Pochta aloqasi sohasidagi faoliyatni takomillashtirish toʻgʻrisida (339-son)

19.07.2004

Oʻzbekiston Respublikasi Vazirlar Mahkamasining

qarori

Pochta aloqasini boshqarish tuzilmasini takomillashtirish va uning faoliyati samaradorligini oshirish, shuningdek “Pochta aloqasi toʻgʻrisida”gi Oʻzbekiston Respublikasi Qonunini hamda 2003-2004-yillarda korxonalarni davlat tasarrufidan chiqarish va xususiylashtirishning qabul qilingan dasturini bajarish yuzasidan Vazirlar Mahkamasi qaror qiladi:

1. Quyidagilar:

“Oʻzbekiston pochtasi” davlat-aksiyadorlik kompaniyasini “Oʻzbekiston pochtasi” ochiq aksiyadorlik jamiyatiga aylantirish toʻgʻrisida;

1-ilovaga muvofiq aksiyadorlik jamiyatlarini, ularning negizida “Oʻzbekiston pochtasi” ochiq aksiyadorlik jamiyati filiallarini tashkil etgan holda, “Oʻzbekiston pochtasi” ochiq aksiyadorlik jamiyatiga qoʻshish toʻgʻrisida Oʻzbekiston Respublikasi Davlat mulki qoʻmitasi, Oʻzbekiston aloqa va axborotlashtirish agentligining taklifiga, shuningdek “Oʻzbekiston pochtasi” davlat-aksiyadorlik kompaniyasi hamda uning tarkibiga kiruvchi aksiyadorlik jamiyatlari umumiy yigʻilishlarining qarorlariga rozilik berilsin.

Belgilab qoʻyilsinki, “Oʻzbekiston pochtasi” ochiq aksiyadorlik jamiyati “Oʻzbekiston pochtasi” davlat-aksiyadorlik kompaniyasi hamda uning tarkibiga kiruvchi aksiyadorlik jamiyatlarining tuzilgan shartnomalari va majburiyatlari boʻyicha huquqiy vorisi hisoblanadi.

2. “Oʻzbekiston pochtasi” ochiq aksiyadorlik jamiyati Oʻzbekiston Respublikasi pochta aloqasining milliy operatori etib belgilansin, unga quyidagi asosiy vazifalarni bajarish yuklansin:

pochta aloqasi xizmatlari bozoridagi talabni qondirish, respublikaning butun hududidagi barcha foydalanuvchilar uchun yagona qoidalar va talablar asosida majburiy tartibda pochta aloqasi universal xizmatlari koʻrsatish;

pochta aloqasi sohasida iqtisodiy islohotlarni amalga oshirish, uni xoʻjalik yuritishning bozor sharoitlariga oʻtkazish, koʻrsatiladigan xizmatlar turlarini kengaytirish;

pochta aloqasi xizmatlari va qoʻshimcha xizmatlar koʻrsatish uchun pochta aloqasi tarmoqlari va vositalarini erkinlashtirish hamda rivojlantirish chora-tadbirlarini amalga oshirish, ularni foydalanuvchilarga yaqinlashtirish;

pochta joʻnatmalarini, pochta orqali pul mablagʻlari joʻnatmalarini xalqaro ayirboshlashni tashkil etish va amalga oshirish, shuningdek Oʻzbekiston Respublikasi hududida Umumjahon pochta ittifoqining hujjatlaridan kelib chiquvchi majburiyatlarni bajarish;

pochta aloqasi tarmoqlarida yozishmalarning maxfiyligini va pochta xavfsizligini taʼminlash;

marketing tadqiqotlarini tashkil etish, bozor konyunkturasini hisobga olgan holda past narxlardagi xizmatlarning yangi turlarini joriy etish yoʻli bilan pochta xizmatlari bozoridagi raqobatbardoshlilikni oshirish;

pochta aloqasi sifati va ishonchliligini oshirish uchun axborot texnologiyalarini qoʻllanish;

pochta aloqasi sohasida mutaxassislar tayyorlashning yuqori darajasini taʼminlash.

3. Quyidagilar:

“Oʻzbekiston pochtasi” ochiq aksiyadorlik jamiyatining tashkiliy tuzilmasi 2-ilovaga muvofiq;

“Oʻzbekiston pochtasi” ochiq aksiyadorlik jamiyati boshqaruv apparatining xodimlarning cheklangan umumiy soni 92 nafar, shu jumladan boshqaruv xodimlari soni 65 nafar boʻlgan tuzilmasi 3-ilovaga muvofiq maʼqullansin.

