Oʻzbekiston Respublikasi Xavfli geologik jarayonlarni kuzatish davlat xizmati faoliyatini takomillashtirish toʻgʻrisida (909-son)

13.11.2017

Oʻzbekiston Respublikasi Vazirlar Mahkamasining

qarori

Oʻzbekiston Respublikasi Prezidentining “Oʻzbekiston Respublikasi Davlat geologiya va mineral resurslar qoʻmitasi tizimida yagona geologiya xizmatini tashkil etish chora-tadbirlari toʻgʻrisida” 2017-yil 24-maydagi PQ-3004-son qaroriga muvofiq, shuningdek, xavfli geologik jarayonlar taʼsiridagi hududlarda olib boriladigan muhandis-geologik ishlari sifatini oshirish, nazorat tizimini takomillashtirish, hisobga olish, monitoring olib borish va hududlardan oqilona foydalanish, salbiy oqibatlardan oʻz vaqtida ogohlantirish, xabardor qilish va oldini olish maqsadida Vazirlar Mahkamasi qaror qiladi:

1. Quyidagilar:

Oʻzbekiston Respublikasi Xavfli geologik jarayonlarni kuzatish davlat xizmati toʻgʻrisidagi nizom 1-ilovaga muvofiq;

Oʻzbekiston Respublikasi Xavfli geologik jarayonlarni kuzatish davlat xizmati tuzilmasi 2-ilovaga muvofiq tasdiqlansin.

2. Vazirlar Mahkamasining “Oʻzbekiston Respublikasi Xavfli geologik jarayonlarni kuzatish davlat xizmatini tashkil etish toʻgʻrisida” 1994-yil 8-apreldagi 194-son qarorining 2, 3 va 4-bandlari va qarorga 1 va 2-ilovalar oʻz kuchini yoʻqotgan deb hisoblansin.

3. Vazirliklar va idoralar oʻzlari qabul qilgan normativ-huquqiy hujjatlarni bir oy muddatda ushbu qarorga muvofiqlashtirsinlar.

4. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari — “Oʻzbekneftgaz” AJ boshqaruvi raisi A.S. Sultonov va Oʻzbekiston Respublikasi Davlat geologiya va mineral resurslar qoʻmitasi raisi B.F. Islamov zimmasiga yuklansin.

Oʻzbekiston Respublikasining Bosh vaziri A. ARIPOV

Toshkent sh.,

2017-yil 13-noyabr,

909-son

Vazirlar Mahkamasining 2017-yil 13-noyabrdagi 909-son qaroriga 1-ILOVA

Oʻzbekiston Respublikasi Xavfli geologik jarayonlarni kuzatish davlat xizmati toʻgʻrisida

NIZOM

1-bob. Umumiy qoidalar

1. Ushbu Nizom Oʻzbekiston Respublikasi Xavfli geologik jarayonlarni kuzatish davlat xizmatining (keyingi oʻrinlarda Davlat kuzatish xizmati deb ataladi) asosiy vazifalari, funksiyalari, huquqlari, javobgarligi va faoliyatining tashkiliy asoslarini belgilaydi.

2. Davlat kuzatish xizmati davlat va xoʻjalik boshqaruvi organlari, mahalliy davlat hokimiyati organlari va boshqa tashkilotlar, shuningdek, yuridik va jismoniy shaxslarning roʻy berishi mumkin boʻlgan falokatli oqibatlar toʻgʻrisida qaror qabul qilishlari va aholini ogohlantirish chora-tadbirlarini amalga oshirish, aholi punktlari va boshqa obyektlarni ushbu jarayonlar taʼsiridan himoya qilish maqsadida Oʻzbekiston Respublikasi hududida tabiiy va xoʻjalik faoliyat natijasida roʻy beradigan xavfli geologik ekzogen jarayonlarning (koʻchkilar, koʻchishlar, choʻkishlar, suffoziyalar, karstlar) paydo boʻlishi hamda rivojlanishini kuzatuvchi, shuningdek, progonozlashtiruvchi organ hisoblanadi.

