boshqa daromadlar hisobiga shakllantiriladi.

6. Jamgʻarma mablagʻlari:

Vazirlikning moddiy-texnika bazasini mustahkamlash tadbirlarini, bunda Jamgʻarma mablagʻlarining 75 foizidan kam boʻlmagan miqdori ushbu maqsadlarga sarflanadi;

vakillik tadbirlarini (xorijiy delegatsiyalarni kutib olish, transport xizmati, tarjimonlarni jalb qilish, sovgʻa va suvenirlar sotib olish, ovqatlantirish);

sport musobaqalari va madaniy tadbirlar oʻtkazishni;

xorijiy mutaxassislarni jalb qilish tadbirlarini;

Vazirlik xodimlarini tayyorlash, qayta tayyorlash va malakasini oshirish tadbirlarini;

Vazirlikning favqulodda vaziyatlarning oldini olish sohasida oʻz xizmat faoliyatida yuqori natijalarga erishgan xodimlarini moddiy ragʻbatlantirish va ijtimoiy muhofaza qilish choralarini, shu jumladan:

sanatoriy-kurort va tibbiy xizmat koʻrsatishni;

yuqori kasb mahorati, murabbiylik uchun hamda alohida oʻrnak koʻrsatgan Vazirlik xodimlarini asosiy tarif stavkalariga har oylik ustamalar belgilagan holda moddiy ragʻbatlantirishni;

bir yoʻla mukofotlash va moddiy yordam koʻrsatishni (alohida hollarda) moliyalashtirishga yoʻnaltiriladi.

3-bob. Jamgʻarmani boshqarish

7. Jamgʻarma tarkibi va faoliyat tartibi Vazirlikning hayʼati tomonidan belgilanadigan va tasdiqlanadigan Jamgʻarmani boshqarish kengashi tomonidan boshqariladi.

8. Quyidagilar Jamgʻarmani boshqarish kengashining asosiy vazifalari hisoblanadi:

Jamgʻarma mablagʻlaridan maqsadli va samarali foydalanilishini nazorat qilish;

har yili 25-dekabrgacha Jamgʻarmaning kelgusi yil uchun daromadlari va xarajatlari smetalarini tasdiqlash;

Jamgʻarmaning chorak yakuni boʻyicha daromadlari va xarajatlari toʻgʻrisidagi hisobotini koʻrib chiqish va tasdiqlash;

Jamgʻarmaga xorijiy kredit va grantlar jalb etilishiga koʻmaklashish;

Jamgʻarma mablagʻlarini shakllantirish va ulardan foydalanish bilan bogʻliq boshqa vakolatlarni amalga oshirish.

9. Jamgʻarmani boshqarish kengashining majlisi unda aʼzolarining kamida uchdan ikki qismi ishtirok etgan taqdirda vakolatli hisoblanadi.

Jamgʻarma mablagʻlaridan foydalanish toʻgʻrisidagi qaror Jamgʻarmani boshqarish kengashi aʼzolarining oddiy koʻpchilik ovozi bilan qabul qilinadi va Jamgʻarmani boshqarish kengashi raisi tomonidan tasdiqlanadi.

10. Vazirlikning moliya-iqtisodiyot boshqarmasi Jamgʻarmaning Ishchi organi hisoblanadi.

11. Ishchi organ quyidagi funksiyalarni amalga oshiradi:

Jamgʻarmaning kelgusi yil uchun daromadlari va xarajatlari prognoz koʻrsatkichlarini ishlab chiqadi;

daromadlar va xarajatlar smetalarini tayyorlaydi, shuningdek, ularga qonun hujjatlarida belgilangan tartibda oʻzgartirishlar kiritadi;

Jamgʻarma tushumlarini koʻpaytirish va uning mablagʻlaridan samarali foydalanish boʻyicha takliflar tayyorlaydi;

soʻrovnomalarni umumlashtiradi va Jamgʻarmani boshqarish kengashiga koʻrib chiqish uchun materiallar tayyorlaydi;

Jamgʻarmaning tushumlar manbalari hamda asosiy xarajatlar yoʻnalishlari boʻyicha daromadlari hisobini yuritadi;

Jamgʻarma mablagʻlaridan maqsadli foydalanish yuzasidan texnik va moliyaviy nazoratni olib boradi;

har chorakda kamida bir marta Jamgʻarma mablagʻlaridan foydalanilishi toʻgʻrisida hisobot tayyorlaydi va Jamgʻarmani boshqarish kengashiga taqdim etadi.

4-bob. Hisob, hisobot va nazorat

12. Jamgʻarma mablagʻlaridan foydalanish boʻyicha hisob va hisobotlar Vazirlikning budjetdan tashqari boshqa mablagʻlaridan alohida yuritiladi.

13. Jamgʻarmaning tushumlari va xarajatlari smetasi budjet tashkilotlari uchun budjetdan tashqari mablagʻlari boʻyicha qonunchilikda belgilangan tartibda tuziladi (choraklar, tushumlar manbalari va ulardan foydalanish yoʻnalishlari kesimida) va Jamgʻarmani boshqarish kengashi tomonidan tasdiqlanadi.

14. Jamgʻarmani boshqarish kengashi raisi Jamgʻarmaning daromadlari va xarajatlari smetalariga zarurat boʻlganda oʻzgartirishlar kiritish huquqiga ega.

15. Jamgʻarmaning daromadlari va xarajatlari smetalarining bajarilishi boʻyicha yillik hisobot Vazirlik hayʼati majlisida koʻrib chiqiladi va har yili 15-martgacha Jamgʻarmani boshqarish kengashi tomonidan tasdiqlanadi.

16. Jamgʻarma mablagʻlaridan maqsadli foydalanilishi Oʻzbekiston Respublikasi Moliya vazirligining Davlat moliya nazorati bosh boshqarmasi tomonidan nazorat qilinadi.

5-bob. Yakunlovchi qoida

17. Ushbu Nizom talablari buzilishida aybdor boʻlgan shaxslar qonun hujjatlarida belgilangan tartibda javob beradi.