“Oʻzmeliomashlizing” davlat unitar korxonasi faoliyatini yanada takomillashtirish chora-tadbirlari toʻgʻrisida (PQ-3313-son)

06.10.2017

Oʻzbekiston Respublikasi Prezidentining

Qarori

Taʼkidlash lozimki, “Oʻzmeliomashlizing” DUK tomonidan 2008 — 2016-yillarda qurilish tashkilotlariga lizing asosida melioratsiya va boshqa suv xoʻjaligi ishlarini bajarishga, suv xoʻjaligi ekspluatatsiya tashkilotlari, suvdan foydalanish uyushmasi va fermer xoʻjaliklariga, shuningdek, boshqa tashkilotlarga 2300 dona, shu jumladan, Oʻzbekiston Respublikasi Vazirlar Mahkamasi huzuridagi Sugʻoriladigan yerlarning meliorativ holatini yaxshilash jamgʻarmasi hisobidan — 2108 dona meliorativ va boshqa texnika, mashinalar, uskunalar hamda boshqa mexanizatsiya vositalari yetkazib berildi.

Lizing asosida yetkazib berilgan meliorativ va boshqa texnika, mashinalar, uskunalar va mexanizatsiyaning boshqa vositalariga texnik xizmat koʻrsatish boʻyicha zamonaviy servis xizmatlari koʻrsatishni tashkil etish uchun 2012-yilda “Meliomashlizingservis” SHK “Oʻzmeliomashlizing” DUK tashkil etilgan.

Shu bilan birga hududlarda lizing texnikasiga talabni prognozlashtirishning taʼsirchan tizimi shakllantirilmagan, joylarda lizing boʻyicha taqdim etilgan meliorativ texnikadan foydalanishda mavjud muammolarni oʻz vaqtida aniqlash va bartaraf etish boʻyicha tezkor monitoring va talab etilayotgan samaradorlik taʼminlanmagan, meliorativ va boshqa texnikani lizingga taqdim etishni moliyalashtirish uchun xorijiy investitsiyalar, xalqaro moliya institutlari mablagʻlarini jalb qilish boʻyicha imkoniyatlardan zarurligicha foydalanilmayapti.

“Oʻzmeliomashlizing” DUK faoliyatini yanada takomillashtirish, melioratsiya va boshqa suv xoʻjaligi ishlarini bajarishga ixtisoslashtirilgan qurilish tashkilotlari, suv xoʻjaligi ekspluatatsiya tashkilotlari, suvdan foydalanish uyushmalari va fermer xoʻjaliklari, shuningdek, boshqa tashkilotlarga zamonaviy meliorativ va boshqa texnika, mashinalar, uskunalar va boshqa mexanizatsiya vositalarini lizing asosida yetkazib berishni ragʻbatlantirish maqsadida:

1. Quyidagilar “Oʻzmeliomashlizing” DUKning asosiy vazifalari va yoʻnalishlari etib belgilansin:

birinchi, lizingga yetkazib beriladigan meliorativ va boshqa suv xoʻjaligi ishlarini bajarishga ixtisoslashtirilgan qurilish tashkilotlari, suv xoʻjaligi ekspluatatsiya tashkilotlari, suvdan foydalanish uyushmalari va fermer xoʻjaliklari, shuningdek, boshqa tashkilotlarga zamonaviy meliorativ va boshqa texnika, mashinalar, uskunalar va boshqa mexanizatsiya vositalariga boʻlgan ehtiyojni oʻrganish va tahlil qilish;

ikkinchi, meliorativ va boshqa suv xoʻjaligi ishlarini bajarishga ixtisoslashtirilgan qurilish tashkilotlari, suv xoʻjaligi ekspluatatsiya tashkilotlari, suvdan foydalanish uyushmalari va fermer xoʻjaliklari, shuningdek, boshqa tashkilotlarga zamonaviy meliorativ va boshqa texnika, mashinalar, uskunalar va boshqa mexanizatsiya vositalarini yetkazib berish;