3. Davlat kuzatish xizmati Oʻzbekiston Respublikasi Davlat geologiya va mineral resurslar qoʻmitasi (keyingi oʻrinlarda Davlat geologiya qoʻmitasi deb ataladi) tizimiga kiradi va bevosita Davlat geologiya qoʻmitasiga boʻysunadi.

4. Davlat kuzatish xizmati oʻz faoliyatida Oʻzbekiston Respublikasi Konstitutsiyasi va qonunlariga, Oʻzbekiston Respublikasi Oliy Majlisi palatalarining qarorlariga, Oʻzbekiston Respublikasi Prezidentining farmonlari, qarorlari va farmoyishlariga, Oʻzbekiston Respublikasi Vazirlar Mahkamasining qarorlari va farmoyishlariga, Davlat geologiya qoʻmitasining buyruqlariga va ushbu Nizomga hamda boshqa qonunchilik hujjatlariga amal qiladi.

5. Davlat kuzatish xizmati oʻz faoliyatini davlat va xoʻjalik boshqaruvi organlari, mahalliy davlat hokimiyati organlari va boshqa tashkilotlar bilan oʻzaro hamkorlikda amalga oshiradi.

6. Davlat kuzatish xizmati xavfli geologik jarayonlarni kuzatish, ularning shakllanishi sharoitlarini, rivojlanishini oʻrganish, roʻy berishi mumkin boʻlgan falokatli oqibatlari toʻgʻrisida aholini, davlat va xoʻjalik boshqaruvi organlari hamda mahalliy davlat hokimiyati organlarini ogohlantirish va xabardor qilish yuzasidan Davlat geologiya qoʻmitasiga hisobot beradi.

7. Davlat kuzatish xizmati va uning hududiy boʻlinmalarining oʻz vakolatlari doirasida beriladigan yozma koʻrsatmalari davlat va xoʻjalik boshqaruvi organlari, mahalliy davlat hokimiyati organlari, yuridik va jismoniy shaxslar tomonidan bajarilishi majburiydir. Davlat kuzatish xizmati va uning hududiy boʻlinmalari yozma koʻrsatmalarini bajarmaganlik uchun qayd etilgan organlar va yuridik shaxslarning mansabdor shaxslari, shuningdek, jismoniy shaxslar qonunchilikka muvofiq javob beradilar.

8. Davlat kuzatish xizmati yuridik shaxs hisoblanadi, Oʻzbekiston Respublikasi Davlat gerbi tasviri tushirilgan va oʻz nomi davlat tilida yozilgan muhr va blankalarga, shuningdek, qonunchilikka muvofiq ochiladigan bank hisob raqamlariga egadir.

2-bob. Davlat kuzatish xizmatining vazifalari va funksiyalari

9. Quyidagilar Davlat kuzatish xizmatining asosiy vazifalari hisoblanadi:

xavfli geologik jarayonlar rivojlanadigan joylarni aniqlash va ularning faollashishini prognozlashtirish;

xavfli geologik jarayonlarning yuzaga kelishi va rivojlanishining monitoringi olib borilishini tashkil qilish, davlat va xoʻjalik boshqaruvi organlari, mahalliy davlat hokimiyati organlari hamda yuridik va jismoniy shaxslarni ularning roʻy berishi mumkin boʻlgan falokatlari va oqibatlari toʻgʻrisida xabardor qilish va ogohlantirish;

Davlat kuzatish xizmatining yozma koʻrsatmalari, shuningdek, xulosalarida bayon etilgan talablarning barcha davlat va xoʻjalik boshqaruvi organlari, mahalliy davlat hokimiyati organlari hamda yuridik va jismoniy shaxslar, ularning idoraviy boʻysunishidan va mulkchilik shakllaridan qatʼi nazar, mansabdor shaxslar va fuqarolar tomonidan bajarilishi ustidan davlat nazoratini amalga oshirish;

xavfli geologik jarayonlarning yangi manbalari shakllanishining oldini olish maqsadida ularning kuchayishi mumkin boʻlgan mintaqalardagi hududlardan oqilona foydalanish boʻyicha tavsiyanomalar tayyorlash va berish.

