Oʻzbekiston Respublikasi Prezidenti Administratsiyasi huzurida Madaniyat va sanʼatni rivojlantirish jamgʻarmasini tashkil etish toʻgʻrisida (PQ-3325-son)

16.10.2017

Oʻzbekiston Respublikasi Prezidentining

Qarori

Madaniyat va sanʼat sohasidagi boshqaruv tizimida davlat siyosatini amalga oshirish samaradorligini oshirish maqsadida:

1. Oʻzbekiston Respublikasi Vazirlar Mahkamasi huzuridagi yuridik shaxs tashkil etmasdan faoliyat koʻrsatayotgan budjetdan tashqari Madaniyat va sanʼatni rivojlantirish jamgʻarmasi negizida Oʻzbekiston Respublikasi Vazirlar Mahkamasi huzurida yuridik shaxs maqomiga ega boʻlgan Madaniyat va sanʼatni rivojlantirish jamgʻarmasi (keyingi oʻrinlarda — Jamgʻarma) tashkil etilsin.

Oʻzbekiston Respublikasi Prezidentining 2025-yil 14-iyuldagi PF-111-son Farmoniga muvofiq Jamgʻarma Oʻzbekiston Respublikasi Vazirlar Mahkamasi huzuridan Oʻzbekiston Respublikasi Prezidenti Administratsiyasi boʻysunuviga oʻtkazilgani maʼlumot uchun qabul qilinsin.

4. Jamgʻarma barcha turdagi soliqlarni toʻlashdan ozod qilinsin.

Jamgʻarma Adliya vazirligi, Madaniyat vazirligi, Moliya vazirligi, manfaatdor vazirlik va idoralar bilan birgalikda 2022-yil 1-fevralga qadar quyidagilarni nazarda tutuvchi qonun loyihasini belgilangan tartibda Vazirlar Mahkamasiga kiritsin:

Jamgʻarmaga metsenatlik koʻmagi hisobidan toʻgʻridan-toʻgʻri shartnomalar tuzishga ruxsat berish;

Jamgʻarma tomonidan amalga oshiriladigan loyihalarda chet ellik kontragentlarni soliqlar va toʻlovlardan 2030-yil 1-yanvarga qadar boʻlgan davrda ozod qilish.

41. Jamgʻarma Oʻzbekiston Respublikasi Moliya vazirligining Gʻaznachiligida milliy valyutadagi shaxsiy gʻazna hisobvaraqlariga hamda milliy va xorijiy valyutada bank hisobvaraqlariga ega boʻladi.

5. Oʻzbekiston Respublikasi Vazirlar Mahkamasi bir hafta muddatda Jamgʻarma faoliyatini tashkil etish toʻgʻrisida qaror qabul qilsin, unda, jumladan, Jamgʻarma ijrochi direksiyasi tuzilmasini tasdiqlashni koʻzda tutsin.

6. Oʻzbekiston Respublikasi Prezidenti va Oʻzbekiston hukumatining ayrim qarorlariga 2-ilovaga muvofiq oʻzgartirish va qoʻshimchalar kiritilsin.

7. Manfaatdor vazirlik va idoralar bir oy muddatda ular tomonidan qabul qilingan meʼyoriy-huquqiy hujjatlarni ushbu qarorga muvofiqlashtirsin.

8. Mazkur qarorning bajarilishini nazorat qilish Oʻzbekiston Respublikasi Bosh vaziri A.N. Aripov zimmasiga yuklansin.

Oʻzbekiston Respublikasi Prezidenti Sh. MIRZIYOYEV

Toshkent sh.,

2017-yil 16-oktabr,

PQ-3325-son

Oʻzbekiston Respublikasi Prezidentining 2017-yil 16-oktabrdagi PQ-3325-son qaroriga 2-ILOVA

Oʻzbekiston Respublikasi Prezidenti va Oʻzbekiston Respublikasi Hukumatining ayrim qarorlariga kiritilayotgan

OʻZGARTIRISH VA QOʻSHIMCHALAR

1. Oʻzbekiston Respublikasi Prezidentining 2017-yil 16-avgustdagi “Oʻzbekiston Badiiy akademiyasi faoliyatini rivojlantirish va yanada takomillashtirishga doir qoʻshimcha chora-tadbirlar toʻgʻrisida”gi PQ-3219-son qarori:

a) 3-bandi Oʻzbekiston Respublikasi Prezidentining 2018-yil 1-avgustdagi PF-5496-son Farmoniga muvofiq tahrirda bayon etilgan.

b) 4-bandning:

toʻrtinchi xatboshi chiqarib tashlansin;

beshinchi — yettinchi xatboshilar tegishli ravishda toʻrtinchi — oltinchi xatboshilar deb hisoblansin.