Oʻzbekiston Respublikasi Tashqi iqtisodiy faoliyat milliy banki faoliyatini yanada takomillashtirish chora-tadbirlari toʻgʻrisida (PQ-3383-son)

13.11.2017

Oʻzbekiston Respublikasi Prezidentining

Qarori

Oʻzbekiston Respublikasi Tashqi iqtisodiy faoliyat milliy banki faoliyatini yanada takomillashtirish, kichik biznes va xususiy tadbirkorlikni rivojlantirish uchun qulay sharoitlar yaratishda, amalga oshirilayotgan tarkibiy va iqtisodiy oʻzgartirishlardagi ishtirokini kengaytirish, shuningdek bank faoliyatini tashkil etishning xalqaro standartlarini inobatga olgan holda boshqaruvning zamonaviy uslublarini joriy etish maqsadida:

1. Oʻzbekiston Respublikasi Tashqi iqtisodiy faoliyat milliy banki (keyingi oʻrinlarda — Oʻzmilliybank) faoliyatining ustuvor yoʻnalishlari etib quyidagilar belgilansin:

a) tashqi iqtisodiy faoliyat sohasida:

yetakchi chet el banklari va xalqaro moliyaviy tashkilotlar bilan, shu jumladan, zamonaviy va xorijiy tajribada keng qoʻllanadigan oʻzaro hisob-kitoblar mexanizmlarini joriy qilish va amalga oshirilayotgan loyihalarni birgalikda moliyalashtirish orqali hamkorlik munosabatlarini faol rivojlantirish;

respublikada amalga oshirilayotgan iqtisodiyot tarmoqlarida ilgʻor texnologiyalarni joriy qilish, xomashyoni chuqur qayta ishlash, sanoat korxonalarini modernizatsiya qilish va texnologik qayta jihozlash, respublikaning eksport salohiyatini yanada kengaytirishga yoʻnaltirilgan loyihalarni moliyalashtirish uchun xorijiy kredit liniyalarini jalb qilish;

tashqi iqtisodiy faoliyatni yanada rivojlantirish va xalqaro maydonda bank imidjini oshirish, shu jumladan xorijiy mamlakatlarda bank vakolatxonalari, filiallari, shoʻba banklarini tashkil qilish, xorijiy hamkorlar va tashqi iqtisodiy faoliyat subyektlarining ishonchini mustahkamlash uchun bank ishini yuritishning ilgʻor tajribasi va amaliyotini faol joriy qilish orqali oshirish;

b) kichik biznes va xususiy tadbirkorlikni qoʻllab-quvvatlash sohasida:

respublikamizda kichik biznes va xususiy tadbirkorlikni yanada rivojlantirishga koʻmaklashish, tadbirkorlik subyektlariga biznesni tashkil qilish, yuritish va kengaytirish borasida amaliy va moliyaviy koʻmak berish;

kichik biznes va xususiy tadbirkorlik subyektlariga, shu jumladan yangi investitsion va innovatsion gʻoyalarni topish va amalga oshirish, jahon bozorlarining tahlili, ishlab chiqarilgan mahsulotlarning eksportini moliyalashtirish masalalari boʻyicha bank xizmatlarining barcha turlarini, moliyaviy maslahatlar va axborot koʻmagi koʻrsatilishini taʼminlash;

innovatsion tadbirkorlikning joriy qilinishini, yoshlarning, birinchi navbatda, oliy va oʻrta maxsus, kasb-hunar taʼlimi muassasalari bitiruvchilarining yangi tadbirkorlik tashabbuslari — “startup” loyihalarini amalga oshirishni faol qoʻllab-quvvatlash;

v) chakana bank xizmatlarini koʻrsatish sohasida:

aholi va tadbirkorlik subyektlariga chakana bank xizmatlari koʻrsatilishini yanada rivojlantirish, amaldagi kredit, moliyaviy, hisob-kitob, kassa va boshqa chakana bank xizmatlarini, shu jumladan, zamonaviy axborot-kommunikatsiya va innovatsiya texnologiyalarini keng qoʻllash orqali kengaytirish va takomillashtirish hamda ularning yangi turlarini joriy qilish;

tadbirkorlik subyektlari uchun bank mahsulotlari va xizmatlarining, shu jumladan, yetakchi chet el banklari va moliyaviy institutlar tomonidan keng qoʻllanadigan yangi turlarini ishlab chiqish va joriy etish;

aholi va tadbirkorlar orasida yuqori talabga ega boʻlgan mahsulot va xizmatlarni birgalikda joriy qilish uchun respublikaning moliyaviy institutlari bilan faol hamkorlik qilish;

bank xizmatlarini real vaqt (onlayn) tartibida va plastik kartochkalar yordamida amalga oshirish imkonini yaratgan holda butunjahon Internet tarmogʻi orqali koʻrsatish mexanizmlarini takomillashtirish.