10. Yuklangan vazifalarga muvofiq Davlat kuzatish xizmati quyidagi funksiyalarni bajaradi:

a) xavfli geologik jarayonlar rivojlanadigan joylarni aniqlash va ularning faollashishini prognozlashtirish sohasida:

xavfli geologik jarayonlarni kuzatish ishlarini olib borishni taʼminlaydi;

xavfli geologik jarayonlarning salbiy taʼsiridan aholi yashash punktlarini himoya qilishning uzoq muddatli dasturlarini va hududiy chizmalar majmuini chizishda ishtirok etadi;

respublika hududida xavfli geologik jarayonlar roʻy berishi toʻgʻrisidagi axborotga oid maʼlumotlar bankini shakllantiradi va toʻldirib boradi, texnogen faoliyatning xavfli geologik jarayonlar kuchayishi mumkin boʻlgan joylardagi geologik muhitga taʼsirini tahlil qiladi, turli idoralar tomonidan taqdim etilgan maʼlumotlar boʻyicha xavfli geologik jarayonlarning taʼsiri oqibatida yetkazilgan zararlarni hisobga olib boradi, togʻ yonbagʻirlarining mustahkamligini saqlash boʻyicha tavsiyanomalar beradi;

amalga oshirilgan tavsiyanomalarning amaliy ahamiyatini har yili tahlil qiladi va baholaydi;

b) xavfli geologik jarayonlar yuzaga kelishi va rivojlanishining monitoringi olib borilishini tashkil qilish, davlat va xoʻjalik boshqaruvi organlari, mahalliy davlat hokimiyati organlari hamda yuridik va jismoniy shaxslarni ularning roʻy berishi mumkin boʻlgan falokatlari va oqibatlari toʻgʻrisida xabardor qilish va ogohlantirish sohasida:

davlat va xoʻjalik boshqaruvi organlari, mahalliy davlat hokimiyati organlari, shuningdek, yuridik va jismoniy shaxslarni xavfli geologik jarayonlarning faollashishi mumkinligidan xabardor qiladi va ogohlantiradi, xavfli geologik jarayonlarni kuzatish ishlarini tashkil etish boʻyicha tavsiyanomalar beradi;

Davlat kuzatish xizmati, zarur boʻlsa, oʻzining xabardor qilish tizimidan tashqari Oʻzbekiston Respublikasi Favqulodda vaziyatlar vazirligi (keyingi oʻrinlarda FVV deb ataladi), uning hududiy boshqarmalari, boʻlinmalari va boshqa idoralarining xabardor qilish tizimidan foydalanishi mumkin;

davlat va xoʻjalik boshqaruvi organlari, mahalliy davlat hokimiyati organlari bilan hududlardan foydalanishning joriy hamda istiqbol rejalarini, shu jumladan, xavfli geologik jarayonlar kuchayishi mumkin boʻlgan joylardagi sanoat va xoʻjalik qurilishlarining loyihalarini kelishadi hamda ularni oʻzlashtirish mumkinligi toʻgʻrisida xulosalar beradi;

aholi yashash joylari va xalq xoʻjaligi obyektlarini xavfli geologik jarayonlar taʼsiridan himoya qilish boʻyicha chora-tadbirlar loyihalarini loyihalash tashkilotlari bilan kelishadi, zarur hollarda shunday tadbirlarni muhandislik-geologik jihatdan asoslashni tuzishda (murakkab va alohida muhim obyektlarda) ishtirok etadi;