uchinchi, meliorativ va boshqa texnika, mashinalar, uskunalar va boshqa mexanizatsiya vositalarini xarid qilish uchun moʻljallangan resurslarni shakllantirish uchun xalqaro moliya institutlarini hisobga olgan holda, imtiyozli asosda donorlar mablagʻlarini jalb etish;

toʻrtinchi, lizingga yetkazib berilgan meliorativ va boshqa texnika, mashinalar, uskunalar va boshqa mexanizatsiya vositalariga texnik xizmat koʻrsatish boʻyicha zamonaviy servis xizmatlari koʻrsatishni tashkillashtirish;

beshinchi, lizingga yetkazib berilgan melioratsiya va boshqa texnika, mashinalar, uskunalar va boshqa mexanizatsiya vositalarining texnik holatini tizimli monitoring qilish, maqsadli va samarali foydalanilishini tashkil etish.

Oʻzbekiston Respublikasi Bosh vaziri oʻrinbosari — Z.T. Mirzayev va “Oʻzmeliomashlizing” DUK ijrochi direktori A.I. Sulaymonov zimmasiga “Oʻzmeliomashlizing” DUKga yuklatilgan vazifa va faoliyat yoʻnalishlarining sifatli va toʻliq hajmlarda amalga oshirilishi yuzasidan shaxsiy javobgarlik yuklansin.

2. Oʻzbekiston Respublikasi Moliya vazirligi va Oʻzbekiston Respublikasi Xususiylashtirilgan korxonalarga koʻmaklashish va raqobatni rivojlantirish davlat qoʻmitasining avval shakllantirilgan 2 millard soʻm miqdoridagi ustav jamgʻarmasini saqlab qolgan holda, “Meliomashlizingservis” SHK “Meliomashlizingservis” MCHJ etib qayta tashkil etish toʻgʻrisidagi taklifiga rozilik berilsin.

3. Belgilansinki:

“Meliomashlizingservis” MCHJning taʼsischisi etib, “Oʻzmeliomashlizing” DUK hisoblanadi;

“Meliomashlizingservis” MCHJ “Meliomashlizingservis” SHKning shartnomalari va majburiyatlari boʻyicha huquqiy vorisi hisoblanadi.

Oʻzbekiston Respublikasi Moliya vazirligi (B.A. Xodjayev), Oʻzbekiston Respublikasi Xususiylashtirilgan korxonalarga koʻmaklashish va raqobatni rivojlantirish davlat qoʻmitasi (R.A. Gulyamov) va “Oʻzmeliomashlizing” DUK (A.I. Sulaymonov) bir oy muddatda “Meliomashlizingservis” MCHJning asosiy mablagʻlarini inventarizatsiyadan oʻtkazsin.

4. Quyidagilar:

“Oʻzmeliomashlizing” DUK ijro apparatining boshqaruv xodimlari cheklangan soni 33 nafardan iborat tuzilmasi 1-ilovaga muvofiq;

“Oʻzmeliomashlizing” DUK tomonidan lizingga meliorativ va boshqa texnika, mashinalar, uskunalar va boshqa mexanizatsiya vositalarini xarid qilish va taqdim etish toʻgʻrisidagi Nizom 2-ilovaga muvofiq tasdiqlansin.

5. “Oʻzmeliomashlizing” DUKning ijrochi direktori:

Oʻzbekiston Respublikasi Vazirlar Mahkamasi tomonidan lavozimga tayinlanadi va lavozimdan ozod etiladi;

mavqeyi, maishiy taʼminot sharoitlari, tibbiyot va transport xizmatlarini koʻrsatish jihatidan vazir oʻrinbosariga tenglashtiriladi.

