Zargarlik buyumlarining zamonaviy mahalliy ishlab chiqarishlarini tashkil etish chora-tadbirlari toʻgʻrisida (PQ-3334-son)

17.10.2017

Oʻzbekiston Respublikasi Prezidentining

Qarori

Zargarlik buyumlarining zamonaviy ishlab chiqarishlarini tashkil etish, eksportga yoʻnaltirilgan hamda ichki bozorda talabgor boʻlgan mahalliy xomashyo negizidagi yuqori qiymatga ega tayyor mahsulotlarni ishlab chiqarishni kengaytirish, Toshkent shahrida boʻsh turgan ishlab chiqarish maydonlaridan samarali foydalanishni taʼminlash hamda yangi ish joylari barpo etish maqsadida:

1. Maʼlumot uchun qabul qilinsinki:

“1-Zargarlik korxonasi” davlat korxonasi oʻz faoliyatini 2009-yilda toʻxtatgan, ishlab chiqarish quvvatlari faoliyatdan toʻxtagan, mavjud uskunalardan foydalanilmayapti;

Oʻzbekiston Respublikasi Iqtisodiyot vazirligi, Moliya vazirligi, Oʻzbekiston Respublikasi Xususiylashtirilgan korxonalarga koʻmaklashish va raqobatni rivojlantirish davlat qoʻmitasi hamda Toshkent shahar hokimligining Toshkent shahri, Uchtepa tumani, Zargarlik koʻchasi, 46-B uyda joylashgan (keyingi oʻrinlarda — obyekt deb yuritiladi) “1-Zargarlik korxonasi” davlat korxonasi kompleksi mulkini zamonaviy zargarlik ishlab chiqarishni tashkil etish boʻyicha investitsiya loyihasini amalga oshirish uchun “Asaka” aksiyadorlik-tijorat bankiga topshirish toʻgʻrisidagi taklifi qabul qilindi.

2. “Asaka” aksiyadorlik-tijorat banki zargarlik buyumlarining zamonaviy ishlab chiqarishlarini tashkil etish boʻyicha investitsiya loyihasini amalga oshirish uchun obyekt negizida “Asaka” bankning — “Asaka kapital invest” MChJ (keyingi oʻrinlarda — boshqaruvchi kompaniya) boshqaruv kompaniyasi ustav fondiga obyektlarni oʻtkazgan holda baholash tashkiloti tomonidan belgilangan narx boʻyicha davlatning ulushi sifatida ustav fondiga obyektni qabul qilsin.

Oʻzbekiston Respublikasi Investitsiyalar boʻyicha davlat qoʻmitasi (A. Axmedxodjayev), Oʻzbekiston Respublikasi Xususiylashtirilgan korxonalarga koʻmaklashish va raqobatni rivojlantirish davlat qoʻmitasi (R. Gulyamov), Toshkent shahar hokimligi (R. Usmonov) hamda “Asaka” bank boshqaruvi organlari (K. Mullajonov) bir oy muddatda belgilangan tartibda obyektni qabul qilish — topshirish harakatlari amalga oshirilishini taʼminlasin.

Belgilansinki, “Asaka” ATB obyektini boshqaruv kompaniyasining ustav fondiga qabul qilish — topshirish harakatlari soliqqa tortilmaydi.

3. “Asaka” aksiyadorlik — tijorat banki:

bir oy muddatda Oʻzbekiston Respublikasi Moliya vazirligi va Oʻzbekiston Respublikasi Xususiylashtirilgan korxonalarga koʻmaklashish va raqobatni rivojlantirish davlat qoʻmitasi bilan birgalikda sohaga doir investorlarni jalb qilish hamda loyihani amalga oshirishning aniq muddatlarini nazarda tutgan holda “yoʻl xaritasini” ishlab chiqsin va tasdiqlasin;

2018-yilning 1-iyuligacha boshqaruvchi kompaniyaning ulushi bilan ishtirok etishini hisobga olgan holda obyekt negizida zargarlik buyumlarini ishlab chiqarishni tashkil etish va ishga tushirilishini taʼminlasin.

4. Loyihani amalga oshirish doirasida “Asaka” ATBga obyekt negizida zargarlik buyumlari ishlab chiqarish boʻyicha, jumladan sohaga doir investorlar bilan birgalikda yangi tashkilotlarni barpo etish, shuningdek, bankning ulushi va uning boshqaruvchi kompaniyasi bilan 100 foizni oʻz ichiga olgan, keyinchalik esa yangi tashkil etilayotgan bankning va boshqaruvchi kompaniyaning ulushini yangi investorlarga sotish huquqi berilsin.

5. Obyekt hududida amalga oshirilayotgan investitsiya loyihalarini amalga oshirish doirasida “Asaka” ATB va uning boshqaruvchi kompaniyalari ishtirokida barpo etilayotgan tashkilotlar strategik investorga sotilishiga qadar, biroq davlat roʻyxatidan oʻtkazilgan kundan boshlab uch yildan ortiq boʻlmagan muddatda foyda soligʻi, yagona soliq toʻlovi, mulk soligʻi, yer soligʻidan ozod etilsin, boʻshaydigan mablagʻlar maqsadli ravishda ishlab chiqarishni texnik va texnologik qayta jihozlash, modernizatsiya qilish va rivojlantirishga yoʻnaltirilsin.

6. Obyekt hududida amalga oshiriladigan, investitsiya loyihalarini amalga oshirish doirasida “Asaka” ATB va boshqaruvchi kompaniya huzurida barpo etilayotgan tashkilotlarga Oʻzbekiston Respublikasi Prezidentining “Iqtisodiy nochor korxonalarni koʻllab-quvvatlash mexanizmlarini yanada kengaytirish hamda tijorat banklarining koʻchmas mulk obyektlari negizida yangi ishlab chiqarish quvvatlarini tashkil etishni ragʻbatlantirish chora-tadbirlari toʻgʻrisida” 2017-yil 20-apreldagi PF-5022-sonli Farmonining 8-bandi tatbiq etilsin.

7. Loyihani amalga oshirish doirasida, istisno tariqasida, “Asaka” ATB va uning boshqaruvchi kompaniyasiga quyidagilarga ruxsat etilsin:

2018-yilning 1-iyuligacha obyekt hududida belgilangan shaharsozlik normalari va qoidalariga rioya qilgan holda, qurilish va loyihalashtirishni bir vaqtning oʻzida loyihalashtirish va moliyalashtirish shartlarida amalga oshirishga;

loyiha va pudrat tashkilotlari, shuningdek, vakolatli organda import shartnomalarini ekspertizadan oʻtkazgan holda eng maqbul takliflarni tanlab olish asosida tender savdolarni (tanlovlarni) oʻtkazmasdan turib uskunalar, butlovchi buyumlar, ehtiyot qismlar yetkazib beruvchilarini belgilash.

8. Mazkur qarorning ijrosini nazorat qilish Oʻzbekiston Respublikasi Bosh vazirining oʻrinbosari J.A. Qoʻchqorov, Oʻzbekiston Respublikasi Prezidenti huzuridagi Loyihalarni boshqarish milliy agentligi direktori Sh.M. Sodiqov, “Asaka” ATB boshqaruvi raisi K.K. Mullajonov va Toshkent shahar hokimi R.J. Usmonov zimmasiga yuklansin.

Oʻzbekiston Respublikasi Prezidenti Sh. MIRZIYOYEV

Toshkent sh.,

2017-yil 17-oktabr,

PQ-3334-son