Oʻzbekiston Respublikasi Ekologiya va atrof-muhitni muhofaza qilish davlat qoʻmitasi (keyingi oʻrinlarda Davlat ekologiya qoʻmitasi deb ataladi), Oʻzbekiston Respublikasi Davlat arxitektura va qurilish qoʻmitasi (keyingi oʻrinlarda Oʻzbekiston Respublikasi “Davarxitektqurilish” qoʻmitasi deb ataladi) va Oʻzbekiston Respublikasi Gidrometeorologiya xizmati markazi bilan birgalikda xavfli geologik jarayonlar kuchayishi mumkin boʻlgan joylarda ishlab chiqarish kuchlarini rivojlantirish va joylashtirish sxemalarini, shaharlar va aholi yashaydigan boshqa joylarning bosh rejalarini ekspertizadan oʻtkazadi, xoʻjalik faoliyatining xavfli geologik jarayonlarni kuchaytirishi mumkin boʻlgan salbiy taʼsirlariga baho beradi;

oʻz vakolatiga taalluqli masalalar boʻyicha, shuningdek, xorijiy tajribani oʻrganish va joriy etish boʻyicha belgilangan tartibda xalqaro hamkorlikni amalga oshiradi;

v) Davlat kuzatish xizmatining yozma koʻrsatmalari, shuningdek, xulosalarida bayon etilgan talablarning barcha davlat va xoʻjalik boshqaruvi organlari, mahalliy davlat hokimiyati organlari hamda yuridik va jismoniy shaxslar, ularning idoraviy boʻysunishidan va mulkchilik shakllaridan qatʼi nazar, mansabdor shaxslar va fuqarolar tomonidan bajarilishi ustidan davlat nazoratini amalga oshirish sohasida:

xavfli geologik jarayonlar kuchayishi toʻgʻrisida muhandislik-geologiya axboroti, ularning oldini olish yoki salbiy taʼsirini kamaytirish boʻyicha chora-tadbirlar koʻrish uchun xulosalar va yozma koʻrsatmalar beradi;

FVV bilan birgalikda, zarur hollarda, Davlat kuzatish xizmatining yozma koʻrsatmalari davlat va xoʻjalik boshqaruvi organlari, mahalliy davlat hokimiyati organlari hamda yuridik va jismoniy shaxslar tomonidan bajarilmayotgani toʻgʻrisidagi materiallarni prokuratura organlariga beradi;

g) xavfli geologik jarayonlarning yangi manbalari shakllanishining oldini olish maqsadida ularning kuchayishi mumkin boʻlgan mintaqalardagi hududlardan oqilona foydalanish boʻyicha tavsiyanomalar tayyorlash va berish sohasida:

Oʻzbekiston Respublikasi Vazirlar Mahkamasiga, FVVga, Davlat ekologiya qoʻmitasi va “Davarxitektqurilish” qoʻmitasiga xavfli geologik jarayonlar kuchayishi mumkin boʻlgan joylardagi hududlarni oʻzlashtirish tartibi toʻgʻrisidagi talablarni va hujjatlarni ishlab chiqish boʻyicha takliflar kiritadi;

xavfli geologik jarayonlarning belgilarini kuzatish masalasi boʻyicha davlat va xoʻjalik boshqaruvi organlari, mahalliy davlat hokimiyati organlari hamda yuridik va jismoniy shaxslarga maslahat beradi;

foydalanishning notoʻgʻri tartibida xavfli geologik jarayonlarning yuzaga kelishiga, rivojlanishiga yoki ularning kuchayishiga olib keluvchi yangi (rekonstruksiya qilingan) obyektlar hamda inshootlarni qabul qilish va ishga tushirish boʻyicha davlat komissiyasi ishida qatnashadi;

qonunchilikda nazarda tutilgan boshqa funksiyalarni bajaradi.

11. Davlat kuzatish xizmati unga yuklangan vazifalarni hal etadi va oʻzining funksiyalarini bevosita hamda tegishli vazirliklar va idoralar bilan birgalikda bajaradi.

