Oʻzbekiston Respublikasi Prezidentining ayrim hujjatlariga oʻzgartish va qoʻshimchalar kiritish toʻgʻrisida (PF-5216-son)

30.10.2017

Oʻzbekiston Respublikasi Prezidentining

Farmoni

Oʻzbekiston Respublikasi Prezidentining “2017 — 2021-yillarda Oʻzbekiston Respublikasi aholisiga ixtisoslashtirilgan tibbiy yordamni yanada rivojlantirish chora-tadbirlari toʻgʻrisida” 2017-yil 20-iyundagi PQ-3071-sonli qaroriga muvofiq hamda zamon talablariga javob beradigan samarali ixtisoslashtirilgan tibbiy yordam tizimini shakllantirishni davom ettirish, shuningdek, respublika aholisiga koʻrsatilayotgan tibbiy yordam sifatini yaxshilash maqsadida:

1. Oʻzbekiston Respublikasi Prezidentining ayrim hujjatlariga ilovaga muvofiq oʻzgartish va qoʻshimchalar kiritilsin.

2. Oʻzbekiston Respublikasi Sogʻliqni saqlash vazirligi manfaatdor vazirliklar va idoralar bilan birgalikda bir oy muddatda qonun hujjatlariga ushbu Farmondan kelib chiqadigan oʻzgartish va qoʻshimchalar toʻgʻrisida Vazirlar Mahkamasiga takliflar kiritsin.

3. Mazkur Farmonning ijrosini nazorat qilish Oʻzbekiston Respublikasining Bosh vaziri A.N. Aripov va Oʻzbekiston Respublikasi sogʻliqni saqlash vaziri A.K. Shodmonov zimmasiga yuklansin.

Oʻzbekiston Respublikasi Prezidenti Sh. MIRZIYOYEV

Toshkent sh.,

2017-yil 30-oktabr,

PF-5216-son

Oʻzbekiston Respublikasi Prezidentining 2017-yil 30-oktabrdagi PF-5216-sonli Farmoniga ILOVA

Oʻzbekiston Respublikasi Prezidentining ayrim hujjatlariga kiritiladigan oʻzgartish va qoʻshimchalar

1. Oʻzbekiston Respublikasi Prezidentining “Sogʻliqni saqlash tizimini yanada isloh qilish chora-tadbirlari toʻgʻrisida” 2003-yil 26-fevraldagi PF-3214-sonli Farmonida:

a) 3-bandining birinchi xatboshidagi “Vazirlar Mahkamasi Ijtimoiy kompleksi,” soʻzlari chiqarib tashlansin;

b) 3-bandining ikkinchi — beshinchi xatboshilaridagi “ixtisoslashtirilgan” soʻzidan keyin “ilmiy-amaliy tibbiyot” soʻzlari qoʻshib qoʻyilsin;

v) 4-bandi oʻz kuchini yoʻqotgan deb hisoblansin;

g) 5-bandining ikkinchi xatboshidagi “Respublika ixtisoslashtirilgan tibbiy markazlarning” soʻzlari “Respublika ixtisoslashtirilgan ilmiy-amaliy tibbiyot markazlari (keyingi oʻrinlarda — Markazlar)ning” soʻzlari bilan almashtirilsin;

d) 6-bandidagi “Respublika ixtisoslashtirilgan markazlarining” soʻzlari “Markazlarning” soʻzi bilan almashtirilsin;

e) 8-bandining birinchi xatboshidagi “Respublika ixtisoslashtirilgan tibbiy markazining” soʻzlari “Markazning” soʻzi bilan almashtirilsin;

j) 10-bandida:

ikkinchi xatboshi, shuningdek, 1-ilova oʻz kuchini yoʻqotgan deb hisoblansin;

uchinchi xatboshidagi “Respublika ixtisoslashtirilgan markazlari tomonidan” soʻzlari “barcha Respublika ixtisoslashtirilgan ilmiy-amaliy tibbiyot markazlari tomonidan” soʻzlari bilan almashtirilsin;

z) 11-bandining oltinchi xatboshidagi “Respublika ixtisoslashtirilgan markazlarining” soʻzlari “Markazlarning” soʻzi bilan almashtirilsin;

i) 2-ilova quyidagi tahrirda bayon etilsin:

“Barcha respublika ixtisoslashtirilgan ilmiy-amaliy tibbiyot markazlari tomonidan Oʻzbekiston Respublikasining Davlat budjeti mablagʻlari hisobiga tibbiy yordam koʻrsatiladigan imtiyozli toifadagi shaxslar ROʻYXATI

1. Bolalikdan nogironlar;

2. Chin yetimlar;

3. I va II guruh nogironlari;

4. 1941 — 1945-yillardagi urush nogironlari va qatnashchilari, shuningdek, ularga tenglashtirilgan shaxslar;

5. Yoshga oid pensiyaga chiqqan ishlamaydigan shaxslar;

6. 1941 — 1945-yillardagi urush davrida mehnat jabhasining qatnashchilari;

7. Chernobil AESi falokatini tugatishda ishtirok etgan shaxslar jumlasiga kiruvchi nogironlar;

8. Baynalmilalchi-jangchilar;

9. Fuqarolarning oʻzini oʻzi boshqarish organlaridan moddiy yordam oluvchi kam taʼminlangan oilalarga mansub shaxslar;

10. Oʻzbekiston Respublikasi Sogʻliqni saqlash vazirligi tomonidan tasdiqlanadigan roʻyxat boʻyicha, 18 yoshga toʻlmagan patologiyali bolalar;

11. Chaqiruv komissiyalarining yoʻllanmalari boʻyicha chaqiruv yoshidagi (18 — 27 yoshdagi) shaxslar;

12. Oʻzbekiston Respublikasi Sogʻliqni saqlash vazirligi tomonidan tasdiqlanadigan roʻyxat boʻyicha, patologiyali homilador ayollar1;

13. Oʻzbekiston Respublikasi Sogʻliqni saqlash vazirligi tomonidan tasdiqlanadigan roʻyxat boʻyicha, endokrin kasalliklariga chalingan bemorlar2;

14. Oʻzbekiston Respublikasi Sogʻliqni saqlash vazirligi tomonidan tasdiqlanadigan roʻyxat boʻyicha, jinsiy yoʻl bilan yuqtiriladigan kasalliklarga chalingan shaxslar3;

15. Oʻzbekiston Respublikasi Sogʻliqni saqlash vazirligi tomonidan tasdiqlanadigan roʻyxat boʻyicha, sil kasalligiga chalingan shaxslar4;

16. Oʻzbekiston Respublikasi Sogʻliqni saqlash vazirligi tomonidan tasdiqlanadigan roʻyxat boʻyicha, onkologiya kasalliklariga chalingan shaxslari5;

1) Tibbiy yordam Respublika ixtisoslashtirilgan akusherlik va ginekologiya ilmiy-amaliy tibbiyot markazida koʻrsatiladi;

2) Tibbiy yordam Respublika ixtisoslashtirilgan endokrinologiya ilmiy-amaliy tibbiyot markazida koʻrsatiladi;

3) Tibbiy yordam Respublika ixtisoslashtirilgan dermatovenerologiya va kosmetologiya ilmiy-amaliy tibbiyot markazida koʻrsatiladi;

4) Tibbiy yordam Respublika ixtisoslashtirilgan ftiziatriya va pulmonologiya ilmiy-amaliy tibbiyot markazida koʻrsatiladi.

5) Tibbiy yordam Respublika ixtisoslashtirilgan onkologiya va tibbiy radiologiya ilmiy-amaliy tibbiyot markazida koʻrsatiladi”.

