Idoraviy normativ-huquqiy hujjatlarni tayyorlash va qabul qilish qoidalariga oʻzgartirish va qoʻshimchalar kiritish toʻgʻrisida (2565-4-son)

13.10.2017

Oʻzbekiston Respublikasi Adliya vazirining

buyrugʻi

[Oʻzbekiston Respublikasi Adliya vazirligi tomonidan 2017-yil 13-oktabrda roʻyxatdan oʻtkazildi, roʻyxat raqami 2565-4]

Oʻzbekiston Respublikasining “Normativ-huquqiy hujjatlar toʻgʻrisida”gi Qonuni va Oʻzbekiston Respublikasi Prezidentining 2011-yil 23-avgustdagi PQ-1602-son qarori bilan tasdiqlangan Oʻzbekiston Respublikasi Adliya vazirligi toʻgʻrisidagi nizomga muvofiq buyuraman:

1. Oʻzbekiston Respublikasi adliya vazirining 2014-yil 28-fevraldagi 53-mh-son buyrugʻi (roʻyxat raqami 2565, 2014-yil 28-fevral) (Oʻzbekiston Respublikasi qonun hujjatlari toʻplami, 2014-y., 10-son, 110-modda) bilan tasdiqlangan Idoraviy normativ-huquqiy hujjatlarni tayyorlash va qabul qilish qoidalariga ilovaga muvofiq oʻzgartirish va qoʻshimchalar kiritilsin.

2. Mazkur buyruq davlat roʻyxatidan oʻtkazilsin va Idoraviy normativ-huquqiy hujjatlarni davlat roʻyxatidan oʻtkazish boshqarmasi Idoraviy normativ-huquqiy hujjatlarning davlat reyestriga tegishli yozuv kiritsin.

3. Huquqiy targʻibot va axborot boshqarmasi mazkur idoraviy normativ-huquqiy hujjatni “Oʻzbekiston Respublikasi qonun hujjatlari toʻplami” — “Sobraniye zakonodatelstva Respubliki Uzbekistan”da hamda Oʻzbekiston Respublikasi Qonun hujjatlari maʼlumotlari milliy bazasida eʼlon qilinishini taʼminlasin.

4. Mazkur buyruq rasmiy eʼlon qilingan kundan eʼtiboran kuchga kiradi.

5. Mazkur buyruqning ijrosini nazorat qilish vazirning birinchi oʻrinbosari N. Joʻrayev zimmasiga yuklansin.

Vazir R. DAVLETOV

Toshkent sh.,

2017-yil 13-oktabr,

335-mh-son

Oʻzbekiston Respublikasi adliya vazirining 2017-yil 13-oktabrdagi 335-mh-son buyrugʻiga ILOVA

Idoraviy normativ-huquqiy hujjatlarni tayyorlash va qabul qilish qoidalariga kiritilayotgan oʻzgartirish va qoʻshimchalar

1. 68-band quyidagi tahrirda bayon etilsin:

“68. Ijtimoiy-iqtisodiy rivojlanish, iqtisodiyotning alohida sohalari va tarmoqlari hamda Oʻzbekiston Respublikasining Davlat budjeti masalalari bilan bogʻliq idoraviy normativ-huquqiy hujjatlar loyihalari tegishlicha Oʻzbekiston Respublikasi Iqtisodiyot vazirligi va Moliya vazirligi, tashqi savdo bilan bogʻliq masalalar boʻyicha — Oʻzbekiston Respublikasi Tashqi savdo vazirligi bilan, investitsiyalar bilan bogʻliq masalalar boʻyicha — Oʻzbekiston Respublikasi Investitsiyalar boʻyicha davlat qoʻmitasi bilan, tashqi siyosiy faoliyat bilan bogʻliq masalalar boʻyicha — Oʻzbekiston Respublikasi Tashqi ishlar vazirligi bilan kelishilishi lozim.”.

2. 69-banddagi “Mehnat vazirligi” degan soʻzlar “Bandlik va mehnat munosabatlari vazirligi” degan soʻzlar bilan almashtirilsin.

3. 70-banddagi “Tabiatni muhofaza qilish” degan soʻzlar “Ekologiya va atrof-muhitni muhofaza qilish” degan soʻzlar bilan almashtirilsin.

4. Quyidagi mazmundagi 711-band bilan toʻldirilsin:

“711. Fermer, dehqon xoʻjaliklari va tomorqa yer egalarining huquqlari va qonuniy manfaatlariga taalluqli idoraviy normativ-huquqiy hujjatlar loyihalari Oʻzbekiston fermer, dehqon xoʻjaliklari va tomorqa yer egalari kengashi bilan kelishilishi shart.”.

5. 125-bandda:

birinchi xatboshi “Oʻzbekiston Respublikasi qonun hujjatlari toʻplami” — “Sobraniye zakonodatelstva Respubliki Uzbekistan”,” degan soʻzlardan keyin “Oʻzbekiston Respublikasi Qonun hujjatlari maʼlumotlari milliy bazasi,” degan soʻzlar bilan toʻldirilsin;

uchinchi xatboshidagi “Oʻzbekiston Respublikasi qonun hujjatlari toʻplami”da” degan soʻzlar “Oʻzbekiston Respublikasi qonun hujjatlari toʻplami” — “Sobraniye zakonodatelstva Respubliki Uzbekistan” va Oʻzbekiston Respublikasi Qonun hujjatlari maʼlumotlari milliy bazasida” degan soʻzlar bilan almashtirilsin.

6. 126-bandning birinchi xatboshisi quyidagi tahrirda bayon etilsin:

“126. Idoraviy normativ-huquqiy hujjatlar matnlarining elektron shakllari ularni qabul qilgan organlarning rasmiy veb-saytlariga ushbu idoraviy normativ-huquqiy hujjatlar rasmiy eʼlon qilinganidan keyin bir kun ichida joylashtirilishi shart.”.