3-bob. Davlat kuzatish xizmatining huquqlari, majburiyati va javobgarligi

12. Davlat kuzatish xizmati unga yuklangan vazifalar va funksiyalarni bajarish uchun quyidagi huquqlarga ega:

xulosalar asosida xavfli geologik jarayonlar taʼsiriga uchragan joylarda aholini boshqa joyga koʻchirish, obyektlarni qurish va ulardan foydalanish tartibini boshqa muddatga koʻchirish yoki oʻzgartirish toʻgʻrisida ijro etilishi shart boʻlgan yozma koʻrsatmalar berish;

xavfli geologik jarayonlarni aniqlash va rivojlanishini oʻrganish maqsadida idoraviy boʻysunishi va mulkchilik shakllaridan qatʼi nazar davlat va xoʻjalik boshqaruvi organlari, mahalliy davlat hokimiyati organlari, maxfiylik tartibidagi obyektlar, shuningdek, yuridik va jismoniy shaxslar hududiga toʻsiqlarsiz kirish;

davlat va xoʻjalik boshqaruvi organlari, mahalliy davlat hokimiyati organlari, shuningdek, yuridik va jismoniy shaxslardan, idoraviy boʻysunishi va mulkchilik shakllaridan qatʼi nazar, aholi yashash punktlari va obyektlarni tekshirish vaqtida zarur hollarda aloqa vositalari, bino va transport vositasi bilan taʼminlashlarini soʻrash;

davlat va xoʻjalik boshqaruvi organlari, mahalliy davlat hokimiyati organlariga, idoraviy boʻysunishi va mulkchilik shakllaridan qatʼi nazar, hududlardan togʻ yonbagʻirlarining bardoshliligini saqlashga doir talab va tavsiyalarni buzgan holda foydalanayotgan korxonalar (tashkilotlar) faoliyatini toʻxtatish toʻgʻrisida takliflar kiritish;

FVV bilan birgalikda xavfli geologik jarayonlar kuchayishi mumkin boʻlgan joylarda mansabdor shaxslar, shuningdek, yuridik va jismoniy shaxslar tomonidan obyektlar va ulardan foydalanish talablarini qoʻpol ravishda buzish yoki muntazam ravishda bajarmaslik hollariga yoʻl qoʻyilayotganligi, shuningdek, yashovchilarni xavfli joylardan koʻchirish haqidagi yozma koʻrsatmalar bajarilmayotganligi toʻgʻrisidagi materiallarni prokuratura organlariga taqdim etish;

xavfli geologik jarayonlar kuchayishi mumkin boʻlgan hududlarning chegarasini har yili belgilash hamda shunga muvofiq ravishda xavfsiz joylarga koʻchirish lozim boʻlgan obyektlar soni va roʻyxatiga zarur oʻzgartirishlar kiritish, ilgari berilgan tavsiyalar va yozma koʻrsatmalarning mazmunini aniqlash;

xavfli geologik jarayonlar kuchayishi mumkin boʻlgan shart-sharoitlarni oʻrganish masalalarini ishlab chiqish maqsadida belgilangan tartibda Davlat geologiya qoʻmitasining Davlat geologiya fondi, shuningdek, davlat va xoʻjalik boshqaruvi organlari, mahalliy davlat hokimiyati organlari fond materiallaridan bepul va navbatdan tashqari foydalanish;

xavfli geologik jarayonlar kuchaygan davrda shoshilinch xabardor qilish va ogohlantirish zarurati tugʻilganda ommaviy axborot vositalaridan foydalanish;

Davlat kuzatish xizmati qonunchilikka muvofiq boshqa huquqlarga ham egadir.

13. Kuzatish xizmatining Bosh davlat inspektori va uning oʻrinbosarlariga quyidagi huquqlar beriladi:

xavfli geologik jarayonlar kuchayishi mumkin boʻlgan joylarda aholini boshqa joyga koʻchirish (muayyan joydan vaqtinchalik koʻchirish), obyektlar qurish va ulardan foydalanish tartibini boshqa muddatga koʻchirish yoki oʻzgartirish, shuningdek, boshqa ishlarni amalga oshirish toʻgʻrisida yozma koʻrsatmalar berish;