4. Belgilab qoʻyilsinki, “Oʻzbekiston pochtasi” ochiq aksiyadorlik jamiyatining ustav jamgʻarmasi ochiq aksiyadorlik jamiyatining oʻz mol-mulki, 1-ilovada koʻrsatilgan qayta tashkil etilayotgan aksiyadorlik jamiyatlari mol-mulki hisobiga shakllantiriladi, aksiyalari paketlari quyidagicha taqsimlanadi:

davlat mulkida saqlanadigan ulush — 51 foiz;

erkin sotish uchun moʻljallangan ulush — 49 foiz.

5. Oʻzbekiston Respublikasi Davlat mulki qoʻmitasi Oʻzbekiston aloqa va axborotlashtirish agentligi bilan birgalikda ikki oy muddatda “Oʻzbekiston pochtasi” ochiq aksiyadorlik jamiyatining ustav jamgʻarmasini shakllantirish tadbirlarini belgilangan tartibda amalga oshirsin, qayta tashkil etilayotgan aksiyadorlik jamiyatlarining aksiyalarini erkin sotish uchun moʻljallangan ulush hisobiga “Oʻzbekiston pochtasi” ochiq aksiyadorlik jamiyati aksiyalariga konvertatsiya qilsin.

6. Oʻzbekiston aloqa va axborotlashtirish agentligi 2010-yilgacha pochta aloqasi shoxobchalarini zamonaviylashtirish, axborot-kommunikatsiya texnologiyalari negizida xizmatlarning yangi turlarini joriy etish va rivojlantirish dasturini ikki oy muddatda Vazirlar Mahkamasiga kiritsin.

7. Oʻzbekiston Respublikasi Hukumatining 4-ilovaga muvofiq ayrim qarorlariga oʻzgartirishlar kiritilsin.

8. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari A.N. Aripov zimmasiga yuklansin.

Vazirlar Mahkamasining Raisi I. KARIMOV

Toshkent sh.,

2004-yil 19-iyul,

339-son

Vazirlar Mahkamasining 2004-yil 19-iyuldagi 339-son qaroriga 1-ILOVA

“Oʻzbekiston pochtasi” davlat-aksiyadorlik kompaniyasi tarkibiga kirgan qayta tashkil etiladigan, “Oʻzbekiston pochtasi” ochiq aksiyadorlik jamiyatiga qoʻshiladigan aksiyadorlik jamiyatlari roʻyxati

1. “Qoraqalpoq pochtasi” aksiyadorlik jamiyati

2. “Andijon pochtasi” aksiyadorlik jamiyati

3. “Buxoro pochtasi” aksiyadorlik jamiyati

4. “Jizzax pochtasi” aksiyadorlik jamiyati

5. “Qashqadaryo pochtasi” aksiyadorlik jamiyati

6. “Navoiy pochtasi” aksiyadorlik jamiyati

7. “Namangan pochtasi” aksiyadorlik jamiyati

8. “Samarqand pochtasi” aksiyadorlik jamiyati

9. “Surxondaryo pochtasi” aksiyadorlik jamiyati

10. “Sirdaryo pochtasi” aksiyadorlik jamiyati

11. “Toshkent pochtasi” aksiyadorlik jamiyati

12. “Fargʻona pochtasi” aksiyadorlik jamiyati

13. “Xorazm pochtasi” aksiyadorlik jamiyati

14. “Toshkent pochtamti” aksiyadorlik jamiyati

15. “Xalqaro pochtamt” aksiyadorlik jamiyati

16. “Oʻzbekiston markasi” aksiyadorlik jamiyati

17. “Xalqaro tezkor pochta” aksiyadorlik jamiyati

Vazirlar Mahkamasining 2004-yil 19-iyuldagi 339-son qaroriga 2-ILOVA

“Oʻzbekiston pochtasi” ochiq aksiyadorlik jamiyatining tashkiliy tuzilmasi

Vazirlar Mahkamasining 2004-yil 19-iyuldagi 339-son qaroriga 3-ILOVA

“Oʻzbekiston pochtasi” ochiq aksiyadorlik jamiyati boshqaruv apparatining tuzilmasi

Vazirlar Mahkamasining 2004-yil 19-iyuldagi 339-son qaroriga 4-ILOVA

Oʻzbekiston Respublikasi Hukumatining ayrim qarorlariga kiritilayotgan oʻzgartirishlar

1. Vazirlar Mahkamasining “2003-2004-yillarda korxonalarni davlat tasarrufidan chiqarish va xususiylashtirish dasturi toʻgʻrisida” 2003-yil 17-apreldagi 185-son qarorida:

3-ilovadagi 629—645-pozitsiyalar chiqarib tashlansin;

4-ilovadagi 337-pozitsiyada “Oʻzbekiston pochtasi” davlat-aksiyadorlik kompaniyasi” soʻzlari “Oʻzbekiston pochtasi” ochiq aksiyadorlik jamiyati” soʻzlari bilan almashtirilsin.