2. Oʻzbekiston Respublikasi Prezidentining “Sogʻliqni saqlash tizimini isloh qilishni yanada chuqurlashtirish va uni rivojlantirish davlat dasturini amalga oshirishning asosiy yoʻnalishlari toʻgʻrisida” 2007-yil 19-sentabrdagi PF-3923-sonli Farmoni 2-bandi “d” kichik bandining yettinchi xatboshi quyidagi tahrirda bayon etilsin:

“davolash bazasi bilan endokrinologiya ilmiy-tekshirish instituti negizida akademik Y.X. Toʻraqulov nomidagi Endokrinologiya markazi”.

3. Oʻzbekiston Respublikasi Prezidentining “Fuqarolarning pensiya taʼminoti tizimini yanada takomillashtirish chora-tadbirlari toʻgʻrisida” 2009-yil 30-dekabrdagi PF-4161-sonli Farmonida:

a) 2-bandining ikkinchi xatboshidagi “va tibbiy-mehnat ekspertizasi” soʻzlari chiqarib tashlansin;

6) 3-bandining oltinchi xatboshi chiqarib tashlansin.

4. Oʻzbekiston Respublikasi Prezidentining “Oʻzbekiston Respublikasi Moliya vazirligi huzuridagi budjetdan tashqari Pensiya jamgʻarmasining tashkiliy tuzilmasini shakllantirish chora-tadbirlari toʻgʻrisida” 2009-yil 30-dekabrdagi PQ-1252-sonli qarorida:

a) 1-ilovaning “Respublika tibbiy-ijtimoiy ekspertiza inspeksiyasi” va “Tibbiy-mehnat ekspertizasi xizmatlari” bloklari chiqarib tashlansin;

b) 2-ilovaning “Respublika tibbiy-ijtimoiy ekspertiza inspeksiyasi” bloki chiqarib tashlansin;

v) 3-ilovaning “Bosh tibbiy-mehnat ekspert komissiyalari” va “Tibbiy-mehnat ekspert komissiyalari (tuman, tumanlararo, shahar va ixtisoslashtirilgan)” bloklari chiqarib tashlansin.

5. Oʻzbekiston Respublikasi Prezidentining “Toshkent davlat stomatologiya institutini tashkil etish toʻgʻrisida” 2014-yil 22-iyuldagi PQ-2215-sonli qarorida:

a) 4-bandining birinchi xatboshidagi “boshqaruv xodimlari cheklangan soni 35 kishidan iborat” soʻzlari chiqarib tashlansin;

b) 1-ilovaning matni quyidagi tahrirda bayon etilsin:

“Toshkent davlat stomatologiya institutining

TAShKILIY TUZILMASI

Institut kengashi Rektor Vasiylik kengashi Oʻquv ishlari boʻyicha birinchi prorektor Ilmiy ishlar boʻyicha prorektor Maʼnaviy-maʼrifiy ishlar boʻyicha prorektor Moliya-iqtisodiyot ishlari boʻyicha prorektor Xalqaro aloqalar boʻlimi Akademik litseylar va kasb-hunar kollejlari bilan ishlash boʻyicha prorektor Stomatologiya va yuz-jagʻ jarrohligi ilmiy-amaliy markazi Oʻquv-uslubiy boʻlim Iqtidorli yoshlar bilan ishlash boʻyicha ilm-fan va ilmiy-pedagogik kadrlarni tayyorlash boʻlimi Marketing boʻlimi Maʼnaviyat va maʼrifat boʻlimi Moliya-iqtisodiyot boʻlimi Laboratoriya Monitoring va ichki nazorat boʻlimi TDSI huzuridagi akademik litsey Axborot texnologiyalari va oʻquv texnik vositalari markazi Vivariy Axborot-resurs markazi Kuratorlar kengashi (jamoat organi) Buxgalteriya Kadrlar boʻlimi Institut klinikasi Magistratura boʻlimi Tahrir-nashriyot boʻlimi 1 va 2-boʻlimlar Kanselyariya va arxiv Talabalar stomatologiya poliklinikasi Yuriskonsult Fuqaro himoyasi va mehnat muhofazasi shuʼbasi Fakultetlar Ekspluatatsion-texnikva xoʻjalikboʻlimi Stomatologiya Bolalar stomatologiyasi Tibbiy pedagogika Davolash Malaka oshirish

Institut xodimlarining cheklangan soni (boshqaruv, texnik, xizmat koʻrsatuvchi, oʻquv-yordamchi va professor-oʻqituvchilar tarkibi) qonunchilikda oliy oʻquv yurtlari uchun oʻrnatilgan meʼyorlar boʻyicha belgilanadi”.