xavfli geologik jarayonlar kuchayishi mumkin boʻlgan joylarda, agar obyektlar qurilishi xulosalar va ekspertiza dalolatnomalarisiz, loyihalarga rioya etilmasdan amalga oshirilganda yoki Davlat kuzatish xizmatining tavsiyalari bajarilmaganda yoxud bu ishlar hududlardan foydalanishga doir amaldagi normativlarga rioya etilmay bajarilganda oʻz vakolatlari doirasida qurilish ishlarini oʻn ish kunidan ortiq boʻlmagan muddatga toʻxtatib turish yoki oʻn ish kunidan ortiq muddatga toʻxtatib turish toʻgʻrisida sudga murojaat qilish;

agar keyingi faoliyati xavfli geologik jarayonlarning paydo boʻlishiga, rivojlanishiga yoki kuchayishiga olib kelsa, idoraviy mansubligidan va mulkchilik shakllaridan qatʼi nazar, korxonalar (tashkilotlar)ning faoliyatini toʻxtatish toʻgʻrisida Oʻzbekiston Respublikasi Vazirlar Mahkamasiga, davlat va xoʻjalik boshqaruvi organlariga, mahalliy davlat hokimiyati organlariga takliflar kiritish;

agar obyektlarni qurish va ulardan foydalanish shart-sharoitlari xavfli geologik jarayonlarning paydo boʻlishiga, rivojlanishiga yoki kuchayishiga olib keladigan boʻlsa, muhandislik-geologik fond materiallarini oʻrganish va asosli dalillar, shuningdek xavfli geologik jarayonlar rivojlangan hududlarning joriy holatidan kelib chiqib ilgari berilgan xulosalarga zarur oʻzgartirishlar kiritish;

davlat va xoʻjalik boshqaruvi organlari, mahalliy davlat hokimiyati organlari tomonidan Davlat kuzatish xizmatining yozma koʻrsatmalari bajarilmaganligi haqida maʼmuriy huquqbuzarliklar toʻgʻrisida bayonnomalar tuzish va ularni tegishli organlarga yuborish.

14. Davlat kuzatish xizmatining davlat inspektorlariga quyidagi huquqlar beriladi:

xulosalar asosida aholini boshqa joyga koʻchirish (muayyan joydan vaqtinchalik koʻchirish), obyektlar qurish va ulardan foydalanish vaqtini boshqa muddatga koʻchirish yoki oʻzgartirish, shuningdek, xavfli geologik jarayonlar kuchayishi mumkin boʻlgan joylarda boshqa ishlarni amalga oshirish toʻgʻrisida bajarish majburiy boʻlgan yozma koʻrsatmalar berish;

agar obyektlarni qurish va ulardan foydalanish shart-sharoitlari xavfli geologik jarayonlarning paydo boʻlishiga, rivojlanishiga yoki kuchayishiga olib keladigan boʻlsa, xavfli geologik jarayonlar kuchayishi mumkin boʻlgan joylarda hududlarni oʻzlashtirish yuzasidan ilgari berilgan xulosalarga zarur oʻzgartirishlarni bosh davlat inspektori va uning oʻrinbosarlari bilan kelishgan holda kiritish;

xavfli geologik jarayonlar kuchayishi mumkin boʻlgan joylarning chegarasini aniqlash hamda shunga muvofiq ravishda xavfsiz joylarga koʻchirish lozim boʻlgan xoʻjaliklar soni va obyektlar roʻyxatiga doir muhandislik-texnikaviy tadbirlarga oʻzgartirishlar kiritish;

xavfli geologik jarayonlar kuchayishi mumkin boʻlgan joylarda yangi (rekonstruksiya qilingan) obyektlar va inshootlarni qabul qilish va foydalanishga topshirish boʻyicha davlat komissiyalari ishida qatnashish;

Davlat kuzatish xizmati organlari va mansabdor shaxslarining yozma koʻrsatmalari bajarilmaganligi haqida maʼmuriy huquqbuzarliklar toʻgʻrisida bayonnomalar tuzish va ularni tegishli organlarga bosh davlat inspektori va uning oʻrinbosarlari bilan kelishgan holda yuborish.