6. Belgilansinki, meliorativ va boshqa texnika, mashinalar, uskunalar va mexanizatsiyaning boshqa vositalari:

a) Oʻzbekiston Respublikasi Suv xoʻjaligi vazirligining talabnomalariga koʻra, Sugʻoriladigan yerlarni meliorativ yaxshilash davlat dasturi doirasida Oʻzbekiston Respublikasi Vazirlar Mahkamasi huzuridagi Sugʻoriladigan yerlarning meliorativ holatini yaxshilash jamgʻarmasi Kengashi (keyingi oʻrinlarda — Jamgʻarma) mablagʻlari hisobidan hamda uning qarorlari asosida 10 yil muddatga quyidagi shartlarda lizingga beriladi:

lizingga berilayotgan texnika narxining 15 foizi lizing oluvchining shaxsiy mablagʻlari hisobidan avans koʻrinishida toʻlanadi;

lizingga berilayotgan texnika narxining 85 foizi Jamgʻarma tomonidan unga qarz asosida taqdim etilayotgan “Oʻzmeliomashlizing” DUK mablagʻlari hisobidan moliyalashtiriladi;

sugʻoriladigan yerlarning meliorativ holatini yaxshilash va boshqa suv xoʻjaligi ishlari boʻyicha faoliyatni amalga oshiruvchi Oʻzbekiston Respublikasi Suv xoʻjaligi vazirligining ekspluatatsiya suv xoʻjaligi tashkilotlari uchun lizingga berilayotgan texnika narxining 100 foizi Jamgʻarma tomonidan unga qarz asosida ajratiladigan mablagʻlar hisobidan “Oʻzmeliomashlizing” DUK tomonidan moliyalashtiriladi;

lizingga beruvchining daromadi (marjasi) stavkasi lizing shartnomasi tuzilgan kungi Oʻzbekiston Respublikasi Markaziy banki qayta moliyalashtirish stavkasining 50 foizidan oshmasligi kerak;

b) “Oʻzmeliomashlizing” DUKning (unga qarz asosida Jamgʻarma tomonidan ajratiladigan mablagʻlardan tashqari) shaxsiy mablagʻlari va boshqa jalb etiladigan mablagʻlar hisobidan tijorat shartlarida 7 yil muddatga kuyidagi shartlarda lizingga beriladi:

lizing oluvchining hisobidan — 30 foizdan kam boʻlmagan miqdordagi avans;

lizingga beruvchining shaxsiy mablagʻlari hisobidan shakllantiriladigan — 70 foizgacha boʻlgan mablagʻlar.

Bunda “Oʻzmeliomashlizing” DUKning daromadlari (marjasi) stavkasi lizing shartnomasiga koʻra belgilanadi.

7. Oʻzbekiston Respublikasi Vazirlar Mahkamasi bir oy muddatda “Oʻzmeliomashlizing” DUKning ustavini tasdiqlasin.

8. “Oʻzmeliomashlizing” DUK Oʻzbekiston Respublikasi Adliya vazirligi boshqa manfaatdor vazirlik va idoralar bilan birgalikda bir oy muddatda qonun hujjatlariga ushbu qarordan kelib chiqadigan oʻzgartish va qoʻshimchalar toʻgʻrisida Oʻzbekiston Respublikasi Vazirlar Mahkamasiga takliflar kiritsin.

9. Oʻzbekiston Respublikasi Moliya vazirligi, Jamgʻarmani boshqarish boʻyicha departament, Oʻzbekiston Respublikasi Xususiylashtirilgan korxonalarga koʻmaklashish va raqobatni rivojlantirish davlat qoʻmitasi bir oy muddatda qabul qilingan meʼyoriy-huquqiy hujjatlarini mazkur qarorga muvofiqlashtirsin.

10. Ushbu qarorning ijrosini nazorat qilish Oʻzbekiston Respublikasi Bosh vaziri oʻrinbosari — qishloq va suv xoʻjaligi vaziri Z.T. Mirzayev va Oʻzbekiston Respublikasi moliya vaziri B.A. Xodjayev zimmasiga yuklansin.

