Oʻzbekiston Respublikasida naqd pulsiz hisob-kitoblar toʻgʻrisidagi nizomga oʻzgartirish va qoʻshimchalar kiritish haqida (2465-5-son)
22.11.2017
Oʻzbekiston Respublikasi Markaziy banki boshqaruvining
Qarori
[Oʻzbekiston Respublikasi Adliya vazirligi tomonidan 2017-yil 22-noyabrda roʻyxatdan oʻtkazildi, roʻyxat raqami 2465-5]
Oʻzbekiston Respublikasining “Oʻzbekiston Respublikasining Markaziy banki toʻgʻrisida”gi, “Banklar va bank faoliyati toʻgʻrisida”gi, “Elektron toʻlovlar toʻgʻrisida”gi qonunlariga va Oʻzbekiston Respublikasi Prezidentining 2017-yil 29-maydagi PF-5059-son “Elektr energiyasi va tabiiy gaz yetkazib berish hamda isteʼmol qilish sohasida toʻlov intizomini yanada mustahkamlash, shuningdek, ijro ishi yuritish tizimini tubdan takomillashtirish chora-tadbirlari toʻgʻrisida”gi hamda 2017-yil 5-iyuldagi PF-5106-son “Yoshlarga oid davlat siyosati samaradorligini oshirish va Oʻzbekiston yoshlar ittifoqi faoliyatini qoʻllab-quvvatlash toʻgʻrisida”gi farmonlariga muvofiq Oʻzbekiston Respublikasi Markaziy banki Boshqaruvi qaror qiladi:
1. Oʻzbekiston Respublikasi Markaziy banki Boshqaruvining 2013-yil 26-apreldagi 9/1-son qarori (roʻyxat raqami 2465, 2013-yil 3-iyun) (Oʻzbekiston Respublikasi qonun hujjatlari toʻplami, 2013-y., 23-son, 309-modda) bilan tasdiqlangan Oʻzbekiston Respublikasida naqd pulsiz hisob-kitoblar toʻgʻrisidagi nizomga ilovaga muvofiq oʻzgartirish va qoʻshimchalar kiritilsin.
2. Mazkur qaror rasmiy eʼlon qilingan kundan eʼtiboran kuchga kiradi.
Markaziy bank raisi M. NURMURATOV
Toshkent sh.,
2017-yil 11-noyabr,
31/1-son
Oʻzbekiston Respublikasi Markaziy banki Boshqaruvining 2017-yil 11-noyabrdagi 31/1-sonli qaroriga ILOVA
Oʻzbekiston Respublikasida naqd pulsiz hisob-kitoblar toʻgʻrisidagi nizomga kiritilayotgan oʻzgartirish va qoʻshimchalar
1. 1-band quyidagi mazmundagi xatboshi bilan toʻldirilsin:
“Oʻzbekiston Respublikasi budjet tizimi budjetlarining gʻazna ijrosi boʻyicha amalga oshiriladigan naqd pulsiz hisob-kitoblar Oʻzbekiston Respublikasi budjet tizimi budjetlarining gʻazna ijrosi qoidalariga (roʻyxat raqami 2850, 2016-yil 22-dekabr) muvofiq tartibga solinadi.”.
2. 7-band quyidagi tahrirda bayon etilsin:
“7. Etkazib berilgan mahsulot (bajarilgan ishlar, xizmatlar) uchun toʻlovlar bevosita mahsulot yetkazib beruvchilarga toʻlanishi kerak, toʻlovlarning uchinchi shaxslar (xoʻjalik yurituvchi subyektlar) hisobidan undirilishiga yoʻl qoʻyilmaydi, qonun hujjatlarida nazarda tutilgan hollar bundan mustasno.”.
3. 34-band “pochta aloqasi tashkilotlariga” degan soʻzlardan keyin “va AT Xalq banki filiallariga” degan soʻzlar bilan toʻldirilsin.
4. 59-bandda:
“a” kichik bandning yettinchi xatboshisidagi “Kamolot” yoshlar ijtimoiy harakatini” degan soʻzlar “Oʻzbekiston yoshlar ittifoqining” degan soʻzlar bilan almashtirilsin;
“v1” kichik band “energiya resurslari” degan soʻzlardan keyin “hamda suv taʼminoti va suv chiqarish xizmati” degan soʻzlar bilan toʻldirilsin.
5. 61-bandning ikkinchi xatboshisi quyidagi mazmundagi jumla bilan toʻldirilsin:
“Davlat ijrochilari energiya resurslari hamda suv taʼminoti va suv chiqarish xizmati boʻyicha qarzdorlikni undirishda inkasso topshiriqnomalarini bevosita mablagʻlarni toʻlovchiga xizmat koʻrsatuvchi bankka davlat ijrochisining qarorini ilova qilmagan holda taqdim etishi mumkin.”.