15. Davlat kuzatish xizmati quyidagilarga majburdirlar:

Oʻzbekiston Respublikasi hududida xavfli geologik jarayonlarning paydo boʻlishi va kuchayishi mumkin boʻlgan shart-sharoitlarni muntazam oʻrganish, ularning roʻy berishi mumkinligi toʻgʻrisida har yili materiallar tayyorlash;

aholi yashash joylari va xalq xoʻjaligi obyektlarini ushbu jarayonlarning taʼsiridan himoya qilish boʻyicha chora-tadbirlar koʻrish va amalga oshirish uchun ularning roʻy berishi mumkin boʻlgan halokatli oqibatlari toʻgʻrisida Oʻzbekiston Respublikasi Vazirlar Mahkamasiga maʼlum qilish hamda xavfli geologik jarayonlar kuchayishi mumkin boʻlgan joylardagi davlat va xoʻjalik boshqaruvi organlari, mahalliy davlat hokimiyati organlari, yuridik va jismoniy shaxslarni xabardor qilish va ogohlantirish;

FVVga oʻrganilayotgan hududlarda xavfli geologik jarayonlarning paydo boʻlishi va rivojlanishi, shuningdek, xavf koʻrsatgichlari toʻgʻrisidagi maʼlumotlarni oʻz vaqtida va toʻliq taqdim etish;

Oʻzbekiston Respublikasi davlat manfaatlariga qatʼiy rioya etilishini taʼminlash, xavfli geologik jarayonlar kuchayishi mumkin boʻlgan joylarda hududlardan foydalanishda tor mahkamachilik, mahalliychilik koʻrinishlarining oldini olish.

16. Davlat kuzatish xizmati va uning mansabdor shaxslari ularga yuklangan vazifalar va funksiyalar samarali amalga oshirilishi uchun javob beradi.

4-bob. Davlat kuzatish xizmati faoliyatini tashkil qilish

17. Davlat kuzatish xizmatiga Vazirlar Mahkamasi bilan kelishgan holda Davlat geologiya qoʻmitasi raisi tomonidan lavozimiga tayinlanadigan va lavozimdan ozod qilinadigan boshliq rahbarlik qiladi.

Boshliq Davlat geologiya qoʻmitasi raisi tomonidan lavozimga tayinlanadigan va ozod qilinadigan ikki nafar oʻrinbosarga ega boʻladi.

Davlat kuzatish xizmatining boshligʻi xavfli geologik jarayonlarni kuzatish xizmati bosh davlat inspektori (keyingi oʻrinlarda kuzatish xizmati bosh davlat inspektori deb ataladi) hisoblanadi.

Davlat kuzatish xizmati boshligʻining oʻrinbosarlari kuzatish xizmati bosh davlat inspektorining oʻrinbosarlari hisoblanadilar.

Kuzatish xizmati davlat inspektorlarining shaxsiy tarkibi uch yilda bir marotaba, agar zarur boʻlsa, har yili Davlat kuzatish xizmati boshligʻi taqdimnomasiga binoan Davlat geologiya qoʻmitasi raisi tomonidan tasdiqlanadi.

18. Davlat kuzatish xizmati boshqaruv apparatidan, davlat inspektorlari, yordamchi boʻlinmalar, shuningdek, rejimli gidrogeologik stansiyalarga tenglashtirilgan hududiy kuzatuv stansiyalaridan iborat boʻladi.

