3-modda. Palataning maqsadlari va vazifalari

Palata Oʻzbekiston Respublikasi iqtisodiyotini rivojlantirishga, uning jahon xoʻjalik tizimiga qoʻshilishiga koʻmaklashish, bozor infrastrukturasining yaxlit tizimini shakllantirish, tadbirkorlik faoliyati uchun qulay sharoit yaratish, tadbirkorlikning barcha turlarini, Oʻzbekiston tadbirkorlarining boshqa mamlakatlar tadbirkorlari bilan savdo-iqtisodiy va ilmiy-texnikaviy aloqalarini rivojlantirish maqsadida tuziladi.

Palata quyidagi vazifalarni bajaradi:

davlat hokimiyati va boshqaruv organlarida, jamoat va xalqaro tashkilotlarda, shu jumladan boshqa mamlakatlarda tovar ishlab chiqaruvchilar va tadbirkorlarning manfaatlarini ifodalaydi;

kichik va xususiy tadbirkorlikni rivojlantirish konsepsiyasini ishlab chiqishda hamda xoʻjalik yurituvchi subyektlarning faoliyati ustidan jamoatchilik nazorati mexanizmlarini roʻyobga chiqarishda ishtirok etadi;

korxonalar va tashkilotlarning davlat registri asosida kichik va xususiy tadbirkorlik subyektlarining reyestrini yuritadi;

uch tomonlama hamkorlik (yollanma ishchilar ittifoqi, ish beruvchilar ittifoqi va hukumat) tizimini vujudga keltirishda, milliy iqtisodiy va ijtimoiy siyosatni ishlab chiqish va olib borishda ishtirok etadi;

tadbirkorlik faoliyati uchun kadrlar tayyorlash va qayta tayyorlash ishini uyushtiradi;

tadbirkorlikning rivojlanishiga toʻsqinlik qilayotgan muammolarni aniqlaydi, tadbirkorlikni rivojlantirishga hamda tovar ishlab chiqaruvchilar va tadbirkorlarning faoliyat yuritish sharoitlarini yaxshilashga qaratilgan qonun hujjatlarini takomillashtirishda belgilangan tartibda ishtirok etadi;

xoʻjalik yurituvchi subyektlar oʻrtasidagi nizolarni hal etishga koʻmaklashadi;

moliyaviy yordamga boʻlgan ehtiyojni aniqlashda, buxgalteriya hisobi va hisobotini, auditorlik tekshiruvlarini tashkil etish va yuritishda palata aʼzolariga yordam beradi;

xalqaro koʻrgazmalar va yarmarkalarni, Oʻzbekistonda va boshqa davlatlarda firmalarning taqdimotlarini uyushtiradi;

tovarlar va xizmatlar eksportini rivojlantirishga koʻmaklashadi, tashqi bozorda operatsiyalar oʻtkazishda va iqtisodiy hamda ilmiy-texnikaviy hamkorlikning yangi shakllarini oʻzlashtirishda kichik va xususiy tadbirkorlik subyektlariga yordam koʻrsatadi.

kichik biznes korxonalarini rivojlantirish uchun chet el investitsiyalarini jalb etish boʻyicha faoliyatni tashkil etadi, investitsiya loyihalarining, shu jumladan chet el kredit liniyalari orqali jalb etiladigan investitsiya loyihalarining amalga oshirilishi samaradorligi monitoringini investitsiya siklining barcha bosqichlarida oʻtkazadi;