Oʻzbekiston Respublikasi Prezidenti Sh. MIRZIYOYEV

Toshkent sh.,

2017-yil 6-oktabr,

PQ-3313-son

Oʻzbekiston Respublikasi Prezidentining 2017-yil 6-oktabrdagi PQ-3313-son qaroriga 1-ILOVA

“Oʻzmeliomashlizing” DUK ijro apparatining

TUZILMASI

Ijro etuvchi direktor Direktor oʻrinbosari Loyihalarni iqtisodiy tahlil qilish va lizing obyektlarini topshirish boʻlimi 3 Monitoring, marketing va xaridlar boʻlimi 3 Buxgalterlik hisobi va hisoboti boʻlimi 3 Tashqi iqtisodiy aloqalar va investitsiyalar shuʼbasi 2 Yuridik boʻlim 3 “Oʻzmeliomashlizing” DUKning Qoraqalpogʻiston Respublikasi va viloyatlardagi vakillari 13 Ijroni nazorat qilish va AKTni joriy etish shuʼbasi 2 “Meliomashlizingservis” MCHJ Kadrlar boʻyicha bosh mutaxassis 1 Xoʻjalik xizmati 1

Boshqaruv xodimlarining cheklangan umumiy soni — 33 nafar

Oʻzbekiston Respublikasi Prezidentining 2017-yil 6-oktabrdagi PQ-3313-son qaroriga 2-ILOVA

“Oʻzmeliomashlizing” DUK tomonidan lizingga meliorativ va boshqa texnika, mashinalar, uskunalar va boshqa mexanizatsiya vositalarini xarid qilish va taqdim etish toʻgʻrisidagi

NIZOM

1. Ushbu Nizom “Oʻzmeliomashlizing” davlat unitar korxonasi tomonidan (keyingi oʻrinlarda — lizing beruvchi) lizingga meliorativ va boshqa texnika, mashinalar, uskunalar va boshqa mexanizatsiya vositalarini xarid qilish (keyingi oʻrinlarda — lizing obyekti) meliorativ va boshqa suv xoʻjaligi ishlarini bajarishga ixtisoslashgan qurilish tashkilotlariga, suv xoʻjaligi ekspluatatsiya tashkilotlariga, suv isteʼmolchilari assotsiatsiyalari va fermer xoʻjaliklariga, shuningdek, boshqa tashkilotlarga (keyingi oʻrinlarda — lizing oluvchilar) taqdim etish tartibini belgilaydi.

2. Lizing beruvchi tomonidan lizing xizmatlari koʻrsatish:

Oʻzbekiston Respublikasi Vazirlar Mahkamasi huzuridagi Sugʻoriladigan yerlarning meliorativ holatini yaxshilash jamgʻarmasi (keyingi oʻrinlarda — Jamgʻarma) tomonidan unga qarz asosida taqdim etiladigan mablagʻlar hisobidan;

Oʻz mablagʻlari va boshqa jalb etilgan mablagʻlar hamda qonunchilikda taqiqlanmagan boshqa manbalarning mablagʻlari (keyingi oʻrinlarda — oʻz mablagʻlari) hisobidan amalga oshiriladi.

3. Sugʻoriladigan yerlarni meliorativ yaxshilash davlat dasturi doirasida Jamgʻarma mablagʻlari hisobidan Oʻzbekiston Respublikasi Suv xoʻjaligi vazirligining buyurtmanomalariga muvofiq lizing obyektlarining har yilgi roʻyxati loyihasi shakllantiriladi, ularning uzil-kesil roʻyxati Oʻzbekiston Respublikasi Vazirlar Mahkamasi huzuridagi Sugʻoriladigan yerlarning meliorativ holatini yaxshilash jamgʻarmasi Kengashining qarori bilan tasdiqlanadi.