19. Davlat kuzatish xizmati boshligʻi:

Davlat kuzatish xizmati faoliyatiga rahbarlik qiladi va Davlat kuzatish xizmatiga yuklangan vazifalar va funksiyalar bajarilishi uchun shaxsan javob beradi;

oʻz oʻrinbosarlarining vakolatlarini belgilaydi, ular oʻrtasida vazifalarni taqsimlaydi, Davlat kuzatish xizmatining davlat inspektori, hududiy stansiyalari va yordamchi boʻlinmalarining vakolatlarini belgilaydi;

Davlat kuzatish xizmati boshqaruv apparati xodimlari, hududiy stansiyalar va yordamchi boʻlinmalar bajarishi majburiy boʻlgan majburiy buyruqlar chiqaradi va koʻrsatmalar beradi;

Davlat kuzatish xizmatining shtatlar jadvalini Davlat geologiya qoʻmitasiga kelishish uchun kiritadi va uni tasdiqlaydi;

Davlat kuzatish xizmati xodimlarini ragʻbatlantirish va intizomiy javobgarlikka tortish masalasini hal qiladi va belgilangan tartibda alohida oʻrnak koʻrsatgan xodimlar nomzodlarini mukofotlashga tavsiya qiladi;

Davlat kuzatish xizmati xodimlarini belgilangan tartibda lavozimga tayinlaydi va lavozimdan ozod qiladi;

Davlat kuzatish xizmati boshqaruv apparati, yordamchi boʻlinmalari va hududiy stansiyalarida ijro intizomini mustahkamlashga doir ishlarni muvofiqlashtiradi;

Davlat kuzatish xizmati vakolatiga kiruvchi masalalar boʻyicha jismoniy va yuridik shaxslarning murojaatlari toʻgʻrisidagi qonunchilikni ijro qilish ishlarni nazorat qiladi va muvofiqlashtiradi;

Davlat kuzatish xizmati boshligʻi qonunchilikka muvofiq boshqa vakolatlarni ham amalga oshirishi mumkin.

20. Davlat kuzatish xizmatida zarur hollarda xavfli geologik jarayonlarni kuzatish jarayonida aniqlangan muammolarni tezkor hal etish boʻyicha tavsiyalar ishlab chiqilgan holda respublikada shakllanayotgan koʻchkilar holatini tahlil qilish maqsadida boshliq (shtab raisi), uning oʻrinbosarlari, shuningdek, hududiy kuzatish stansiyalari boshliqlaridan iborat tarkibda tezkor shtab tashkil etiladi.

5-bob. Davlat kuzatish xizmatini moliyalashtirish va moddiy-texnik taʼminlash

21. Davlat kuzatish xizmatini moliyalashtirish va moddiy-texnik taʼminlash yillik mineral xomashyo bazani rivojlantirish va qayta toʻldirishning davlat dasturiga muvofiq Oʻzbekiston Respublikasi Davlat budjeti hisobiga amalga oshiriladi.

Mineral-xomashyo bazani rivojlantirish va qayta toʻldirish davlat dasturiga kiritilmagan va ularni amalga oshirish uchun qoʻshimcha xarajatlarni talab qiladigan qoʻshimcha ishlarni bajarishni moliyalashtirish buyurtmachilarning mablagʻlari hisobiga amalga oshiriladi.

22. Davlat kuzatish xizmati tomonidan olingan foyda, shuningdek, jamlangan amortizatsiya toʻlovlari va boshqa tushumlar uning tasarrufida qoladi, belgilangan tartibda moddiy-texnik bazani mustahkamlash va axborot-kommunikatsion tizimini rivojlantirish, kasb mahoratining yuqori darajasi, lavozim majburiyatlari sifatli bajarilganligi, ijodiy faolligi va tashabbuskorligi uchun xodimlarni ragʻbatlantirish uchun foydalaniladi.

6-bob. Yakunlovchi qoida

23. Davlat kuzatish xizmatini qayta tashkil qilish va tugatish qonunchilikda belgilangan tartibda amalga oshiriladi.

Vazirlar Mahkamasining 2017-yil 13-noyabrdagi 909-son qaroriga 2-ILOVA

Oʻzbekiston Respublikasi Xavfli geologik jarayonlarni kuzatish davlat xizmatining

TUZILMASI

Izoh: Xodimlarning cheklangan soni 154 nafarni tashkil etadi, shu jumladan boshqaruv xodimlari 9 nafar.