2. Belgilansinki:

Oʻzmilliybank yagona taʼsischisi Oʻzbekiston Respublikasi Vazirlar Mahkamasi boʻlgan, oʻz faoliyatini xoʻjalik yuritish huquqiga asoslangan unitar korxona sifatida amalga oshiruvchi davlat banki hisoblanadi;

Oʻzmilliybank ustav kapitali uning taʼsischisi tomonidan belgilanadigan miqdorda shakllantiriladi va taʼsischining tegishli qarorlari bilan oʻzgartirilishi mumkin.

3. Oʻzmilliybankka quyidagi huquqlar berilsin:

tashqi iqtisodiy faoliyat va ikki tomonlama munosabatlarni yanada rivojlantirish, buning asosida milliy ishlab chiqaruvchilar mahsulotlari eksportini qoʻllab-quvvatlash va ragʻbatlantirish hajmlarini oshirish maqsadida respublikamizning iqtisodiy hamkorlari boʻlgan xorijiy mamlakatlarda bank vakolatxonalari, filiallari, shoʻba banklarini belgilangan tartibda tashkil qilish;

Oʻzbekiston Respublikasi Davlat budjeti mablagʻlarini depozit sifatida jalb qilish.

4. Oʻzbekiston Respublikasi Vazirlar Mahkamasi ikki oy muddatda:

mazkur qaror talablaridan kelib chiqqan holda Oʻzmilliybank Ustavining yangi tahririni;

tegishli qarorlarning tezkor qabul qilinishini taʼminlash maqsadida Oʻzmilliybank Kengashining yangilangan tarkibini, uning funksiya va vazifalarini tubdan qayta koʻrib chiqqan va aʼzolar sonini maqbullashtirgan holda tasdiqlasin.

5. Oʻzbekiston Respublikasi Markaziy banki Oʻzmilliybankning Ustavi Oʻzbekiston Respublikasi Vazirlar Mahkamasi tomonidan tasdiqlanganidan soʻng belgilangan tartibda roʻyxatdan oʻtkazilishini taʼminlasin.

6. Oʻzbekiston Respublikasi Prezidentining “Davlat ulushi ustuvor boʻlgan aksiyadorlik jamiyatlarida korporativ boshqaruvni yanada takomillashtirish chora-tadbirlari toʻgʻrisida”gi 2016-yil 17-oktabrdagi PQ-2635-sonli qarorida:

2-bandning uchinchi xatboshisi va 4-banddagi “unitarnogo predpriyatiya “Natsionalniy bank vneshneekonomicheskoy deyatelnosti Respubliki Uzbekistan” soʻzlari chiqarib tashlansin;

1-ilovaning 10-bandi chiqarib tashlansin;

2-ilovada:

nomidagi “unitarnogo predpriyatiya “Natsionalniy bank vneshneekonomicheskoy deyatelnosti Respubliki Uzbekistan” soʻzlari chiqarib tashlansin;

“Raximov S.B. — predsedatel pravleniya Natsionalnogo banka vneshneekonomicheskoy deyatelnosti” satri chiqarib tashlansin.

7. Oʻzmilliybank manfaatdor vazirlik va idoralar bilan birgalikda ikki oy muddatda ushbu qarordan kelib chiqadigan oʻzgartirish va qoʻshimchalar toʻgʻrisida Oʻzbekiston Respublikasi Vazirlar Mahkamasiga takliflar kiritsin.

8. Mazkur qarorning ijrosini nazorat qilish Oʻzbekiston Respublikasi Bosh vazirining oʻrinbosari J.A. Kuchkarov va Oʻzmilliybank boshqaruvi raisi S.R. Xolmuradov zimmalariga yuklansin.

Oʻzbekiston Respublikasi Prezidenti Sh. MIRZIYOYEV

Toshkent sh.,

2017-yil 13-noyabr,

PQ-3383-son