Davlat dasturi doirasida lizing obyektlarini xarid qilish uchun mablagʻlar:

15 foizi — lizing oluvchilarning mablagʻlari hisobidan;

85 foizi — lizing oluvchi tomonidan unga jamgʻarma qarz asosida taqdim etadigan mablagʻlar hisobidan moliyalashtiriladi.

Oʻzbekiston Respublikasi Suv xoʻjaligi vazirligining suv xoʻjaligi ekspluatatsiya tashkilotlari uchun lizing obyektlari qiymatining 100 foizi lizing beruvchi tomonidan unga qarz asosida Jamgʻarma taqdim etadigan mablagʻlar hisobidan moliyalashtiriladi.

Lizing obyektlari lizing shartnomalari tuzilgan sanada Oʻzbekiston Respublikasi Markaziy bankining qayta moliyalashtirish stavkasi 50 foizidan oshmaydigan miqdorda har yilgi marjani toʻlash sharti bilan 10 yil muddatga lizingga beriladi.

4. Lizing beruvchining oʻz mablagʻlari va boshqa jalb etilgan mablagʻlar hisobidan xarid qilinadigan lizing obyektlari roʻyxati lizing oluvchilarning buyurtmanomalariga asosan lizing beruvchi tomonidan shakllantiriladi.

Lizing obyektlarini xarid qilish uchun zarur mablagʻlar:

kamida 30 foiz miqdordagi avans (boʻnak) — lizing oluvchi hisobidan moliyalashtiriladi;

mablagʻlarning 70 foizga qadari lizing beruvchining oʻz mablagʻlari hisobidan shakllantiriladi.

Lizing beruvchining oʻz mablagʻlari va boshqa jalb etilgan mablagʻlari hisobidan (unga Jamgʻarma tomonidan qarzga ajratiladigan mablagʻlardan tashqari) lizing obyektlari tijorat shartlari asosida 7 yilgacha muddatga taqdim etiladi. Bunda lizing beruvchining daromad (marja) stavkasi lizing shartnomasida belgilanadi.

5. Lizing oluvchilariga lizing obyektlarini lizingga taqdim etish butun lizing davriga olinayotgan lizing obyektining mulkiy tavakkalchiliklarini sugʻurtalash boʻyicha sugʻurta polisi mavjud boʻlgan taqdirdagina amalga oshiriladi.

Lizingning barcha oʻzi yurar obyektlari maqsadli va samarali ekspluatatsiya qilinishini monitoring qilish maqsadida axborotni onlayn rejimida yuborib turadigan GPS trakerlari oʻrnatiladi.

6. Lizing oluvchilar tomonidan lizing toʻlovlari toʻlanmagan, lizing obyektlari shartnoma shartlariga muvofiq tegishli darajada saqlanishi taʼminlanmagan yoki maqsadga nomuvofiq ekspluatatsiya qilingan taqdirda, shuningdek, texnik servis koʻrsatish qoidalarining buzilishi aniqlanganida lizing obyektlari sud qaroriga muvofiq qaytarib olinadi va lizing obyektining qoldiq qiymati boʻyicha toʻlov qobiliyatiga ega boʻlgan boshqa lizing oluvchilarga topshiriladi.

7. “Oʻzmeliomashlizing” DUK tomonidan lizingga meliorativ va boshqa texnika, mashinalar, uskunalar va boshqa mexanizatsiya vositalarini xarid qilish va taqdim etish ilovaga muvofiq sxema boʻyicha amalga oshiriladi.

8. Lizing beruvchi jamgʻarma mablagʻlari hisobidan lizing obyektlarini xarid qilish uchun Jamgʻarmaga qarz ajratish boʻyicha buyurtmanoma taqdim etadi.

Jamgʻarma ana shu buyurtmanomalar asosida 10 bank kuni mobaynida Oʻzbekiston Respublikasi Markaziy banki qayta moliyalash stavkasining 25 foizi miqdorida yillik marjani toʻlash sharti bilan lizing beruvchining bank hisobvaragʻiga oʻtkazgan holda 10 yil muddatga qarz taqdim etadi.