6. Oʻzbekiston Respublikasi Prezidentining “Aholini dori-darmon vositalari va tibbiyot buyumlari bilan taʼminlashni yanada yaxshilashga doir chora-tadbirlar toʻgʻrisida” 2016-yil 31-oktabrdagi PQ-2647-sonli qarorida:

a) 1-bandning toʻrtinchi xatboshi chiqarib tashlansin.

b) 4-bandida:

birinchi xatboshi quyidagi tahrirda bayon etilsin:

“Oʻzbekiston Respublikasi Tashqi savdo vazirligi zimmasiga Roʻyxatga kiritilgan dori-darmon vositalari va tibbiyot buyumlarining jahon narxlari konyunkturasini tahlil qilish funksiyalari yuklansin”;

uchinchi xatboshidagi “tender takliflari koʻrib chiqilmaydi” soʻzlari “tovar yetkazib berish toʻgʻrisida import shartnomalari tuzilishiga yoʻl qoʻyilmaydi” soʻzlari bilan almashtirilsin;

v) 3-ilovaning 5-bandidagi uchinchi xatboshida, 6-bandining beshinchi xatboshida “tender asosida dori-darmon vositalari va tibbiyot buyumlarini xarid qiluvchi ulgurji savdo tashkilotlari” soʻzlari chiqarib tashlansin;

g) 4-ilovada:

9-bandining uchinchi xatboshidagi “va keyinchalik uni tender hujjatlariga kiritish” soʻzlari chiqarib tashlansin;

10-bandi kuyidagi tahrirda bayon etilsin:

“10. Komissiya Roʻyxatga kiritilgan dori-darmon vositalari va tibbiyot buyumlarining cheklangan kontrakt qiymatlarini Dori-darmon vositalari va tibbiyot buyumlarining xarid qiymatini, qayd etilgan ulgurji va chakana narxlarini aniqlash boʻyicha ishchi guruhning hisob-kitoblari asosida tasdiqlaydi.

Ishchi guruhning tarkibi Tashqi savdo vazirligi, Iqtisodiyot vazirligi, Moliya vazirligi, Sogʻliqni saqlash vazirligi, Markaziy bank, Xususiylashtirilgan korxonalarga koʻmaklashish va raqobatni rivojlantirish davlat qoʻmitasi vakillaridan iborat Komissiya raisi tomonidan tasdiqlanadi”;

11- va 12-bandlar chiqarib tashlansin;

13-bandning birinchi xatboshidagi “Oʻzbekiston Respublikasi Tashqi savdo vazirligi tomonidan oʻtkazilgan tender savdolari boʻyicha importyorlar olib kelgan barcha dori-darmon vositalari va tibbiyot buyumlari” soʻzlari “Roʻyxatga kiritilgan, import qilinadigan barcha dori-darmon vositalari va tibbiyot buyumlari” soʻzlari bilan almashtirilsin;

22-banddagi “Oʻzbekiston Respublikasi Sogʻliqni saqlash vazirligining Nazorat inspeksiyasi tomonidan amalga oshiriladi” soʻzlari “Hududiy sogʻliqni saqlash boshqarmasi organlari tomonidan amalga oshiriladi” soʻzlari bilan almashtirilsin;

d) dori-darmon vositalari va tibbiyot buyumlari narxlarini boshqarish tartibi toʻgʻrisidagi Nizom ilovasida:

2-bosqich chiqarib tashlansin;

3-bosqichning “Bajarish muddati” blokidagi “gʻolibni aniqlash” soʻzlari “Tashqi savdo vazirligidan takliflar olish” soʻzlari bilan almashtirilsin;

5-bosqichning “Masʼullar” blokidagi “Sogʻliqni saqlash vazirligining Nazorat inspeksiyasi” soʻzlari “Hududiy sogʻliqni saqlash boshqarmasi organlari” soʻzlari bilan almashtirilsin.

