Hazorasp qand-shakar zavodini xomashyo bilan taʼminlash masalalari toʻgʻrisida (1-son)

05.01.1998

Oʻzbekiston Respublikasi Vazirlar Mahkamasining

qarori

[Koʻchirma]

Xorazm viloyatidagi Hazorasp qand-shakar zavodining barqaror ishlashini taʼminlash maqsadida Vazirlar Mahkamasi qaror qiladi:

1. Oʻzbekiston Respublikasi Makroiqtisodiyot va statistika vazirligi hamda Qishloq va suv xoʻjaligi vazirligining qand lavlagi ekin maydonlari va uning yalpi hosili toʻgʻrisidagi taklifi 1-ilovaga* muvofiq qabul qilinsin.

*1-ilova berilmaydi.

2. Oʻzbekiston Respublikasi Qishloq va suv xoʻjaligi vazirligi Tashqi iqtisodiy aloqalar vazirligi, “Oʻzqishloqxoʻjaliktaʼminottuzatish” davlat-kooperativ qoʻmitasi va “Oziqovqatsanoat” uyushmasi bilan birgalikda MDHning lavlagi ekiladigan mintaqalarida va uzoq xorijiy mamlakatlarda qand lavlagi yetishtirish tajribasini oʻrgansin. Qoraqalpogʻiston Respublikasi va Xorazm viloyatining agroiqlim sharoitlarini hisobga olgan holda qand lavlagi yetishtirish boʻyicha tavsiyanomalar hamda texnologik xaritalar ishlab chiqilsin va xoʻjaliklarga yetkazilsin. Qandliligi kamida 17 foiz boʻlgan qand lavlagi olinishi taʼminlansin.

3. “Oziqovqatsanoat” uyushmasi (Qosimxoʻjayev):

Oʻzbekiston Respublikasi Qishloq va suv xoʻjaligi vazirligi, Qoraqalpogʻiston Respublikasi Vazirlar Kengashi va Xorazm viloyati hokimligi bilan birgalikda 1998-yil 1-fevralgacha 1998-yil hosilidan qand lavlagi xarid qilish yuzasidan xoʻjaliklar bilan kontraktatsiya shartnomalari tuzishni tugallasin;

1998-yil 1-martgacha xoʻjaliklarga shartnomaviy narx boʻyicha xarid qilinadigan xomashyo qiymatining kamida 40 foizi miqdorida avans toʻlasin;

tayyor (qand-shakar) va qoʻshimcha mahsulot (jom)ning bir qismini xomashyo uchun toʻlov hisobiga xoʻjaliklarga ajratishni nazarda tutsin;

qand lavlagini qabul qilib olish va saqlash uchun qand-shakar zavodi hududida 50 ming tonna qand lavlagi gʻaramlab saqlanadigan maydonni, shuningdek respublikaning qayd etilgan mintaqalarida 4 ta qand lavlagi qabul qilish punktlarini tayyorlasin.

4. “Oʻzkimyosanoat” uyushmasi (Yusupbekov) lavlagi ekadigan xoʻjaliklarga 2-ilovaga* muvofiq miqdorda mineral oʻgʻitlar va gerbitsidlar yetkazib berishni taʼminlasin.

*2-ilova berilmaydi.

5. “Oʻzqishloqxoʻjaliktaʼminottuzatish” davlat-kooperativ qoʻmitasi (Olimjonov) 1998-yil 1-martgacha mashina-traktor parklari uchun 3-ilovaga* muvofiq qand lavlagi yetishtirish va hosilini yigʻishtirib olish texnikasini yetkazib berish masalasini ishlab chiqsin.

*3-ilova berilmaydi.

“Oʻzqishloqxoʻjalikmash-xolding” kompaniyasi (Matchonov) 1998-1999-yillarda respublika sanoat korxonalarida “Oʻzqishloqxoʻjaliktaʼminottuzatish” davlat-kooperativ qoʻmitasi va Qishloq va suv xoʻjaligi vazirligi buyurtmanomalariga binoan qand lavlagi yetishtirish va lavlagichilik texnikasi parkini yangilash uchun shunday texnika ishlab chiqarishni tashkil etsin.

6. Qishloq va suv xoʻjaligi vazirligi lavlagi yetishtirish tajribasini oʻrganish asosida bir kurtakli qand lavlagi urugʻini yetkazib berishi mumkin boʻlgan tashkilotlarni aniqlasin, “Oʻzdonmahsulot” korporatsiyasi (Otayev) esa kontraktlar tuzishni va 4-ilovaga* muvofiq urugʻlik yetkazib berishni ikki oy muddatda taʼminlasin.

* 4-ilova berilmaydi.

7. “Paxta-bank” va “Gʻalla-bank” “Oziqovqatsanoat” uyushmasiga yetishtiriladigan qand lavlagi uchun xoʻjaliklarga avans berish uchun 761 mln. soʻm miqdorida va “Oʻzdonmahsulot” korporatsiyasiga navli (bir kurtakli) lavlagi urugʻlari sotib olish uchun 1200 ming AQSh dollariga teng miqdorda qayta moliyalash stavkasi boʻyicha bir yilgacha muddatga kreditlar ajratsinlar.

11. “Oʻzavtotrans” davlat korporatsiyasi va “Oʻzbekiston temir yoʻllari” kompaniyasi “Oziqovqatsanoat” uyushmasiga qand lavlagi tashish uchun zarur miqdorda avtotransport vositalari va temir yoʻl vagonlari ajratsinlar.

12. “Oziqovqatsanoat” uyushmasi Oʻzbekiston Respublikasi Tashqi iqtisodiy aloqalar vazirligi, Qishloq va suv xoʻjaligi vazirligi bilan birgalikda mavsum oraligʻida shakar xomashyosini qayta ishlash hisobiga Hazorasp qand-shakar zavodining yillik ishlab chiqarish quvvatlarini 125 ming tonnagacha oshirish masalasini bir oy muddatda ishlab chiqsin va takliflar kiritsin.

13. Mazkur qarorning bajarilishini nazorat qilish Oʻzbekiston Respublikasi Bosh vazirining birinchi oʻrinbosari I. H. Joʻrabekov va Bosh vazir oʻrinbosari M. Z. Usmonov zimmasiga yuklansin.

Vazirlar Mahkamasining Raisi I. KARIMOV

Toshkent sh.,

1998-yil 5-yanvar,

1-son