Zarur hollarda Jamgʻarma mavjud moliyaviy resurslarni hisobga olgan holda lizing operatsiyalarini oʻtkazish uchun kelgusi davrga ajratiladigan pul mablagʻlari hajmiga oid kafolat xatini lizing beruvchiga taqdim etadi.

9. Lizing obyektlarini yetkazib beruvchilarni belgilash qonunchilikka muvofiq amalga oshiriladi. Lizing obyektlarini xarid qilish lizing beruvchi bilan yetkazib beruvchi oʻrtasida tuzilgan oldi-sotdi shartnomasiga muvofiq amalga oshiriladi.

10. Lizing beruvchi kelgusi yil uchun:

bank bilan — moliya agenti funksiyalarini bajarish boʻyicha;

sugʻurta tashkiloti bilan — sugʻurta agenti funksiyalarini bajarish boʻyicha shartnomalar tuzadi.

Barcha lizing oluvchilar oʻz mablagʻlari hisobidan lizing obyektlariga sugʻurta polislarini lizing beruvchi foydasiga rasmiylashtiradilar.

“Oʻzmeliomashlizing” DUK tomonidan lizingga meliorativ va boshqa texnika, mashinalar, uskunalar va boshqa mexanizatsiya vositalarini xarid qilish va taqdim etish toʻgʻrisidagi nizomga ILOVA

“Oʻzmeliomashlizing” DUK tomonidan lizingga meliorativ va boshqa texnika, mashinalar, uskunalar va boshqa mexanizatsiya vositalarini xarid qilish va taqdim etish

SXEMASI

1. Buyurtma berish, lizing obyektlari lizing oluvchilarining har yilgi roʻyxatlarini shakllantirish va tasdiqlash:

1a sugʻoriladigan yerlarning meliorativ holatini yaxshilash Davlat dasturi doirasida Jamgʻarma mablagʻlari hisobiga;

1b “Oʻzmeliomashlizing” DUKning oʻz mablagʻlari hisobiga.

2. Moliya agenti funksiyalarini bajarish boʻyicha bank bilan shartnoma tuzish.

3. Sugʻurta agenti funksiyalarini bajarish boʻyicha sugʻurta tashkiloti bilan shartnoma tuzish.

4. Lizing obyektini yetkazib berish toʻgʻrisida lizing oluvchining lizing beruvchiga murojaati.

5. Lizing obyektini yetkazib berish boʻyicha lizing oluvchi bilan shartnoma tuzish.

6. Lizing obyektiga sugʻurta polisini lizing beruvchi foydasiga rasmiylashtirish.

7. Lizing oluvchi mablagʻlari hisobidan avans (boʻnak) toʻlash: lizing obyekti Davlat dasturi doirasida sotib olingan taqdirda — 15 foizi va agarda lizing obyekti lizing beruvchining oʻz mablagʻlari hisobidan meliorativ va boshqa suv xoʻjaligi ishlarini bajarishga ixtisoslashgan qurilish tashkilotlariga, suv isteʼmolchilari assotsiatsiyalariga va fermer xoʻjaliklariga, shuningdek, boshqa tashkilotlarga sotib olinadigan taqdirda — kamida 30 foizi; lizing obyekti Oʻzbekiston Respublikasi Suv xoʻjaligi vazirligining suv xoʻjaligi ekspluatatsiya tashkilotlar tomonidan Davlat dasturi doirasida sotib olingan taqdirda — avans toʻlanmaydi.

8. Lizing obyektini xarid qilish uchun qarz ajratish boʻyicha Jamgʻarmaga buyurtma taqdim etish.

9. Lizing obyektini xarid qilish uchun qarz ajratish.

10. Lizing obyektini xarid qilish va lizing oluvchiga yetkazib berish.