7. Oʻzbekiston Respublikasi Prezidentining “Oʻzbekiston Respublikasi birlamchi tibbiy-sanitariya yordami muassasalari faoliyatini tashkil etishni takomillashtirish chora-tadbirlari toʻgʻrisida” 2017-yil 29-martdagi PQ-2857-sonli qarori 1-bandining oltinchi xatboshidagi “ixtisoslashtirilgan va ilmiy-amaliy” soʻzlari “ixtisoslashtirilgan ilmiy-amaliy tibbiyot” soʻzlari bilan almashtirilsin.

8. Oʻzbekiston Respublikasi Prezidentining “2017 — 2021-yillarda Oʻzbekiston Respublikasida onkologiya xizmatini yanada rivojlantirish va aholiga onkologik yordam koʻrsatishni takomillashtirish chora-tadbirlari toʻgʻrisida” 2017-yil 4-apreldagi PQ-2866-sonli qarori 1-ilovasining “Ilmiy-tadqiqot institutlari va oliy tibbiyot taʼlim muassasalarining klinikalari, Respublika ixtisoslashtirilgan tibbiyot markazlari va boshqa davolash-profilaktika muassasalari (qoʻshimcha kasalliklari bilan birgalikda onkologik bemorlarni davolashda)” blokidagi “ixtisoslashtirilgan” soʻzidan keyin “ilmiy-amaliy” soʻzlari yozilsin.

9. Oʻzbekiston Respublikasi Prezidentining “Qashqadaryo viloyati sogʻliqni saqlash muassasalarida ixtisoslashtirilgan tibbiy yordam koʻrsatishni yanada yaxshilash chora-tadbirlari toʻgʻrisida” 2017-yil 1-maydagi PQ-2938-sonli qarorida:

a) 1-bandining uchinchi va toʻrtinchi xatboshilaridagi “Respublika ixtisoslashtirilgan” soʻzlaridan keyin “ilmiy-amaliy tibbiyot” soʻzlari qoʻshib qoʻyilsin;

b) 3-bandi quyidagi tahrirda bayon etilsin:

“3. Belgilansinki, akademik Y.X. Toʻraqulov nomidagi Respublika ixtisoslashtirilgan endokrinologiya ilmiy-amaliy tibbiyot markazi hamda Respublika ixtisoslashtirilgan kardiologiya ilmiy-amaliy tibbiyot markazi tegishli ravishda Qashqadaryo viloyat ixtisoslashtirilgan endokrinologiya markaziga va Respublika ixtisoslashtirilgan kardiologiya ilmiy-amaliy tibbiyot markazining Qashqadaryo filialiga tashkiliy-uslubiy va ilmiy-amaliy yordam koʻrsatadilar”.

10. Oʻzbekiston Respublikasi Prezidentining “Oʻzbekiston Respublikasi aholisiga 2017 — 2021-yillarda ixtisoslashtirilgan tibbiy yordam koʻrsatishni yanada rivojlantirish chora-tadbirlari toʻgʻrisida” 2017-yil 20-iyundagi PQ-3071-sonli qarori bilan tasdiqlangan respublika ixtisoslashtirilgan ilmiy-amaliy tibbiyot markazlari — tibbiy xizmatlar koʻrsatishning tegishli ixtisoslashtirilgan yoʻnalishlari boʻyicha respublikaning bosh tibbiyot tashkilotlari Roʻyxatida:

a) 7-bandida “Respublika” soʻzidan oldin “akademik Y.X.Toʻraqulov nomidagi” soʻzlari qoʻshib qoʻyilsin;

b) 8-bandidagi “dermatologiya va venerologiya” soʻzlari “dermatovenerologiya va kosmetologiya” soʻzlari bilan almashtirilsin.